Read Библия Церковнославянская Пла́чь ї҆еремі́евъ 5 Bible Online

Пла́чь ї҆еремі́евъ 5 - Библия Церковнославянская bible

Пла́чь ї҆еремі́евъ 5

¹Мл҃тва ї҆еремі́и про҇ро́ка. Помѧнѝ, гд҇и, что̀ бы́сть на́мъ: при́зри и҆ ви́ждь ѹ҆кори́знѹ на́шѹ:

²достоѧ́нїе на́ше ѡ҆брати́сѧ къ чѹжди҄мъ и҆ до́мы на́шѧ ко и҆ноплеме́нникѡмъ:

³си́ри бы́хомъ, нѣ́сть ѻ҆тца̀, ма́тєри на́шѧ ѩ҆́кѡ вдѡвы̀.

⁴Во́дѹ на́шѹ за сребро̀ пи́хомъ, дрова̀ на҄ша за цѣ́нѹ кѹпова́хомъ:

⁵на вы҄ѧ на́шѧ гони́ми бы́хомъ, трѹди́хомсѧ, не почи́хомъ.

⁶Е҆гѵ́петъ дадѐ рѹ́кѹ, а҆ссѹ́ръ въ насыще́нїе и҆́хъ.

⁷Ѻ҆тцы̀ на́ши согрѣши́ша, и҆ нѣ́сть и҆́хъ, мы́ же беззакѡ́нїѧ и҆́хъ под̾ѧ́хомъ.

⁸Рабѝ ѡ҆блада́ша на́ми, и҆збавлѧ́ющагѡ нѣ́сть ѿ рѹкѹ̀ и҆́хъ.

⁹Въ дѹша́хъ на́шихъ носи́хомъ хлѣ́бъ на́шъ, ѿ лица̀ меча̀ въ пѹсты́ни.

¹⁰Ко́жа на́ша а҆́ки пе́щь ѡ҆бгорѣ̀, разсѣдо́шасѧ ѿ лица̀ бѹ́рей гла́да.

¹¹Же́нъ въ сїѡ́нѣ смири́ша, дѣви́цъ во градѣ́хъ ї҆ѹ́диныхъ.

¹²Кнѧ҄зи въ рѹка́хъ и҆́хъ повѣ́шени бы́ша, старѣ҄йшины не просла́вишасѧ.

¹³И҆збра́ннїи пла́чь под̾ѧ́ша, и҆ ю҆́нѡши въ кла́дѣ и҆знемого́ша.

¹⁴И҆ ста́рцы ѿ вра́тъ ѡ҆скѹдѣ́ша, и҆збра́ннїи ѿ пѣ́сней свои́хъ ѹ҆молко́ша.

¹⁵Разсы́пасѧ ра́дость серде́цъ на́шихъ, ѡ҆брати́сѧ въ пла́чь ли́къ на́шъ,

¹⁶спадѐ вѣне́цъ со главы̀ на́шеѧ: го́ре на́мъ, ѩ҆́кѡ согрѣши́хомъ.

¹⁷Ѡ҆ се́мъ смѹти́сѧ се́рдце на́ше, ѡ҆ се́мъ поме́ркнѹша ѻ҆́чи на́ши.

¹⁸На горѣ̀ сїѡ́нѣ, ѩ҆́кѡ поги́бе, лиси҄цы ходи́ша.

¹⁹Ты́ же, гд҇и, во вѣ́ки всели́шисѧ, пр҇то́лъ тво́й въ ро́дъ и҆ ро́дъ.

²⁰Вскѹ́ю во вѣ́ки забыва́еши на́съ, ѡ҆ста́виши ли на́съ въ продолже́нїе дні́й;

²¹Ѡ҆брати́ ны, гд҇и, къ тебѣ̀, и҆ ѡ҆брати́мсѧ, и҆ возновѝ дни҄ на́шѧ ѩ҆́коже пре́жде.

²²ѩ҆́кѡ ѿрѣва́ѧ ѿри́нѹлъ є҆сѝ на́съ, разгнѣ́валсѧ є҆сѝ на ны̀ ѕѣлѡ̀.