Read Библия Церковнославянская Ѡ҆сі́а 2 Bible Online

Ѡ҆сі́а 2 - Библия Церковнославянская bible

Ѡ҆сі́а 2

¹Рцы́те бра́тѹ своемѹ̀: лю́дїе моѝ: и҆ сестрѣ̀ свое́й: поми́лованнаѧ.

²Сѹди́тесѧ съ ма́терїю свое́ю, сѹди́тесѧ, ѩ҆́кѡ та̀ не жена̀ моѧ̀, и҆ а҆́зъ не мѹ́жъ є҆ѧ̀: и҆ ѿве́ргѹ блѹжє́нїѧ є҆ѧ̀ ѿ лица̀ моегѡ̀ и҆ любодѣ́йство є҆ѧ̀ ѿ среды̀ сосцѹ҄ є҆ѧ̀:

³ѩ҆́кѡ да совлекѹ̀ ю҆̀ на́гѹ и҆ поста́влю ю҆̀ ѩ҆́коже въ де́нь рожде́нїѧ є҆ѧ̀, и҆ положѹ̀ ю҆̀ ѩ҆́кѡ пѹсты́ню, и҆ ѹ҆чиню̀ ю҆̀ ѩ҆́кѡ зе́млю безво́днѹ, и҆ ѹ҆бїю̀ ѻ҆́нѹю жа́ждею:

⁴и҆ ча҄дъ є҆ѧ̀ не поми́лѹю, ѩ҆́кѡ ча҄да блѹже́нїѧ сѹ́ть,

⁵ѩ҆́кѡ соблѹдѝ ма́ти и҆́хъ, посрами́сѧ роди́вшаѧ и҆̀хъ, рече́ бо: пойдѹ̀ в̾слѣ́дъ похотникѡ́въ мои́хъ, даю́щихъ мнѣ̀ хлѣ́бы моѧ҄ и҆ во́дѹ мою̀, и҆ ри҄зы моѧ҄ и҆ плащани҄цы моѧ҄, и҆ ма́сло моѐ и҆ всѧ҄, є҆ли҄ка мнѣ̀ досто́ѧтъ.

⁶Сегѡ̀ ра́ди, сѐ, а҆́зъ заграждѹ̀ пѹ́ть є҆ѧ̀ те́рнїемъ и҆ возграждѹ̀ распѹ҄тїѧ є҆ѧ̀, и҆ стезѝ своеѧ̀ не ѡ҆брѧ́щетъ:

⁷и҆ пожене́тъ похотникѝ своѧ҄ и҆ не пости́гнетъ и҆́хъ, и҆ взы́щетъ и҆̀хъ и҆ не ѡ҆брѧ́щетъ, и҆ рече́тъ: пойдѹ̀ и҆ возвращѹ́сѧ къ мѹ́жѹ моемѹ̀ пе́рвомѹ, ѩ҆́кѡ добрѣ́е мѝ бѣ̀ тогда̀, не́жели нн҃ѣ.

⁸Но та̀ не ѹ҆разѹмѣ̀, ѩ҆́кѡ а҆́зъ да́хъ є҆́й пшени́цѹ и҆ вїно̀ и҆ ма́сло, и҆ сребро̀ ѹ҆мно́жихъ є҆́й: сїѧ́ же срє́брѧны и҆ зла҄ты сотворѝ ваа́лѹ.

⁹Сегѡ̀ ра́ди ѡ҆бращѹ́сѧ и҆ возмѹ̀ пшени́цѹ мою̀ во вре́мѧ є҆ѧ̀ и҆ вїно̀ моѐ во вре́мѧ є҆гѡ̀, и҆ ѿимѹ̀ ри҄зы моѧ҄ и҆ плащани҄цы моѧ҄, да не покрыва́етъ стѹда̀ своегѡ̀:

¹⁰и҆ нн҃ѣ ѿкры́ю нечистотѹ̀ є҆ѧ̀ пред̾ похотника́ми є҆ѧ̀, и҆ никто́же ѿи́метъ є҆ѧ̀ ѿ рѹкѝ моеѧ̀:

¹¹и҆ ѿвращѹ̀ всѧ҄ весє́лїѧ є҆ѧ̀ и҆ пра́здники є҆ѧ̀, и҆ новомч҇їѧ є҆ѧ̀ и҆ сѹббѡ҄ты є҆ѧ̀ и҆ всѧ҄ пра́зднєства є҆ѧ̀,

