Read Библия Церковнославянская I҆езекі́илѧ 40 Bible Online

I҆езекі́илѧ 40 - Библия Церковнославянская bible

I҆езекі́илѧ 40

¹И҆ бы́сть во два́десѧть пѧ́тое лѣ́то плѣне́нїѧ на́шегѡ, пе́рвагѡ мц҇а, въ десѧ́тый де́нь мц҇а, въ четвертоена́десѧть лѣ́то по плѣне́нїи гра́да, въ то́й де́нь бы́сть на мнѣ̀ рѹка̀ гд҇нѧ: и҆ веде́ мѧ та́мѡ,

²въ видѣ́нїи бж҃їи веде́ мѧ на зе́млю ї҆и҃левѹ и҆ поста́ви мѧ̀ на горѣ̀ высо́цѣ ѕѣлѡ̀, на не́йже ѩ҆́кѡ согражде́нїе гра́да прѧ́мѡ (полѹ́дне),

³и҆ введѐ мѧ̀ та́мѡ: и҆ сѐ, мѹ́жъ, и҆ зра́къ є҆гѡ̀ бѧ́ше, ѩ҆́кѡ видѣ́нїе мѣ́ди блеща́щїѧсѧ, и҆ въ рѹцѣ̀ є҆гѡ̀ бѧ́ше ве́рвь зи́ждѹщихъ и҆ тро́сть мѣ́рителнаѧ. То́й же стоѧ́ше ѹ҆ вра́тъ

⁴и҆ речѐ ко мнѣ̀: ви́дѣлъ ли є҆сѝ, сы́не человѣ́чь; ви́ждь ѻ҆чи́ма твои́ма и҆ ѹ҆ши́ма твои́ма слы́ши, и҆ ѹ҆чинѝ въ се́рдцы твое́мъ всѧ҄, є҆ли҄ка а҆́зъ показѹ́ю тебѣ̀, занѐ тогѡ̀ ра́ди вше́лъ є҆сѝ сѣ́мѡ, да покажѹ̀ тебѣ̀, и҆ пока́жеши ты̀ всѧ҄, є҆ли҄ка ви́диши, до́мѹ ї҆и҃левѹ.

⁵И҆ сѐ, ѡ҆гра́да внѣѹ́дѹ ѡ҆́крестъ хра́ма, и҆ въ рѹцѣ̀ мѹ́жа мѣ́ра тро́стѧна шестѝ лакѡ́тъ въ ла́коть шестодла́нный, и҆ и҆змѣ́ри предстѣ́нїе ширинѹ̀ ра́внѡ тро́сти, и҆ высотѹ̀ є҆гѡ̀ ра́внѡ тро́сти.

⁶И҆ вни́де во врата̀ зрѧ҄щаѧ на восто́къ седмїю̀ степе́ньми, и҆ и҆змѣ́ри ѳеѐ, ше́сть ѡ҆ сїю̀ странѹ̀, ше́сть же ѡ҆б̾ ѻ҆нѹ̀, и҆ є҆ла́мъ {притво́ръ} две́рный ра́внѡ тро́сти.

⁷И҆ ѳеѐ {черто́гъ} ра́внѡ тро́сти въ долготѹ̀ и҆ ра́внѡ тро́сти въ широтѹ̀, и҆ а҆їла́мъ {подвѡ́и} средѣ̀ ѳенла́ѳъ {черто́гѡвъ} шестѝ лакѡ́тъ. И҆ ѳеѐ второ́е {вторы́й} ра́внѡ тро́сти въ широтѹ̀ и҆ ра́внѡ тро́сти въ долготѹ̀, є҆ла́мъ {притво́ръ} же пѧтѝ лакѡ́тъ.

