Read Библия Церковнославянская Посла́нїе їеремі́ино 1 Bible Online

Посла́нїе їеремі́ино 1 - Библия Церковнославянская bible

Посла́нїе їеремі́ино 1

¹Списа́нїе посла́нїѧ ко ѿводи҄мымъ плѣ́нникѡмъ въ вавѷлѡ́нъ ѿ царѧ̀ вавѷлѡ́нскагѡ, є҆́же посла̀ ї҆еремі́а, возвѣсти́ти и҆̀мъ, ѩ҆́коже повелѣ́но бы́сть є҆мѹ̀ ѿ бг҃а.

²Грѣ҄хъ ра́ди, и҆́миже согрѣши́сте пред̾ бг҃омъ, ѿведе́тесѧ въ вавѷлѡ́нъ плѣне́ни навѹходоно́соромъ царе́мъ вавѷлѡ́нскимъ.

³Вше́дше ѹ҆́бѡ въ вавѷлѡ́нъ, бѹ́дете та́мѡ лѣ҄та мнѡ́га и҆ вре́мѧ до́лго, до седмѝ родѡ́въ: пото́мъ же и҆зведѹ̀ ва́съ ѿтѹ́дѹ съ ми́ромъ.

⁴Нн҃ѣ же ѹ҆́зрите въ вавѷлѡ́нѣ бо́ги срє́брѧны и҆ зла҄ты, и҆ ка́мєнны и҆ древѧ҄ны на ра́менахъ носи҄мы, показѹ́ющыѧ стра́хъ ѩ҆зы́кѡмъ.

⁵Блюди́тесѧ ѹ҆̀бо, да не и҆ вы̀ и҆ноплеме́нникѡмъ ѹ҆подо́битесѧ, и҆ стра́хъ прїи́метъ ва́съ ѿ ни́хъ: ви́дѣвше наро́дъ напредѝ и҆ созадѝ и҆́хъ кла́нѧющьсѧ и҆̀мъ, рцы́те ѹ҆́бѡ во ѹ҆мѣ̀: тебѣ̀ лѣ́по є҆́сть кла́нѧтисѧ, влдко!

⁶А҆́гг҃лъ бо мо́й съ ва́ми є҆́сть, се́й взыскѹ́етъ дѹ́шъ ва́шихъ.

⁷Ѧ҆зы́къ бо и҆́хъ и҆зстро́ганъ є҆́сть древодѣ́лею, ті́и же позлаще́ни и҆ посре́брени, лжи́ви же сѹ́ть и҆ не мо́гѹтъ глаго́лати,

⁸и҆ ѩ҆́коже дѣви́цѣ красотолюби́вѣй взе́млюще зла́то, ѹ҆строѧ́ютъ вѣнцы̀ на главы҄ богѡ́въ свои́хъ.

⁹Тѣ́мже ѹ҆крада́ютъ ѿ ни́хъ жерцы̀ зла́то и҆ сребро̀ и҆ себѣ̀ ѹ҆потреблѧ́ютъ.

¹⁰Дадѧ́тъ же ѿ ни́хъ и҆ блѹдни́цамъ сѹ́щымъ въ домѹ̀, а҆ бо́ги ѹ҆краша́ютъ а҆́ки человѣ́кѡвъ ри́зами, бо́ги златы҄ѧ и҆ срє́брѧныѧ и҆ древѧ҄ныѧ.

¹¹Ті́и же не ѹ҆цѣлѣ́ютъ ѿ ржѝ и҆ мо́лїѧ, ѡ҆дѣ́ютъ же ѧ҆̀ въ багрѧни́цѹ.

¹²Ѡ҆тира́ютъ ли́ца и҆̀мъ пра́ха ра́ди, и҆́же ѿ хра́ма, и҆́же є҆́сть мно́жайшїй на ни́хъ.

¹³И҆ ски́петръ и҆́мѹтъ, ѩ҆́кѡ человѣ́къ и҆ ѩ҆́кѡ сѹдїѧ̀ страны̀, и҆́же согрѣша́ющагѡ къ себѣ̀ не ѹ҆бїе́тъ.

