Read Библия Церковнославянская Пла́чь ї҆еремі́евъ 2 Bible Online

Пла́чь ї҆еремі́евъ 2 - Библия Церковнославянская bible

Пла́чь ї҆еремі́евъ 2

¹А҆́лефъ. Ка́кѡ ѡ҆мрачѝ во гнѣ́вѣ свое́мъ гд҇ь дще́рь сїѡ́ню: све́рже съ небесѐ на зе́млю сла́вѹ ї҆и҃левѹ, и҆ не помѧнѹ̀ подно́жїѧ ногѹ̀ своє́ю въ де́нь гнѣ́ва и҆ ѩ҆́рости своеѧ̀.

²Бе́ѳъ. Погрѹзѝ гд҇ь и҆ не пощадѣ̀: всѧ҄ кра҄снаѧ ї҆а҄кѡвлѧ разорѝ ѩ҆́ростїю свое́ю, тверды́ни дще́ре ї҆ѹ́дины и҆зве́рже на зе́млю, ѡ҆сквернѝ царѧ̀ є҆ѧ̀ и҆ кнѧ҄зи є҆ѧ̀,

³Гі́мель. сокрѹшѝ во гнѣ́вѣ ѩ҆́рости своеѧ̀ ве́сь ро́гъ ї҆и҃левъ, ѡ҆братѝ вспѧ́ть десни́цѹ є҆гѡ̀ ѿ лица̀ врага̀, разжжѐ во ї҆а́кѡвѣ ѩ҆́кѡ ѻ҆́гнь пла́мы, и҆ потребѝ всѧ҄ ѡ҆́крестъ,

⁴Да́леѳъ. напрѧжѐ лѹ́къ сво́й ѩ҆́кѡ ра́тникъ проти́вный, ѹ҆твердѝ десни́цѹ свою̀ ѩ҆́кѡ сѹпоста҄тъ и҆ и҆збѝ всѧ҄ кра҄снаѧ ѻ҆́чїю моє́ю во селе́нїихъ дще́ре сїѡ́ни, и҆злїѧ̀ ѩ҆́кѡ ѻ҆́гнь ѩ҆́рость свою̀.

⁵Гѐ. Бы́сть гд҇ь а҆́ки вра́гъ, погрѹзѝ ї҆и҃лѧ, погрѹзѝ всѧ҄ до́мы є҆гѡ̀, разсы́па всѧ҄ стѣ́ны є҆гѡ̀ и҆ ѹ҆мно́жи дще́ри ї҆ѹ́динѣ смире́на и҆ смире́нѹ,

⁶Ва́ѵъ. и҆ разве́рзе а҆́ки вїногра́дъ селе́нїе своѐ, разсы́па пра́здники є҆гѡ̀: забы̀ гд҇ь, ѩ҆̀же сотворѝ въ сїѡ́нѣ пра́здники и҆ сѹббѡ҄ты, и҆ ѡ҆ѕло́би преще́нїемъ гнѣ́ва своегѡ̀ царѧ̀ и҆ кнѧ́зѧ и҆ жерца̀.

⁷За́їнъ. Ѿри́нѹ гд҇ь же́ртвенникъ сво́й, ѿтрѧсѐ ст҃ы́ню свою̀, сокрѹшѝ рѹко́ю вра́жїею стѣ́нѹ забра́лѡвъ є҆гѡ̀: гла́съ да́ша въ домѹ̀ гд҇ни ѩ҆́кѡ въ де́нь пра́здника.

⁸И҆́ѳъ. Ѡ҆брати́сѧ гд҇ь разсы́пати стѣ́нѹ дще́ре сїѡ́ни: протѧжѐ мѣ́рѹ, не ѿвратѝ рѹкѝ своеѧ̀ ѿ попра́нїѧ: и҆ сѣ́това предгра́дїе, и҆ ѡ҆гра́да вкѹ́пѣ и҆знемо́же.

⁹Те́ѳъ. Врасто́ша въ зе́млю врата̀ є҆ѧ̀, погѹбѝ и҆ сокрѹшѝ верєѝ є҆ѧ̀, царѧ̀ є҆ѧ̀ и҆ кнѧ҄зи є҆ѧ̀ во ѩ҆зы́цѣхъ, нѣ́сть зако́на, и҆ проро́цы є҆ѧ̀ не ви́дѣша видѣ́нїѧ ѿ гд҇а.

¹⁰Ї҆ѡ́дъ. Сѣдо́ша на землѝ, ѹ҆молко́ша старѣ҄йшины дще́ре сїѡ́ни, посы́паша пе́рсть на главы҄ своѧ҄, препоѧ́сашасѧ во врє́тища, низведо́ша въ зе́млю старѣ́йшинъ дѣ́въ ї҆ер҇ли́мскихъ.

¹¹Ка́фъ. Ѡ҆скѹдѣ́ша ѻ҆́чи моѝ въ слеза́хъ, смѹти́сѧ се́рдце моѐ, и҆злїѧ́сѧ на зе́млю сла́ва моѧ̀ ѡ҆ сокрѹше́нїи дще́ре люді́й мои́хъ, внегда̀ ѡ҆скѹдѣ̀ младе́нецъ и҆ ссѹ́щїй на сто́гнахъ гра́дскихъ.