⁸И҆ ѳеѐ {черто́гъ} тре́тїе ра́внѡ тро́сти въ долготѹ̀ и҆ ра́внѡ тро́сти въ широтѹ̀,

⁹є҆ла́мъ же вра́тный, и҆́же бли́з̾ є҆ла́ма {притво́ра} две́рнагѡ ѻ҆смѝ лакѡ́тъ, а҆їле́ѵъ же {подвѡ́и же є҆гѡ̀} двою̀ лакте́й: и҆ є҆ла́мъ {притво́ръ} две́рный внѹтрьѹ́дѹ.

¹⁰И҆ ѳеѐ двє́рныѧ {черто́зи две́рнїи} прѧ́мѡ ѳеѐ {черто́гѡмъ}, трѝ ѡ҆ сїю̀ странѹ̀ и҆ трѝ ѡ҆б̾ ѻ҆нѹ̀, мѣ́ра же є҆ди́на трїе́мъ: и҆ мѣ́ра є҆ди́на а҆їла́мъ {подво́ємъ} сю́дѹ и҆ сю́дѹ.

¹¹И҆ размѣ́ри широтѹ̀ вхо́да вра́тнагѡ десѧтѝ лакте́й, широтѹ́ же вра́тнѹю трина́десѧти лакте́й,

¹²и҆ ла́коть є҆ди́нъ своди́мь прѧ́мѡ ѳееі́мъ {черто́гѡмъ} ла́ктѧ є҆ди́нагѡ и҆ ла́ктѧ є҆ди́нагѡ, предѣ́лъ сю́дѹ и҆ сю́дѹ, и҆ ѳеѐ шестѝ лакте́й ѡ҆ сїю̀ странѹ̀ и҆ шестѝ лакте́й ѡ҆б̾ ѻ҆нѹ̀ странѹ̀.

¹³И҆ размѣ́ри врата̀ ѿ стѣны̀ ѳеѐ до стѣны̀ ѳеѐ, широта̀ два́десѧти и҆ пѧтѝ лакте́й: сїѧ҄ врата̀ ко вратѡ́мъ,

¹⁴и҆ непокрове́нное є҆ла́ма {притво́ра} вра́тъ шести́десѧтъ лакте́й, (*два́десѧти пѧтѝ) и҆ ѳеѐ {черто́гъ} двора̀ ѡ҆́крестъ,

¹⁵и҆ непокрове́нное вра́тъ ѿвнѣ̀ въ непокрове́нное (*вра́тъ) є҆ла́ма вра́тъ внѹтрьѹ́дѹ пѧтьдесѧ́тъ лакте́й.

¹⁶И҆ ѻ҆кѡ́нца сокровє́на ѳееі́мъ {въ черто́зѣхъ} и҆ въ а҆їла́мъ {подво́ехъ и҆́хъ} внѹ́трь вра́тъ двора̀ ѡ҆́крестъ: та́кожде и҆ є҆ла́мъ {притво́рамъ} ѻ҆кѡ́нца внѹтрьѹ́дѹ ѡ҆́крестъ, и҆ на а҆їла́мъ {и҆ на подво́ехъ} фі́нїки сю́дѹ и҆ сю́дѹ (и҆зва҄ѧны).

¹⁷И҆ введе́ мѧ во дво́ръ внѹ́треннїй, и҆ сѐ, преграждє́нїѧ и҆ междѹстѡ́лпїѧ ѡ҆́крестъ двора̀, прегражде́нїи же три́десѧть въ междѹсто́лпїихъ,

¹⁸и҆ притво́ры проти́вѹ за́дней странѣ̀ вра́тъ, по долготѣ̀ вра́тъ междѹсто́лпїе ни́жнее.

¹⁹И҆ размѣ́ри широтѹ̀ двора̀ ѿ непокрове́нагѡ вра́тъ внѣ́шнихъ внѹ́трь ко непокрове́номѹ вра́тъ зрѧ́щихъ внѣ̀, лакте́й сто̀ зрѧ́щихъ на восто́къ: и҆ введе́ мѧ на сѣ́веръ,

²⁰и҆ сѐ, врата̀ зрѧ҄щаѧ на сѣ́веръ дворѹ̀ внѣ́шнемѹ, и҆ размѣ́ри ѧ҆̀, долготѹ̀ и҆́хъ и҆ широтѹ̀.