¹⁴И҆́мать же и҆ ме́чь въ десни́цѣ и҆ сѣки́рѹ, са́мъ же себѐ ѿ ра́ти и҆ ѿ разбѡ́йникъ не ѿи́метъ: ѿсю́дѹ зна́еми сѹ́ть, ѩ҆́кѡ не сѹ́ть бо́зи: не ѹ҆бо́йтесѧ ѹ҆̀бо и҆́хъ.

¹⁵ѩ҆́коже бо сосѹ́дъ человѣ́ческъ сокрѹше́нъ непотре́бенъ быва́етъ,

¹⁶та́цы сѹ́ть бо́зи и҆́хъ: є҆гда́ же поста́влени бѹ́дѹтъ въ домѣ́хъ, ѻ҆́чи и҆́хъ пѡ́лны сѹ́ть пра́ха ѿ ногѹ̀ входѧ́щихъ.

¹⁷И҆ ѩ҆́коже комѹ̀ преѡби́дѣвшѹ царѧ̀, заключе́ни быва́ютъ дворы̀, и҆лѝ ѩ҆́кѡ на сме́рть ѿводи́мѹ, хра́мы и҆́хъ ѹ҆твержда́ютъ жерцы̀ две́рьми и҆ замка́ми и҆ заво́рами, да ѿ разбѡ́йникъ ѡ҆кра́дени не бѹ́дѹтъ.

¹⁸Свѣти҄ла жгѹ́тъ и҆̀мъ, и҆ мно́жае не́же себѣ̀, ѿ ни́хже ни є҆ди́но мо́гѹтъ ви́дѣти.

¹⁹Сѹ́ть ѹ҆́бѡ ѩ҆́кѡ бе́рвна въ домѹ̀, сердца́ же и҆́хъ то́чатъ чє́рви, и҆̀же ѿ землѝ, и҆ ѻ҆де́ждѹ и҆́хъ, ѻ҆ни́ же не чѹ́вствѹютъ сегѡ̀.

²⁰Ѡ҆чернѣ́ло є҆́сть лицѐ и҆́хъ ѿ ды́ма хра́мины:

²¹по тѣлесе́мъ и҆́хъ и҆ по главѣ̀ парѧ́тъ нетопыри҄ нощні́и, и҆ ла҄стовицы и҆ пти҄цы, та́кожде и҆ коткѝ (ска́чѹтъ).

²²Ѿ тогѡ̀ ѹ҆вѣ́сте, ѩ҆́кѡ не сѹ́ть бо́зи не ѹ҆бо́йтесѧ ѹ҆̀бо и҆́хъ.

²³Зла́то бо лежа́щее на ни́хъ на красѹ̀, а҆́ще не ѡ҆чи́ститъ кто̀ ѿ ржѝ, не возблиста́ютъ: є҆гда́ бо слива́хѹ и҆̀хъ, не чѹ́вствоваша.

²⁴За всѧ́кѹ цѣ́нѹ кѹ́плени сѹ́ть, въ ни́хже нѣ́сть дѹ́ха.

²⁵Без̾ но́гъ на ра́мѣхъ но́сѧтсѧ, ѩ҆влѧ́юще своѐ безче́стїе человѣ́кѡмъ, ѡ҆срамлѧ́ютсѧ же и҆ слѹжа́щїи и҆̀мъ:

²⁶зане́же, є҆гда̀ когда̀ падѹ́тсѧ на зе́млю, и҆ не мо́гѹтъ са́ми воста́ти: и҆ а҆́ще кто̀ поста́витъ ѧ҆̀ прѧ́мѡ, не мо́гѹтъ постѹпи́ти, и҆ а҆́ще преклонѧ́тсѧ, не мо́гѹтъ и҆спра́вити себѐ, но ѩ҆́кѡ мертвецє́мъ да́ры и҆̀мъ полага́ютъ.

²⁷Трє́бы же и҆́хъ продаю́ще жерцы̀ на ѕло̀ ѹ҆потреблѧ́ютъ: та́кожде и҆ жєны̀ и҆́хъ варѧ́тъ ѿ ни́хъ, ни є҆ди́номѹ же ѹ҆бо́гѹ, ни не́мощнѹ подаю́тъ:

²⁸тре́бъ и҆́хъ нечи҄стыѧ и҆ кровотѡ́чныѧ жєны̀ прикаса́ютсѧ. Ѹ҆разѹмѣ́вше ѹ҆̀бо ѿ си́хъ, ѩ҆́кѡ не сѹ́ть бо́зи, не бо́йтесѧ и҆́хъ.

