Read Библия Церковнославянская I҆езекі́илѧ 24 Bible Online

I҆езекі́илѧ 24 - Библия Церковнославянская bible

I҆езекі́илѧ 24

¹И҆ бы́сть сло́во гд҇не ко мнѣ̀, въ девѧ́тое лѣ́то, въ мц҇ъ десѧ́тый, въ десѧ́тый де́нь мц҇а, гл҃ѧ:

²сы́не человѣ́чь, напишѝ себѣ̀ и҆́мѧ днѐ сегѡ̀, ѿ негѡ́же ѹ҆крѣпи́сѧ ца́рь вавѷлѡ́нскїй на ї҆ер҇ли́мъ, ѿ сегѡ̀ днѐ, и҆́же дне́сь,

³и҆ рцы̀ при́тчѹ къ до́мѹ прогнѣвлѧ́ющемѹ, и҆ рече́ши къ ни҄мъ: сїѧ҄ гл҃етъ а҆дѡнаї̀ гд҇ь: наста́ви коно́бъ, наста́ви и҆ влі́й въ ѻ҆́нь во́дѹ,

⁴и҆ ве́рзи въ ѻ҆́нь на дво́е разсѣчє́наѧ, всѧ́кое разсѣче́нїе до́брое, го́лень и҆ ра́мо, ѡ҆брѣ҄зана ѿ косте́й,

⁵ѡ҆ и҆збра́нныхъ скотѡ́въ взѧ҄таѧ, и҆ подгнѣща́й костьмѝ под̾ нимѝ: возврѣ̀ и҆ воскипѣ̀, и҆ свари́шасѧ кѡ́сти є҆гѡ̀ посредѣ̀ є҆гѡ̀.

⁶Тогѡ̀ ра́ди сїѧ҄ гл҃етъ а҆дѡнаї̀ гд҇ь: ѽ, градѐ крове́й! коно́бе, въ не́мже є҆́сть ѩ҆́дъ, и҆ ѩ҆́дъ не и҆зы́де и҆з̾ негѡ̀: по ѹ҆́дѡмъ є҆гѡ̀ и҆знесѐ, не падѐ на не́мъ жре́бїй.

⁷ѩ҆́кѡ кро́вь є҆гѡ̀ средѣ̀ є҆гѡ̀ є҆́сть, на гла́дцѣмъ ка́мени вчини́хъ ю҆̀: не пролїѧ́хъ є҆ѧ̀ на зе́млю, є҆́же покры́ти ю҆̀ земле́ю,

⁸є҆́же навестѝ ѩ҆́рость мою̀ (на ню̀), во ѿмще́нїе є҆́же ѿмсти́ти: да́хъ кро́вь є҆гѡ̀ на гла́дцѣмъ ка́мени, є҆́же не покры́ти є҆ѧ̀.

⁹Тогѡ̀ ра́ди сїѧ҄ гл҃етъ а҆дѡнаї̀ гд҇ь: ѽ, лю́тѣ, градѐ крове́й! а҆́зъ же возвели́чѹ главню̀

¹⁰и҆ ѹ҆мно́жѹ дрова̀ и҆ возгнѣщѹ̀ ѻ҆́гнь, ѩ҆́кѡ да и҆ста́ютъ мѧса̀, и҆ ѡ҆скѹдѣ́етъ ю҆ха̀, и҆ кѡ́сти и҆ста́ютъ,

¹¹и҆ ста́нетъ на главнѧ́хъ є҆гѡ̀, (то́щь) разгорѣ́сѧ, ѩ҆́кѡ да и҆згори́тъ, и҆ распали́тсѧ и҆ сгори́тъ мѣ́дь є҆гѡ̀, и҆ и҆ста́етъ средѣ̀ є҆гѡ̀ нечистота̀ є҆гѡ̀, и҆ ѡ҆скѹдѣ́етъ ѩ҆́дъ є҆гѡ̀:

¹²да смири́тсѧ ѩ҆́дъ є҆гѡ̀, и҆ не и҆зы́детъ и҆з̾ негѡ̀ мно́гїй ѩ҆́дъ є҆гѡ̀, и҆ посрами́тсѧ ѩ҆́дъ є҆гѡ̀:

¹³въ нечистотѣ̀ твое́й ѹ҆кро́пъ, поне́же ѡ҆сквернѧ́лсѧ є҆сѝ ты̀ и҆ не ѡ҆чи́стилсѧ ѿ нечистоты̀ твоеѧ̀: и҆ что̀ бѹ́детъ а҆́ще не ѡ҆чи́стишисѧ по се́мъ, до́ндеже и҆спо́лню ѩ҆́рость мою̀ въ тебѣ̀;

¹⁴А҆́зъ гд҇ь гл҃ахъ, и҆ прїи́детъ, и҆ сотворю̀, и҆ не ѹ҆косню̀, и҆ не пощажѹ̀, и҆ не бѹ́дѹ ѹ҆моле́нъ: по пѹтє́мъ твои҄мъ и҆ по помыслѡ́мъ твои҄мъ сѹждѹ̀ тебѣ̀, гл҃етъ а҆дѡнаї̀ гд҇ь: сегѡ̀ ра́ди, сѐ, а҆́зъ сѹждѹ̀ тебѣ̀ по кро́вемъ твои҄мъ и҆ по помыслѡ́мъ твои҄мъ сѹждѹ̀ тебѣ̀, нечи́сте, пресловѹ́те и҆ вели́кїй на разгнѣ́ванїе.

