Read Библия Церковнославянская Варѹ́хъ 3 Bible Online

Варѹ́хъ 3 - Библия Церковнославянская bible

Варѹ́хъ 3

¹Гд҇и вседержи́телю, бж҃е ї҆и҃левъ, дѹша̀ въ тѣснотѣ̀ и҆ дѹ́хъ въ стѹже́нїи возопѝ къ тебѣ̀:

²ѹ҆слы́ши, гд҇и, и҆ поми́лѹй, ѩ҆́кѡ є҆сѝ бг҃ъ мл҇рдъ, и҆ поми́лѹй на́съ, ѩ҆́кѡ согрѣши́хомъ пред̾ тобо́ю:

³ѩ҆́кѡ ты̀ пребыва́ѧй во вѣ́къ, мы́ же погиба́ющїи во вѣ́къ.

⁴Гд҇и вседержи́телю, бж҃е ї҆и҃левъ, ѹ҆слы́ши моли́твѹ ѹ҆ме́ршихъ ї҆и҃левыхъ и҆ сынѡ́въ согрѣши́вшихъ пред̾ тобо́ю, и҆̀же не послѹ́шаша гла́са гд҇а бг҃а своегѡ̀, и҆ прильпо́ша на́мъ ѕла҄ѧ.

⁵Не помѧнѝ непра́вдъ ѻ҆тє́цъ на́шихъ, но помѧнѝ рѹ́кѹ твою̀ и҆ и҆́мѧ твоѐ въ сїѐ вре́мѧ,

⁶ѩ҆́кѡ ты̀ гд҇ь бг҃ъ на́шъ, и҆ похва́лимъ тѧ̀, гд҇и:

⁷ѩ҆́кѡ тогѡ̀ ра́ди да́лъ є҆сѝ стра́хъ тво́й въ се́рдце на́ше, є҆́же призыва́ти и҆́мѧ твоѐ, и҆ похва́лимъ тѧ̀ во преселе́нїи на́шемъ, ѩ҆́кѡ ѿврати́хомъ ѿ се́рдца на́шегѡ всю̀ непра́вдѹ ѻ҆тє́цъ на́шихъ согрѣши́вшихъ пред̾ тобо́ю.

⁸Сѐ, мы̀ дне́сь во преселе́нїи на́шемъ, а҆́може ны̀ разсы́палъ є҆сѝ на ѹ҆кори́знѹ и҆ на клѧ́твѹ и҆ на ѹ҆держа́нїе, по всѣ҄мъ непра́вдамъ ѻ҆тє́цъ на́шихъ, и҆̀же ѿстѹпи́ша ѿ тебє̀, гд҇и бж҃е на́шъ.

⁹Слы́ши, ї҆и҃лю, за́пѡвѣди живота̀, внѹшѝ разѹмѣ́ти смышле́нїе.

¹⁰Что̀ є҆́сть, ї҆и҃лю; что̀ ѩ҆́кѡ є҆сѝ на землѝ вра́жїи; ѡ҆бетша́лъ є҆сѝ на землѝ чѹжде́й, ѡ҆скверни́лсѧ є҆сѝ съ ме́ртвыми,

¹¹вмѣни́лсѧ є҆сѝ съ сѹ́щими во а҆́дѣ,

¹²ѡ҆ста́вилъ є҆сѝ и҆сто́чника премѹ́дрости.

¹³А҆́ще бы пѹте́мъ бж҃їимъ ходи́лъ є҆сѝ, жи́лъ бы въ ми́рѣ во вре́мѧ вѣ́чное.

¹⁴Наѹчи́сѧ, гдѣ̀ є҆́сть смышле́нїе, гдѣ̀ є҆́сть крѣ́пость, гдѣ̀ є҆́сть мѹ́дрость; є҆́же разѹмѣ́ти кѹ́пнѡ, гдѣ̀ є҆́сть долгожи́тїе и҆ жи́знь, гдѣ̀ є҆́сть свѣ́тъ ѻ҆че́съ и҆ ми́ръ;

¹⁵Кто̀ ѡ҆брѣ́те мѣ́сто є҆ѧ̀, и҆ кто̀ вни́де въ сокрѡ́вища є҆ѧ̀;

¹⁶Гдѣ̀ сѹ́ть кнѧ҄зи ѩ҆зы́честїи и҆ владѣ́ющїи ѕвѣрьмѝ сѹ́щими на землѝ, и҆гра́ющїи пти́цами небе́сными

¹⁷и҆ хранѧ́щїи зла́то и҆ сребро̀, на не́же ѹ҆пова́ша человѣ́цы, и҆ нѣ́сть конца̀ стѧжа́нїю и҆́хъ;

¹⁸ѩ҆́кѡ дѣ́лающїи сребро̀ и҆ пекѹ́щїисѧ, и҆ нѣ́сть и҆з̾ѡбрѣ́тенїѧ дѣ́лъ и҆́хъ.

