Read Библия Церковнославянская I҆езекі́илѧ 45 Bible Online

I҆езекі́илѧ 45 - Библия Церковнославянская bible

I҆езекі́илѧ 45

¹И҆ є҆гда̀ раздѣлѧ́ти ва́мъ зе́млю въ наслѣ́дїе, ѿлѹчи́те нача́токъ гд҇еви, ст҃о ѿ землѝ, въ долготѹ̀ двѹ́десѧти и҆ пѧтѝ ты́сѧщъ, а҆ въ широтѹ̀ десѧтѝ ты́сѧщъ, ст҃о да бѹ́детъ во всѣ́хъ предѣ́лѣхъ и҆́хъ ѡ҆́крестъ.

²И҆ да бѹ́дѹтъ ѿ тогѡ̀ на ст҃о́е пѧ́ть сѡ́тъ, по пѧтѝ сѡ́тъ четвероѹго́лнѡ ѡ҆́крестъ, разстоѧ́нїе же и҆́хъ пѧтьдесѧ́тъ лакте́й ѡ҆́крестъ.

³И҆ ѿ сегѡ̀ размѣре́нїѧ да размѣ́риши въ долготѹ̀ два́десѧть пѧ́ть ты́сѧщъ, а҆ въ широтѹ̀ де́сѧть ты́сѧщъ: и҆ въ то́мъ да бѹ́детъ ѡ҆свѧще́нїе, ст҃а҄ѧ ст҃ы́хъ.

⁴Ст҃о ѿ землѝ да бѹ́детъ жерцє́мъ слѹжа́щымъ во ст҃ѣ́мъ и҆ да бѹ́детъ пристѹпа́ющымъ слѹжи́ти гд҇еви, и҆ бѹ́детъ и҆̀мъ мѣ́сто на до́мы ѿлѹчє́нны ѡ҆свѧще́нїю и҆́хъ,

⁵два́десѧть пѧ́ть ты́сѧщъ въ долготѹ̀ и҆ два́десѧть {Є҆вр.: де́сѧть.} ты́сѧщъ въ широтѹ̀ да бѹ́детъ, леѵі́тѡмъ слѹжа́щымъ хра́мѹ, тѣ҄мъ во ѡ҆держа́нїе гра́ды ко ѡ҆бита́нїю.

⁶И҆ ѡ҆держа́нїе гра́да да да́си въ широтѹ̀ пѧ́ть ты́сѧщъ, а҆ въ долготѹ̀ два́десѧть пѧ́ть ты́сѧщъ, ѩ҆́коже нача́токъ ст҃ы́хъ всемѹ̀ до́мѹ ї҆и҃левѹ да бѹ́детъ

⁷и҆ старѣ́йшинѣ ѿ тогѡ̀: и҆ ѿ сегѡ̀ въ нача́тки ст҃ы́хъ, во ѡ҆держа́нїе гра́да по лицѹ̀ нача́ткѡвъ ст҃ы́нь и҆ по лицѹ̀ ѡ҆держа́нїѧ гра́да, ѩ҆̀же къ мо́рю, и҆ ѿ сѹ́щихъ къ мо́рю, ѩ҆̀же на восто́къ: долгота́ же ѩ҆́кѡ є҆ди́на ча́сть ѿ предѣ҄лъ и҆̀же къ мо́рю, и҆ долгота̀ ко предѣ́лѡмъ и҆̀же на восто́къ землѝ.

⁸И҆ бѹ́детъ є҆мѹ̀ во ѡ҆держа́нїе во ї҆и҃ли, и҆ да не наси́лѹютъ ктомѹ̀ старѣ҄йшины ї҆и҃лєвы лю́демъ мои҄мъ, и҆ зе́млю да наслѣ́дѧтъ до́мъ ї҆и҃левъ по племенѡ́мъ свои҄мъ.

⁹Сїѧ҄ гл҃етъ гд҇ь бг҃ъ: да довлѣ́ютъ ва́мъ, старѣ҄йшины ї҆и҃лєвы, непра́вдѹ и҆ ѡ҆ѕлобле́нїе ѿве́ржите, сѹ́дъ же и҆ пра́вдѹ сотвори́те: и҆зыми́те наси́лїе ѿ люді́й мои́хъ, гл҃етъ гд҇ь бг҃ъ.

¹⁰Вѣ́съ пра́ведный и҆ мѣ́ра пра́ведна и҆ хі́нїѯъ пра́веденъ да бѹ́дѹтъ ва́мъ въ мѣ҄ры:

¹¹и҆ хі́нїѯъ та́кожде є҆ди́нъ да бѹ́детъ ва́мъ, є҆́же прїима́ти, десѧ́таѧ ча́сть гомо́ра хі́нїѯъ, и҆ десѧ́таѧ ча́сть гомо́ра є҆́фї, мѣ́ра къ гомо́рѹ да бѹ́детъ ра́вна.

