Read Библия Церковнославянская I҆еремі́и 51 Bible Online

I҆еремі́и 51 - Библия Церковнославянская bible

I҆еремі́и 51

¹Та́кѡ гл҃етъ гд҇ь: сѐ, а҆́зъ воздви́гнѹ на вавѷлѡ́нъ и҆ на живѹ́щыѧ халдє́и вѣ́тръ зно́енъ гѹби́телный:

²и҆ послю̀ на вавѷлѡ́нъ рѹга́тєли, и҆ стѹ́днѡ порѹга́ютсѧ є҆мѹ̀ и҆ и҆стлѧ́тъ зе́млю є҆гѡ̀: поне́же го́ре на вавѷлѡ́нъ ѡ҆́крестъ въ де́нь ѡ҆ѕлобле́нїѧ є҆гѡ̀.

³Да налѧца́етъ налѧца́ѧй лѹ́къ сво́й, и҆ да ѡ҆блече́тсѧ въ брѡнѧ̀ своѧ҄, и҆ не пощади́те ю҆́ношъ є҆гѡ̀, и҆ побі́йте всѐ во́инство є҆гѡ̀.

⁴И҆ падѹ́тъ и҆збїе́ннїи въ землѝ халде́йстѣй и҆ ѩ҆́звеннїи во страна́хъ є҆ѧ̀.

⁵Поне́же не ѡ҆вдовѣ̀ ї҆и҃ль и҆ ї҆ѹ́да ѿ бг҃а своегѡ̀, ѿ гд҇а вседержи́телѧ, ѩ҆́кѡ землѧ̀ и҆́хъ напо́лнисѧ непра́вды ѿ ст҃ы́хъ ї҆и҃левыхъ.

⁶Бѣжи́те ѿ среды̀ вавѷлѡ́на и҆ спаси́те кі́йждо дѹ́шѹ свою̀ и҆ не поги́бнете въ непра́вдѣ є҆гѡ̀, занѐ вре́мѧ ѿмще́нїѧ є҆гѡ̀ є҆́сть ѿ гд҇а, воздаѧ́нїе то́й возда́стъ є҆мѹ̀.

⁷Ча́ша злата҄ѧ вавѷлѡ́нъ въ рѹцѣ̀ гд҇ни, напаѧ́ющи всю̀ зе́млю, ѿ вїна̀ є҆гѡ̀ пи́ша (всѝ) ѩ҆зы́цы, сегѡ̀ ра́ди потрѧсо́шасѧ.

⁸Внеза́пѹ падѐ вавѷлѡ́нъ и҆ сокрѹши́сѧ: пла́чите по не́мъ, возми́те ма́сти къ болѣ́зни є҆гѡ̀, да и҆сцѣли́тсѧ.

⁹Врачева́хомъ вавѷлѡ́на, и҆ не и҆сцѣлѣ̀: ѡ҆ста́вимъ є҆го̀ и҆ ѿи́демъ кі́йждо въ зе́млю свою̀, взы́де бо къ небесѝ сѹ́дъ є҆гѡ̀ и҆ воздви́жесѧ да́же до ѕвѣ́здъ.

¹⁰И҆знесѐ гд҇ь сѹ́дъ сво́й: прїиди́те и҆ возвѣсти́мъ въ сїѡ́нѣ дѣла̀ гд҇а бг҃а на́шегѡ.

¹¹Наѡстри́те стрѣ́лы, напо́лните тѹ́лы: воздви́же гд҇ь дѹ́хъ царе́й ми́дскихъ, ѩ҆́кѡ проти́вѹ вавѷлѡ́на гнѣ́въ є҆гѡ̀, да погѹби́тъ и҆̀, поне́же ѿмще́нїе гд҇не є҆́сть, ѿмще́нїе люді́й є҆гѡ̀.

¹²На стѣна́хъ вавѷлѡ́нскихъ воздви́гните зна́мѧ, поста́вите стра҄жи, ѹ҆гото́вите стра́жей, ѹ҆гото́вите ѻ҆рѹ́жїе: ѩ҆́кѡ ѹ҆мы́сли гд҇ь, и҆ сотвори́тъ, ѩ҆̀же речѐ на живѹ́щыѧ въ вавѷлѡ́нѣ,

¹³живы́й над̾ вода́ми мно́гими и҆ бога́тъ въ сокро́вищихъ свои́хъ: прїи́де коне́цъ тво́й и҆́стиннѡ во ѹ҆трѡ́бы твоѧ҄.