¹⁹Погибо́ша и҆ во а҆́дъ снидо́ша, и҆ и҆ні́и вмѣ́стѡ и҆́хъ воста́ша.

²⁰Ю҆нѣ́йшїи ви́дѣша свѣ́тъ и҆ всели́шасѧ на землѝ, пѹти́ же хи́трости не ѹ҆вѣ́дѣша,

²¹ни разѹмѣ́ша сте́зь є҆ѧ̀, нижѐ прїѧ́ша є҆ѧ̀ сы́нове и҆́хъ, ѿ пѹтѝ своегѡ̀ дале́че бы́ша.

²²И҆ не слы́шасѧ въ ханаа́нѣ, нижѐ ѩ҆ви́сѧ во ѳема́нѣ:

²³сы́нове а҆га́рини взыскѹ́ющїи ра́зѹма, и҆̀же на землѝ, кѹпцы̀ мера҄ни и҆ ѳема҄ни, и҆ басносло́вцы и҆ взыска́телїе ра́зѹма, пѹтѝ премѹ́дрости не ѹ҆вѣ́дѣша, нижѐ помѧнѹ́ша сте́зь є҆ѧ̀.

²⁴Ѽ, ї҆и҃лю, ко́ль вели́къ до́мъ бж҃їй и҆ простра́нно мѣ́сто селе́нїѧ є҆гѡ̀!

²⁵Вели́ко и҆ не и҆́мать конца̀, высо́ко и҆ безмѣ́рно.

²⁶Та́мѡ бы́ша и҆споли́ни и҆мени́тїи, бы́вшїи и҆спе́рва ѕѣлѡ̀ вели́цы, ѹ҆мѣ́юще воева́ти.

²⁷Не си́хъ и҆збра̀ бг҃ъ, ни пѹтѝ хи́тростнагѡ дадѐ и҆̀мъ,

²⁸и҆ погибо́ша, зане́же не и҆мѣ́ша мѹ́дрости, погибо́ша за безсовѣ́тїе своѐ.

²⁹Кто̀ взы́де на не́бо, и҆ взѧ̀ ю҆̀, и҆ снесѐ ю҆̀ ѿ ѡ҆́блакъ;

³⁰Кто̀ пре́йде на ѻ҆́нѹ странѹ̀ мо́рѧ, и҆ ѡ҆брѣ́те ю҆̀, и҆ во́зметъ ю҆̀ за зла́то и҆збра́нно;

³¹Нѣ́сть вѣ́дѹщагѡ пѹ́ть є҆ѧ̀, ни помышлѧ́ющагѡ сте́зь є҆ѧ̀:

³²но вѣ́дый всѧ҄ вѣ́сть ю҆̀, и҆з̾ѡбрѣ́те ю҆̀ смы́сломъ свои́мъ: сотвори́вый зе́млю въ вѣ́чное вре́мѧ напо́лни ю҆̀ ското́мъ двоно́жнымъ и҆ четвероно́жнымъ.

³³Посыла́ѧй свѣ́тъ, и҆ и҆́детъ: призва̀ є҆го̀, и҆ послѹ́ша є҆гѡ̀ со тре́петомъ.

³⁴Ѕвѣ́зды же возсїѧ́ша во храни́лищихъ свои́хъ и҆ возвесели́шасѧ.

³⁵Призва̀ ѧ҆̀, и҆ реко́ша: прїидо́хомъ: возсїѧ́ша съ весе́лїемъ сотво́ршемѹ ѧ҆̀.

³⁶Се́й бг҃ъ на́шъ, не вмѣни́тсѧ и҆́нъ къ немѹ̀.

³⁷И҆з̾ѡбрѣ́те всѧ́къ пѹ́ть хи́трости и҆ дадѐ ю҆̀ ї҆а́кѡвѹ ѻ҆́трокѹ своемѹ̀ и҆ ї҆и҃лю возлю́бленномѹ ѿ негѡ̀.

³⁸Посе́мъ на землѝ ѩ҆ви́сѧ и҆ съ человѣ҄ки поживѐ.