²¹И҆ ѳеѐ {черто́зи и҆́хъ} трѝ ѡ҆ сїю̀ странѹ̀, три́ же ѡ҆б̾ ѻ҆нѹ̀, и҆ а҆їле́ѵъ {подвѡ́и и҆́хъ}, и҆ є҆ла́мы {притво́ры и҆́хъ}, и҆ фі́нїки и҆́хъ: и҆ бы́сть по мѣ́рѣ вра́тъ зрѧ́щихъ на восто́къ, пѧти́десѧти лакте́й долгота̀ и҆́хъ, а҆ широта̀ и҆́хъ двѹ́десѧти и҆ пѧтѝ лакте́й:

²²и҆ ѻ҆кѡ́нца и҆́хъ, и҆ є҆ла́мы, и҆ фі́нїки и҆́хъ, ѩ҆́коже врата̀ зрѧ҄щаѧ на восто́къ: и҆ седмїю̀ восхо́дами восхожда́хѹ на нѧ̀, и҆ є҆ла́мы внѹтрьѹ́дѹ.

²³И҆ врата̀ дворѹ̀ внѹ́треннемѹ зрѧ҄щаѧ ко вратѡ́мъ сѣ҄вернымъ, ѩ҆́коже врата̀ зрѧ҄щаѧ на восто́къ: и҆ размѣ́ри дво́ръ ѿ вра́тъ до вра́тъ лакте́й сто̀.

²⁴И҆ веде́ мѧ къ ю҆́гѹ, и҆ сѐ, врата̀ зрѧ҄щаѧ на ю҆́гъ, и҆ размѣ́ри ѧ҆̀, и҆ ѳеѐ {черто́ги и҆́хъ}, и҆ а҆їле́ѵа {подвѡ́и и҆́хъ}, и҆ є҆ла́мы {притво́ры и҆́хъ}, по тѣ҄мжде мѣ́рамъ.

²⁵И҆ ѻ҆кѡ́нца и҆́хъ и҆ є҆ла́мы ѡ҆́крестъ ѩ҆́коже и҆ ѻ҆кѡ́нца є҆ла́гъ {ѡ҆́ныѧ}, пѧти́десѧти лакте́й долгота̀ и҆́хъ, а҆ широта̀ двѹ́десѧти и҆ пѧтѝ лакте́й,

²⁶и҆ се́дмь восхо́дѡвъ и҆̀мъ, и҆ є҆ла́мы внѹтрьѹ́дѹ, и҆ фі́нїки и҆́хъ, є҆ди́нъ ѡ҆ сїю̀ странѹ̀, а҆ дрѹгі́й ѡ҆б̾ ѻ҆нѹ̀ над̾ а҆їле́ѵъ {подво́ѧми и҆́хъ}.

²⁷И҆ врата̀ прѧ́мѡ вратѡ́мъ двора̀ внѹ́треннѧгѡ на ю҆́гъ: и҆ размѣ́ри дво́ръ ѿ вра́тъ до вра́тъ на ю҆́гъ, сто̀ лакте́й въ широтѹ̀.

²⁸И҆ введе́ мѧ во дво́ръ внѹ́треннїй вра́тъ, ѩ҆̀же на ю҆́гъ, и҆ размѣ́ри врата̀, ѩ҆̀же на ю҆́гъ, по тѣ҄мжде мѣ́рамъ:

²⁹и҆ ѳеѐ {черто́зи и҆́хъ}, и҆ а҆їле́ѵъ {подвѡ́и и҆́хъ}, и҆ є҆ла́мы {притво́ры и҆́хъ} по тѣ҄мжде мѣ́рамъ.

³⁰И҆ ѻ҆кѡ́нца и҆́хъ и҆ є҆ла́мы ѡ҆́крестъ, пѧти́десѧти лакте́й долгота̀ и҆́хъ, а҆ широта̀ двѹ́десѧти и҆ пѧтѝ лакте́й.

