Read Библия Церковнославянская I҆езекі́илѧ 37 Bible Online

I҆езекі́илѧ 37 - Библия Церковнославянская bible

I҆езекі́илѧ 37

¹И҆ бы́сть на мнѣ̀ рѹка̀ гд҇нѧ, и҆ и҆зведе́ мѧ въ дс҃ѣ гд҇ни и҆ поста́ви мѧ̀ средѣ̀ по́лѧ: се́ же бѧ́ше по́лно косте́й человѣ́ческихъ:

²и҆ ѡ҆бведе́ мѧ ѡ҆́крестъ и҆́хъ ѡ҆́колѡ, и҆ сѐ, мнѡ́ги ѕѣлѡ̀ на лицы̀ по́лѧ, и҆ сѐ, сѹ҄хи ѕѣлѡ̀.

³И҆ речѐ ко мнѣ̀: сы́не человѣ́чь, ѡ҆живѹ́тъ ли кѡ́сти сїѧ҄; И҆ реко́хъ: гд҇и бж҃е, ты̀ вѣ́си сїѧ҄.

⁴И҆ речѐ ко мнѣ̀: сы́не человѣ́чь, прорцы̀ на кѡ́сти сїѧ҄ и҆ рече́ши и҆̀мъ: кѡ́сти сѹхї҄ѧ, слы́шите сло́во гд҇не:

⁵сѐ гл҃етъ а҆дѡнаї̀ гд҇ь косте́мъ си҄мъ: сѐ, а҆́зъ введѹ̀ въ ва́съ дѹ́хъ живо́тенъ

⁶и҆ да́мъ на ва́съ жи҄лы, и҆ возведѹ̀ на ва́съ пло́ть и҆ прострѹ̀ по ва́мъ ко́жѹ, и҆ да́мъ дх҃ъ мо́й въ ва́съ, и҆ ѡ҆живетѐ и҆ ѹ҆вѣ́сте, ѩ҆́кѡ а҆́зъ є҆́смь гд҇ь.

⁷И҆ прореко́хъ, ѩ҆́коже заповѣ́да мѝ гд҇ь. И҆ бы́сть гла́съ внегда̀ мѝ про҇ро́чествовати, и҆ сѐ, трѹ́съ, и҆ совокѹплѧ́хѹсѧ кѡ́сти, ко́сть къ ко́сти, ка́ѧждо ко соста́вѹ своемѹ̀.

⁸И҆ ви́дѣхъ, и҆ сѐ, бы́ша и҆̀мъ жи҄лы, и҆ пло́ть растѧ́ше, и҆ восхожда́ше (и҆ протѧже́сѧ) и҆̀мъ ко́жа верхѹ̀, дѹ́ха же не бѧ́ше въ ни́хъ.

⁹И҆ речѐ ко мнѣ̀: прорцы̀ ѡ҆ дѹ́сѣ, прорцы̀, сы́не человѣ́чь, и҆ рцы̀ дѹ́хови: сїѧ҄ гл҃етъ а҆дѡнаї̀ гд҇ь: ѿ четы́рехъ вѣ́трѡвъ прїидѝ, дѹ́ше, и҆ вдѹ́ни на мє́ртвыѧ сїѧ҄, и҆ да ѡ҆живѹ́тъ.

¹⁰И҆ прореко́хъ, ѩ҆́коже повелѣ̀ мѝ, и҆ вни́де въ нѧ̀ дѹ́хъ жи́зни, и҆ ѡ҆жи́ша и҆ ста́ша на нога́хъ свои́хъ, собо́ръ мно́гъ ѕѣлѡ̀.

¹¹И҆ речѐ гд҇ь ко мнѣ̀ гл҃ѧ: сы́не человѣ́чь, сїѧ҄ кѡ́сти ве́сь до́мъ ї҆и҃левъ є҆́сть, ті́и бо глаго́лютъ: сѹ҄хи бы́ша кѡ́сти на́шѧ, поги́бе наде́жда на́ша, ѹ҆бїе́ни бы́хомъ.

¹²Тогѡ̀ ра́ди прорцы̀ (сы́не человѣ́чь) и҆ рцы̀ къ ни҄мъ: сїѧ҄ гл҃етъ а҆дѡнаї̀ гд҇ь: сѐ, а҆́зъ ѿве́рзѹ гро́бы ва́шѧ и҆ и҆зведѹ̀ ва́съ ѿ грѡ́бъ ва́шихъ, лю́дїе моѝ, и҆ введѹ̀ вы̀ въ зе́млю ї҆и҃левѹ:

¹³и҆ ѹ҆вѣ́сте, ѩ҆́кѡ а҆́зъ є҆́смь гд҇ь, внегда̀ ѿве́рсти мѝ гро́бы ва́шѧ, є҆́же возвести́ ми ва́съ ѿ гробѡ́въ ва́шихъ, лю́дїе моѝ: и҆ да́мъ дх҃ъ мо́й въ ва́съ, и҆ жи́ви бѹ́дете,

¹⁴и҆ поста́влю вы̀ на землѝ ва́шей, и҆ ѹ҆вѣ́сте, ѩ҆́кѡ а҆́зъ гд҇ь: гл҃ахъ и҆ сотворю̀, гл҃етъ а҆дѡнаї̀ гд҇ь.

