Read Библия Церковнославянская I҆езекі́илѧ 2 Bible Online

I҆езекі́илѧ 2 - Библия Церковнославянская bible

I҆езекі́илѧ 2

¹Сїѐ видѣ́нїе подо́бїе сла́вы гд҇ни. И҆ ви́дѣхъ, и҆ падо́хъ ни́цъ, и҆ слы́шахъ гла́съ гл҃ющагѡ, и҆ речѐ ко мнѣ̀: сы́не человѣ́чь, ста́ни на но́ги твоѧ҄, и҆ возгл҃ю тебѣ̀.

²И҆ прїи́де на мѧ̀ дѹ́хъ, и҆ взѧ̀ мѧ̀, и҆ воздви́же мѧ̀, и҆ поста́ви мѧ̀ на нога́хъ мои́хъ, и҆ слы́шахъ є҆го̀ гл҃юща ко мнѣ̀.

³И҆ речѐ (гд҇ь) ко мнѣ̀: сы́не человѣ́чь, послю́ тѧ а҆́зъ къ до́мѹ ї҆и҃левѹ, ѡ҆горчева́ющымъ мѧ̀, и҆̀же ѡ҆горчи́ша мѧ̀: са́ми и҆ ѻ҆тцы̀ и҆́хъ ѿверго́шасѧ менє̀ до дне́шнѧгѡ днѐ:

⁴и҆ сы́нове жестоколи́чнїи и҆ твердосерде́чнїи. А҆́зъ послю́ тѧ къ тѣ҄мъ, и҆ рече́ши къ ни҄мъ: та́кѡ гл҃етъ а҆дѡнаї̀ гд҇ь:

⁵а҆́ще ѹ҆́бѡ ѹ҆слы́шатъ, и҆лѝ ѹ҆боѧ́тсѧ, занѐ до́мъ ѡ҆горчева́ѧй є҆́сть, и҆ позна́ютъ, ѩ҆́кѡ про҇ро́къ є҆сѝ ты̀ посредѣ̀ и҆́хъ.

⁶И҆ ты̀, сы́не человѣ́чь, да не ѹ҆бои́шисѧ и҆́хъ, ни ѹ҆жаса́йсѧ ѿ лица̀ и҆́хъ: занѐ разсверѣ́пѣютъ и҆ ѡ҆бы́дѹтъ тѧ̀ ѡ҆́крестъ, посредѣ́ бо скорпі́євъ ты̀ живе́ши: слове́съ и҆́хъ не ѹ҆бо́йсѧ и҆ ѿ лица̀ и҆́хъ не ѹ҆жаса́йсѧ, занѐ до́мъ ѡ҆горчева́ѧй є҆́сть:

⁷и҆ возглаго́леши словеса̀ моѧ҄ къ ни҄мъ, а҆́ще ѹ҆́бѡ ѹ҆слы́шатъ, и҆лѝ ѹ҆боѧ́тсѧ, занѐ до́мъ прогнѣ́ваѧй є҆́сть.

⁸И҆ ты̀, сы́не человѣ́чь, послѹ́шай гл҃ющагѡ къ тебѣ̀, не бѹ́ди ѡ҆горчева́ѧй, ѩ҆́коже до́мъ преѡгорчева́ѧй: ѿве́рзи ѹ҆ста̀ твоѧ̀ и҆ снѣ́ждь, ѩ҆̀же а҆́зъ даю̀ тебѣ̀.

⁹И҆ ви́дѣхъ, и҆ сѐ, рѹка̀ просте́рта ко мнѣ̀, и҆ въ не́й сви́токъ кни́жный:

¹⁰и҆ развѝ є҆го̀ предо мно́ю, и҆ въ то́мъ пи҄сана бы́ша прє́днѧѧ и҆ за҄днѧѧ: и҆ впи́сано бѧ́ше въ не́мъ рыда́нїе и҆ жа́лость и҆ го́ре.