¹⁴Клѧ́тсѧ бо гд҇ь си́лъ мы́шцею свое́ю, ѩ҆́кѡ напо́лню тебѐ людьмѝ, ѩ҆́коже а҆крі́дами, и҆ возгласѧ́тъ над̾ тобо́ю низходѧ́щїи.

¹⁵Гд҇ь сотвори́вый зе́млю въ си́лѣ свое́й и҆ ѹ҆стро́ивый вселе́ннѹю въ мѹ́дрости свое́й, и҆ разѹмѣ́нїемъ свои́мъ распрострѐ небеса̀,

¹⁶є҆гда̀ ѻ҆́нъ да́стъ гла́съ, ѹ҆мно́жатсѧ во́ды на небесѝ, воздвиза́ѧй ѡ҆́блаки ѿ конє́цъ землѝ, мо́лнїю въ до́ждь сотворѝ, и҆зводѧ́й свѣ́тъ ѿ сокро́вищъ свои́хъ.

¹⁷Ѡ҆бѹѧ̀ всѧ́къ человѣ́къ ѿ ра́зѹма, посрами́сѧ всѧ́къ слїѧ́тель ѿ и҆зва́ѧнїй свои́хъ, ѩ҆́кѡ лѡ́жнаѧ слїѧ҄нїѧ є҆гѡ̀, и҆ нѣ́сть дѹ́ха въ ни́хъ:

¹⁸сѹ́єтна сѹ́ть дѣла̀ и҆ смѣ́хѹ достѡ́йна, въ ча́съ посѣще́нїѧ своегѡ̀ поги́бнѹтъ.

¹⁹Не такова̀ ча́сть ї҆а́кѡвлѧ, ѩ҆́кѡ сотвори́вый всѧ́чєскаѧ то́й є҆́сть, (а҆ ї҆и҃ль) же́злъ достоѧ́нїѧ є҆гѡ̀, гд҇ь вседержи́тель и҆́мѧ є҆гѡ̀.

²⁰Сокрѹша́еши ты̀ мнѣ̀ сосѹ́ды бра҄нныѧ, и҆ а҆́зъ сокрѹшѹ̀ въ тебѣ̀ ѩ҆зы́ки и҆ погѹблю̀ въ тебѣ̀ ца҄рствїѧ:

²¹и҆ и҆збїю̀ въ тебѣ̀ ко́ни и҆ вса́дники и҆́хъ, и҆ и҆збїю̀ въ тебѣ̀ колєсни́цы и҆ всѣда́ющихъ на ни́хъ:

²²и҆ и҆збїю̀ въ тебѣ̀ мѹ́жа и҆ женѹ̀, и҆ и҆збїю̀ въ тебѣ̀ ста́ра и҆ ѻ҆́трока, и҆ и҆збїю̀ въ тебѣ̀ ю҆́ношѹ и҆ дѣ́вѹ:

²³и҆ и҆збїю̀ въ тебѣ̀ па́стырѧ и҆ стада̀ є҆гѡ̀, и҆ и҆збїю̀ въ тебѣ̀ ѡ҆рю́ща и҆ рабо́тна скота̀ є҆гѡ̀, и҆ и҆збїю̀ въ тебѣ̀ воевѡ́ды и҆ прави́тєли.

²⁴И҆ возда́мъ вавѷлѡ́нѹ и҆ всѣ҄мъ жителє́мъ халдє́йскимъ всѧ҄ ѕлѡ́бы и҆́хъ, ѩ҆̀же сотвори́ша над̾ сїѡ́номъ пред̾ ѻ҆чи́ма ва́шима, гл҃етъ гд҇ь.

²⁵Сѐ, а҆́зъ на тѧ̀, горо̀ смертоно́снаѧ, гл҃етъ гд҇ь, растлѣва́ющаѧ всю̀ зе́млю, и҆ прострѹ̀ рѹ́кѹ мою̀ на тѧ̀ и҆ и҆зве́ргѹ тѧ̀ и҆з̾ ка́меней, и҆ да́мъ тѧ̀ въ го́рѹ сожже́нѹю:

²⁶и҆ не во́змѹтъ ѿ тебє̀ ка́мене во ѹ҆́глъ и҆ ка́мене во ѡ҆снова́нїе, ѩ҆́кѡ потреби́шисѧ во вѣ́ки, гл҃етъ гд҇ь.

