Read Библия Церковнославянская Ѡ҆сі́а 3 Bible Online

Ѡ҆сі́а 3 - Библия Церковнославянская bible

Ѡ҆сі́а 3

¹И҆ речѐ гд҇ь ко мнѣ̀: є҆щѐ и҆дѝ и҆ возлюбѝ женѹ̀ лю́бѧщѹю ѕло̀ и҆ любодѣ́йцѹ, ѩ҆́коже лю́битъ бг҃ъ сы́ны ї҆и҃лєвы: сі́и же взира́ютъ къ богѡ́мъ чѹжди҄мъ и҆ лю́бѧтъ варє́нїѧ съ корі́нками.

²И҆ наѧ́хъ себѣ̀ ѻ҆́нѹю пѧтїюна́десѧть сре́брениками и҆ гомо́ромъ ѩ҆чме́нѧ и҆ не́велемъ вїна̀,

³и҆ реко́хъ є҆́й: дни҄ мнѡ́ги да сѣди́ши ѹ҆ менє̀ и҆ а҆́зъ ѹ҆ тебє̀, и҆ не соблѹ́диши, ни бѹ́деши мѹ́жѹ и҆но́мѹ:

⁴занѐ дни҄ мнѡ́ги сѧ́дѹтъ сы́нове ї҆и҃лєвы, не сѹ́щѹ царю̀, ни сѹ́щѹ кнѧ́зю, ни сѹ́щей же́ртвѣ, ни сѹ́щѹ же́ртвенникѹ, ни жре́чествѹ, нижѐ ѩ҆вле́нїємъ:

⁵и҆ посе́мъ ѡ҆братѧ́тсѧ сы́нове ї҆и҃лєвы и҆ взы́щѹтъ гд҇а бг҃а своего̀ и҆ даві́да царѧ̀ своего̀, и҆ почѹдѧ́тсѧ ѡ҆ гд҇ѣ и҆ ѡ҆ бла́гостехъ є҆гѡ̀ въ послѣ҄днїѧ дни҄.