Read Библия Церковнославянская I҆езекі́илѧ 30 Bible Online

I҆езекі́илѧ 30 - Библия Церковнославянская bible

I҆езекі́илѧ 30

¹И҆ бы́сть сло́во гд҇не ко мнѣ̀ гл҃ѧ:

²сы́не человѣ́чь, прорцы̀ и҆ рцы̀: сїѧ҄ гл҃етъ а҆дѡнаї̀ гд҇ь:

³возрыда́йте: ѽле, ѽле де́нь! ѩ҆́кѡ бли́з̾ де́нь гд҇ень, и҆ приближа́етсѧ де́нь ѡ҆́блака, и҆ коне́цъ ѩ҆зы́кѡвъ бѹ́детъ:

⁴и҆ прїи́детъ ме́чь на є҆гѵ́птѧны, и҆ бѹ́детъ мѧте́жъ во є҆ѳїо́пїи, и҆ падѹ́тъ ѩ҆́звенїи во є҆гѵ́птѣ, и҆ взѧ́то бѹ́детъ мно́жество и҆́хъ, и҆ падѹ́тсѧ ѡ҆снова҄нїѧ є҆гѡ̀:

⁵пе́рсѧне и҆ кри́тѧне, и҆ лѵ́дѧне и҆ лївѵ́ане, и҆ мѹ́рини (и҆ всѧ̀ а҆ра́вїа) и҆ всѝ примѣ҄сницы, и҆ сы́нове, и҆̀же ѿ завѣ́та моегѡ̀, въ не́мъ мече́мъ падѹ́тъ съ ни́мъ.

⁶Сїѧ҄ гл҃етъ гд҇ь: и҆ падѹ́тъ подпѡ́ры є҆гѵ́пта, и҆ сни́детъ ѹ҆кори́зна крѣ́пости є҆гѡ̀ ѿ магдѡ́ла да́же до сїи́ны, мече́мъ падѹ́тъ въ не́мъ, гл҃етъ а҆дѡнаї̀ гд҇ь.

⁷И҆ ѡ҆пѹстѣ́ютъ средѣ̀ стра́нъ поги́бшихъ, и҆ гра́ди и҆́хъ средѣ̀ градѡ́въ ѡ҆пѹстѣ́вшихъ бѹ́дѹтъ:

⁸и҆ ѹ҆разѹмѣ́ютъ, ѩ҆́кѡ а҆́зъ є҆́смь гд҇ь, є҆гда̀ да́мъ ѻ҆́гнь на є҆гѵ́петъ, и҆ сокрѹша́тсѧ всѝ помага́ющїи є҆мѹ̀.

⁹Въ то́й де́нь прїи́дѹтъ вѣ҄стницы ѿ лица̀ моегѡ̀ въ сїеі́мъ тща́щесѧ погѹби́ти наде́ждѹ мѹ́ринскїѧ землѝ, и҆ бѹ́детъ и҆̀мъ мѧте́жъ въ де́нь є҆гѵ́петскъ, ѩ҆́кѡ сѐ, приспѣ̀.

¹⁰Сїѧ҄ гл҃етъ а҆дѡнаї̀ гд҇ь: и҆ погѹблю̀ мно́жество є҆гѵ́птѧнъ рѹко́ю навѹходоно́сора царѧ̀ вавѷлѡ́нска,

¹¹самагѡ̀ и҆ люді́й є҆гѡ̀ съ ни́мъ, гѹби́телїе ѿ ѩ҆зы҄къ по́слани погѹби́ти зе́млю: и҆ и҆звлекѹ́тъ всѝ мечы̀ своѧ҄ на є҆гѵ́пта, и҆ напо́лнитсѧ землѧ̀ ѩ҆́звеными.

¹²И҆ да́мъ рѣ́ки и҆́хъ во ѡ҆пѹстѣ́нїе и҆ ѿда́мъ зе́млю въ рѹ́цѣ ѕлы́хъ, и҆ погѹблю̀ зе́млю и҆ и҆сполне́нїе є҆ѧ̀ рѹка́ми чѹжди́хъ, а҆́зъ гд҇ь гл҃ахъ.

¹³ѩ҆́кѡ сїѧ҄ гл҃етъ а҆дѡнаї̀ гд҇ь: погѹблю̀ кѹмі́ры и҆ и҆спражню̀ вельмо́жы ѿ мемфі́са и҆ старѣ҄йшины ѿ землѝ є҆гѵ́петскїѧ, и҆ не бѹ́дѹтъ ктомѹ̀: и҆ да́мъ стра́хъ во землѝ є҆гѵ́петстѣй.

