Read Библия Церковнославянская I҆езекі́илѧ 19 Bible Online

I҆езекі́илѧ 19 - Библия Церковнославянская bible

I҆езекі́илѧ 19

¹Ты́ же, сы́не человѣ́чь, возмѝ пла́чь на кнѧ҄зи ї҆и҃лєвы,

²и҆ рече́ши: почто̀ ма́ти твоѧ̀ льви́ца средѣ̀ львѡ́въ почѝ, посредѣ̀ львѡ́въ ѹ҆мно́жи льви҄чища своѧ҄;

³И҆ ѿскочѝ є҆ди́нъ ѿ льви́чищъ є҆ѧ̀ и҆ бы́сть ле́въ, и҆ наѹчи́сѧ восхища́ти восхищє́нїѧ и҆ человѣ́ки снѣдѐ.

⁴И҆ слы́шаша ѡ҆ не́мъ ѩ҆зы́цы, и҆ ѩ҆́тъ бы́сть въ растлѣ́нїи и҆́хъ, приведо́ша є҆го̀ во ѹ҆здѣ̀ во є҆гѵ́петъ.

⁵И҆ ви́дѣ, ѩ҆́кѡ ѿведе́нъ бы́сть ѿ неѧ̀, и҆ поги́бе ча́ѧнїе є҆ѧ̀: и҆ взѧ̀ и҆на́го ѿ льви́чищъ свои́хъ и҆ льво́мъ ѹ҆чинѝ є҆го̀,

⁶и҆ живѧ́ше посредѣ̀ львѡ́въ, бы́сть ле́въ и҆ наѹчи́сѧ восхища́ти восхищє́нїѧ: человѣ́ки и҆з̾ѧдѐ,

⁷и҆ пасѧ́шесѧ въ лю́тости свое́й, и҆ гра́ды и҆́хъ пѹ҄сты поста́ви, и҆ погѹбѝ зе́млю и҆ и҆сполне́нїе є҆ѧ̀ гла́сомъ рыка́нїѧ своегѡ̀.

⁸И҆ да́ша на́нь ѩ҆зы́цы ѡ҆́крестъ ѿ стра́нъ и҆ простро́ша на́нь мрє́жи своѧ҄, и҆ въ погѹбле́нїи и҆́хъ ѩ҆́тъ бы́сть.

⁹И҆ положи́ша є҆го̀ во ѹ҆здѣ̀ и҆ въ клѣ́ти, приведо́ша є҆го̀ ко царю̀ вавѷлѡ́нскѹ и҆ вверго́ша є҆го̀ въ темни́цѹ, ѩ҆́кѡ да не слы́шитсѧ гла́съ є҆гѡ̀ ктомѹ̀ на гора́хъ ї҆и҃левыхъ.

¹⁰Ма́ти твоѧ̀ ѩ҆́кѡ вїногра́дъ и҆ ѩ҆́кѡ цвѣ́тъ ши́пчанъ на водѣ̀ насажде́нъ, пло́дъ є҆гѡ̀ и҆ ѿра́сль є҆гѡ̀ бы́сть ѿ воды̀ мно́ги.

¹¹И҆ бы́сть є҆мѹ̀ же́злъ крѣ́пости над̾ пле́менемъ старѣ́йшинъ, и҆ вознесе́сѧ въ вели́чїи свое́мъ средѣ̀ ло́зїѧ: и҆ ви́дѣ вели́чество своѐ во мно́жествѣ ло́зїѧ своегѡ̀,

¹²и҆ ѡ҆бломи́сѧ въ ѩ҆́рости, и҆ на зе́млю пове́рженъ бы́сть, и҆ вѣ́тръ зно́йный и҆зсѹшѝ плоды̀ є҆гѡ̀: ѹ҆вѧдо́ша, и҆ и҆́зсше же́злъ крѣ́пости є҆гѡ̀: ѻ҆́гнь потребѝ є҆го̀.

¹³И҆ нн҃ѣ насади́ша є҆го̀ въ пѹсты́ни, на землѝ безво́днѣ.

¹⁴И҆ и҆зы́де ѻ҆́гнь ѿ жезла̀ и҆збра́нныхъ є҆гѡ̀ и҆ поѧдѐ и҆̀, и҆ не бѣ̀ въ не́мъ жезла̀ крѣ́пости є҆гѡ̀: пле́мѧ въ при́тчѹ пла́ча є҆́сть, и҆ бѹ́детъ пла́чь.