Read Библия Церковнославянская I҆езекі́илѧ 11 Bible Online

I҆езекі́илѧ 11 - Библия Церковнославянская bible

I҆езекі́илѧ 11

¹И҆ воздви́же мѧ̀ дѹ́хъ и҆ возведѐ мѧ̀ ко вратѡ́мъ до́мѹ гд҇нѧ, ѩ҆̀же прѧ́мѡ зрѧ́тъ на восто́къ: и҆ сѐ, пред̾ преддве́рїемъ вра́тъ ѩ҆́кѡ два́десѧть и҆ пѧ́ть мѹже́й: и҆ ви́дѣхъ средѣ̀ и҆́хъ ї҆ехоні́ю сы́на ї҆азе́рова и҆ фалті́ю ване́ова, старѣ҄йшины людскї҄ѧ.

²И҆ речѐ гд҇ь ко мнѣ̀: сы́не человѣ́чь, сі́и мѹ́жїе помышлѧ́ющїи сѹ́єтнаѧ и҆ совѣ́тъ творѧ́щїи лѹка́въ во гра́дѣ се́мъ,

³глаго́лющїи: не въ но́вѣ ли согради́шасѧ до́мове; се́й є҆́сть коно́бъ, мы́ же мѧса̀.

⁴Сегѡ̀ ра́ди прорцы̀ на нѧ̀, прорцы̀, сы́не человѣ́чь.

⁵И҆ нападѐ на мѧ̀ дх҃ъ гд҇ень и҆ речѐ ко мнѣ̀: глаго́ли, сїѧ҄ гл҃етъ гд҇ь: та́кѡ реко́сте, до́ме ї҆и҃левъ, и҆ ѹ҆мышлє́нїѧ дѹ́ха ва́шегѡ а҆́зъ вѣ́мъ:

⁶ѹ҆мно́жисте мертвецы̀ ва́шѧ во гра́дѣ се́мъ и҆ напо́лнисте пѹти҄ є҆гѡ̀ ѩ҆́звенныхъ.

⁷Тогѡ̀ ра́ди та́кѡ гл҃етъ а҆дѡнаї̀ гд҇ь: мертвецы̀ ва́ши, ѩ҆̀же и҆зби́сте средѣ̀ є҆гѡ̀, ті́и сѹ́ть мѧса̀, а҆ се́й коно́бъ є҆́сть, и҆ ва́съ и҆зведѹ̀ ѿ среды̀ є҆гѡ̀.

⁸Меча̀ боите́сѧ, и҆ ме́чь наведѹ̀ на ва́съ, гл҃етъ а҆дѡнаї̀ гд҇ь:

⁹и҆ и҆зведѹ̀ ва́съ ѿ среды̀ є҆гѡ̀ и҆ преда́мъ ва́съ въ рѹ́цѣ чѹжди́хъ и҆ сотворю̀ въ ва́съ сѹ́дъ:

¹⁰мече́мъ паде́те, на гора́хъ ї҆и҃левыхъ сѹждѹ̀ ва́мъ, и҆ ѹ҆вѣ́сте, ѩ҆́кѡ а҆́зъ гд҇ь:

¹¹то́й не бѹ́детъ ва́мъ въ коно́бъ, и҆ вы̀ не бѹ́дете посредѣ̀ є҆гѡ̀ въ мѧса̀: на гора́хъ ї҆и҃левыхъ сѹждѹ̀ ва́мъ,

¹²и҆ ѹ҆вѣ́сте, ѩ҆́кѡ а҆́зъ гд҇ь, ѩ҆́кѡ по за́повѣдемъ мои҄мъ не ходи́сте и҆ сѹдѡ́въ мои́хъ не сотвори́сте, но по ѡ҆бы́чаємъ ѩ҆зы́кѡвъ сѹ́щихъ ѡ҆́крестъ ва́съ сотвори́сте.

