Read Библия Церковнославянская I҆еремі́и 6 Bible Online

I҆еремі́и 6 - Библия Церковнославянская bible

I҆еремі́и 6

¹Ѹ҆крѣпи́тесѧ, сы́нове венїамі́нѡвы, посредѣ̀ ї҆ер҇ли́ма, и҆ въ ѳекѹ́и вострѹби́те трѹбо́ю, и҆ над̾ веѳаха́рмомъ воздви́гните хорѹ́гвь: ѩ҆́кѡ ѕла҄ѧ произнико́ша ѿ сѣ́вера, и҆ сотре́нїе вели́ко быва́етъ:

²и҆ ѿи́метсѧ высота̀ твоѧ̀, дщѝ сїѡ́нѧ.

³Къ не́й прїи́дѹтъ па́стырїе и҆ стада̀ и҆́хъ, и҆ поста́вѧтъ на не́й кѹ́щы ѡ҆́крестъ, и҆ ѹ҆пасѹ́тъ кі́йждо рѹко́ю свое́ю.

⁴Ѹ҆гото́витесѧ на ню̀ на бра́нь, воста́ните и҆ взы́демъ на ню̀ ѡ҆ полѹ́дни: го́ре на́мъ, ѩ҆́кѡ ѹ҆клони́сѧ де́нь, ѩ҆́кѡ и҆счеза́ютъ сѣ҄ни днєвны́ѧ.

⁵Воста́ните и҆ взы́демъ на ню̀ но́щїю и҆ расточи́мъ ѡ҆снѡва́нїѧ є҆ѧ̀.

⁶ѩ҆́кѡ сїѧ҄ гл҃етъ гд҇ь си́лъ: посѣцы̀ древа̀ є҆гѡ̀, и҆злі́й на ї҆ер҇ли́мъ си́лѹ: ѽ, гра́де лжи́вый, всѧ́кое наси́льство въ не́мъ!

⁷ѩ҆́коже стѹденѹ̀ твори́тъ кла́дѧзь во́дѹ свою̀, та́кѡ стѹденѹ̀ твори́тъ ю҆̀ ѕло́ба є҆ѧ̀: нече́стїе и҆ па́кѡсти ѹ҆слы́шатсѧ въ не́мъ над̾ лице́мъ є҆гѡ̀ всегда̀.

⁸Не́мощїю и҆ ѩ҆́звою нака́жешисѧ, ї҆ер҇ли́ме: да не ѿстѹ́питъ дѹша̀ моѧ̀ ѿ тебє̀, да не сотворю́ тѧ непрохо́днѹ, зе́млю неѡбита́ннѹ.

⁹ѩ҆́кѡ сїѧ҄ гл҃етъ гд҇ь си́лъ: ѡ҆бира́йте, ѡ҆бира́йте, а҆́ки вїногра́дъ, ѡ҆ста́нки ї҆и҃лєвы, ѡ҆брати́тесѧ а҆́ки ѡ҆бира́тель на ко́шницѹ свою̀.

¹⁰Комѹ̀ возглаго́лю и҆ (комѹ̀) засвидѣ́телствѹю, и҆ ѹ҆слы́шитъ; сѐ, неѡбрѣ҄зана ѹ҆шеса̀ и҆́хъ, и҆ слы́шати не возмогѹ́тъ: сѐ, сло́во гд҇не бы́сть къ ни҄мъ въ поноше́нїе, и҆ не воспрїи́мѹтъ тогѡ̀.

¹¹И҆ ѩ҆́рость мою̀ и҆спо́лнихъ, и҆ терпѣ́хъ, и҆ не сконча́хъ и҆́хъ: и҆злїю̀ на младе́нцы ѿвнѣ̀ и҆ на собра́нїе ю҆́ношъ вкѹ́пѣ: мѹ́жъ бо и҆ жена̀ ѩ҆́ти бѹ́дѹтъ, ста́рецъ со и҆спо́лненнымъ дні́й.

¹²И҆ пре́йдѹтъ до́мы и҆́хъ ко и҆ны҄мъ, полѧ̀ и҆ жєны̀ и҆́хъ та́кожде, ѩ҆́кѡ прострѹ̀ рѹ́кѹ мою̀ на ѡ҆бита́ющихъ на землѝ се́й, гл҃етъ гд҇ь.

¹³Поне́же ѿ ме́ншагѡ и҆ да́же до бо́лшагѡ всѝ соверши́ша беззакѡ́ннаѧ, ѿ свѧще́нника и҆ да́же до лжепроро́ка всѝ сотвори́ша лѡ́жнаѧ

¹⁴и҆ цѣлѧ́хѹ сотре́нїе люді́й мои́хъ, ѹ҆ничижа́юще и҆ глаго́люще: ми́ръ, ми́ръ: и҆ гдѣ̀ є҆́сть ми́ръ;

¹⁵Постыдѣ́шасѧ, ѩ҆́кѡ ѡ҆скѹдѣ́ша: и҆ нижѐ а҆́ки посрамлѧ́еми постыдѣ́шасѧ и҆ безче́стїѧ своегѡ̀ не позна́ша: сегѡ̀ ра́ди падѹ́тъ паде́нїемъ свои́мъ и҆ во вре́мѧ посѣще́нїѧ своегѡ̀ поги́бнѹтъ, речѐ гд҇ь.

