Read Библия Церковнославянская I҆езекі́илѧ 29 Bible Online

I҆езекі́илѧ 29 - Библия Церковнославянская bible

I҆езекі́илѧ 29

¹Въ десѧ́тое лѣ́то, въ десѧ́тый мц҇ъ, (въ пе́рвый де́нь) мц҇а, бы́сть сло́во гд҇не ко мнѣ̀ гл҃ѧ:

²сы́не человѣ́чь, ѹ҆твердѝ лицѐ твоѐ на фараѡ́на царѧ̀ є҆гѵ́петска и҆ прорцы̀ на́нь и҆ на є҆гѵ́петъ ве́сь:

³глаго́ли и҆ рцы̀: си́це гл҃етъ а҆дѡнаї̀ гд҇ь: сѐ, а҆́зъ наведѹ̀ на тѧ̀, фараѡ́не, царю̀ є҆гѵ́петскїй, ѕмі́а вели́каго, сѣдѧ́щаго средѣ̀ рѣ́къ свои́хъ, глаго́лющаго: моѧ҄ сѹ́ть рѣ́ки, и҆ а҆́зъ сотвори́хъ ѧ҆̀.

⁴А҆́зъ же да́мъ ѹ҆здѹ̀ въ чє́люсти твоѧ҄, и҆ прилѣплю̀ ры҄бы рѣкѝ твоеѧ̀ ко крило́ма твои́ма, и҆ возведѹ́ тѧ ѿ среды̀ рѣкѝ твоеѧ̀, и҆ къ чешѹѧ́мъ твои҄мъ прильпнѹ́тъ:

⁵и҆ низве́ргѹ тѧ̀ вско́рѣ и҆ всѧ҄ ры҄бы рѣкѝ твоеѧ̀: на лицы̀ по́лѧ паде́ши, и҆ не собере́шисѧ, и҆ не ѡ҆гради́шисѧ, ѕвѣрє́мъ зємны́мъ и҆ пти́цамъ небє́снымъ да́хъ тѧ̀ во снѣ́дь.

⁶И҆ ѹ҆вѣ́дѧтъ всѝ живѹ́щїи во є҆гѵ́птѣ, ѩ҆́кѡ а҆́зъ є҆́смь гд҇ь: занѐ бы́лъ є҆сѝ же́злъ тро́стѧнъ до́мѹ ї҆и҃левѹ:

⁷є҆гда̀ ѩ҆́сѧ тебє̀ рѹко́ю свое́ю, сокрѹши́лсѧ є҆сѝ, и҆ є҆гда̀ восплеска̀ на ни́хъ всѧ́ка рѹка̀, и҆ є҆гда̀ почи́ша на тебѣ̀, сте́рлсѧ є҆сѝ и҆ сломи́лъ є҆сѝ и҆̀хъ всѧ҄ чрє́сла.

⁸Сегѡ̀ ра́ди та́кѡ гл҃етъ а҆дѡнаї̀ гд҇ь: сѐ, а҆́зъ наведѹ̀ на тѧ̀ ме́чь и҆ погѹблю̀ ѿ тебє̀ человѣ́ки и҆ скоты̀,

⁹и҆ бѹ́детъ землѧ̀ є҆гѵ́петска въ поги́бель и҆ во ѡ҆пѹстѣ́нїе, и҆ ѹ҆разѹмѣ́ютъ, ѩ҆́кѡ а҆́зъ є҆́смь гд҇ь. Поне́же глаго́лалъ є҆сѝ, ѩ҆́кѡ рѣ́ки моѧ҄ сѹ́ть, и҆ а҆́зъ сотвори́хъ ѧ҆̀:

¹⁰тогѡ̀ ра́ди, сѐ, а҆́зъ на тѧ̀ и҆ на всѧ҄ рѣ́ки твоѧ҄, и҆ да́мъ зе́млю є҆гѵ́петскѹ во ѡ҆пѹстѣ́нїе и҆ въ ме́чь и҆ въ поги́бель, ѿ магдѡ́ла и҆ сїи́ны и҆ да́же до предѣ҄лъ є҆ѳїо́пскихъ:

¹¹не про́йдетъ сквозѣ̀ є҆ѧ̀ нога̀ человѣ́ча, ни нога̀ ско́тїѧ не постѹпи́тъ по не́й, и҆ не насели́тсѧ четы́редесѧть лѣ́тъ:

¹²и҆ да́мъ зе́млю є҆гѡ̀ въ па́гѹбѹ средѣ̀ землѝ ѡ҆пѹстѣ́лыѧ, и҆ гра́ди є҆гѡ̀ средѣ̀ градѡ́въ ѡ҆пѹстѣ́вшихъ бѹ́дѹтъ, въ разоре́нїи бѹ́дѹтъ четы́редесѧть лѣ́тъ: и҆ разсѣ́ю є҆гѵ́пта во ѩ҆зы́цѣхъ, и҆ развѣ́ю ѧ҆̀ по страна́мъ.

¹³Сїѧ҄ гл҃етъ а҆дѡнаї̀ гд҇ь: по четы́редесѧтихъ лѣ́тѣхъ соберѹ̀ є҆гѵ́птѧны ѿ ѩ҆зы҄къ, а҆́може разсы́пашасѧ,

¹⁴и҆ возвращѹ̀ плѣ́нники є҆гѵ́пєтскїѧ и҆ вселю̀ ѧ҆̀ въ зе́млю фаѳѡ́рскѹю, въ зе́млю, ѿѻнѹ́дѹже взѧ́ти бы́ша, и҆ бѹ́детъ вла́сть смире́нна:

¹⁵па́че всѣ́хъ власте́й бѹ́детъ смире́нна, и҆ не вознесе́тсѧ ктомѹ̀ над̾ ѩ҆зы҄ки, и҆ ѹ҆ма́лєны сотворю̀ ѧ҆̀, є҆́же не бы́ти и҆̀мъ мнѡ́гимъ во ѩ҆зы́цѣхъ.

¹⁶И҆ не бѹ́дѹтъ ктомѹ̀ до́мѹ ї҆и҃левѹ въ наде́ждѹ воспомина́ющѹю беззако́нїе, внегда̀ послѣ́довати и҆̀мъ по ни́хъ: и҆ ѹ҆разѹмѣ́ютъ, ѩ҆́кѡ а҆́зъ є҆́смь гд҇ь.

¹⁷И҆ бы́сть въ два́десѧть седмо́е лѣ́то, во є҆ди́нъ де́нь мц҇а пе́рвагѡ, бы́сть сло́во гд҇не ко мнѣ̀ гл҃ѧ:

¹⁸сы́не человѣ́чь, навѹходоно́соръ ца́рь вавѷлѡ́нскъ порабо́ти си́лѹ свою̀ рабо́тою вели́кою на тѵ́ра, всѧ́ка глава̀ плѣши́ва и҆ всѧ́ко ра́мо на́го: и҆ мзда̀ не бы́сть є҆мѹ̀ ни си́лѣ є҆гѡ̀ на тѵ́ра, за рабо́тѹ, є҆́юже рабо́таша на́нь.

¹⁹Тогѡ̀ ра́ди си́це гл҃етъ а҆дѡнаї̀ гд҇ь: сѐ, а҆́зъ даю̀ навѹходоно́сорѹ царю̀ вавѷлѡ́нскѹ зе́млю є҆гѵ́петскѹ, и҆ во́зметъ мно́жество є҆ѧ̀, и҆ плѣни́тъ плѣ́нъ є҆ѧ̀, и҆ расхи́титъ кѡры́сти є҆ѧ̀, и҆ бѹ́детъ мзда̀ си́лѣ є҆гѡ̀:

²⁰за слѹ́жбѹ є҆гѡ̀, є҆́юже послѹжѝ на тѵ́ра, да́хъ є҆мѹ̀ зе́млю є҆гѵ́петскѹ, занѐ послѹжѝ мнѣ̀, сїѧ҄ гл҃етъ а҆дѡнаї̀ гд҇ь.

²¹Въ то́й де́нь взы́детъ ро́гъ всемѹ̀ до́мѹ ї҆и҃левѹ, и҆ тебѣ̀ да́мъ ѹ҆ста̀ ѿвє́рста средѣ̀ и҆́хъ, и҆ ѹ҆вѣ́дѧтъ, ѩ҆́кѡ а҆́зъ є҆́смь гд҇ь.