Read Библия Церковнославянская Варѹ́хъ 2 Bible Online

Варѹ́хъ 2 - Библия Церковнославянская bible

Варѹ́хъ 2

¹И҆ ѹ҆ста́ви гд҇ь сло́во своѐ, є҆́же гл҃а на на́съ и҆ на сѹді́й на́шихъ, сѹди́вшихъ во ї҆и҃ли, и҆ на цари҄ на́шѧ и҆ на кнѧ҄зи на́шѧ, и҆ на всѧ́каго человѣ́ка ї҆и҃лева и҆ ї҆ѹ́дина,

²навестѝ на ны̀ ѕло̀ ве́лїе, є҆́же не сотвори́сѧ под̾ всѣ́мъ небесе́мъ, ѩ҆́коже сотвори́сѧ во ї҆ер҇ли́мѣ, по пи҄саннымъ въ зако́нѣ мѡѷсе́овѣ,

³є҆́же ѩ҆́сти на́мъ пло́ть человѣ́ческѹ сы́на своегѡ̀ и҆ пло́ть человѣ́ческѹ дще́ре своеѧ̀.

⁴И҆ дадѐ ѧ҆̀ подрѹ҄чны всѣ҄мъ ца́рствамъ, ѩ҆̀же ѡ҆́крестъ на́съ, на ѹ҆кори́знѹ и҆ въ непрохожде́нїе во всѣ́хъ лю́дехъ, и҆̀же ѡ҆́крестъ на́съ, а҆́може и҆̀хъ разсѣ́ѧ гд҇ь.

⁵И҆ бы́хомъ во и҆сподѝ, а҆ не въ верхѹ̀, ѩ҆́кѡ согрѣши́хомъ гд҇еви бг҃ѹ на́шемѹ, не слѹ́шающе гла́са є҆гѡ̀.

⁶Гд҇еви бг҃ѹ на́шемѹ пра́вда, на́мъ же и҆ ѻ҆тцє́мъ на́шымъ стыдѣ́нїе ли́цъ, ѩ҆́коже де́нь се́й.

⁷ѩ҆̀же гл҃а гд҇ь на на́съ всѧ҄ ѕла҄ѧ, сїѧ҄ прїидо́ша на ны̀,

⁸занѐ не моли́хомсѧ лицѹ̀ гд҇ню, є҆́же ѿврати́тисѧ комѹ́ждо ѿ мы́слей се́рдца своегѡ̀ ѕла́гѡ.

⁹И҆ ѹ҆бѹди́сѧ гд҇ь ѡ҆ ѕло́бахъ и҆ наведѐ на на́съ сїѧ҄, (ѩ҆̀же постиго́ша ны̀,) ѩ҆́кѡ првднъ гд҇ь во всѣ́хъ дѣ́лѣхъ свои́хъ, ѩ҆̀же заповѣ́да на́мъ.

¹⁰И҆ не послѹ́шахомъ гла́са є҆гѡ̀ ходи́ти въ повелѣ́нїихъ є҆гѡ̀, ѩ҆̀же дадѐ пред̾ лице́мъ на́шимъ.

¹¹И҆ нн҃ѣ, гд҇и бж҃е ї҆и҃левъ, и҆́же и҆зве́лъ є҆сѝ лю́ди твоѧ҄ и҆з̾ землѝ є҆гѵ́петскїѧ рѹко́ю крѣ́пкою и҆ мы́шцею высо́кою, зна́мєнїи и҆ чѹдесы̀ и҆ си́лою вели́кою, и҆ сотвори́лъ є҆сѝ себѣ̀ и҆́мѧ, ѩ҆́коже де́нь се́й,

¹²согрѣши́хомъ, нече́ствовахомъ, непра́вдовахомъ, гд҇и бж҃е на́шъ, во всѣ́хъ ѡ҆правда́нїихъ твои́хъ.

¹³Да ѿврати́тсѧ ѹ҆̀бо ѿ на́съ ѩ҆́рость твоѧ̀, ѩ҆́кѡ ѡ҆ста́сѧ на́съ ма́лѡ во ѩ҆зы́цѣхъ, а҆́може разсѣ́ѧлъ ны̀ є҆сѝ.

