Read Библия Церковнославянская I҆езекі́илѧ 23 Bible Online

I҆езекі́илѧ 23 - Библия Церковнославянская bible

I҆езекі́илѧ 23

²сы́не человѣ́чь, двѣ̀ жєнѣ̀ бѣ́стѣ дщє́ри ма́тере є҆ди́ныѧ

³и҆ соблѹди́стѣ во є҆гѵ́птѣ, въ ю҆́ности свое́й соблѹди́стѣ: та́мѡ спадо́ша сосцы̀ и҆́хъ, и҆ та́мѡ растли́стѣ дѣ́вство.

⁴И҆мена́ же и҆́ма: ѻ҆ола̀ старѣ́йшаѧ, ѻ҆олїва́ же ме́ншаѧ сестра̀ є҆ѧ̀: и҆ бы́стѣ мнѣ̀ и҆ роди́стѣ сы́ны и҆ дщє́ри: и҆мена́ же и҆́ма: самарі́а ѻ҆ола̀, и҆ ї҆ер҇ли́мъ ѻ҆олїва̀.

⁵И҆ соблѹдѝ ѻ҆ола̀ ѿ менє̀ и҆ возложи́сѧ на похотникѝ своѧ҄, на а҆ссѷрі́аны приближа́ющыѧсѧ є҆́й,

⁶ѡ҆блечє́нныѧ въ червлєни́цы, старѣ҄йшины и҆ воевѡ́ды: ю҆́нѡши и҆збра́ннїи, всѝ кѡ́нницы ѩ҆здѧ́щїи на ко́нехъ:

⁷и҆ дадѐ блѹже́нїе своѐ къ ни҄мъ: и҆збра҄ннымъ сынѡ́мъ а҆ссѷрї҄йскимъ всѣ҄мъ, и҆ ко всѣ҄мъ, на нѧ́же возлага́шесѧ, во всѣ́хъ нечистота́хъ и҆́хъ ѡ҆сквернѧ́шесѧ:

⁸и҆ блѹже́нїѧ своегѡ̀, є҆́же и҆з̾ є҆гѵ́пта, не ѡ҆ста́ви, ѩ҆́кѡ съ не́ю спа́хѹ въ ю҆́ности є҆ѧ̀, и҆ ті́и растли́ша дѣ́вство є҆ѧ̀ и҆ и҆злїѧ́ша блѹже́нїе своѐ на ню̀.

⁹Тогѡ̀ ра́ди преда́хъ ю҆̀ въ рѹ́цѣ похотникѡ́мъ є҆ѧ̀, въ рѹ́цѣ сынѡ́мъ а҆ссѷрї҄йскимъ, на ни́хже возлага́шесѧ.

¹⁰Ті́и ѿкры́ша сты́дъ є҆ѧ̀, сы҄ны и҆ дщє́ри є҆ѧ̀ поѧ́ша и҆ самѹ́ю мече́мъ ѹ҆сѣ́кнѹша: и҆ бы́сть поноше́нїе въ жена́хъ, и҆ ѿмще́нїе сотвори́ша въ не́й во дщере́хъ є҆ѧ̀.

¹¹И҆ ви́дѣ сестра̀ є҆ѧ̀ ѻ҆олїва̀, и҆ растлѝ возложе́нїе своѐ па́че є҆ѧ̀, и҆ блѹ́дъ сво́й па́че блѹда̀ сестры̀ своеѧ̀ ѹ҆мно́жи:

¹²на сынѡ́въ а҆ссѷрі́йскихъ возложи́сѧ, на старѣ҄йшины и҆ воевѡ́ды, и҆̀же бли́з̾ є҆ѧ̀, ѡ҆блечє́нны во благоистка҄нны, на ко́нники ѩ҆здѧ́щыѧ на ко́нехъ, ю҆́нѡши и҆збра́нни всѝ.

¹³И҆ ви́дѣхъ, ѩ҆́кѡ ѡ҆скверни́сѧ пѹ́ть є҆ди́нъ ѻ҆бою̀.