³¹Є҆ла́мы же во дво́ръ внѣ́шнїй, и҆ фі́нїки а҆їле́ѵъ {подво́ємъ и҆́хъ}, и҆ ѻ҆́смь восхо́дѡвъ.

³²И҆ введе́ мѧ во врата̀ зрѧ҄щаѧ на восто́къ, и҆ размѣ́ри ѧ҆̀ по тѣ҄мжде мѣ́рамъ, и҆ ѳеѐ {черто́ги и҆́хъ} и҆ а҆їле́ѵъ {подвѡ́и} и҆ є҆ла́мы {притво́ры и҆́хъ} по тѣ҄мжде мѣ́рамъ.

³³И҆ ѻ҆кѡ́нца и҆̀мъ, и҆ є҆ла́мы {и҆ притво́рамъ и҆́хъ} ѡ҆́крестъ, пѧти́десѧти лакте́й долгота̀ и҆́хъ, а҆ широта̀ и҆́хъ двѹ́десѧти и҆ пѧтѝ лакте́й.

³⁴И҆ є҆ла́мы во дво́ръ внѹ́треннїй, и҆ фі́нїки на а҆їле́ѵъ {на подво́ехъ и҆́хъ} сю́дѹ и҆ сю́дѹ, и҆ ѻ҆́смь восхо́дѡвъ и҆̀мъ.

³⁵И҆ введе́ мѧ во врата̀ ѩ҆̀же на сѣ́веръ, и҆ размѣ́ри по тѣ҄мжде мѣ́рамъ,

³⁶и҆ ѳеѐ и҆ а҆їле́ѵъ и҆ є҆ла́мы, и҆ ѻ҆кѡ́нца и҆̀мъ ѡ҆́крестъ, пѧти́десѧти лакте́й долгота̀ и҆́хъ, а҆ широта̀ двѹ́десѧти и҆ пѧтѝ лакте́й,

³⁷и҆ є҆ла́мы во внѣ́шнїй дво́ръ, и҆ фі́нїки а҆їле́ѵѹ {подво́ємъ и҆́хъ} сю́дѹ и҆ сю́дѹ, и҆ ѻ҆́смь восхо́дѡвъ и҆̀мъ.

³⁸И҆ прегра҄ды и҆́хъ, и҆ двє́ри и҆́хъ, и҆ є҆ла́мы и҆́хъ пред̾ враты̀ и҆́хъ вторы́ми сто́къ, та́мѡ и҆змыва́ютъ всесожжє́нїѧ.

³⁹Во є҆ла́мѣ {въ притво́рѣ} же вра́тъ, двѣ̀ трапє́зы ѡ҆ сїю̀ странѹ̀, двѣ́ же ѡ҆б̾ ѻ҆нѹ̀, є҆́же закала́ти на ни́хъ всесожжє́нїѧ, ѩ҆̀же за грѣхѝ и҆ ѩ҆̀же за невѣ́дѣнїе.

⁴⁰И҆ созадѝ сто́ка всесожже́нїй две́рїй зрѧ́щихъ на сѣ́веръ двѣ̀ трапє́зы на восто́къ проти́вѹ за́дней странѣ̀ (две́рїй) вторы́хъ, и҆ проти́вѹ є҆ла́ма вра́тъ двѣ̀ трапє́зы на восто́къ.

⁴¹Четы́ри ѡ҆ сїю̀ странѹ̀, четы́ри же ѡ҆б̾ ѻ҆нѹ̀ проти́вѹ за́дней странѣ̀ вра́тъ, на тѣ́хъ закала́ютъ заколє́нїѧ: прѧ́мѡ ѻ҆смѝ трапе́зъ заколе́нїй:

⁴²четы́ри же трапє́зы всесожже́нїй ка́мєнны и҆стє́саны, въ широтѹ̀ ла́ктѧ є҆ди́нагѡ и҆ по́лъ, въ долготѹ̀ двѹ́хъ лакте́й и҆ по́лъ, а҆ въ высотѹ̀ ла́коть є҆ди́нъ: на ты҄ѧ возлага́ютъ ѻ҆рѹ́дїѧ, и҆́миже закала́ютъ та́мѡ всесожжє́нїѧ и҆ заколє́нїѧ.

