Read Библия Церковнославянская I҆езекі́илѧ 3 Bible Online

I҆езекі́илѧ 3 - Библия Церковнославянская bible

I҆езекі́илѧ 3

¹И҆ речѐ ко мнѣ̀: сы́не человѣ́чь, снѣ́ждь сви́токъ се́й, и҆ и҆дѝ и҆ рцы̀ сынѡ́мъ ї҆и҃лєвымъ.

²И҆ ѿверзо́хъ ѹ҆ста̀ моѧ҄, и҆ напита́ мѧ сви́ткомъ си́мъ

³и҆ речѐ ко мнѣ̀: сы́не человѣ́чь, ѹ҆ста̀ твоѧ҄ снѣдѧ́тъ, и҆ чре́во твоѐ насы́титсѧ сви́тка сегѡ̀ да́ннагѡ тебѣ̀. И҆ снѣдо́хъ є҆го̀, и҆ бы́сть во ѹ҆стѣ́хъ мои́хъ ѩ҆́кѡ ме́дъ сла́докъ.

⁴И҆ речѐ ко мнѣ̀: сы́не человѣ́чь, и҆дѝ и҆ вни́ди въ до́мъ ї҆и҃левъ, и҆ глаго́ли словеса̀ моѧ҄ къ ни҄мъ:

⁵ѩ҆́кѡ не къ лю́демъ глѹбокорѣ҄чивымъ и҆ косноѧзы҄чнымъ посыла́емь є҆сѝ, къ до́мѹ ї҆и҃левѹ,

⁶нижѐ къ лю́демъ мнѡ́гимъ и҆ноѧзы҄чнымъ, и҆норѣ҄чивымъ, ни тѧ҄жкимъ ѧ҆зы́комъ сѹ́щымъ, и҆́хже не разѹмѣ́лъ бы є҆сѝ слове́съ: а҆́ще же и҆ къ тацѣ҄мъ посла́лъ бы́хъ тѧ̀, то̀ и҆ ті́и послѹ́шали бы́ша тебѐ:

⁷а҆ до́мъ ї҆и҃левъ не восхо́щетъ послѹ́шати тебѐ, поне́же не хотѧ́тъ слѹ́шати менѐ, ѩ҆́кѡ ве́сь до́мъ ї҆и҃левъ непокори́ви сѹ́ть и҆ жестокосе́рди:

⁸и҆ сѐ, да́хъ лицѐ твоѐ си́льно проти́вѹ лица̀ и҆́хъ, и҆ прю̀ {Є҆вр.: чело̀.} твою̀ ѹ҆крѣплю̀ проти́вѹ прѝ и҆́хъ:

⁹и҆ бѹ́детъ, всегда̀ крѣпча́е ка́мене да́хъ прю̀ твою̀: не ѹ҆бо́йсѧ и҆́хъ, ни ѹ҆жаса́йсѧ лица̀ и҆́хъ, занѐ до́мъ разгнѣ́ваѧй є҆́сть.

¹⁰И҆ речѐ ко мнѣ̀: сы́не человѣ́чь, всѧ҄ словеса̀, ѩ҆̀же гл҃ахъ съ тобо́ю, возмѝ въ се́рдце твоѐ и҆ ѹ҆ши́ма твои́ма послѹ́шай:

¹¹и҆ ше́дъ вни́ди въ плѣ́нъ къ сынѡ́мъ люді́й твои́хъ, и҆ рече́ши къ ни҄мъ и҆ возглаго́леши къ ни҄мъ: та́кѡ гл҃етъ а҆дѡнаї̀ гд҇ь: а҆́ще ѹ҆́бѡ послѹ́шаютъ и҆ а҆́ще ѹ҆́бѡ повинѹ́тсѧ.

¹²И҆ взѧ́ мѧ дѹ́хъ, и҆ слы́шахъ гла́съ за собо́ю трѹ́са вели́ка, глаго́лющихъ: блг҇ве́на сла́ва гд҇нѧ ѿ мѣ́ста є҆гѡ̀.

¹³И҆ ви́дѣхъ гла́съ кри́лъ живо́тныхъ скрилѧ́ющихсѧ дрѹ́гъ ко дрѹ́гѹ, и҆ гла́съ коле́съ держа́щьсѧ и҆́хъ, и҆ гла́съ трѹ́са вели́ка.

¹⁴И҆ дѹ́хъ воздви́же мѧ̀ и҆ взѧ́ мѧ, и҆ поидо́хъ вознесе́нъ во ѹ҆стремле́нїи дѹ́ха моегѡ̀, и҆ рѹка̀ гд҇нѧ бы́сть на мнѣ̀ крѣ́пкаѧ.

¹⁵И҆ внидо́хъ въ плѣ́нники вознесе́нъ, и҆ ѡ҆быдо́хъ живѹ́щыѧ на рѣцѣ̀ хова́ръ, и҆ сѣдо́хъ тѹ̀ се́дмь дні́й, ходѧ̀ посредѣ̀ и҆́хъ.