¹⁴Ѹ҆слы́ши, гд҇и, моли́твѹ на́шѹ и҆ проше́нїе на́ше, и҆ и҆зба́ви на́съ тебє̀ ра́ди, и҆ да́ждь на́мъ благода́ть пред̾ лице́мъ пресели́вшихъ на́съ:

¹⁵да ѹ҆вѣ́сть всѧ̀ землѧ̀, ѩ҆́кѡ ты̀ гд҇ь бг҃ъ на́шъ, и҆ ѩ҆́кѡ и҆́мѧ твоѐ призва́сѧ на ї҆и҃ли и҆ на пле́мени є҆гѡ̀.

¹⁶Гд҇и, при́зри и҆з̾ до́мѹ ст҃а́гѡ твоегѡ̀ на на́съ и҆ вонмѝ на́мъ, и҆ приклонѝ ѹ҆́хо твоѐ и҆ ѹ҆слы́ши на́съ.

¹⁷Ѿве́рзи, гд҇и, ѻ҆́чи твоѝ и҆ ви́ждь, ѩ҆́кѡ не ѹ҆ме́ршїи, и҆̀же во а҆́дѣ, и҆́хже взѧ́сѧ дѹ́хъ и҆́хъ ѿ ѹ҆тро́бъ и҆́хъ, воздадѧ́тъ тебѣ̀ сла́вѹ и҆ ѡ҆правда́нїе гд҇еви:

¹⁸но дѹша̀ сѣ́тѹющаѧ ѡ҆ вели́чествѣ ѕла̀, и҆́же хо́дитъ слѧ́ченъ и҆ болѧ́й, и҆ ѻ҆́чи ѡ҆скѹдѣва́ющїи, и҆ дѹша̀ а҆́лчѹщаѧ воздадѧ́тъ тебѣ̀ сла́вѹ и҆ пра́вдѹ, гд҇и!

¹⁹ѩ҆́кѡ не по ѡ҆правда́нїємъ ѻ҆тє́цъ на́шихъ, ни царе́й на́шихъ (и҆злива́емъ мѡли́твы) мы̀, и҆ предлага́емъ мѡли́твы на́шѧ пред̾ лице́мъ твои́мъ, гд҇и бж҃е на́шъ!

²⁰ѩ҆́кѡ посла́лъ є҆сѝ ѩ҆́рость твою̀ и҆ гнѣ́въ тво́й на на́съ, ѩ҆́коже гл҃алъ є҆сѝ рѹко́ю ѻ҆́трѡкъ твои́хъ про҇рѡ́къ, гл҃ѧ:

²¹та́кѡ речѐ гд҇ь: приклони́те ра́мена ва҄ша и҆ послѹжи́те царю̀ вавѷлѡ́нскомѹ, и҆ сѣди́те на землѝ, ю҆́же да́хъ ѻ҆тцє́мъ ва́шымъ:

²²и҆ а҆́ще не послѹ́шаете гла́са гд҇нѧ, є҆́же рабо́тати царю̀ вавѷлѡ́нскѹ, ѡ҆скѹдѣ́нїе сотворю̀ и҆з̾ градѡ́въ ї҆ѹ́диныхъ и҆ внѣѹ́дѹ ї҆ер҇ли́ма,

²³и҆ ѿимѹ̀ (ѿ ва́съ) гла́съ весе́лїѧ и҆ гла́съ ра́дованїѧ, гла́съ жениха̀ и҆ гла́съ невѣ́сты, и҆ бѹ́детъ всѧ̀ землѧ̀ въ непрохожде́нїе ѿ живѹ́щихъ.

²⁴И҆ не послѹ́шахомъ гла́са твоегѡ̀ слѹжи́ти царю̀ вавѷлѡ́нскѹ: и҆ ѹ҆ста́вилъ є҆сѝ словеса̀ твоѧ҄, ѩ҆̀же гл҃алъ є҆сѝ рѹко́ю ѻ҆́трѡкъ твои́хъ про҇ро́кѡвъ, є҆́же и҆знестѝ кѡ́сти царе́й на́шихъ и҆ кѡ́сти ѻ҆тє́цъ на́шихъ ѿ мѣ́ста и҆́хъ.