¹⁴И҆ приложѝ ко блѹже́нїю своемѹ̀, и҆ ви́дѣ мѹ́жы напи҄саны на стѣнѣ̀, ѡ҆́бразы халдє́йски напи҄саны ша́рами,

¹⁵препоѧ҄саны пестрота́ми ѡ҆ чре́слѣхъ свои́хъ, и҆ превѡ́и краше́ннїи на глава́хъ и҆́хъ, ви́дъ троѧ́кїй всѣ́хъ, подо́бїе сынѡ́въ вавѷлѡ́нскихъ, халде́йскихъ, землѝ ѻ҆те́чества и҆́хъ:

¹⁶и҆ возложи́сѧ на нѧ̀ зрѣ́нїемъ ѻ҆че́й свои́хъ, и҆ посла̀ послы̀ къ ни҄мъ въ зе́млю халде́йскѹ.

¹⁷И҆ прїидо́ша къ не́й сы́нове вавѷлѡ́нстїи на ло́же вита́ющихъ и҆ ѡ҆скверни́ша ю҆̀ въ блѹже́нїи є҆ѧ̀, и҆ ѡ҆скверни́сѧ въ ни́хъ, и҆ ѿстѹпѝ дѹша̀ є҆ѧ̀ ѿ ни́хъ:

¹⁸и҆ ѿкры̀ блѹже́нїе своѐ и҆ ѿкры̀ срамотѹ̀ свою̀. И҆ ѿстѹпѝ дш҃а̀ моѧ̀ ѿ неѧ̀, ѩ҆́коже ѿстѹпѝ дш҃а̀ моѧ̀ ѿ сестры̀ є҆ѧ̀.

¹⁹И҆ ѹ҆мно́жила є҆сѝ блѹже́нїе твоѐ, є҆́же помѧнѹ́ти дни҄ ю҆́ности твоеѧ̀, въ нѧ́же блѹди́ла є҆сѝ во є҆гѵ́птѣ,

²⁰и҆ возлегла̀ є҆сѝ на халдє́и, и҆́хже плѡ́ти бы́ша а҆́ки плѡ́ти ѡ҆́сли, и҆ ѩ҆́кѡ лѡ́на кѡ́нскаѧ лѡ́на и҆́хъ,

²¹и҆ посѣти́ла є҆сѝ беззако́нїе ю҆́ности твоеѧ̀, ѩ҆̀же твори́ла є҆сѝ во є҆гѵ́птѣ во вита́лищи твое́мъ, и҆дѣ́же сосцы̀ ю҆́ности твоеѧ̀ спадо́ста.

²²Тогѡ̀ ра́ди, ѻ҆олїво̀, сїѧ҄ гл҃етъ а҆дѡнаї̀ гд҇ь: сѐ, а҆́зъ воздви́гнѹ похотникѝ твоѧ҄ на тѧ̀, ѿ ни́хже ѿстѹпѝ дѹша̀ твоѧ̀, и҆ наведѹ̀ и҆̀хъ на тѧ̀ ѡ҆́крестъ,

²³сынѡ́въ вавѷлѡ́нскихъ и҆ всѣ́хъ халде́євъ, факѹ́да и҆ сѹ́да и҆ кѹ́да, и҆ всѧ҄ сы́ны а҆ссѷрї҄йски съ ни́ми, ю҆́ношы и҆збра҄нны, старѣ҄йшины и҆ воевѡ́ды, всѧ҄ трїста́ты и҆ нарѡ́читыѧ, ко́нники на ко́нехъ всѝ.

²⁴И҆ прїи́дѹтъ на тѧ̀ всѝ ѿ сѣ́вера, колєсни́цы и҆ коле́са со мно́гимъ наро́домъ, щиты̀ и҆ сѹ҄лицы и҆ шле́мы, и҆ поста́вѧтъ стражбѹ̀ ѡ҆́крестъ тебє̀, и҆ да́мъ пред̾ лице́мъ и҆́хъ сѹ́дъ, и҆ ѿмстѧ́тъ тѝ въ сѹдѣ́хъ свои́хъ:

²⁵и҆ да́мъ рве́нїе моѐ въ тебѣ̀, и҆ сотворѧ́тъ съ тобо́ю гнѣ́въ ѩ҆́рости моеѧ̀, но́здри твоѧ҄ и҆ ѹ҆́шы твоѝ ѡ҆брѣ́жѹтъ, и҆ ѡ҆ста́вшихъ твои́хъ мече́мъ и҆зсѣкѹ́тъ: ті́и сынѡ́въ твои́хъ и҆ дще́рей твои́хъ во́змѹтъ, и҆ ѡ҆ста́вшихъ твои́хъ потреби́тъ ѻ҆́гнь:

²⁶и҆ совлекѹ́тъ съ тебє̀ ри҄зы твоѧ҄ и҆ во́змѹтъ сосѹ́ды хвалы̀ твоеѧ̀.