¹⁶И҆ бы́сть по седми́хъ дне́хъ сло́во гд҇не ко мнѣ̀ гл҃ѧ:

¹⁷сы́не человѣ́чь, стра́жа да́хъ тѧ̀ до́мѹ ї҆и҃левѹ, да слы́шиши сло́во ѿ ѹ҆́стъ мои́хъ и҆ воспрети́ши и҆̀мъ ѿ менє̀.

¹⁸Внегда̀ гл҃ати мѝ беззако́нникѹ: сме́ртїю ѹ҆́мреши: и҆ не возвѣсти́ши є҆мѹ̀, ни соглаго́леши, є҆́же ѡ҆ста́тисѧ беззако́нникѹ и҆ ѡ҆брати́тисѧ ѿ пѹтѝ своегѡ̀, є҆́же жи́вѹ бы́ти є҆мѹ̀: беззако́нникъ то́й въ беззако́нїи свое́мъ ѹ҆́мретъ, кро́ве же є҆гѡ̀ ѿ рѹкѝ твоеѧ̀ взыщѹ̀.

¹⁹И҆ ты̀ а҆́ще возвѣсти́ши беззако́нникѹ, и҆ не ѡ҆брати́тсѧ ѿ беззако́нїѧ своегѡ̀ и҆ ѿ пѹтѝ своегѡ̀ (беззако́нна): то́й беззако́нникъ во беззако́нїи свое́мъ ѹ҆́мретъ, а҆ ты̀ дѹ́шѹ твою̀ и҆зба́виши.

²⁰И҆ є҆гда̀ соврати́тсѧ првдникъ ѿ пра́вдъ свои́хъ и҆ сотвори́тъ согрѣше́нїе: и҆ да́мъ мѹ́кѹ пред̾ ни́мъ, то́й ѹ҆́мретъ, ѩ҆́кѡ ты̀ не воспрети́лъ є҆сѝ є҆мѹ̀, и҆ во грѣсѣ́хъ свои́хъ ѹ҆́мретъ, занѐ не помѧнѹ́тсѧ пра҄вды є҆гѡ̀, ѩ҆̀же сотворѝ: кро́ве же є҆гѡ̀ ѿ рѹкѝ твоеѧ̀ взыщѹ̀.

²¹Ты́ же а҆́ще возвѣсти́ши првдномѹ, є҆́же не согрѣши́ти, и҆ то́й не согрѣши́тъ: првдный жи́знїю поживе́тъ, ѩ҆́кѡ воспрети́лъ є҆сѝ є҆мѹ̀, и҆ ты̀ твою̀ дѹ́шѹ и҆зба́виши.

²²И҆ бы́сть на мнѣ̀ рѹка̀ гд҇нѧ, и҆ речѐ ко мнѣ̀: воста́ни и҆ и҆зы́ди на по́ле, и҆ та́мѡ возглаго́летсѧ къ тебѣ̀.

²³И҆ воста́хъ и҆ и҆зыдо́хъ на по́ле: и҆ сѐ, та́мѡ сла́ва гд҇нѧ стоѧ́ше, ѩ҆́коже видѣ́нїе и҆ ѩ҆́коже сла́ва гд҇нѧ, ю҆́же ви́дѣхъ на рѣцѣ̀ хова́ръ, и҆ падо́хъ на лицы̀ мое́мъ.

²⁴И҆ прїи́де на мѧ̀ дѹ́хъ и҆ поста́ви мѧ̀ на ногѹ̀ моє́ю: и҆ гл҃а ко мнѣ̀ и҆ речѐ мѝ: вни́ди и҆ затвори́сѧ средѣ̀ до́мѹ твоегѡ̀.

²⁵И҆ ты̀, сы́не человѣ́чь, сѐ, да́шасѧ на тѧ̀ ѹ҆́зы, и҆ свѧ́жѹтъ тѧ̀ и҆́ми, и҆ не и҆зы́деши ѿ среды̀ и҆́хъ:

²⁶и҆ ѧ҆зы́къ тво́й привѧжѹ̀ къ горта́ни твоемѹ̀, и҆ ѡ҆нѣмѣ́еши и҆ не бѹ́деши и҆̀мъ въ мѹ́жа ѡ҆бличе́нїѧ, поне́же до́мъ разгнѣ́ваѧй є҆́сть:

²⁷и҆ внегда̀ гл҃ати мѝ къ тебѣ̀, ѿве́рзѹ ѹ҆ста̀ твоѧ҄, и҆ рече́ши къ ни҄мъ: сїѧ҄ гл҃етъ а҆дѡнаї̀ гд҇ь: слы́шай да слы́шитъ, и҆ не покарѧ́ѧйсѧ да не покарѧ́етсѧ, занѐ до́мъ преѡгорчева́ѧй є҆́сть.