¹²и҆ погѹблю̀ вїногра́дъ є҆ѧ̀ и҆ смѡ́квы є҆ѧ̀, ѡ҆ ни́хже речѐ: мзды҄ мѝ сѹ́ть сїѧ҄, ѩ҆̀же да́ша мнѣ̀ похотницы̀ моѝ: и҆ положѹ̀ ѧ҆̀ въ свидѣ́нїе, и҆ поѧдѧ́тъ ѧ҆̀ ѕвѣ́рїе се́лнїи и҆ пти҄цы небє́сныѧ и҆ га́ди земні́и:

¹³и҆ ѿмщѹ̀ на не́й дни҄ ваалі́мѡвы, въ нѧ́же трє́бы кладѧ́ше и҆̀мъ, и҆ вдѣва́ше ѹ҆серѧ҄зи своѧ҄ и҆ мони҄ста своѧ҄, и҆ хожда́ше в̾слѣ́дъ похотникѡ́въ свои́хъ, а҆ менѐ забы̀, гл҃етъ гд҇ь.

¹⁴Сегѡ̀ ра́ди, сѐ, а҆́зъ соблажню̀ ю҆̀, и҆ ѹ҆чиню̀ ю҆̀ ѩ҆́кѡ пѹсты́ню, и҆ возгл҃ю въ се́рдце є҆ѧ̀,

¹⁵и҆ да́мъ є҆́й притѧжа́нїе є҆ѧ̀ ѿтѹ́дѹ и҆ полѧ́нѹ а҆хѡ́ровѹ, ѿве́рсти смы́слъ є҆ѧ̀: и҆ смири́тсѧ та́мѡ по днє́мъ дѣ́тства своегѡ̀ и҆ по днє́мъ и҆зведе́нїѧ своегѡ̀ ѿ землѝ є҆гѵ́петски.

¹⁶И҆ бѹ́детъ въ то́й де́нь, нарече́тъ мѧ̀ мѹ́жъ мо́й, гл҃етъ гд҇ь, а҆ не прозове́тъ менѐ ктомѹ̀ ваалі́мъ.

¹⁷И҆ ѿве́ргѹ и҆мена̀ ваалї҄млѧ ѿ ѹ҆́стъ є҆ѧ̀, и҆ не воспомѧнѹ́тсѧ ксемѹ̀ и҆мена̀ и҆́хъ.

¹⁸И҆ завѣща́ю и҆̀мъ завѣ́тъ въ то́й де́нь со ѕвѣрьмѝ се́лными и҆ со пти́цами небе́сными и҆ съ га҄ды зємны́ми, и҆ лѹ́къ и҆ ме́чь и҆ бра́нь сокрѹшѹ̀ ѿ землѝ, и҆ вселю̀ ѧ҆̀ со ѹ҆пова́нїемъ:

¹⁹и҆ ѡ҆брѹчѹ́ тѧ себѣ̀ во вѣ́къ и҆ ѡ҆брѹчѹ́ тѧ себѣ̀ въ пра́вдѣ и҆ въ сѹдѣ̀ и҆ въ ми́лости и҆ въ щедро́тахъ:

²⁰и҆ ѡ҆брѹчѹ́ тѧ себѣ̀ въ вѣ́рѣ, и҆ ѹ҆вѣ́си гд҇а.

²¹И҆ бѹ́детъ въ то́й де́нь, гл҃етъ гд҇ь, послѹ́шаю небесѐ, а҆ ѻ҆́ное послѹ́шаетъ землѝ,

²²и҆ землѧ̀ послѹ́шаетъ пшени́цы и҆ вїна̀ и҆ ма́сла, и҆ сі́и послѹ́шаютъ ї҆езрае́лѧ:

²³и҆ всѣ́ю ѻ҆́нѹю себѣ̀ на землѝ и҆ поми́лѹю непоми́лованнѹю: и҆ рекѹ̀ не лю́демъ мои҄мъ: лю́дїе моѝ є҆стѐ вы̀: и҆ ті́и рекѹ́тъ: гд҇ь бг҃ъ на́шъ ты̀ є҆сѝ.