⁴³И҆ и҆мѣ́ютъ ѡ҆гражде́нїе ма́ло и҆сте́сано на дла́нь внѹтрьѹ́дѹ ѡ҆́крестъ, верхѹ́ же трапе́зы покро́въ, є҆́же покрыва́тисѧ и҆̀мъ ѿ дождѧ̀ и҆ зно́ѧ.

⁴⁴И҆ введе́ мѧ во дво́ръ внѹ́треннѣйшїй, и҆ сѐ, двѣ̀ прегра҄ды во внѹ́треннѣйшемъ дворѣ̀, є҆ди́на проти́вѹ за́дней странѣ̀ вра́тъ зрѧ́щихъ на сѣ́веръ, вводѧ́щаѧ на ю҆́гъ, а҆ дрѹга́ѧ проти́вѹ за́дней странѣ̀ вра́тъ сѹ́щихъ на ю҆́гъ, зрѧ́щихъ же къ сѣ́верѹ.

⁴⁵И҆ речѐ ко мнѣ̀: прегра́да сїѧ̀, ѩ҆́же зри́тъ на ю҆́гъ, жерцє́мъ є҆́сть, и҆̀же стрегѹ́тъ стражбѹ̀ хра́ма:

⁴⁶а҆ прегра́да, ѩ҆́же зри́тъ къ сѣ́верѹ, жерцє́мъ є҆́сть стрегѹ́щымъ стра́жѹ тре́бника: ті́и сѹ́ть сы́нове садѹ́кѡвы, пристѹпа́ющїи ѿ леѵі́а ко гд҇еви, є҆́же слѹжи́ти є҆мѹ̀.

⁴⁷И҆ размѣ́ри дво́ръ ста̀ лакте́й въ долготѹ̀ и҆ въ широтѹ̀ ста̀ лакте́й, на четы́ри страны҄ є҆гѡ̀, и҆ тре́бникъ прѧ́мѡ хра́мѹ.

⁴⁸И҆ введе́ мѧ во є҆ла́мъ {притво́ръ} хра́ма: и҆ размѣ́ри а҆і́лъ {подвѡ́и} є҆ла́ма пѧтѝ лакте́й широтѹ̀ ѡ҆ сїю̀ странѹ̀, пѧти́ же лакте́й ѡ҆б̾ ѻ҆нѹ̀, широта́ же две́рнаѧ четырехна́десѧти лакте́й, и҆ бока̀ двє́рнаѧ є҆ла́ма трѝ ла҄кти ѡ҆ сїю̀ странѹ̀, три́ же ѡ҆б̾ ѻ҆нѹ̀.

⁴⁹Долгота́ же є҆ла́ма два́десѧть лакте́й, а҆ широта̀ двана́десѧть лакте́й: и҆ десѧтїю̀ степе́ньми восхожда́хѹ къ немѹ̀, и҆ столпѝ бѧ́хѹ ѹ҆ а҆їла́ма {ѹ҆ подво́євъ}, є҆ди́нъ ѡ҆ сїю̀ странѹ̀, а҆ дрѹгі́й ѡ҆б̾ ѻ҆нѹ̀ {Въ се́й главѣ̀ и҆ въ дрѹги́хъ сеѧ̀ кни́ги глава́хъ ѡ҆ста́влєны є҆врє́йскїѧ рѣ҄чи въ соста́вѣ, поне́же во всѣ́хъ гре́ческихъ перево́дѣхъ стоѧ́тъ є҆врє́йскїѧ жь: а҆ лѹ́чшагѡ ра́ди вразѹмле́нїѧ чита́телємъ, значє́нїѧ и҆́хъ и҆з̾ѡбражены̀ под̾ соста́вомъ славе́нски.}.