¹²И҆ вѣ́съ, два́десѧть ѻ҆́воли сі́кль, и҆ два́десѧть пѧ́ть сі́клей, и҆ два́десѧть сі́клей, и҆ пѧтьна́десѧть сі́клей мна́съ бѹ́детъ ва́мъ.

¹³И҆ се́й нача́токъ, є҆го́же ѿлѹчитѐ, шестѹ́ю ча́сть мѣ́ры ѿ гомо́ра пшени́цы и҆ шестѹ́ю ча́сть є҆́фї ѿ ко́ра ѩ҆чме́нѧ.

¹⁴За́повѣдь же ѡ҆ є҆ле́и, мѣ́рѹ є҆ле́а ѿ десѧтѝ мѣ́ръ, поне́же де́сѧть мѣ́ръ сѹ́ть гомо́ръ.

¹⁵И҆ ѻ҆вча̀ є҆ди́но ѿ десѧтѝ ѻ҆ве́цъ ѹ҆ча́стїе ѿ всѣ́хъ ѻ҆те́чествъ ї҆и҃левыхъ, на жє́ртвы и҆ на всесожжє́нїѧ и҆ на спасе́нїе, є҆́же ѹ҆моли́ти ѡ҆ ва́съ, гл҃етъ гд҇ь бг҃ъ.

¹⁶Вси́ же лю́дїе землѝ да дадѧ́тъ се́й нача́токъ старѣ́йшинѣ ї҆и҃левѹ,

¹⁷и҆ старѣ́йшиною да быва́ютъ всесожжє́нїѧ: и҆ жє́ртвы и҆ возлїѧ҄нїѧ бѹ́дѹтъ въ пра́здники и҆ въ новом҇чїѧ, и҆ въ сѹббѡ҄ты и҆ во всѧ҄ пра́здники до́мѹ ї҆и҃лева: то́й сотвори́тъ ѩ҆̀же за грѣхѝ и҆ же́ртвѹ, и҆ всесожжє́нїѧ и҆ ѩ҆̀же спасе́нїѧ, є҆́же ѹ҆молѧ́ти ѡ҆ до́мѣ ї҆и҃левѣ.

¹⁸Та́кѡ гл҃етъ гд҇ь бг҃ъ: въ пе́рвый мц҇ъ, во є҆ди́нъ де́нь мц҇а, да во́змете телца̀ ѿ говѧ́дъ непоро́чна, є҆́же ѡ҆чи́стити ст҃о́е:

¹⁹и҆ да во́зметъ жре́цъ ѿ кро́ве ѡ҆чище́нїѧ и҆ да возлїе́тъ на пра́ги хра́ма и҆ на четы́ри ѹ҆́глы ст҃и́лища, и҆ на же́ртвенникъ и҆ на пра́ги вра́тъ двора̀ внѹ́треннѧгѡ.

²⁰И҆ си́це да сотвори́ши въ седмы́й мц҇ъ: во є҆ди́нъ (де́нь) мц҇а во́змеши ѿ коегѡ́ждо невѣ́дѹщагѡ и҆ ѿ младе́нца, и҆ ѡ҆чи́стите хра́мъ.

²¹Въ пе́рвый мц҇ъ, четвертагѡна́десѧть днѐ мц҇а, да бѹ́детъ ва́мъ па́сха пра́здникъ: се́дмь дні́й да ѩ҆́сте ѡ҆прѣсно́ки.

²²И҆ сотвори́тъ старѣ́йшина въ то́й де́нь за сѧ̀ и҆ за до́мъ и҆ за всѧ҄ лю́ди землѝ, телца̀ за грѣ́хъ:

²³въ се́дмь же дні́й пра́здника да сотвори́тъ всесожжє́нїѧ гд҇еви се́дмь телцє́въ и҆ се́дмь ѻ҆внѡ́въ непоро́чныхъ по всѧ́къ де́нь седмѝ дні́й: и҆ за грѣ́хъ ко́злище ѿ ко́зъ на всѧ́къ де́нь, и҆ же́ртвѹ,

²⁴и҆ ѡ҆прѣсно́ки телцѹ̀ и҆ ѡ҆прѣсно́ки ѻ҆внѹ̀ да сотвори́ши, и҆ є҆ле́а їнъ ѡ҆прѣсно́кѹ.

²⁵Въ седмы́й же мц҇ъ, въ пѧтыйна́десѧть де́нь мц҇а, въ пра́здницѣ сотвори́ши по томѹ́жде, се́дмь дні́й, ѩ҆́коже и҆ за грѣ́хъ, и҆ ѩ҆́коже всесожжє́нїѧ, и҆ ѩ҆́коже да́ръ, и҆ ѩ҆́коже ма́сло древѧ́ное.