Read Библия Церковнославянская Данїи́ла 8 Bible Online

Данїи́ла 8 - Библия Церковнославянская bible

Данїи́ла 8

¹Въ лѣ́то тре́тїе ца́рства валтаса́ра царѧ̀ видѣ́нїе ѩ҆ви́сѧ мнѣ̀, а҆́зъ данїи́лъ, по ѩ҆́вльшемсѧ мнѣ̀ пре́жде.

²И҆ бѣ́хъ въ сѹ́сѣхъ гра́дѣ, и҆́же є҆́сть во странѣ̀ є҆ла́мстѣй, и҆ ви́дѣхъ въ видѣ́нїи, и҆ бѣ́хъ на ѹ҆ва́лѣ,

³и҆ воздвиго́хъ ѻ҆́чи моѝ и҆ ви́дѣхъ: и҆ сѐ, ѻ҆ве́нъ є҆ди́нъ стоѧ̀ пред̾ ѹ҆ва́ломъ є҆мѹ́же ро́зи, ро́зи же высо́цы, є҆ди́нъ же вы́шше дрѹга́гѡ, и҆ вы́шшїй восхожда́ше послѣдѝ.

⁴И҆ ви́дѣхъ ѻ҆вна̀ бодѹ́ща на за́падъ и҆ на сѣ́веръ, и҆ на ю҆́гъ и҆ на восто́къ: и҆ всѝ ѕвѣ́рїе не ста́нѹтъ пред̾ ни́мъ, и҆ не бѣ̀ и҆збавлѧ́юща и҆з̾ рѹкѝ є҆гѡ̀, и҆ сотворѝ по во́ли свое́й, и҆ возвели́чисѧ.

⁵А҆́зъ же бѣ́хъ размышлѧ́ѧ, и҆ сѐ козе́лъ ѿ ко́зъ и҆дѧ́ше ѿ лі́ва на лицѐ всеѧ̀ землѝ и҆ не бѣ̀ прикаса́ѧсѧ землѝ, и҆ козлѹ̀ томѹ̀ ро́гъ ви́димь междѹ̀ ѻ҆чи́ма є҆гѡ̀:

⁶и҆ прїи́де до ѻ҆вна̀ и҆мѹ́щагѡ рога̀ є҆го́же ви́дѣхъ стоѧ́ща пред̾ ѹ҆ва́ломъ, и҆ течѐ къ немѹ̀ въ си́лѣ крѣ́пости своеѧ̀.

⁷И҆ ви́дѣхъ є҆го̀ доходѧ́ща до ѻ҆вна̀, и҆ разсвирѣ́пѣ на него̀, и҆ поразѝ ѻ҆вна̀, и҆ сокрѹшѝ ѻ҆́ба рѡ́га є҆гѡ̀: и҆ не бѣ̀ си́лы ѻ҆внѹ̀, є҆́же ста́ти проти́вѹ є҆мѹ̀: и҆ пове́рже є҆го̀ на зе́млю и҆ попра̀ є҆го̀, и҆ не бѣ̀ и҆збавлѧ́ѧй ѻ҆вна̀ ѿ рѹкѝ є҆гѡ̀.

⁸И҆ козе́лъ ко́зїй возвели́чисѧ до ѕѣла̀: и҆ внегда̀ ѹ҆крѣпи́сѧ, сокрѹши́сѧ ро́гъ є҆гѡ̀ вели́кїй, и҆ взыдо́ша дрѹзі́и четы́ри ро́зи под̾ ни́мъ, по четы́ремъ вѣ́трѡмъ небє́снымъ:

⁹и҆ ѿ є҆ди́нагѡ и҆́хъ взы́де ро́гъ є҆ди́нъ крѣ́покъ, и҆ возвели́чисѧ вельмѝ къ ю҆́гѹ и҆ къ восто́кѹ и҆ къ си́лѣ,

¹⁰и҆ возвели́чисѧ да́же до си́лы нб҇ныѧ: и҆ сотворѝ па́сти на зе́млю ѿ си́лы нб҇ныѧ и҆ ѿ ѕвѣ́здъ, и҆ попра̀ ѧ҆̀:

¹¹и҆ до́ндеже а҆рхїстрати́гъ и҆зба́витъ плѣ́нники, и҆ є҆гѡ̀ ра́ди же́ртва смѧте́сѧ, и҆ благопоспѣши́сѧ є҆мѹ̀, и҆ ст҃о́е ѡ҆пѹстѣ́етъ:

¹²и҆ даде́сѧ на же́ртвѹ грѣ́хъ, и҆ пове́ржесѧ пра́вда на зе́млю: и҆ сотворѝ, и҆ благопоспѣши́сѧ.