²⁹Ѿкѹ́дѹ бо прозовѹ́тсѧ бо́зи, ѩ҆́кѡ жєны̀ слѹ́жатъ богѡ́мъ срє́брѧнымъ и҆ златы҄мъ и҆ древѧ҄нымъ;

³⁰И҆ во хра́мѣхъ и҆́хъ жерцы̀ сѣда́ютъ, и҆мѹ́ще ри҄зы растє́рзаны и҆ главы҄ и҆ брады҄ ѡ҆бри҄ты, и҆́хже главы҄ не покровє́ны сѹ́ть:

³¹ревѹ́тъ же вопїю́ще пред̾ бѡ́ги свои́ми, ѩ҆́коже нѣ́цыи на ве́чери мертвеца̀.

³²Ѿ ри́зъ и҆́хъ взе́млюще жерцы̀, ѡ҆дѣва́ютъ жєны̀ своѧ҄ и҆ дѣ́ти.

³³И҆ а҆́ще ѿ когѡ̀ ѕло̀ постра́ждѹтъ и҆лѝ добро̀, не мо́гѹтъ ѿда́ти: ни царѧ̀ мо́гѹтъ поста́вити, ни ѿѧ́ти:

³⁴та́кожде ни бога́тства ни мѣ́ди мо́гѹтъ да́ти. А҆́ще кто̀ и҆̀мъ что̀ ѡ҆бѣща́въ не ѿда́стъ, не воспро́сѧтъ.

³⁵Ѿ сме́рти человѣ́ка не и҆зба́вѧтъ, ни ме́нша ѿ крѣ́пка не ѿи́мѹтъ:

³⁶человѣ́ка слѣ́па къ видѣ́нїю не навратѧ́тъ, въ нѹ́жди человѣ́кѹ не помо́гѹтъ,

³⁷вдовы̀ не поми́лѹютъ и҆ сиротѣ̀ добра̀ не сотворѧ́тъ.

³⁸Подо́бни сѹ́ть ка́менїю наго́рномѹ бо́зи и҆́хъ древѧ́ни и҆ ка́менни, и҆ позлаще́ни и҆ посре́брени, слѹжа́щїи же и҆̀мъ посра́мѧтсѧ.

³⁹Ка́кѡ ѹ҆̀бо мо́щно мнѣ́ти и҆лѝ прозва́ти ѧ҆̀ бога́ми;

⁴⁰Ктомѹ́ же и҆ са́ми ті́и халде́є не чтѹ́тъ и҆́хъ: и҆̀же є҆гда̀ ѹ҆́зрѧтъ нѣ́ма не могѹ́ща глаго́лати, прино́сѧтъ є҆го̀ къ ви́лѹ, є҆мѹ́же мо́лѧтсѧ, да глаго́летъ, а҆́ки си́льнѹ сѹ́щѹ почѹ́ти.

⁴¹И҆ не мо́гѹтъ ті́и разѹмѣ́вше сїѐ ѡ҆ста́вити ѧ҆̀, чѹ́вства бо не и҆́мѹтъ.

⁴²Жєны́ же ѡ҆бложє́ны ѹ҆́жами на распѹ́тїихъ сѣдѧ́тъ, кадѧ́щѧ ѡ҆тре́бы.

⁴³Е҆гда́ же кото́раѧ ѿ ни́хъ привлече́на ѿ нѣ́коегѡ мимоходѧ́ща бѹ́детъ съ ни́мъ, бли́жнюю ѹ҆карѧ́етъ, ѩ҆́кѡ не сподо́биласѧ ѩ҆́коже и҆ ѻ҆на̀, ни ѹ҆́же є҆ѧ̀ прето́ргнѹлосѧ.