¹²Ла́медъ. Ма́теремъ свои҄мъ реко́ша: гдѣ̀ пшени́ца и҆ вїно̀; внегда̀ разсла́блєнымъ бы́ти и҆̀мъ, ѩ҆́кѡ ѩ҆́звєнымъ на сто́гнахъ гра́дскихъ, є҆гда̀ и҆злива́хѹсѧ дѹ́ши и҆́хъ въ ло́но ма́терей и҆́хъ.

¹³Ме́мъ. Что́ ти засвидѣ́телствѹю; и҆лѝ что̀ ѹ҆подо́блю тебѣ̀, дщѝ ї҆ер҇ли́млѧ; кто́ тѧ спасе́тъ и҆ кто́ тѧ ѹ҆тѣ́шитъ, дѣви́це, дщѝ сїѡ́нѧ; ѩ҆́кѡ возвели́чисѧ ча́ша сокрѹше́нїѧ твоегѡ̀, кто́ тѧ и҆зцѣли́тъ;

¹⁴Нѹ́нъ. Проро́цы твоѝ ви́дѣша тебѣ̀ сѹ́єтнаѧ и҆ безѹ́мїе и҆ не ѿкры́ша ѡ҆ непра́вдѣ твое́й, є҆́же возврати́ти плѣне́нїе твоѐ, и҆ ви́дѣша тебѣ̀ словеса̀ сѹ́єтнаѧ и҆ и҆зриновє́нїѧ.

¹⁵Са́мехъ. Восплеска́ша рѹка́ма ѡ҆ тебѣ̀ всѝ минѹ́ющїи пѹте́мъ, позвизда́ша и҆ покива́ша главо́ю свое́ю ѡ҆ дще́ри ї҆ер҇ли́мли, рекѹ́ще: се́й ли гра́дъ, вѣне́цъ сла́вы, весе́лїе всеѧ̀ землѝ;

¹⁶А҆́їнъ. Ѿверзо́ша на тѧ̀ ѹ҆ста̀ своѧ҄ всѝ вразѝ твоѝ, позвизда́ша и҆ поскрежета́ша зѹбы̀ свои́ми и҆ рѣ́ша: поглоти́мъ ю҆̀: ѻ҆ба́че се́й де́нь, є҆го́же ча́ѧхомъ, ѡ҆брѣто́хомъ є҆го̀, ви́дѣхомъ.

¹⁷Фѝ. Сотворѝ гд҇ь, ѩ҆̀же помы́сли, сконча̀ словеса̀ своѧ҄, ѩ҆̀же заповѣ́да ѿ дні́й пе́рвыхъ: разорѝ и҆ не пощадѣ̀, и҆ возвеселѝ ѡ҆ тебѣ̀ врага̀, вознесѐ ро́гъ стѹжа́ющагѡ тѝ.

¹⁸Ца́ди. Возопѝ се́рдце и҆́хъ ко гд҇ѹ, стѣ́ны дще́ре сїѡ́ни да и҆злїю́тъ ѩ҆́коже водоте́ча сле́зы де́нь и҆ но́щь: не да́ждь поко́ѧ себѣ̀, и҆ да не ѹ҆мо́лкнетъ зѣ́ница ѻ҆́чїю твоє́ю.

¹⁹Кѡ́фъ. Воста́ни, поѹчи́сѧ въ нощѝ въ нача́лѣ стражбы̀ твоеѧ̀, пролі́й ѩ҆́кѡ во́дѹ се́рдце твоѐ пред̾ лице́мъ гд҇нимъ, воздви́гни къ немѹ̀ рѹ́цѣ твоѝ ѡ҆ дѹша́хъ младе́нєцъ твои́хъ, разсла́бленыхъ гла́домъ въ нача́лѣ всѣ́хъ и҆схо́дѡвъ.

²⁰Ре́шъ. Ви́ждь, гд҇и, и҆ при́зри, кого̀ є҆сѝ ѡ҆треби́лъ си́це; є҆да̀ снѣдѧ́тъ жєны̀ пло́дъ ѹ҆тро́бы своеѧ̀; ѡ҆требле́нїе сотворѝ по́варъ, и҆збїю́тъ ли младе́нцєвъ ссѹ́щихъ сосцы̀; ѹ҆бїе́ши ли во ст҃ы́ни гд҇ни жерца̀ и҆ проро́ка;

²¹Ши́нъ. Ѹ҆спо́ша на и҆схо́дищихъ ѻ҆́трокъ и҆ ста́рецъ: дѣви҄цы моѧ҄ и҆ ю҆́нѡты моѝ ѿидо́ша въ плѣ́нъ, мече́мъ и҆ гла́домъ и҆зби́лъ є҆сѝ, въ де́нь гнѣ́ва твоегѡ̀ свари́лъ є҆сѝ, не пощадѣ́лъ.

²²Ѳа́ѵъ. Призва́лъ є҆сѝ ѩ҆́кѡ де́нь пра́здника пришє́лствїѧ моѧ҄ ѡ҆́крестъ, и҆ не бы́сть въ де́нь гнѣ́ва гд҇нѧ ѹ҆цѣлѣ́вый и҆ ѡ҆ста́выйсѧ, ѩ҆́кѡ сотвори́хъ возмощѝ и҆ ѹ҆мно́жихъ врагѝ моѧ҄ всѧ҄.