²⁷И҆ ѿвращѹ̀ нечє́стїѧ твоѧ҄ ѿ тебє̀ и҆ блѹ́дъ тво́й ѿ землѝ є҆гѵ́петскїѧ: и҆ не воздви́гнеши ѻ҆че́съ твои́хъ на ни́хъ и҆ є҆гѵ́пта не помѧне́ши ктомѹ̀.

²⁸Поне́же сїѧ҄ гл҃етъ а҆дѡнаї̀ гд҇ь: сѐ, а҆́зъ предаю́ тѧ въ рѹ́цѣ, и҆́хже ненави́диши, ѿ ни́хже ѿстѹпѝ дѹша̀ твоѧ̀:

²⁹и҆ сотворѧ́тъ въ тебѣ̀ въ не́нависти, и҆ во́змѹтъ всѧ҄ трѹды̀ твоѧ҄ и҆ дѣла̀ твоѧ҄, и҆ бѹ́деши нага̀ и҆ посра́млена, и҆ ѿкры́етсѧ стѹ́дъ блѹда̀ твоегѡ̀ и҆ нече́стїе твоѐ.

³⁰И҆ блѹже́нїе твоѐ сотворѝ сїѧ҄ тебѣ̀, є҆гда̀ блѹди́ла є҆сѝ в̾слѣ́дъ ѩ҆зы́кѡвъ и҆ ѡ҆сквернѧ́ласѧ въ кѹмі́рѣхъ и҆́хъ:

³¹въ пѹтѝ сестры̀ твоеѧ̀ ходи́ла є҆сѝ, и҆ да́мъ ча́шѹ є҆ѧ̀ въ рѹ́цѣ твоѝ.

³²Сїѧ҄ гл҃етъ а҆дѡнаї̀ гд҇ь: ча́шѹ сестры̀ твоеѧ̀ и҆спїе́ши глѹбо́кѹю и҆ широ́кѹю, и҆ бѹ́детъ на смѣ́хъ и҆ подражне́нїе, и҆з̾ѻби́лнѹю ко соверше́нїю пїѧ́нства,

³³и҆ разслабле́нїѧ напо́лнишисѧ: ча́ша же потребле́нїѧ и҆ погѹбле́нїѧ ча́ша сестры̀ твоеѧ̀ самарі́и:

³⁴и҆ и҆спїе́ши ю҆̀ и҆ и҆стощи́ши, и҆ чре́пъ є҆ѧ̀ ѩ҆дѹ́щи потреби́ши, и҆ сѡсца̀ твоѧ҄ ѿто́ргнеши: и҆ пра́здники и҆ новом҇чїѧ твоѧ҄ ѿвращѹ̀: поне́же а҆́зъ гл҃ахъ, речѐ а҆дѡнаї̀ гд҇ь.

³⁵Сегѡ̀ ра́ди сїѧ҄ гл҃етъ а҆дѡнаї̀ гд҇ь: поне́же забы́ла мѧ̀ є҆сѝ и҆ ѿве́ргла менѐ наза́дъ тѣ́ла твоегѡ̀, и҆ ты̀ возмѝ нече́стїе твоѐ и҆ блѹ́дъ тво́й.

³⁶И҆ речѐ гд҇ь ко мнѣ̀: сы́не человѣ́чь, не бѹ́деши ли сѹди́ти ѻ҆олѣ̀ и҆ ѻ҆олївѣ̀, и҆ возвѣсти́ши ли и҆́ма беззакѡ́нїѧ є҆ю̀;

³⁷ѩ҆́кѡ любодѣ́йствовастѣ, и҆ кро́вь въ рѹка́хъ є҆ю̀, и҆ въ кѹмі́рѣхъ є҆ю̀ прелюбодѣ́йствовастѣ, и҆ ча҄да своѧ҄, ѩ҆̀же роди́стѣ мнѣ̀, провожда́стѣ и҆̀мъ сквозѣ̀ ѻ҆́гнь.