⁴⁴Всѧ҄ быва́ємаѧ въ ни́хъ лжи҄ва сѹ́ть: ка́кѡ ѹ҆̀бо мо́щно мнѣ́ти и҆лѝ прозыва́ти ѧ҆̀ бога́ми бы́ти;

⁴⁵Древодѣ́лѧми и҆ златари҄ сотворе́ни сѹ́ть: ничто́же и҆́но быва́ютъ, но є҆́же хотѧ́тъ хѹдо́жницы, то̀ быва́ютъ.

⁴⁶И҆ са́ми, и҆̀же и҆̀хъ творѧ́тъ, не быва́ютъ долговѣ́чни.

⁴⁷Ка́кѡ ѹ҆̀бо сотворє́ннаѧ и҆́ми мо́гѹтъ бы́ти бо́зи; ѡ҆ста́виша бо по себѣ̀ лжѹ̀ и҆ ѹ҆кори́знѹ пото́мъ бѹ́дѹщымъ:

⁴⁸є҆гда́ бо прїи́детъ на ни́хъ ра́ть и҆ ѕла҄ѧ, совѣщава́ютъ междѹ̀ собо́ю жерцы̀, гдѣ̀ скры́ютсѧ съ ни́ми.

⁴⁹Ка́кѡ ѹ҆̀бо нѣ́сть чѹ́вствовати, ѩ҆́кѡ не сѹ́ть бо́зи, и҆̀же не и҆збавлѧ́ютъ себѐ ѿ ра́ти, ни ѿ ѕла̀;

⁵⁰Древѧ́ни сѹ́ще и҆ ка́менни, и҆ позлаще́ни и҆ посре́брени, позна́ютсѧ пото́мъ ѩ҆зы́кѡмъ всѣ҄мъ, ѩ҆́кѡ лжа̀ сѹ́ть: и҆ царє́мъ ѩ҆́вни бѹ́дѹтъ, ѩ҆́кѡ не сѹ́ть бо́зи, но дѣла̀ рѹ́къ человѣ́ческихъ, и҆ ни є҆ди́но дѣ́ло бж҃їе въ ни́хъ є҆́сть:

⁵¹комѹ̀ ѹ҆̀бо нѣ́сть разѹ́мно, ѩ҆́кѡ не сѹ́ть бо́зи;

⁵²Царѧ́ бо странѣ̀ не поставлѧ́ютъ, ни дождѧ̀ человѣ́кѡмъ подаю́тъ,

⁵³ни сѹда̀ разсѹ́дѧтъ и҆ не и҆зба́вѧтъ ѿ ѡ҆би́ды, не́мощни сѹ́ще:

⁵⁴ѩ҆́коже бо вра́ны междѹ̀ не́бомъ и҆ земле́ю сѹ́ть: и҆ є҆гда̀ паде́тъ ѻ҆́гнь на хра́мѣ богѡ́въ древѧ́ныхъ и҆лѝ ка́менныхъ, и҆лѝ позлаще́ныхъ и҆лѝ посре́бреныхъ, жерцы̀ и҆́хъ и҆збѣ́гнѹтъ и҆ ѹ҆цѣлѣ́ютъ, ѻ҆ни́ же ѩ҆́кѡ бе́рвна посредѣ̀ сгорѧ́тъ.

⁵⁵Царю́ же и҆ ра҄тнымъ не ста́нѹтъ проти́вѹ: ѹ҆̀бо ка́кѡ мо́щно мнѣ́ти и҆лѝ прїѧ́ти, ѩ҆́кѡ бо́зи сѹ́ть;

⁵⁶Ни ѿ разбѡ́йникъ, ни ѿ тате́й и҆зба́вѧтъ себѐ бо́зи древѧ́ни и҆ ка́менни, и҆ посре́брени и҆ позлаще́ни.

⁵⁷И҆̀хже преѡдолѣ́вше и҆ взе́мше зла́то и҆ сребро̀ и҆ ри҄зы и҆́хъ, ѿи́дѹтъ, нижѐ са́ми себѣ̀ помо́гѹтъ.

⁵⁸Тѣ́мже лѹ́чше є҆́сть ца́рь показѹ́ѧй своѐ мѹ́жество, и҆лѝ сосѹ́дъ въ домѹ̀ потре́бенъ, є҆го́же ѹ҆потреблѧ́етъ владѧ́й и҆́мъ, не́жели лжи́вїи бо́зи: и҆лѝ две́рь въ домѹ̀ стрегѹ́щи ѩ҆̀же въ не́мъ, не́жели лжи́вїи бо́зи: и҆ древѧ́ный сто́лпъ въ домѹ̀ ца́рстѣмъ, не́жели лжи́вїи бо́зи.