¹⁴И҆ погѹблю̀ зе́млю фаѳѡ́рскѹю, и҆ да́мъ ѻ҆́гнь на та́нїса, и҆ сотворю̀ ѿмще́нїе въ дїоспо́ли,

¹⁵и҆ и҆злїю̀ ѩ҆́рость мою̀ на саі́нъ крѣ́пость є҆гѵ́петскѹ, и҆ погѹблю̀ мно́жество ме́мфы.

¹⁶И҆ да́мъ ѻ҆́гнь на є҆гѵ́пта, и҆ мѧте́жемъ возмѧте́тсѧ саи́съ, и҆ въ дїоспо́ли бѹ́детъ разсѣ́лина, и҆ разлїю́тсѧ во́ды.

¹⁷Ю҆́нѡши и҆лїѹпо́лѧ и҆ вѹва́ста мече́мъ падѹ́тъ, и҆ жєны̀ въ плѣ́нъ по́йдѹтъ:

¹⁸и҆ въ тафне́сѣ помрачи́тсѧ де́нь, є҆гда̀ сокрѹшѹ̀ та́мѡ ски́петры є҆гѵ́пєтски, и҆ поги́бнетъ та́мѡ ѹ҆кори́зна крѣ́пости є҆гѡ̀, и҆ того̀ покры́етъ ѡ҆́блакъ, и҆ дщє́ри є҆гѡ̀ во плѣне́нїе ѿведѹ́тсѧ.

¹⁹И҆ сотворю̀ сѹ́дъ во є҆гѵ́птѣ, и҆ ѹ҆разѹмѣ́ютъ, ѩ҆́кѡ а҆́зъ є҆́смь гд҇ь.

²⁰И҆ бы́сть во є҆динонадесѧ́тое лѣ́то, въ пе́рвый мц҇ъ, въ седмы́й де́нь мц҇а, бы́сть сло́во гд҇не ко мнѣ̀ гл҃ѧ:

²¹сы́не человѣ́чь, мы҄шцы фараѡ́на царѧ̀ є҆гѵ́петска сотро́хъ, и҆ сѐ, не помоли́сѧ, є҆́же да́ти є҆мѹ̀ цѣльбѹ̀, приложи́ти є҆мѹ̀ пла́стырь, (ѡ҆бѧза́ти,) да́ти си́лѹ, да во́зметъ ме́чь.

²²Тогѡ̀ ра́ди сїѧ҄ гл҃етъ а҆дѡнаї̀ гд҇ь: сѐ, а҆́зъ на фараѡ́на царѧ̀ є҆гѵ́петска, и҆ сокрѹшѹ̀ мы҄шцы є҆гѡ̀ крѣ҄пкїѧ и҆ протѧжє́ныѧ и҆ сотрє́ныѧ, и҆ и҆зри́нѹ ме́чь є҆гѡ̀ и҆з̾ рѹкѝ є҆гѡ̀:

²³и҆ разсѣ́ю є҆гѵ́пта во ѩ҆зы́ки и҆ развѣ́ю и҆̀хъ во страны҄:

²⁴и҆ ѹ҆крѣплю̀ мы҄шцы царѧ̀ вавѷлѡ́нска и҆ да́мъ ме́чь мо́й въ рѹ́кѹ є҆гѡ̀, и҆ наведе́тъ є҆го̀ на є҆гѵ́пта, и҆ плѣни́тъ плѣне́нїе є҆гѡ̀, и҆ во́зметъ кѡры́сти є҆гѡ̀:

²⁵и҆ ѹ҆крѣплю̀ мы҄шцы царѧ̀ вавѷлѡ́нска, мы҄шцы же фараѡ҄ни падѹ́тъ: и҆ ѹ҆вѣ́дѧтъ, ѩ҆́кѡ а҆́зъ є҆́смь гд҇ь, є҆гда̀ да́мъ ме́чь мо́й въ рѹ́цѣ царѧ̀ вавѷлѡ́нска, и҆ простре́тъ є҆го̀ на зе́млю є҆гѵ́петскѹ,

²⁶и҆ разсѣ́ю є҆гѵ́пта во ѩ҆зы́ки и҆ развѣ́ю и҆̀хъ во страны҄: и҆ ѹ҆вѣ́дѧтъ всѝ, ѩ҆́кѡ а҆́зъ є҆́смь гд҇ь.