Read Библия Церковнославянская Варѹ́хъ 1 Bible Online

Варѹ́хъ 1 - Библия Церковнославянская bible

Варѹ́хъ 1

¹Сїѧ҄ словеса̀ кни́ги, ю҆́же написа̀ варѹ́хъ сы́нъ нирі́инъ, сы́на маасе́ева, сы́на седекі́ина, сы́на а҆саде́ева, сы́на хелкі́ина въ вавѷлѡ́нѣ,

²въ пѧ́тое лѣ́то, въ седмы́й де́нь мц҇а, во вре́мѧ, въ не́же взѧ́ша халде́є ї҆ер҇ли́мъ и҆ пожго́ша є҆го̀ ѻ҆гне́мъ.

³И҆ прочтѐ варѹ́хъ словеса̀ кни́ги сеѧ̀ во ѹ҆́шы ї҆ехоні́и сы́на ї҆ѡакі́ма царѧ̀ ї҆ѹ́дина и҆ во ѹ҆́шы всѣ́хъ люді́й приходѧ́щихъ ко кни́зѣ,

⁴и҆ во ѹ҆́шы си́льныхъ и҆ сынѡ́въ ца́рскихъ и҆ во ѹ҆́шы старѣ́йшинъ, и҆ во ѹ҆́шы всѣ́хъ люді́й ѿ ма́ла и҆ до вели́ка и҆́хъ, всѣ́хъ живѹ́щихъ въ вавѷлѡ́нѣ при рѣцѣ̀ сѹ́дъ.

⁵И҆ пла́кахѹсѧ, и҆ постѧ́хѹсѧ, и҆ молѧ́хѹсѧ моли́твами пред̾ гд҇емъ,

⁶и҆ собра́ша сребро̀, ѩ҆́коже когѡ́ждо можа́ше рѹка̀,

⁷и҆ посла́ша во ї҆ер҇ли́мъ ко ї҆ѡакі́мѹ жерцѹ̀ вели́комѹ, сы́нѹ хелкі́инѹ сы́на салѡ́млѧ и҆ ко жерцє́мъ и҆ ко всѣ҄мъ лю́демъ, и҆̀же ѡ҆брѣто́шасѧ съ ни́мъ во ї҆ер҇ли́мѣ,

⁸внегда̀ взѧ̀ сосѹ́ды хра́ма гд҇нѧ и҆знесє́ныѧ ѿ хра́ма возврати́ти на зе́млю ї҆ѹ́динѹ, въ десѧ́тый де́нь мц҇а сива́нъ, сосѹ́ды срє́брѧны, ѩ҆̀же сотворѝ седекі́а сы́нъ ї҆ѡсі́инъ ца́рь ї҆ѹ́динъ,

⁹повнегда̀ преселѝ навѹходоно́соръ ца́рь вавѷлѡ́нскїй ї҆ехоні́ю и҆ кнѧ҄зи, и҆ ѹ҆́зники и҆ си҄льныѧ и҆ лю́ди землѝ ѿ ї҆ер҇ли́ма, и҆ введѐ ѧ҆̀ (свѧ҄заны) въ вавѷлѡ́нъ.

¹⁰И҆ реко́ша: сѐ, посла́хомъ къ ва́мъ сребро̀, да кѹ́пите на сребрѣ̀ всесожжє́нїѧ за грѣ́хъ и҆ ѳѷмїа́мъ, и҆ сотвори́те же́ртвѹ и҆ вознеси́те на же́ртвенникъ гд҇а бг҃а на́шегѡ,

¹¹и҆ моли́тесѧ за житїѐ навѹходоно́сора царѧ̀ вавѷлѡ́нскагѡ и҆ за житїѐ валтаса́ра сы́на є҆гѡ̀, да бѹ́дѹтъ дні́е и҆́хъ, ѩ҆́коже дні́е небе́снїи, на землѝ.

¹²И҆ да да́стъ гд҇ь крѣ́пость на́мъ и҆ да просвѣти́тъ ѻ҆́чи на́ши, и҆ да живе́мъ под̾ сѣ́нїю навѹходоно́сора царѧ̀ вавѷлѡ́нска и҆ под̾ сѣ́нїю валтаса́ра сы́на є҆гѡ̀, да рабо́таемъ и҆̀мъ дни҄ мнѡ́ги и҆ ѡ҆брѧ́щемъ благода́ть пред̾ ни́ми.

¹³И҆ моли́тесѧ за на́съ ко гд҇еви бг҃ѹ на́шемѹ, ѩ҆́кѡ согрѣши́хомъ гд҇еви бг҃ѹ на́шемѹ, и҆ не ѿврати́сѧ ѩ҆́рость гд҇нѧ и҆ гнѣ́въ є҆гѡ̀ ѿ на́съ до сегѡ̀ днѐ.

¹⁴И҆ прочти́те кни́гѹ сїю̀, ю҆́же посла́хомъ къ ва́мъ, и҆сповѣ́дати въ домѹ̀ гд҇ни въ де́нь пра́здника, во дни҄ годовы҄ѧ,

¹⁵и҆ да рече́те: гд҇ѹ бг҃ѹ на́шемѹ пра́вда, а҆ на́мъ стыдѣ́нїе ли́цъ, ѩ҆́коже де́нь се́й, человѣ́кѹ ї҆ѹ́динѹ и҆ живѹ́щымъ во ї҆ер҇ли́мѣ,

¹⁶и҆ царє́мъ на́шымъ и҆ кнѧзє́мъ на́шымъ, и҆ жерцє́мъ на́шымъ и҆ проро́кѡмъ на́шымъ и҆ ѻ҆тцє́мъ на́шымъ:

¹⁷поне́же согрѣши́хомъ пред̾ гд҇емъ

¹⁸и҆ не покори́хомсѧ є҆мѹ̀ и҆ не послѹ́шахомъ гла́са гд҇а бг҃а на́шегѡ ходи́ти въ повелѣ́нїихъ є҆гѡ̀, ѩ҆̀же дадѐ пред̾ лице́мъ на́шимъ.

¹⁹Ѿ днѐ, въ ѻ҆́ньже и҆зведѐ гд҇ь ѻ҆тцы̀ на́шѧ ѿ землѝ є҆гѵ́петски, и҆ до сегѡ̀ днѐ бѣ́хомъ не покарѧ́ющесѧ гд҇еви бг҃ѹ на́шемѹ и҆ ѿмета́хомсѧ, є҆́же не послѹ́шати гла́са є҆гѡ̀.

²⁰И҆ прильпѐ къ на́мъ ѕло̀ и҆ клѧ́тва, ю҆́же сочинѝ гд҇ь мѡѷсе́ю ѻ҆́трокѹ своемѹ̀ въ де́нь, въ ѻ҆́ньже и҆зведѐ гд҇ь ѻ҆тцы̀ на́шѧ ѿ землѝ є҆гѵ́петскїѧ, да́ти на́мъ зе́млю кипѧ́щѹю млеко́мъ и҆ ме́домъ, ѩ҆́коже де́нь се́й.

²¹И҆ не послѹ́шахомъ гла́са гд҇а бг҃а на́шегѡ по всѣ҄мъ словесє́мъ про҇ро́чєскимъ, ѩ҆̀же посла̀ къ на́мъ,

²²и҆ хожда́хомъ кі́йждо на́съ по ра́зѹмѹ се́рдца своегѡ̀ ѕла́гѡ рабо́тати богѡ́мъ и҆нѣ҄мъ, твори́ти ѕла҄ѧ пред̾ ѻ҆чи́ма гд҇а бг҃а на́шегѡ.