Read Библия Церковнославянская Ѡ҆сі́а 4 Bible Online

Ѡ҆сі́а 4 - Библия Церковнославянская bible

Ѡ҆сі́а 4

¹Слы́шите сло́во гд҇не, сы́нове ї҆и҃лєвы, ѩ҆́кѡ сѹ́дъ гд҇еви къ живѹ́щымъ на землѝ: занѐ нѣ́сть и҆́стины, ни ми́лости, ни вѣ́дѣнїѧ бж҃їѧ на землѝ:

²клѧ́тва и҆ лжа̀, и҆ ѹ҆бі́йство и҆ татьба̀ и҆ любодѣѧ́нїе разлїѧ́сѧ по землѝ, и҆ кро́вь съ кровьмѝ мѣша́ютъ.

³Сегѡ̀ ра́ди воспла́четсѧ землѧ̀ и҆ ѹ҆ма́литсѧ со всѣ́ми всели́вшимисѧ на не́й, со ѕвѣрьмѝ польски́ми и҆ съ га҄ды зємны́ми и҆ со пти́цами небе́сными, и҆ ры҄бы морскї҄ѧ ѡ҆скѹдѣ́ютъ:

⁴ѩ҆́кѡ да никто́же не при́тсѧ, ни ѡ҆блича́етсѧ никто́же: лю́дїе же моѝ а҆́ки прерѣка́емый жре́цъ,

⁵и҆ и҆знемо́жетъ во дне́хъ, и҆ и҆знемо́жетъ проро́къ съ тобо́ю: но́щи ѹ҆подо́бихъ ма́терь твою̀.

⁶Ѹ҆подо́бишасѧ лю́дїе моѝ а҆́ки не и҆мѹ́ще ѹ҆мѣ́нїѧ: ѩ҆́кѡ ты̀ ѹ҆мѣ́нїе ѿве́рглъ є҆сѝ, ѿве́ргѹ и҆ а҆́зъ тебѐ, є҆́же не жре́чествовати мнѣ̀, и҆ забы́лъ є҆сѝ зако́нъ бг҃а своегѡ̀, забѹ́дѹ и҆ а҆́зъ ча҄да твоѧ҄.

⁷По мно́жествѹ и҆́хъ та́кѡ согрѣши́ша мнѣ̀: сла́вѹ и҆́хъ въ безче́стїе положѹ̀.

⁸Грѣхѝ люді́й мои́хъ снѣдѧ́тъ и҆ въ непра́вдахъ и҆́хъ во́змѹтъ дѹ́шы и҆́хъ.

⁹И҆ бѹ́детъ ѩ҆́коже лю́дїе, та́кѡ и҆ жре́цъ: и҆ ѿмщѹ̀ на ни́хъ пѹти҄ и҆́хъ, и҆ ѹ҆мышлє́нїѧ и҆́хъ возда́мъ и҆̀мъ.

¹⁰И҆ бѹ́дѹтъ ѩ҆́сти и҆ не насы́тѧтсѧ: соблѹди́ша и҆ не и҆спра́вѧтсѧ: поне́же гд҇а ѡ҆ста́виша є҆́же снабдѣ́ти.

¹¹Блѹ́дъ и҆ вїно̀ и҆ пїѧ́нство прїѧ́тъ се́рдце люді́й мои́хъ.

¹²Въ зна́менїихъ вопроша́хѹ и҆ въ жезлѣ́хъ свои́хъ повѣ́дахѹ тѣ́мъ: дѹ́хомъ блѹже́нїѧ прельсти́шасѧ и҆ соблѹди́ша ѿ бг҃а своегѡ̀:

¹³на версѣ́хъ го́ръ кадѧ́хѹ и҆ на холмѣ́хъ жрѧ́хѹ под̾ дѹ́бомъ и҆ под̾ є҆́лїю и҆ под̾ дре́вомъ вѣ́твеннымъ, ѩ҆́кѡ до́бръ кро́въ: сегѡ̀ ра́ди соблѹ́дѧтъ дщє́ри ва́шѧ, и҆ невѣ҄сты ва́шѧ возлюбодѣ́ютъ.

¹⁴И҆ не присѣщѹ̀ на дщє́ри ва́шѧ, є҆гда̀ соблѹ́дѧтъ, и҆ на невѣ҄сты ва́шѧ, є҆гда̀ возлюбодѣ́ютъ: ѩ҆́кѡ и҆ ті́и со блѹдни́цами смѣси́шасѧ и҆ со блѹдника́ми трє́бы жрѧ́хѹ, и҆ лю́дїе смы́слѧщїи со блѹдни́цею сплета́хѹсѧ.

¹⁵Ты́ же, ї҆и҃лю, не не разѹмѣва́й, и҆ ї҆ѹ́до: не входи́те въ галга́лѹ и҆ не восходи́те въ до́мъ ѡ҆́новъ, и҆ не клени́тесѧ гд҇емъ живы҄мъ.

¹⁶Занѐ ѩ҆́коже ю҆́ница стрѣка́ломъ стрѣ́чема разсвирѣ́пѣ ї҆и҃ль: нн҃ѣ ѹ҆пасе́тъ ѧ҆̀ гд҇ь, ѩ҆́кѡ а҆́гнца на простра́нствѣ.

¹⁷Прича́стникъ кѹмі́рѡмъ є҆фре́мъ положѝ себѣ̀ собла́зны,

¹⁸и҆збра̀ ханане́ѡвъ: блѹдѧ́ще возблѹди́ша, возлюби́ша безче́стїе ѿ хрепета́нїѧ своегѡ̀.

¹⁹Ви́хръ дѹ́ха возсви́щетъ въ крилѣ́хъ свои́хъ, и҆ посра́мѧтсѧ ѿ тре́бищъ свои́хъ.