Read Библия Церковнославянская Ѡ҆сі́а 12 Bible Online

Ѡ҆сі́а 12 - Библия Церковнославянская bible

Ѡ҆сі́а 12

¹Е҆фре́мъ же ѕо́лъ дѹ́хъ, гонѧ́ше зно́й ве́сь де́нь: тщє́тнаѧ и҆ сѹ́єтнаѧ ѹ҆мно́жи, и҆ завѣ́тъ со а҆ссѷрї҄аны завѣща̀, и҆ є҆ле́й во є҆гѵ́петъ посыла́ше.

²И҆ сѹ́дъ гд҇еви ко ї҆ѹ́дѣ, є҆́же ѿмсти́ти ї҆а́кѡва: по пѹтє́мъ є҆гѡ̀ и҆ по начина́нїємъ є҆гѡ̀ возда́стъ є҆мѹ̀.

³Во ѹ҆тро́бѣ запѧ̀ бра́та своего̀ и҆ трѹды҄ свои́ми ѹ҆крѣпѣ̀ къ бг҃ѹ:

⁴и҆ ѹ҆крѣпѣ̀ со а҆́гг҃ломъ и҆ превозмо́же. Пла́кашасѧ и҆ моли́шасѧ мѝ: въ домѹ̀ ѡ҆́новѣ ѡ҆брѣто́ша мѧ̀, и҆ тѹ̀ глаго́ласѧ къ ни҄мъ.

⁵Гд҇ь же бг҃ъ вседержи́тель бѹ́детъ па́мѧть є҆гѡ̀.

⁶И҆ ты̀ ѡ҆ бз҃ѣ свое́мъ ѡ҆брати́шисѧ, ми́лость и҆ сѹ́дъ снабдѝ, и҆ приближа́йсѧ къ бг҃ѹ своемѹ̀ пр҇нѡ.

⁷Ханаа́нъ, въ рѹцѣ̀ є҆гѡ̀ мѣ́рило непра́вды, наси́льствовати возлюбѝ.

⁸И҆ речѐ є҆фре́мъ: ѻ҆ба́че ѡ҆богатѣ́хъ, ѡ҆брѣто́хъ прохлажде́нїе себѣ̀: всѝ трѹды̀ є҆гѡ̀ не ѡ҆брѧ́щѹтсѧ є҆мѹ̀ ра́ди непра́вдъ, и҆́миже согрѣшѝ.

⁹А҆́зъ же гд҇ь бг҃ъ тво́й, и҆зведо́хъ тѧ̀ и҆з̾ землѝ є҆гѵ́петски: є҆щѐ вселю̀ тѧ̀ въ кѹ́щахъ, ѩ҆́коже во дни҄ пра́здника.

¹⁰И҆ гл҃ахъ ко про҇ро́кѡмъ, и҆ а҆́зъ видѣ҄нїѧ ѹ҆мно́жихъ, и҆ въ рѹка́хъ про҇ро́ческихъ ѹ҆подо́бихсѧ.

¹¹А҆́ще не галаа́дъ є҆́сть, ѹ҆̀бо ло́жни бы́ша во галга́лѣхъ кнѧ҄зи трє́бы кладѹ́ще, и҆ трє́бища и҆́хъ ѩ҆́коже же́лви на цѣли́знѣ польстѣ́й.

¹²И҆ ѿи́де ї҆а́кѡвъ на по́ле сѷрі́йско, и҆ рабо́та ї҆и҃ль ѡ҆ женѣ̀ и҆ ѡ҆ женѣ̀ снабдѣ̀.

¹³И҆ про҇ро́комъ и҆зведѐ гд҇ь ї҆и҃лѧ и҆з̾ землѝ є҆гѵ́петскїѧ, и҆ про҇ро́комъ снабдѣ́сѧ.

¹⁴Разгнѣ́ва мѧ̀ є҆фре́мъ и҆ воз̾ѧри́ мѧ: и҆ кро́вь є҆гѡ̀ на не́мъ пролїе́тсѧ, и҆ ѹ҆кори́знѹ є҆гѡ̀ возда́стъ є҆мѹ̀ гд҇ь.