³⁸Да́же и҆ сїѧ҄ сотвори́стѣ мѝ, ѡ҆сквернѧ́стѣ ст҃а҄ѧ моѧ҄ въ то́й де́нь, и҆ сѹббѡ҄ты моѧ҄ ѡ҆сквернѧ́стѣ:

³⁹и҆ внегда̀ закала́стѣ ча҄да своѧ҄ кѹмі́рѡмъ свои҄мъ, и҆ вхожда́стѣ во ст҃а҄ѧ моѧ҄ въ то́й де́нь, є҆́же скверни́ти ѧ҆̀: и҆ сѐ, та́кѡ творѧ́стѣ средѣ̀ до́мѹ моегѡ̀:

⁴⁰и҆ посыла́стѣ ко мѹжє́мъ грѧдѹ́щымъ и҆здале́ча, къ ни҄мже послѡ́въ посыла́стѣ. И҆ є҆гда̀ приходи́ти и҆̀мъ, а҆́бїе ѹ҆мыва́ласѧ є҆сѝ и҆ ѹ҆тварѧ́ла є҆сѝ ѻ҆́чи твоѝ и҆ ѹ҆краша́ласѧ ѹ҆́тварїю,

⁴¹и҆ сѣдѣ́ла є҆сѝ на ѻ҆дрѣ̀ по́стланѣ, и҆ трапе́за ѹ҆кра́шенна пред̾ лице́мъ є҆ѧ̀, и҆ ѳѷмїа́мъ мо́й и҆ є҆ле́й мо́й предлага́ла пред̾ ни́ми, и҆ веселѧ́хѹсѧ въ ни́хъ:

⁴²и҆ гла́сомъ сли́чнымъ возглаша́хѹ, и҆ ко мѹжє́мъ ѿ мно́жества человѣ́ча приходѧ́щымъ ѿ пѹсты́ни, и҆ даѧ́хѹ пє́рстни на рѹ́ки и҆́хъ и҆ вѣне́цъ хвалы̀ на главы҄ и҆́хъ.

⁴³И҆ реко́хъ: не въ си́хъ ли прелюбодѣ́йствѹютъ; и҆ дѣла̀ блѹдни́цы, и҆ сама̀ соблѹдѝ.

⁴⁴И҆ вхожда́хѹ къ не́й: ѩ҆́коже вла́зѧтъ къ женѣ̀ блѹдни́цѣ, та́кѡ вла́зѧхѹ ко ѻ҆олѣ̀ и҆ ко ѻ҆олївѣ̀, жена́мъ беззако́нницамъ, є҆́же сотвори́ти беззако́нїе.

⁴⁵Мѹ́жїе же пра́веднїи, ті́и и҆ ѿмстѧ́тъ и҆́ма ѿмще́нїемъ любодѣ́йницъ и҆ ѿмще́нїемъ пролива́ющихъ кро́вь, ѩ҆́кѡ любодѣ҄йцы сѹ́ть, и҆ кро́вь въ рѹка́хъ и҆́хъ.

⁴⁶Сїѧ҄ гл҃етъ а҆дѡнаї̀ гд҇ь: приведѝ на ни́хъ наро́ды и҆ да́ждь на ни́хъ мѧте́жъ и҆ разграбле́нїе,

⁴⁷и҆ ве́ржи ка́менїе на ни́хъ, ка́менїе наро́дѡвъ, и҆ да и҆збодѹ́тъ и҆̀хъ мечьмѝ свои́ми: сы́ны и҆́хъ и҆ дщє́ри и҆́хъ и҆збїю́тъ и҆ до́мы и҆́хъ ѻ҆гне́мъ сожгѹ́тъ:

⁴⁸и҆ ѿвращѹ̀ нече́стїе ѿ землѝ, и҆ нака́жѹтсѧ всѧ҄ жєны̀ и҆ не сотворѧ́тъ по нече́стїємъ и҆́хъ:

⁴⁹и҆ да́стсѧ нече́стїе ва́ше на вы̀: и҆ (всѧ҄) грѣхѝ кѹмї҄ръ ва́шихъ прїи́мете и҆ ѹ҆разѹмѣ́ете, ѩ҆́кѡ а҆́зъ а҆дѡнаї̀ гд҇ь.