Read Библия Церковнославянская Варѹ́хъ 4 Bible Online

Варѹ́хъ 4 - Библия Церковнославянская bible

Варѹ́хъ 4

¹Сїѧ̀ кни́га повелѣ́нїй бж҃їихъ и҆ зако́нъ сы́й во вѣ́къ: всѝ держа́щїисѧ є҆ѧ̀ въ живо́тъ (вни́дѹтъ), ѡ҆ста́вившїи же ю҆̀ ѹ҆́мрѹтъ.

²Ѡ҆брати́сѧ, ї҆а́кѡве, и҆ и҆ми́сѧ є҆ѧ̀, ходѝ ко сїѧ́нїю прѧ́мѡ свѣ́та є҆ѧ̀.

³Не да́ждь и҆но́мѹ сла́вы твоеѧ̀, и҆ поле́зныхъ тебѣ̀ ѩ҆зы́кѹ чѹжде́мѹ.

⁴Блаже́ни є҆смы̀, ї҆и҃лю, ѩ҆́кѡ ѹ҆гѡ́днаѧ бг҃ѹ на́мъ разѹ҄мна сѹ́ть.

⁵Дерза́йте, лю́дїе моѝ, па́мѧть ї҆и҃лева.

⁶Про́дани бы́сте ѩ҆зы́кѡмъ не на па́гѹбѹ: поне́же разгнѣ́васте бг҃а, пре́дани бы́сте сѹпоста́тѡмъ,

⁷преѡгорчи́сте бо сотво́ршаго ва́съ, (бг҃а вѣ́чнаго,) поже́рше бѣсѡ́мъ, а҆ не бг҃ѹ:

⁸забы́сте бо гд҇а пита́ющаго ва́съ, ѡ҆печа́листе же и҆ воспита́вшаго ва́съ ї҆ер҇ли́ма.

⁹Ви́дѣ бо наше́дшїй ва́мъ гнѣ́въ ѿ бг҃а и҆ речѐ: слы́шите, присє́лницы сїѡ҄ни, наведе́ бо мѝ гд҇ь сѣ́тованїе вели́ко,

¹⁰ви́дѣхъ бо плѣне́нїе люді́й сынѡ́въ мои́хъ и҆ дще́рей, є҆́же наведѐ и҆̀мъ вѣ́чный.

¹¹Пита́хъ бо ѧ҆̀ съ весе́лїемъ, и҆спѹсти́хъ же ѧ҆̀ съ пла́чемъ и҆ рыда́нїемъ.

¹²Никто́же да ра́дѹетсѧ ѡ҆ мнѣ̀ вдови́цѣ и҆ ѡ҆ста́вленнѣй ѿ мно́гихъ, ѡ҆пѹстѣ́хъ за грѣхѝ ча҄дъ мои́хъ, поне́же ѹ҆клони́шасѧ ѿ зако́на бж҃їѧ,

¹³и҆ ѡ҆правда́нїй є҆гѡ̀ не позна́ша, и҆ не ходи́ша въ пѹте́хъ за́повѣдїй бж҃їихъ, нижѐ стезьмѝ наказа́нїѧ въ пра́вдѣ є҆гѡ̀ стѹпа́ша.

¹⁴Да прїи́дѹтъ ѡ҆кре́стнїи сїѡ҄ни, и҆ помѧни́те плѣне́нїе сынѡ́въ мои́хъ и҆ дще́рей, є҆́же наведѐ и҆̀мъ вѣ́чный:

¹⁵наведе́ бо на нѧ̀ ѩ҆зы́къ и҆здале́ча, ѩ҆зы́къ безстѹ́дный и҆ и҆ноѧзы́чный:

¹⁶поне́же не ѹ҆срами́шасѧ ста́рца, ни поми́ловаша ѻ҆троча́те, и҆ ѿведо́ша любе́зныхъ вдови́чихъ, и҆ ѿ дще́рей є҆ди́нѹ ѡ҆пѹстоши́ша.

¹⁷А҆́зъ же ка́кѡ мо́щенъ помощѝ ва́мъ;

¹⁸Наведы́й бо ва́мъ ѕла҄ѧ и҆зба́витъ ва́съ ѿ рѹкѝ вра҄гъ ва́шихъ.

¹⁹И҆ди́те, ча҄да, и҆ди́те: а҆́зъ бо ѡ҆ста́хсѧ пѹста̀,

²⁰совлеко́хсѧ ри́зы ми́рныѧ, ѡ҆блеко́хсѧ же во вре́тище моле́нїѧ моегѡ̀: возопїю̀ къ вѣ́чномѹ во дни҄ моѧ҄.