²⁷Воздви́гните зна́мѧ на землѝ, вострѹби́те трѹбо́ю во ѩ҆зы́цѣхъ, ѡ҆свѧти́те на́нь ѩ҆зы́ки, возвѣсти́те на́нь ца́рствамъ а҆рара҄тскимъ ѿ менє̀ и҆ а҆сханазе́ѡмъ: ѹ҆тверди́те над̾ ни́мъ стрѣ҄льницы, возведи́те на́нь ко́ни, ѩ҆́кѡ а҆крі́дѡвъ мно́жество.

²⁸Возведи́те на́нь ѩ҆зы҄ки, царѧ̀ ми́дска и҆ всеѧ̀ землѝ, воево́дъ є҆гѡ̀ и҆ всѣ́хъ во́євъ є҆гѡ̀ и҆ всеѧ̀ землѝ ѡ҆́бласти є҆гѡ̀.

²⁹И҆ потрѧсе́сѧ землѧ̀ и҆ смѹти́сѧ, занѐ воста̀ на вавѷлѡ́нъ ѹ҆мышле́нїе гд҇не, є҆́же положи́ти зе́млю вавѷлѡ́нскѹ пѹ́стѹ и҆ ненаселе́нѹ.

³⁰Ѡ҆скѹдѣ́ша крѣ́пцыи вавѷлѡ́нстїи є҆́же ра́товати: сѧ́дѹтъ та́мѡ во ѡ҆гра́дѣ, поги́бе хра́брость и҆́хъ, и҆ бы́ша ѩ҆́кѡ жєны̀: пожжє́на сѹ́ть селє́нїѧ, сотрє́ны завѡ́ры є҆гѡ̀.

³¹Гонѧ́й во срѣ́тенїе текѹ́ща пости́гнетъ, и҆ вѣ́стникъ срѣ́титъ посла̀, да возвѣсти́тъ царю̀ вавѷлѡ́нскѹ, ѩ҆́кѡ взѧ́тъ бы́сть гра́дъ є҆гѡ̀.

³²Ѿ кра́ѧ прехожде́нїй є҆гѡ̀ ѩ҆́ти бы́ша, и҆ тверды҄ни є҆гѡ̀ зажжє́ны ѻ҆гне́мъ, и҆ мѹ́жїе є҆гѡ̀ во́инстїи и҆схо́дѧтъ.

³³Та́кѡ бо гл҃етъ гд҇ь вседержи́тель, бг҃ъ ї҆и҃левъ: до́мове царѧ̀ вавѷлѡ́нскагѡ ѩ҆́кѡ гѹмно̀ зрѣ́ло и҆змлаче́ни бѹ́дѹтъ: є҆щѐ ма́лѡ, и҆ прїи́детъ жатва̀ є҆гѡ̀.

³⁴Снѣде́ мѧ, раздроби́ мѧ, прїѧ́тъ мѧ̀ тма̀ тонка̀, навѹходоно́соръ ца́рь вавѷлѡ́нскїй пожре́ мѧ, ѩ҆́кѡ ѕмі́й напо́лни чре́во своѐ сла́достїю мое́ю: и҆ и҆зверго́ша мѧ̀.

³⁵Трѹды̀ моѝ и҆ бѣды҄ моѧ҄ на вавѷлѡ́нъ, рече́тъ живѹ́щаѧ въ сїѡ́нѣ, и҆ кро́вь моѧ̀ на живѹ́щыѧ въ халде́ехъ, рече́тъ ї҆ер҇ли́мъ.

³⁶Сегѡ̀ ра́ди та́кѡ гл҃етъ гд҇ь: сѐ, а҆́зъ сѹди́ти бѹ́дѹ сопе́рника твоего̀ и҆ ѿмщѹ̀ ѿмще́нїе твоѐ, и҆ пѹ́сто сотворю̀ мо́ре є҆гѡ̀ и҆ и҆зсѹшѹ̀ пото́ки є҆гѡ̀.

³⁷И҆ бѹ́детъ вавѷлѡ́нъ въ запѹстѣ́нїе, жили́ще ѕмїє́мъ, въ чѹ́до и҆ позвизда́нїе, поне́же не бѹ́детъ живѹ́щагѡ.

³⁸Вкѹ́пѣ а҆́ки львы̀ воста́нѹтъ и҆ а҆́ки скѵ́мни львѡ́въ.

³⁹Въ горѧ́чести и҆́хъ да́мъ питїѐ и҆̀мъ и҆ ѹ҆пою̀ ѧ҆̀, да спѧ́тъ и҆ ѹ҆́снѹтъ сно́мъ вѣ́чнымъ и҆ не воста́нѹтъ, гл҃етъ гд҇ь.

