Read Библия Церковнославянская I҆езекі́илѧ 17 Bible Online

I҆езекі́илѧ 17 - Библия Церковнославянская bible

I҆езекі́илѧ 17

¹И҆ бы́сть сло́во гд҇не ко мнѣ̀ гл҃ѧ:

²сы́не человѣ́чь, повѣ́ждь по́вѣсть и҆ рцы̀ при́тчѹ на до́мъ ї҆и҃левъ,

³и҆ рече́ши: сїѧ҄ гл҃етъ а҆дѡнаї̀ гд҇ь: ѻ҆ре́лъ вели́кїй, великокри́лый, до́лгїй протѧже́нїемъ, и҆спо́лнь ногте́й, и҆́же и҆́мать повелѣ́нїе вни́ти въ лїва́нъ, и҆ взѧ̀ и҆збра҄нныѧ ке́дра,

⁴и҆ верхѝ мѧ́гкости ѡ҆строга̀, и҆ принесѐ ѧ҆̀ въ зе́млю ханане́йскѹ, во гра́дѣ ѡ҆гражде́ннѣмъ положѝ ѧ҆̀:

⁵и҆ взѧ̀ ѿ сѣ҄мене земна́гѡ и҆ дадѐ є҆̀ на по́ли пло́днѣ, (да ѹ҆тверди́тъ коре́нїе) над̾ вода́ми мно́гими, ви́дѣно ѹ҆чинѝ є҆̀:

⁶и҆ прозѧбѐ и҆ бы́сть въ вїногра́дъ не́мощенъ и҆ ма́лъ вели́чествомъ, є҆́же ѩ҆влѧ́тисѧ ло́зїю є҆гѡ̀ на не́мъ, и҆ коре́нїе є҆гѡ̀ под̾ ни́мъ бѧ́ше: и҆ бы́сть въ вїногра́дъ, и҆ сотворѝ рѡ́зги, и҆ прострѐ ѿра҄сли своѧ҄.

⁷И҆ бы́сть ѻ҆ре́лъ дрѹгі́й вели́къ, великокри́лный, мно́гъ ногтьмѝ, и҆ сѐ, вїногра́дъ се́й ѡ҆плета́ѧсѧ ѡ҆б̾ не́мъ: и҆ коре́нїе є҆гѡ̀ къ немѹ̀, и҆ ло́зїе своѐ и҆спѹстѝ є҆мѹ̀, є҆́же напаѧ́ти себѐ со грѹ́дїемъ са́да своегѡ̀.

⁸На по́ли до́брѣ, на водѣ̀ мно́зѣ пита́етсѧ то́й, є҆́же сотвори́ти прозѧбє́нїѧ и҆ приноси́ти пло́дъ, є҆́же бы́ти въ вїногра́дъ вели́къ.

⁹Сегѡ̀ ра́ди рцы̀: сїѧ҄ гл҃етъ а҆дѡнаї̀ гд҇ь: є҆да̀ и҆спра́витсѧ; не коре́нїе ли мѧгкоты̀ є҆гѡ̀ и҆ пло́дъ и҆згнїе́тъ; и҆ и҆́зсхнѹтъ всѧ҄ лѣ́тѡрасли є҆гѡ̀, и҆ не мы́шцею ли вели́кою, ни людьмѝ мно́гими є҆́же и҆сто́ргнѹти є҆го̀ и҆з̾ коре́нїѧ є҆гѡ̀;

¹⁰И҆ сѐ, ты́етъ: є҆да̀ ѹ҆спѣ́етъ; не а҆́бїе ли, є҆гда̀ ко́снетсѧ є҆мѹ̀ вѣ́тръ зно́йный, посхне́тъ сѹхото́ю; со грѹ́дїемъ прозѧбе́нїѧ своегѡ̀ и҆́зсхнетъ.

¹¹И҆ бы́сть сло́во гд҇не ко мнѣ̀ гл҃ѧ:

¹²сы́не человѣ́чь, рцы̀ ко до́мѹ прогнѣвлѧ́ющемѹ мѧ̀: не вѣ́сте ли, что̀ сѹ́ть сїѧ҄; рцы̀ и҆̀мъ: сѐ, грѧде́тъ ца́рь вавѷлѡ́нскъ на ї҆ер҇ли́мъ, и҆ во́зметъ царѧ̀ є҆гѡ̀ и҆ кнѧ́зѧ є҆гѡ̀, и҆ ѿведе́тъ ѧ҆̀ къ себѣ̀ въ вавѷлѡ́нъ:

¹³и҆ по́йметъ ѿ пле́мене ца́рска, и҆ завѣща́етъ съ ни́мъ завѣ́тъ, и҆ введе́тъ є҆го̀ въ клѧ́твѣ, и҆ старѣ҄йшины землѝ во́зметъ,