¹³И҆ слы́шахъ є҆ди́нагѡ ст҃а́гѡ глаго́люща. И҆ речѐ є҆ди́нъ ст҃ы́й дрѹго́мѹ нѣ́коемѹ глаго́лющемѹ: доко́лѣ видѣ́нїе ста́нетъ, же́ртва ѿѧ́таѧ, и҆ грѣ́хъ ѡ҆пѹстѣ́нїѧ да́нный, и҆ ст҃о́е и҆ си́ла попере́тсѧ;

¹⁴И҆ речѐ є҆мѹ̀: да́же до ве́чера и҆ ѹ҆́тра дні́й двѣ̀ ты́сѧщы и҆ три́ста, и҆ ѡ҆чи́ститсѧ ст҃о́е.

¹⁵И҆ бы́сть, є҆гда̀ ви́дѣхъ а҆́зъ данїи́лъ видѣ́нїе и҆ взыска́хъ вѣ́дѣнїѧ, и҆ сѐ, ста̀ предо мно́ю а҆́ки ѡ҆́бразъ мѹ́жескъ,

¹⁶и҆ слы́шахъ гла́съ мѹ́жескъ средѣ̀ ѹ҆ва́ла, и҆ призва̀ и҆ речѐ: гаврїи́ле, скажѝ видѣ́нїе ѻ҆́номѹ.

¹⁷И҆ прїи́де и҆ ста̀ бли́з̾ стоѧ́нїѧ моегѡ̀: и҆ є҆гда̀ прїи́де ѹ҆жасо́хсѧ и҆ падо́хъ на лицѐ моѐ. И҆ речѐ ко мнѣ̀: разѹмѣ́й, сы́не человѣ́чь, є҆ще́ бо до сконча́нїѧ вре́мене видѣ́нїе.

¹⁸И҆ є҆гда̀ глаго́лаше со мно́ю, падо́хъ ни́цъ на землѝ, и҆ прикоснѹ́сѧ мнѣ̀, и҆ поста́ви мѧ̀ на но́ги моѧ҄, и҆ речѐ:

¹⁹сѐ, а҆́зъ возвѣща́ю тебѣ̀ бѹ҄дѹщаѧ на послѣ́докъ гнѣ́ва (сынѡ́мъ люді́й твои́хъ): є҆ще́ бо до конца̀ вре́мене видѣ́нїе.

²⁰Ѻ҆ве́нъ, є҆го́же ви́дѣлъ є҆сѝ и҆мѹ́ща рога̀, ца́рь ми́дскїй и҆ пе́рсскїй:

²¹а҆ козе́лъ ко́зїй ца́рь є҆́ллинскїй є҆́сть: ро́гъ же вели́кїй, и҆́же междѹ̀ ѻ҆чи́ма є҆гѡ̀, то́й є҆́сть ца́рь пе́рвый:

²²семѹ́ же сокрѹши́вшѹсѧ воста́ша четы́ри ро́зи под̾ ни́мъ: четы́ри ца́рїе воста́нѹтъ ѿ ѩ҆зы́ка є҆гѡ̀, но не въ крѣ́пости є҆гѡ̀,

²³и҆ на послѣ́докъ ца́рства и҆́хъ, и҆сполнѧ́ющымсѧ грѣхѡ́мъ и҆́хъ, воста́нетъ ца́рь безсра́менъ лице́мъ и҆ разѹмѣ́ѧ гада҄нїѧ,

²⁴и҆ держа́вна крѣ́пость є҆гѡ̀, не въ крѣ́пости же свое́й, и҆ чѹде́снѡ растли́тъ и҆ ѹ҆пра́витъ и҆ сотвори́тъ, и҆ разсы́плетъ крѣ҄пкїѧ и҆ лю́ди ст҃ы,

²⁵и҆ ѩ҆ре́мъ вери́гъ свои́хъ и҆спра́витъ: ле́сть въ рѹцѣ̀ є҆гѡ̀, и҆ въ се́рдцы свое́мъ возвели́читсѧ, и҆ ле́стїю разсы́плетъ мно́гихъ, и҆ на па́гѹбѹ мнѡ́гимъ возста́нетъ, и҆ ѩ҆́кѡ ѩ҆́ица рѹко́ю сокрѹши́тъ.

²⁶И҆ видѣ́нїе ве́чера и҆ ѹ҆́тра рѣче́ннагѡ и҆́стинно є҆́сть: ты́ же назна́менай видѣ́нїе, ѩ҆́кѡ на дни҄ мнѡ́ги.

²⁷А҆́зъ же данїи́лъ ѹ҆спо́хъ и҆ и҆знемога́хъ на дни҄ (мнѡ́ги), и҆ воста́хъ и҆ творѧ́хъ дѣла̀ царє́ва, и҆ почѹди́хсѧ видѣ́нїю, и҆ не бѧ́ше разѹмѣва́ющагѡ.