²¹Дерза́йте, ча҄да, возопі́йте къ бг҃ѹ, и҆ и҆зба́витъ ва́съ ѿ наси́лїѧ рѹкѝ вра́жїѧ.

²²А҆́зъ бо (и҆спе́рва) надѣ́ѧхсѧ на вѣ́чнаго ѡ҆ спасе́нїи ва́шемъ: и҆ прїи́де мѝ ра́дость ѿ ст҃а́гѡ въ поми́лованїи, є҆́же прїи́детъ ва́мъ вско́рѣ ѿ вѣ́чнагѡ сп҃са на́шегѡ.

²³И҆спѹсти́хъ бо ва́съ съ рыда́нїемъ и҆ пла́чемъ, ѿда́стъ же мѝ бг҃ъ ва́съ съ ра́достїю и҆ весе́лїемъ въ вѣ́къ.

²⁴ѩ҆́коже бо нн҃ѣ ви́дѣша присє́лницы сїѡ҄ни ва́ше плѣне́нїе (ѿ бг҃а), та́кожде ѹ҆́зрѧтъ вско́рѣ сп҃се́нїе ва́ше ѿ бг҃а, є҆́же прїи́детъ ва́мъ со сла́вою вели́кою и҆ со ѡ҆свѣще́нїемъ вѣ́чнагѡ.

²⁵Ча҄да, долготерпи́те и҆́же ѿ бг҃а наше́дшїй ва́мъ гнѣ́въ, гони́лъ бо тѧ̀ вра́гъ тво́й, и҆ ѹ҆́зриши па́гѹбѹ є҆гѡ̀ вско́рѣ и҆ на вы́ю є҆гѡ̀ настѹ́пиши.

²⁶Младі́и моѝ ходи́ша въ пѹти҄ же́стѡки, восхище́ни сѹ́ть, ѩ҆́коже ста́до похище́но врага́ми.

²⁷Дерза́йте, ча҄да, и҆ возопі́йте къ бг҃ѹ, бѹ́детъ бо ва́мъ ѿ наве́дшагѡ па́мѧть.

²⁸ѩ҆́коже бо бы́сть ѹ҆́мъ ва́шъ заблѹди́ти ва́мъ ѿ бг҃а, та́кѡ нн҃ѣ десѧти́жды ѹ҆сѹгѹби́те ѡ҆брати́вшесѧ взыска́ти є҆го̀:

²⁹наведы́й бо ва́мъ ѕла҄ѧ наведе́тъ ва́мъ вѣ́чное весе́лїе со сп҃се́нїемъ ва́шимъ.

³⁰Дерза́й, ї҆ер҇ли́ме, ѹ҆тѣ́шитъ тѧ̀ нарекі́й тебѐ.

³¹Ѡ҆каѧ́нни ѡ҆ѕло́бившїи тѧ̀ и҆ ра́довавшїисѧ ѡ҆ паде́нїи твое́мъ, (мще́нїе бѹ́детъ над̾ ни́ми).

³²Ѡ҆каѧ́нни гра́ди, и҆̀мже порабо́таша ча҄да твоѧ҄, ѡ҆каѧ́нна прїи́мшаѧ сы́ны твоѧ҄.

³³ѩ҆́коже бо пора́довасѧ ѡ҆ твое́мъ паде́нїи и҆ возвесели́сѧ ѡ҆ разоре́нїи твое́мъ, та́кожде ѡ҆печа́литсѧ ѡ҆ свое́мъ запѹстѣ́нїи.

³⁴И҆ ѿсѣкѹ̀ ѿ неѧ̀ весе́лїе многонаро́дства, и҆ велича́нїе є҆ѧ̀ бѹ́детъ въ рыда́нїе.

³⁵Ѻ҆́гнь и҆ на́йдетъ на ню̀ ѿ вѣ́чнагѡ во дни҄ мнѡ́ги, и҆ насели́тсѧ бѣ́сами на мно́жайшее вре́мѧ.

³⁶Воззрѝ на восто́къ, ї҆ер҇ли́ме, и҆ ви́ждь весе́лїе грѧдѹ́щее тебѣ̀ ѿ бг҃а.

³⁷Сѐ, грѧдѹ́тъ сы́нове твоѝ, и҆̀хже и҆спѹсти́лъ є҆сѝ, грѧдѹ́тъ со́брани ѿ востѡ́къ да́же до за҄падъ сло́вомъ ст҃а́гѡ, ра́дѹющесѧ ѡ҆ сла́вѣ бж҃їей.