¹³И҆ бы́сть внегда̀ прорица́ти мѝ, и҆ фалті́а сы́нъ ване́овъ ѹ҆́мре: и҆ падо́хъ ни́цъ и҆ возопи́хъ гла́сомъ вели́кимъ, глаго́лѧ: го́ре мнѣ̀, лю́тѣ мнѣ̀, а҆дѡнаю̀ гд҇и! на сконча́нїе ли твори́ши ты̀ ѡ҆ста́нки ї҆и҃лєвы;

¹⁴И҆ бы́сть сло́во гд҇не ко мнѣ̀ гл҃ѧ:

¹⁵сы́не человѣ́чь, бра́тїѧ твоѧ҄ и҆ мѹ́жїе плѣ́на твоегѡ̀ и҆ ве́сь до́мъ ї҆и҃левъ сконча́сѧ, и҆̀мже реко́ша живѹ́щїи во ї҆ер҇ли́мѣ: дале́че ѹ҆дали́тесѧ ѿ гд҇а, на́мъ дана̀ є҆́сть землѧ̀ въ наслѣ́дїе.

¹⁶Сегѡ̀ ра́ди реко́хъ: сїѧ҄ гл҃етъ а҆дѡнаї̀ гд҇ь: ѩ҆́кѡ ѿри́нѹ ѧ҆̀ во ѩ҆зы́ки и҆ разсѣ́ю ѧ҆̀ по все́й землѝ, и҆ бѹ́дѹ и҆̀мъ во ѡ҆свѧще́нїе ма́ло во страна́хъ, а҆́може вни́дѹтъ та́мѡ.

¹⁷Сегѡ̀ ра́ди рцы̀: сїѧ҄ гл҃етъ а҆дѡнаї̀ гд҇ь: и҆ прїимѹ̀ ѧ҆̀ ѿ ѩ҆зы҄къ и҆ соберѹ̀ ѧ҆̀ ѿ стра́нъ, и҆дѣ́же разсѣ́ѧхъ ѧ҆̀ въ ни́хъ, и҆ да́мъ и҆̀мъ зе́млю ї҆и҃левѹ:

¹⁸и҆ вни́дѹтъ та́мѡ и҆ ѿве́ргѹтъ всѧ҄ ме́рзѡсти є҆ѧ̀ и҆ всѧ҄ беззакѡ́нїѧ є҆ѧ̀ ѿ неѧ̀:

¹⁹и҆ да́мъ и҆̀мъ се́рдце и҆́но и҆ дѹ́хъ но́въ да́мъ и҆̀мъ, и҆ и҆сто́ргнѹ ка́менное се́рдце ѿ пло́ти и҆́хъ и҆ да́мъ и҆̀мъ се́рдце пло́тѧно,

²⁰ѩ҆́кѡ да въ за́повѣдехъ мои́хъ хо́дѧтъ и҆ ѡ҆правда҄нїѧ моѧ҄ сохранѧ́тъ и҆ сотворѧ́тъ ѧ҆̀: и҆ бѹ́дѹтъ мѝ въ лю́ди, и҆ а҆́зъ и҆̀мъ бѹ́дѹ въ бг҃а.

²¹А҆ и҆́хже се́рдце по гнѹ́сностемъ и҆́хъ и҆ по беззако́нїємъ и҆́хъ хо́дитъ, пѹти҄ тѣ́хъ на главы҄ и҆́хъ положѹ̀, гл҃етъ а҆дѡнаї̀ гд҇ь.

²²И҆ воздвиго́ша херѹві́ми кри́ла своѧ҄, и҆ коле́са держа҄щаѧсѧ и҆́хъ: сла́ва же бг҃а ї҆и҃лева бѣ̀ на ни́хъ свы́ше и҆́хъ.

²³И҆ взы́де сла́ва гд҇нѧ ѿ среды̀ гра́да и҆ ста̀ на горѣ̀, ѩ҆́же бѧ́ше прѧ́мѡ гра́да на восто́къ.

²⁴И҆ дѹ́хъ взѧ̀ мѧ̀ и҆ принесѐ мѧ̀ на зе́млю халде́йскѹ въ плѣ́нники, въ видѣ́нїи, дх҃омъ бж҃їимъ.

²⁵И҆ взыдо́хъ ѿ видѣ́нїѧ, є҆́же ви́дѣхъ, и҆ глаго́лахъ ко плѣ́нникѡмъ всѧ҄ словеса̀ гд҇нѧ, ѩ҆̀же показа̀ мнѣ̀.