¹⁵И҆ бы́сть сло́во гд҇не ко мнѣ̀ гл҃ѧ:

¹⁶сы́не человѣ́чь, сѐ, а҆́зъ взе́млю ѿ тебє̀ жела҄нїѧ ѻ҆че́съ твои́хъ въ пораже́нїи, не воспла́чи, нижѐ возрыда́й, нижѐ да прїи́дѹтъ тебѣ̀ сле́зы,

¹⁷возстенѝ молчѧ̀: стена́нїе кро́ве, чре́слъ пла́чь є҆́сть: да бѹ́дѹтъ вла́си твоѝ сплете́ни на тебѣ̀, и҆ сапо́зи твоѝ на нога́хъ твои́хъ, и҆ да не ѹ҆тѣ́шишисѧ ѹ҆стна́ми и҆́хъ, и҆ хлѣ́ба мѹже́й да не снѣ́си.

¹⁸И҆ глаго́лахъ къ лю́демъ заѹ́тра, ѩ҆́коже заповѣ́да мѝ, и҆ ѹ҆́мре жена̀ моѧ̀ въ ве́черъ, и҆ сотвори́хъ заѹ́тра, ѩ҆́коже повелѣ́сѧ мѝ.

¹⁹И҆ реко́ша ко мнѣ̀ лю́дїе: не возвѣсти́ши ли на́мъ, что̀ сѹ́ть сїѧ҄, ѩ҆̀же ты̀ твори́ши;

²⁰И҆ реко́хъ къ ни҄мъ: сло́во гд҇не бы́сть ко мнѣ̀ гл҃ѧ:

²¹рцы̀ къ до́мѹ ї҆и҃левѹ, сїѧ҄ гл҃етъ а҆дѡнаї̀ гд҇ь: сѐ, а҆́зъ ѡ҆скверню̀ ст҃а҄ѧ моѧ҄, велича҄нїѧ крѣ́пости ва́шеѧ, жела҄нїѧ ѻ҆че́съ ва́шихъ, и҆ и҆́хже щадѧ́тъ дѹ́ши ва́шѧ: и҆ сы́нове ва́ши и҆ дщє́ри ва́шѧ, ѩ҆̀же ѡ҆ста́висте, мече́мъ падѹ́тъ:

²²и҆ сотворитѐ, ѩ҆́коже а҆́зъ сотвори́хъ: ѿ ѹ҆́стъ и҆́хъ не ѹ҆тѣ́шитесѧ и҆ хлѣ́ба мѹже́й не снѣ́сте,

²³и҆ вла́си ва́ши на глава́хъ ва́шихъ, и҆ сапо́зи ва́ши на нога́хъ ва́шихъ: не бѹ́дете терза́тисѧ, нижѐ пла́кати, и҆ и҆ста́ете въ непра́вдахъ ва́шихъ, и҆ не ѹ҆тѣ́шите кі́йждо бра́та своегѡ̀.

²⁴И҆ бѹ́детъ ва́мъ ї҆езекі́иль въ чѹ́до: по всемѹ̀ є҆ли҄ка сотвори́хъ, сотворитѐ: є҆гда̀ прїи́дѹтъ сїѧ҄, и҆ ѹ҆разѹмѣ́ете, ѩ҆́кѡ а҆́зъ а҆дѡнаї̀ гд҇ь.

²⁵И҆ ты̀, сы́не человѣ́чь, не въ де́нь ли то́й, є҆гда̀ возмѹ̀ ѿ ни́хъ крѣ́пость и҆́хъ, вознесе́нїе хвальбы̀ и҆́хъ, жела҄нїѧ ѻ҆́чїю и҆́хъ и҆ возноше́нїе дѹшѝ и҆́хъ, сы́ны и҆́хъ и҆ дщє́ри и҆́хъ:

²⁶въ то́й де́нь прїи́детъ ѹ҆цѣлѣ́вый къ тебѣ̀ возвѣсти́ти тебѣ̀ во ѹ҆́шы,

²⁷въ то́й де́нь ѿве́рзѹтсѧ ѹ҆ста̀ твоѧ҄ ко ѹ҆цѣлѣ́вшемѹ, и҆ возглаго́леши и҆ не премолчи́ши ктомѹ̀, и҆ бѹ́деши и҆̀мъ въ чѹ́до: и҆ ѹ҆вѣ́дѧтъ, ѩ҆́кѡ а҆́зъ а҆дѡнаї̀ гд҇ь.