²⁵И҆ сѐ, сѹ́ть и҆зве́ржєны зно́ю дневно́мѹ и҆ стѹ́дени нощнѣ́й, и҆ и҆зомро́ша болѣ́зньми ѕлы́ми, гла́домъ и҆ мече́мъ и҆ затче́нїемъ.

²⁶И҆ положи́лъ є҆сѝ до́мъ тво́й, въ не́мже нарѣче́сѧ и҆́мѧ твоѐ, ѩ҆́коже де́нь се́й, ѕло́бы ра́ди до́мѹ ї҆и҃лева и҆ до́мѹ ї҆ѹ́дина.

²⁷И҆ сотвори́лъ є҆сѝ въ на́съ, гд҇и бж҃е на́шъ, по все́й ти́хости твое́й и҆ по всѣ҄мъ щедро́тамъ твои҄мъ вели҄кимъ,

²⁸ѩ҆́коже гл҃алъ є҆сѝ рѹко́ю раба̀ твоегѡ̀ мѡѷсе́а въ де́нь, въ ѻ҆́ньже заповѣ́далъ є҆сѝ є҆мѹ̀ вписа́ти зако́нъ тво́й пред̾ сы҄ны ї҆и҃левыми, гл҃ѧ:

²⁹а҆́ще не послѹ́шаете гла́са моегѡ̀, мно́жество сїѐ вели́кое и҆ мно́гое ѡ҆брати́тсѧ въ ма́лъ ѩ҆зы́къ во ѩ҆зы́цѣхъ, а҆́може а҆́зъ разсѣ́ю ѧ҆̀:

³⁰разѹмѣ́хъ бо, ѩ҆́кѡ не и҆́мѹтъ послѹ́шати менѐ, ѩ҆́кѡ лю́дїе жестоковы́йни сѹ́ть, и҆ ѡ҆братѧ́тсѧ къ се́рдцѹ своемѹ̀ на землѝ преселе́нїѧ своегѡ̀,

³¹и҆ ѹ҆вѣ́дѧтъ, ѩ҆́кѡ а҆́зъ гд҇ь бг҃ъ и҆́хъ: и҆ да́мъ и҆̀мъ се́рдце, (и҆ ѹ҆разѹмѣ́ютъ,) и҆ ѹ҆́шы, и҆ ѹ҆слы́шатъ,

³²и҆ похва́лѧтъ мѧ̀ на землѝ преселе́нїѧ своегѡ̀, и҆ помѧнѹ́тъ и҆́мѧ моѐ,

³³и҆ ѡ҆братѧ́тсѧ ѿ хребта̀ своегѡ̀ же́стокагѡ и҆ ѿ ѕло́бъ свои́хъ, ѩ҆́кѡ помѧнѹ́тъ пѹ́ть ѻ҆тє́цъ свои́хъ согрѣши́вшихъ пред̾ гд҇емъ:

³⁴и҆ возвращѹ̀ ѧ҆̀ на зе́млю, є҆́юже клѧ́хсѧ ѻ҆тцє́мъ и҆́хъ, а҆враа́мѹ и҆ ї҆саа́кѹ и҆ ї҆а́кѡвѹ, и҆ воз̾ѡблада́ютъ є҆́ю: и҆ ѹ҆мно́жѹ ѧ҆̀, и҆ не ѹ҆ма́лѧтсѧ:

³⁵и҆ ѹ҆ста́влю и҆̀мъ завѣ́тъ вѣ́ченъ, є҆́же бы́ти мнѣ̀ и҆̀мъ въ бг҃а, и҆ ті́и бѹ́дѹтъ мнѣ̀ лю́дїе: и҆ не подви́гнѹ ктомѹ̀ люді́й мои́хъ ї҆и҃лѧ и҆ землѝ, ю҆́же да́хъ и҆̀мъ.