⁴⁰И҆ низведѹ̀ ѧ҆̀ ѩ҆́кѡ а҆́гнцы на закла́нїе и҆ ѩ҆́кѡ ѻ҆вны̀ съ козлы҄.

⁴¹Ка́кѡ взѧ́сѧ сеса́хъ, и҆ ѩ҆́та сла́ва всеѧ̀ землѝ; ка́кѡ бы́сть во ѹ҆дивле́нїе вавѷлѡ́нъ во ѩ҆зы́цѣхъ;

⁴²Взы́де на вавѷлѡ́нъ мо́ре въ шѹ́мѣ во́лнъ свои́хъ, и҆ покры́сѧ.

⁴³Бы́ша гра́ди є҆гѡ̀ въ запѹстѣ́нїе, землѧ̀ безво́дна и҆ пѹста̀, землѧ̀, въ не́йже никто́же поживе́тъ, и҆ нижѐ бѹ́детъ вита́ти въ не́мъ сы́нъ человѣ́чь.

⁴⁴И҆ посѣщѹ̀ на ви́ла въ вавѷлѡ́нѣ, и҆зве́ргѹ то̀, є҆́же поглотѝ, ѿ ѹ҆́стъ є҆гѡ̀, и҆ не соберѹ́тсѧ вѧ́щше къ немѹ̀ ѩ҆зы́цы, занѐ и҆ стѣ́ны вавѷлѡ҄нскїѧ падѹ́тъ.

⁴⁵И҆зыди́те ѿ среды̀ є҆гѡ̀, лю́дїе моѝ, да спасе́тъ кі́йждо дѹ́шѹ свою̀ ѿ гнѣ́ва ѩ҆́рости гд҇ни.

⁴⁶Да не когда̀ ѹ҆мѧгчи́тсѧ се́рдце ва́ше, и҆ ѹ҆боите́сѧ ра́ди слѹ́ха, и҆́же ѹ҆слы́шитсѧ на землѝ, и҆ прїи́детъ въ лѣ́то слы́шанїе, и҆ по лѣ́тѣ слы́шанїе, бѣ́дность и҆ непра́вда на зе́млю, и҆ властели́нъ на властели́на.

⁴⁷Сегѡ̀ ра́ди, сѐ, дні́е грѧдѹ́тъ, и҆ посѣщѹ̀ на и҆зва҄ѧныѧ вавѷлѡ́на: и҆ всѧ̀ землѧ̀ є҆гѡ̀ посрами́тсѧ, и҆ всѝ ѩ҆́звенїи є҆гѡ̀ падѹ́тъ посредѣ̀ є҆гѡ̀.

⁴⁸И҆ возвеселѧ́тсѧ над̾ вавѷлѡ́номъ небеса̀ и҆ землѧ̀ и҆ всѧ҄ сѹ҄щаѧ въ ни́хъ: ѿ полѹ́нощи бо прїи́дѹтъ на́нь всегѹби́телїе, гл҃етъ гд҇ь:

⁴⁹и҆ ѩ҆́коже сотворѝ вавѷлѡ́нъ па́дати ѩ҆́звєнымъ во ї҆и҃ли, та́кѡ въ вавѷлѡ́нѣ падѹ́тъ ѩ҆́звенїи всеѧ̀ землѝ.

⁵⁰И҆збѣ́гшїи меча̀, и҆ди́те, не сто́йте: и҆̀же и҆здале́че, помѧни́те гд҇а, и҆ ї҆ер҇ли́мъ да взы́детъ на се́рдце ва́ше.

⁵¹Посрами́хомсѧ, занѐ слы́шахомъ рѹга́нїе на́ше, покры̀ срамота̀ лицѐ на́ше, ѩ҆́кѡ прїидо́ша чѹжді́и во ст҃а҄ѧ на҄ша въ до́мъ гд҇ень.

⁵²Сегѡ̀ ра́ди, сѐ, дні́е грѧдѹ́тъ, гл҃етъ гд҇ь, и҆ посѣщѹ̀ на и҆зва҄ѧнїѧ є҆гѡ̀, и҆ по все́й землѝ є҆гѡ̀ падѹ́тъ ѩ҆́звенїи.