⁵⁹Со́лнце бо и҆ лѹна̀ и҆ ѕвѣ́зды, свѣ҄тлы сѹ́ще и҆ посыла́ємы на потре́бѹ, благопослѹшли҄вы сѹ́ть.

⁶⁰Та́кожде и҆ мо́лнїѧ, є҆гда̀ блиста́етъ, благови́дна є҆́сть: та́кожде и҆ вѣ́тръ во все́й странѣ̀ вѣ́етъ.

⁶¹И҆ ѡ҆блакѡ́мъ є҆гда̀ повели́тсѧ ѿ бг҃а и҆тѝ на всю̀ вселе́ннѹю, соверша́ютъ повелѣ́нное.

⁶²Ѻ҆́гнь же пѹ́щенъ свы́ше и҆стреби́ти го́ры и҆ дѹбра҄вы твори́тъ повелѣ́нное: сі́и же ни ѡ҆бразѡ́мъ, нижѐ си́ламъ и҆́хъ ѹ҆подо́блени сѹ́ть.

⁶³Тѣ́мже ни мнѣ́ти мо́щно, ни прозыва́ти и҆̀хъ бы́ти бо́ги, не си҄льнымъ и҆̀мъ сѹ́щымъ ни прю̀ разсѹди́ти, ни добра̀ сотвори́ти человѣ́кѡмъ.

⁶⁴Разѹмѣ́вше ѹ҆̀бо, ѩ҆́кѡ не сѹ́ть бо́зи, не бо́йтесѧ и҆́хъ.

⁶⁵Ни царе́й бо прокленѹ́тъ, нижѐ благословѧ́тъ.

⁶⁶Зна́менїѧ же на небесѝ и҆ во ѩ҆зы́цѣхъ не пока́жѹтъ: ни просвѣтѧ́тъ ѩ҆́кѡ со́лнце, ни ѡ҆свѣтѧ́тъ ѩ҆́кѡ лѹна̀.

⁶⁷Ѕвѣ́рїе лѹ́чше и҆́хъ сѹ́ть, и҆̀же мо́гѹтъ, и҆збѣ́ге под̾ кро́въ, себѐ по́льзовати.

⁶⁸Ни є҆ди́нымъ ѹ҆̀бо ѡ҆́бразомъ є҆́сть на́мъ ѩ҆́вѣ, ѩ҆́кѡ сѹ́ть бо́зи: тѣ́мже не бо́йтесѧ и҆́хъ.

⁶⁹ѩ҆́коже бо во ѻ҆во́щницѣ пѹжа́ло ничесѡ́же храни́тъ, та́кожде и҆ бо́зи и҆́хъ сѹ́ть древѧ́ни и҆ ка́менни, и҆ посре́брени и҆ позлаще́ни.

⁷⁰Тѣ́мъ же ѡ҆́бразомъ и҆ хвра́стъ, и҆́же во ѡ҆гра́дѣ, на не́мже всѧ҄ пти҄цы сѣда́ютъ: та́кожде и҆ мертвецѹ̀ пове́рженѹ во тмѣ̀ подо́бни сѹ́ть бо́зи и҆́хъ, древѧ́ни, позлаще́ни и҆ посре́брени.

⁷¹Ѿ багрѧни́цы, (въ ню́же ѡ҆дѣ́ѧни,) и҆ ѿ мра́мора, и҆́же на ни́хъ плѣ́снивѣетъ, позна́йте, ѩ҆́кѡ не сѹ́ть бо́зи: ті́и бо послѣдѝ и҆з̾ѧде́ни бѹ́дѹтъ ѿ че́рвїѧ и҆ бѹ́дѹтъ во ѹ҆кори́знѹ во странѣ̀.

⁷²Лѹ́чше ѹ҆̀бо є҆́сть человѣ́къ пра́веденъ не и҆мѣ́ѧй кѹмі́рѡвъ, бѹ́детъ бо дале́че ѿ ѹ҆кори́зны.