¹⁴є҆́же бы́ти въ ца́рство немощно̀, є҆́же весьма̀ не возноси́тисѧ, (но) храни́ти завѣ́тъ є҆гѡ̀ и҆ стоѧ́ти въ не́мъ:

¹⁵и҆ ѿве́ржетсѧ ѿ негѡ̀ посыла́ѧ послы̀ своѧ҄ во є҆гѵ́петъ да́ти є҆мѹ̀ ко́ни и҆ лю́ди мнѡ́ги: є҆да̀ и҆спра́витъ; спасе́тсѧ ли творѧ́й сопроти҄внаѧ; и҆ престѹпа́ѧй завѣ́тъ спасе́тсѧ ли;

¹⁶Живѹ̀ а҆́зъ, гл҃етъ а҆дѡнаї̀ гд҇ь, а҆́ще не на мѣ́стѣ, и҆дѣ́же ца́рь воцари́вый є҆го̀, и҆́же похѹ́ли клѧ́твѹ мою̀ и҆ и҆́же престѹпѝ завѣ́тъ мо́й, съ ни́мъ средѣ̀ вавѷлѡ́на сконча́етсѧ.

¹⁷И҆ не въ си́лѣ вели́цѣй, нижѐ въ наро́дѣ мно́зѣ сотвори́тъ съ ни́мъ фараѡ́нъ бра́нь во ѻ҆стро́зѣ и҆ въ согражде́нїи стрѣ́льницъ, є҆́же и҆з̾ѧ́ти дѹ́шы мнѡ́ги.

¹⁸И҆ похѹ́ли клѧ́твѹ, є҆́же престѹпи́ти завѣ́тъ, и҆ сѐ, дадѐ рѹ́кѹ свою̀ и҆ всѧ҄ сїѧ҄ сотворѝ є҆мѹ̀: не спасе́тсѧ.

¹⁹Сегѡ̀ ра́ди рцы̀: сїѧ҄ гл҃етъ а҆дѡнаї̀ гд҇ь: живѹ̀ а҆́зъ, а҆́ще не клѧ́твѹ мою̀, ю҆́же похѹ́ли, и҆ завѣ́тъ мо́й, є҆го́же престѹпѝ, да́мъ на главѹ̀ є҆гѡ̀:

²⁰и҆ прострѹ̀ мре́жѹ мою̀ на́нь, и҆ ѩ҆́тъ бѹ́детъ во ѡ҆держа́нїи є҆ѧ̀: и҆ приведѹ̀ є҆го̀ въ вавѷлѡ́нъ и҆ разсѹждѹ́сѧ съ ни́мъ та́мѡ ѡ҆ непра́вдѣ є҆гѡ̀, є҆́юже непра́вдова ко мнѣ̀:

²¹и҆ всѝ и҆збѣ́гшїи є҆гѡ̀ и҆ всѝ и҆збра́ннїи со всѣ́ми ѡ҆полчє́нїи є҆гѡ̀ мече́мъ падѹ́тъ, и҆ всѧ҄ ѡ҆ста҄вшаѧ и҆́хъ разсѣ́ю по всемѹ̀ вѣ́трѹ, и҆ ѹ҆вѣ́сте, ѩ҆́кѡ а҆́зъ гд҇ь гл҃ахъ.

²²Сегѡ̀ ра́ди сїѧ҄ гл҃етъ а҆дѡнаї̀ гд҇ь: и҆ возмѹ̀ а҆́зъ ѡ҆ и҆збра́нныхъ ке́дра высо́кагѡ ѿ верха̀ и҆ да́мъ ѿ главы̀ ѿра́слей є҆гѡ̀, сердца̀ и҆́хъ ѡ҆стрѹжѹ̀ и҆ насаждѹ̀ а҆́зъ на горѣ̀ высо́цѣ:

²³и҆ повѣ́шѹ и҆̀ въ горѣ̀ высо́цѣ ї҆и҃левѣ и҆ насаждѹ̀ и҆̀, и҆ прорасти́тъ ѿра́сль и҆ сотвори́тъ пло́дъ и҆ бѹ́детъ въ ке́дръ вели́къ: и҆ почі́етъ под̾ ни́мъ всѧ́къ ѕвѣ́рь, и҆ под̾ сѣ́нїю є҆гѡ̀ почі́етъ всѧ́ка пти́ца, и҆ ло́зїе є҆гѡ̀ па́ки ѹ҆стро́ѧтсѧ:

²⁴и҆ ѹ҆вѣ́сть всѧ́ко дре́во полево́е, ѩ҆́кѡ а҆́зъ гд҇ь смирѧ́ѧй дре́во высо́кое и҆ возносѧ́й дре́во смире́нное, и҆ и҆зсѹша́ѧй дре́во зеле́ное и҆ прораща́ѧй дре́во сѹхо́е: а҆́зъ гд҇ь гл҃ахъ и҆ сотворю̀.