¹⁶Сїѧ҄ гл҃етъ гд҇ь: ста́ните на пѹте́хъ и҆ ви́дите, и҆ вопроси́те ѡ҆ стезѧ́хъ гд҇нихъ вѣ́чныхъ и҆ ви́дите, кі́й є҆́сть пѹ́ть бла́гъ, и҆ ходи́те по немѹ̀ и҆ ѡ҆брѧ́щете ѡ҆чище́нїе дѹша́мъ ва́шымъ. И҆ реко́ша: не по́йдемъ.

¹⁷И҆ поста́вихъ над̾ ва́ми стра́жы: слы́шите гла́съ трѹбы̀. И҆ реко́ша: не послѹ́шаемъ.

¹⁸Сегѡ̀ ра́ди ѹ҆слы́шаша ѩ҆зы́цы и҆ пасѹ́щїи стада̀ своѧ҄.

¹⁹Слы́ши, землѐ: сѐ, а҆́зъ навождѹ̀ на лю́ди сїѧ҄ ѕла҄ѧ, пло́дъ ѿвраще́нїѧ и҆́хъ, ѩ҆́кѡ слове́съ мои́хъ не послѹ́шаша и҆ зако́нъ мо́й ѿверго́ша.

²⁰Вскѹ́ю мнѣ̀ кади́ло ѿ савы̀ прино́сите и҆ кїнамѡ́нъ ѿ землѝ да́льнїѧ; всесожжє́нїѧ ва҄ша не сѹ́ть прїѧ҄тна, и҆ же́ртвы ва́шѧ не ѹ҆слади́ша мѧ̀.

²¹Сегѡ̀ ра́ди та́кѡ гл҃етъ гд҇ь: сѐ, а҆́зъ да́мъ на лю́ди сїѧ҄ болѣ́знь, и҆ и҆знемо́гѹтъ ѻ҆тцы̀ и҆ сы́нове вкѹ́пѣ, сосѣ́дъ и҆ и҆́скреннїй є҆гѡ̀ поги́бнѹтъ.

²²Сїѧ҄ гл҃етъ гд҇ь: сѐ, лю́дїе грѧдѹ́тъ ѿ сѣ́вера, и҆ ѩ҆зы́къ вели́къ воста́нетъ ѿ конє́цъ землѝ,

²³лѹ́къ и҆ щи́тъ во́змѹтъ: мѹчи́теленъ є҆́сть и҆ не ѹ҆милосе́рдитсѧ: гла́съ є҆гѡ̀, ѩ҆́кѡ мо́ре шѹмѧ́щее: на ко́нехъ и҆ колесни́цахъ ѡ҆полчи́тсѧ а҆́ки ѻ҆́гнь на бра́нь на тѧ̀, дщѝ сїѡ́нѧ.

²⁴Слы́шахомъ слѹ́хъ є҆гѡ̀, ѡ҆слабѣ́ша рѹ́цѣ на́ши, ско́рбь ѡ҆б̾ѧ́тъ на́съ, бѡлѣ́зни ѩ҆́кѡ родѧ́щїѧ.

²⁵Не и҆сходи́те на ни҄вы и҆ на пѹти҄ не ходи́те, поне́же ме́чь вра́жїй ѡ҆бита́етъ ѡ҆́крестъ.

²⁶Дщѝ люді́й мои́хъ, препоѧ́шисѧ вре́тищемъ и҆ посы́плисѧ пе́пеломъ, пла́чь возлю́бленнагѡ сотворѝ тебѣ̀ рыда́нїе го́рько, поне́же внеза́пѹ прїи́детъ запѹстѣ́нїе на ва́съ.

²⁷И҆скѹси́телѧ да́хъ тѧ̀ въ лю́дехъ и҆скѹ́сныхъ, и҆ ѹ҆вѣ́си мѧ̀, внегда̀ и҆скѹси́ти мѝ пѹ́ть и҆́хъ:

²⁸всѝ непослѹ́шни ходѧ́щїи стропти́вѡ: мѣ́дь и҆ желѣ́зо, всѝ растлѣ́ни сѹ́ть.

²⁹Ѡ҆скѹдѣ̀ мѣ́хъ ѿ ѻ҆гнѧ̀, и҆стлѣ̀ ѻ҆́лово: всѹ́е кова́чь сребро̀ кѹе́тъ, лѹка҄вства бо и҆́хъ не и҆ста́ѧша.

³⁰Сребро̀ ѿринове́но нарцы́те и҆́хъ, ѩ҆́кѡ гд҇ь ѿве́рже и҆̀хъ.