¹⁵И҆ бы́сть сло́во гд҇не ко мнѣ̀ гл҃ѧ:

¹⁶сы́не человѣ́чь, возмѝ себѣ̀ же́злъ є҆ди́нъ и҆ напишѝ на не́мъ ї҆ѹ́дѹ и҆ сы́ны ї҆и҃лєвы прилежа́щыѧ къ немѹ̀: и҆ же́злъ вторы́й возмѝ себѣ̀ и҆ напишѝ на не́мъ ї҆ѡ́сифа, же́злъ є҆фре́мовъ, и҆ всѧ҄ сы́ны ї҆и҃лєвы приложи́вшыѧсѧ къ немѹ̀:

¹⁷и҆ совокѹпѝ ѧ҆̀ дрѹ́гъ ко дрѹ́гѹ себѣ̀ въ же́злъ є҆ди́нъ, є҆́же свѧза́ти ѧ҆̀, и҆ бѹ́дѹтъ (вкѹ́пѣ) въ рѹцѣ̀ твое́й:

¹⁸и҆ бѹ́детъ, є҆гда̀ рекѹ́тъ къ тебѣ̀ сы́нове люді́й твои́хъ, вопроша́юще: не возвѣсти́ши ли на́мъ ты̀, что̀ сѹ́ть сїѧ҄ тебѣ̀;

¹⁹и҆ рече́ши къ ни҄мъ: сїѧ҄ гл҃етъ а҆дѡнаї̀ гд҇ь: сѐ, а҆́зъ поимѹ̀ пле́мѧ ї҆ѡ́сифово, є҆́же є҆́сть въ рѹцѣ̀ є҆фре́мовѣ, и҆ племена̀ ї҆и҃лєва прилежа҄щаѧ къ немѹ̀, и҆ да́мъ ѧ҆̀ въ пле́мѧ ї҆ѹ́дино, и҆ бѹ́дѹтъ въ же́злъ є҆ди́нъ въ рѹцѣ̀ ї҆ѹ́динѣ.

²⁰И҆ бѹ́дѹтъ жезлѝ, на ни́хже писа́ти бѹ́деши, въ рѹцѣ̀ твое́й пред̾ ѻ҆чи́ма и҆́хъ,

²¹и҆ рече́ши къ ни҄мъ: сїѧ҄ гл҃етъ а҆дѡнаї̀ гд҇ь: сѐ, а҆́зъ пое́млю ве́сь до́мъ ї҆и҃левъ ѿ среды̀ ѩ҆зы́кѡвъ, а҆́може внидо́ша, и҆ соберѹ̀ ѧ҆̀ ѿ всѣ́хъ сѹ́щихъ ѡ҆́крестъ и҆́хъ и҆ введѹ̀ и҆̀хъ въ зе́млю ї҆и҃левѹ,

²²и҆ да́мъ ѧ҆̀ во ѩ҆зы́къ на землѝ мое́й и҆ въ гора́хъ ї҆и҃левыхъ: и҆ кнѧ́зь є҆ди́нъ бѹ́детъ во всѣ́хъ си́хъ царе́мъ, и҆ не бѹ́дѹтъ ктомѹ̀ въ два̀ ѩ҆зы҄ка, ни раздѣлѧ́тсѧ ктомѹ̀ на два̀ ца҄рства,

²³да не ѡ҆сквернѧ́ютсѧ ктомѹ̀ въ кѹмі́рѣхъ свои́хъ и҆ въ ме́рзостехъ свои́хъ и҆ во всѣ́хъ нече́стїихъ свои́хъ: и҆ и҆зба́влю ѧ҆̀ ѿ всѣ́хъ беззако́нїй и҆́хъ, и҆́миже согрѣши́ша, и҆ ѡ҆чи́щѹ ѧ҆̀, и҆ бѹ́дѹтъ мѝ въ лю́ди, и҆ а҆́зъ бѹ́дѹ и҆̀мъ въ бг҃а.

²⁴И҆ ра́бъ мо́й даві́дъ кнѧ́зь средѣ̀ и҆́хъ и҆ па́стырь є҆ди́нъ бѹ́детъ всѣ́хъ, ѩ҆́кѡ въ за́повѣдехъ мои́хъ ходи́ти бѹ́дѹтъ и҆ сѹды̀ моѧ҄ сохранѧ́тъ и҆ сотворѧ́тъ ѧ҆̀,

²⁵и҆ вселѧ́тсѧ на землѝ свое́й, ю҆́же да́хъ рабѹ̀ моемѹ̀ ї҆а́кѡвѹ, на не́йже жи́ша та́мѡ ѻ҆тцы̀ и҆́хъ, и҆ вселѧ́тсѧ на не́й ті́и и҆ сы́нове и҆́хъ и҆ сы́нове сынѡ́въ и҆́хъ да́же до вѣ́ка: и҆ даві́дъ ра́бъ мо́й кнѧ́зь и҆́хъ бѹ́детъ во вѣ́къ.

²⁶И҆ ѹ҆твержѹ̀ и҆̀мъ завѣ́тъ ми́ренъ, и҆ завѣ́тъ вѣ́ченъ бѹ́детъ съ ни́ми, и҆ ѹ҆кореню̀ ѧ҆̀ и҆ ѹ҆мно́жѹ,

²⁷и҆ да́мъ ѡ҆сщ҃е́нїе моѐ посредѣ̀ и҆́хъ во вѣ́къ, и҆ бѹ́детъ вселе́нїе моѐ въ ни́хъ, и҆ бѹ́дѹ и҆̀мъ бг҃ъ, а҆ ѻ҆нѝ бѹ́дѹтъ мѝ лю́дїе:

²⁸и҆ ѹ҆вѣ́дѧтъ ѩ҆зы́цы, ѩ҆́кѡ а҆́зъ є҆́смь гд҇ь ѡ҆сщ҃а́ѧй ѧ҆̀, внегда̀ бѹ́дѹтъ ст҃а҄ѧ моѧ҄ средѣ̀ и҆́хъ во вѣ́къ.