Read Библия Церковнославянская I҆езекі́илѧ 15 Bible Online

I҆езекі́илѧ 15 - Библия Церковнославянская bible

I҆езекі́илѧ 15

¹И҆ бы́сть сло́во гд҇не ко мнѣ̀ гл҃ѧ:

²сы́не человѣ́чь, что̀ бы́ло бы дре́во ло́зное ѿ всѣ́хъ древе́съ гро́здныхъ, сѹ́щихъ во древесѣ́хъ дѹбра́вныхъ;

³А҆́ще во́змѹтъ ѿ негѡ̀ дре́во, є҆́же сотвори́ти дѣ́ло; и҆ а҆́ще во́змѹтъ ко́лъ ѿ негѡ̀, є҆́же ѡ҆бѣ́сити на не́мъ кі́й либо сосѹ́дъ;

⁴Ра́звѣ є҆́же ѻ҆гне́ви преда́стсѧ на потребле́нїе, лѣ́тнее ѡ҆чище́нїе є҆гѡ̀ потреблѧ́етъ ѻ҆́гнь, и҆ и҆счеза́етъ до конца̀: є҆да̀ потре́бно бѹ́детъ на дѣ́ло;

⁵И҆ є҆щѐ цѣ́лѹ є҆мѹ̀ сѹ́щѹ не бѹ́детъ на дѣ́ло, кольмѝ па́че а҆́ще ѻ҆́гнь є҆̀ попали́тъ до конца̀, бѹ́детъ ли на дѣ́ло пото́мъ;

⁶Сегѡ̀ ра́ди рцы̀: си́це гл҃етъ гд҇ь бг҃ъ: ѩ҆́коже лоза̀ вїногра́днаѧ во дре́вѣхъ дѹбра́вныхъ, ю҆́же да́хъ на потребле́нїе ѻ҆гне́ви, та́кѡ да́мъ живѹ́щыѧ во ї҆ер҇ли́мѣ:

⁷и҆ да́мъ лицѐ моѐ на нѧ̀, ѿ ѻ҆гнѧ̀ и҆зы́дѹтъ, и҆ ѻ҆́гнь поѧ́стъ ѧ҆̀: и҆ ѹ҆вѣ́дѧтъ, ѩ҆́кѡ а҆́зъ гд҇ь, є҆гда̀ ѹ҆тверждѹ̀ лицѐ моѐ на ни́хъ:

⁸и҆ да́мъ зе́млю въ па́гѹбѹ, занѐ впадо́ша въ грѣ́хъ, гл҃етъ а҆дѡнаї̀ гд҇ь.