Read Библия Церковнославянская I҆езекі́илѧ 35 Bible Online

I҆езекі́илѧ 35 - Библия Церковнославянская bible

I҆езекі́илѧ 35

¹И҆ бы́сть сло́во гд҇не ко мнѣ̀ гл҃ѧ:

²сы́не человѣ́чь, ѡ҆братѝ лицѐ твоѐ къ горѣ̀ сеі́ръ и҆ прорцы̀ на ню̀ и҆ рцы̀ є҆́й:

³сїѧ҄ гл҃етъ а҆дѡнаї̀ гд҇ь: сѐ, а҆́зъ на тѧ̀, горо̀ сеі́ръ, и҆ прострѹ̀ рѹ́кѹ мою̀ на тѧ̀ и҆ поста́влю тѧ̀ пѹ́стѹ, и҆ ѡ҆пѹстѣ́еши,

⁴и҆ во градѣ́хъ твои́хъ пѹсты́ню сотворю̀, и҆ ты̀ въ пѹсты́ню бѹ́деши, и҆ ѹ҆разѹмѣ́еши, ѩ҆́кѡ а҆́зъ є҆́смь гд҇ь.

⁵Поне́же бы́сть въ тебѣ̀ вражда̀ вѣ́чнаѧ, и҆ присѣдѣ́ла є҆сѝ до́мѹ ї҆и҃левѹ лѹка́вствомъ, рѹко́ю врагѡ́въ съ мече́мъ во вре́мѧ печа́ли и҆́хъ и҆ во вре́мѧ непра́вды, на послѣ́докъ:

⁶сегѡ̀ ра́ди живѹ̀ а҆́зъ, гл҃етъ а҆дѡнаї̀ гд҇ь, поне́же въ кро́ви согрѣши́ла є҆сѝ, и҆ кро́вь пожене́тъ тѧ̀, кро́вь возненави́дѣла є҆сѝ, и҆ кро́вь и҆ждене́тъ тѧ̀.

⁷И҆ поста́влю го́рѹ сеі́ръ пѹ́стѹ и҆ ѡ҆пѹстѣ́вшѹ, и҆ погѹблю̀ ѿ неѧ̀ человѣ́ки и҆ скоты̀, (и҆ приходѧ́ша и҆ ѿходѧ́ща:)

⁸и҆ напо́лню ѩ҆́звеными твои́ми хо́лмы твоѧ҄ и҆ дє́бри твоѧ҄, и҆ на всѣ́хъ по́лехъ твои́хъ ѩ҆́звенїи мече́мъ падѹ́тъ въ тебѣ̀:

⁹и҆ пѹ́стѹ во вѣ́къ поста́влю тѧ̀, и҆ гра́ди твоѝ не населѧ́тсѧ ктомѹ̀, и҆ ѹ҆разѹмѣ́еши, ѩ҆́кѡ а҆́зъ є҆́смь гд҇ь.

¹⁰Поне́же рекла̀ є҆сѝ: ѻ҆́ба ѩ҆зы҄ка и҆ ѻ҆́бѣ странѣ҄ моѝ бѹ́дѹтъ, и҆ возмѹ̀ и҆̀хъ въ наслѣ́дїе, а҆ гд҇ь та́мѡ є҆́сть:

¹¹сегѡ̀ ра́ди живѹ̀ а҆́зъ, гл҃етъ а҆дѡнаї̀ гд҇ь, и҆ сотворю̀ тебѣ̀ по враждѣ̀ твое́й и҆ по ре́вности твое́й, ю҆́же сотвори́ла є҆сѝ ѿ ненавидѣ́нїѧ къ ни҄мъ, и҆ позна́нъ бѹ́дѹ тобо́ю, є҆гда̀ и҆́мамъ тебѐ сѹди́ти, и҆ ѹ҆разѹмѣ́еши, ѩ҆́кѡ а҆́зъ є҆́смь гд҇ь.

¹²Слы́шахъ гла́съ всѣ́хъ хѹле́нїй твои́хъ, ѩ҆̀же глаго́лала є҆сѝ: го́ры ї҆и҃лєвы пѹ҄сты даны̀ на́мъ во снѣ́дь:

¹³и҆ велерѣ́чила є҆сѝ на мѧ̀ ѹ҆сты̀ твои́ми и҆ ѹ҆мно́жила на мѧ̀ словеса̀, а҆́зъ же ѹ҆слы́шахъ.

¹⁴Сегѡ̀ ра́ди та́кѡ гл҃етъ а҆дѡнаї̀ гд҇ь: во весе́лїи всеѧ̀ землѝ пѹ́стѹ тѧ̀ сотворю̀:

¹⁵ѩ҆́коже пора́доваласѧ є҆сѝ ѡ҆ наслѣ́дїй до́мѹ ї҆и҃лева, ѩ҆́кѡ поги́бе, та́кѡ сотворю̀ тебѣ̀: пѹста̀ бѹ́деши, горо̀ сеі́ръ, и҆ всѧ̀ ї҆дѹме́а потреби́тсѧ, и҆ ѹ҆вѣ́дѧтъ, ѩ҆́кѡ а҆́зъ є҆́смь гд҇ь бг҃ъ и҆́хъ.