⁵³ѩ҆́кѡ а҆́ще взы́детъ вавѷлѡ́нъ на не́бо и҆ а҆́ще ѹ҆тверди́тъ на высотѣ̀ крѣ́пость свою̀, ѿ менє̀ прїи́дѹтъ гѹби́телїе є҆гѡ̀, гл҃етъ гд҇ь.

⁵⁴Гла́съ во́плѧ вавѷлѡ́нска, и҆ сотре́нїе вели́ко въ землѝ халде́йстѣй:

⁵⁵ѩ҆́кѡ погѹбѝ гд҇ь вавѷлѡ́на и҆ сотрѐ ѿ негѡ̀ гла́съ ве́лїй шѹмѧ́щь ѩ҆́кѡ во́ды мнѡ́ги, дадѐ въ па́гѹбѹ гла́съ є҆гѡ̀:

⁵⁶ѩ҆́кѡ прїи́де на вавѷлѡ́нъ хи́щникъ, ѩ҆́ти бы́ша си́льнїи є҆гѡ̀, ѹ҆вѧдѐ лѹ́къ и҆́хъ, ѩ҆́кѡ бг҃ъ воздае́тъ и҆̀мъ,

⁵⁷гд҇ь воздае́тъ є҆мѹ̀ воздаѧ́нїе: и҆ ѹ҆пои́тъ кнѧ҄зи є҆гѡ̀ и҆ мѹ҄дрыѧ є҆гѡ̀, и҆ воевѡ́ды є҆гѡ̀ и҆ вѡ́и є҆гѡ̀ и҆ си҄льныѧ є҆гѡ̀, и҆ ѹ҆́снѹтъ сно́мъ вѣ́чнымъ и҆ не возбѹдѧ́тсѧ, гл҃етъ цр҃ь, гд҇ь вседержи́тель и҆́мѧ є҆гѡ̀.

⁵⁸Та́кѡ гл҃етъ гд҇ь вседержи́тель: стѣна̀ вавѷлѡ́нска сїѧ̀ преширо́ка, подкопа́нїемъ подко́пана бѹ́детъ, и҆ врата̀ є҆гѡ̀ высѡ́ка ѻ҆гне́мъ сожжє́на бѹ́дѹтъ, и҆ бѹ́дѹтъ трѹди́тисѧ лю́дїе вотщѐ, и҆ ѩ҆зы́цы въ нача́лѣ поги́бнѹтъ.

⁵⁹Сло́во, є҆́же заповѣ́да гд҇ь ї҆еремі́и про҇ро́кѹ, рещѝ саре́ю сы́нѹ нирі́инѹ, сы́на маассе́ова, є҆гда̀ и҆́де ѿ седекі́и царѧ̀ ї҆ѹ́дина въ вавѷлѡ́нъ, въ четве́ртое лѣ́то ца́рства є҆гѡ̀: саре́й же бѣ̀ нача́лникъ дарѡ́въ.

⁶⁰И҆ написа̀ ї҆еремі́а всѧ҄ ѕла҄ѧ, ѩ҆̀же и҆мѧ́хѹ прїитѝ на вавѷлѡ́нъ, во є҆ди́нѹ кни́гѹ всѧ҄ словеса̀ сїѧ҄, ѩ҆̀же пи҄сана сѹ́ть на вавѷлѡ́нъ. И҆ речѐ ї҆еремі́а къ сарею̀:

⁶¹є҆гда̀ вни́деши въ вавѷлѡ́нъ, и҆ ѹ҆́зриши и҆ прочте́ши всѧ҄ словеса̀ сїѧ҄, и҆ рече́ши:

⁶²гд҇и, ты̀ ре́клъ є҆сѝ проти́вѹ мѣ́ста сегѡ̀ погѹби́ти є҆̀, и҆ да не бѹ́детъ живѧ́й въ не́мъ ѿ человѣ́ка и҆ до скота̀, и҆ да бѹ́детъ въ вѣ́чнѹю пѹсты́ню:

⁶³и҆ бѹ́детъ, є҆гда̀ прочте́ши кни́гѹ сїю̀, привѧжѝ къ не́й ка́мень и҆ вве́рзи ю҆̀ посредѣ̀ є҆ѵфра́та и҆ рцы̀:

⁶⁴та́кѡ потопи́тсѧ вавѷлѡ́нъ и҆ не воста́нетъ ѿ лица̀ ѕѡ́лъ, ѩ҆̀же а҆́зъ наведѹ̀ на́нь, и҆ разори́тсѧ. Да́же до здѣ̀ словеса̀ ї҆ерємі́ина.