Read Библия Церковнославянская Ѡ҆сі́а 6 Bible Online

Ѡ҆сі́а 6 - Библия Церковнославянская bible

Ѡ҆сі́а 6

¹Въ ско́рби свое́й ѹ҆́треневати бѹ́дѹтъ ко мнѣ̀, глаго́люще: и҆́демъ и҆ ѡ҆брати́мсѧ ко гд҇ѹ бг҃ѹ на́шемѹ,

²ѩ҆́кѡ то́й побѝ ны̀, и҆ и҆зцѣли́тъ ны̀: ѹ҆ѧзви́тъ, и҆ ѹ҆врачѹ́етъ ны̀:

³и҆зцѣли́тъ ны̀ по двою̀ дню҄, въ де́нь тре́тїй воскре́снемъ и҆ жи́ви бѹ́демъ пред̾ ни́мъ, и҆ ѹ҆вѣ́мы: пожене́мъ, є҆́же ѹ҆вѣ́дѣти гд҇а: ѩ҆́кѡ ѹ҆́тро гото́во ѡ҆брѧ́щемъ є҆го̀, и҆ прїи́детъ на́мъ ѩ҆́кѡ до́ждь ра́ннїй и҆ по́здный землѝ.

⁴Что́ ти сотворю̀, є҆фре́ме; что́ ти сотворю̀, ї҆ѹ́до; ми́лость бо ва́ша ѩ҆́кѡ ѡ҆́блакъ ѹ҆́треннїй и҆ ѩ҆́кѡ роса̀ ра́нѡ па́дающаѧ.

⁵Сегѡ̀ ра́ди пожа́хъ проро́ки ва́шѧ, ѹ҆би́хъ ѧ҆̀ словесе́мъ ѹ҆́стъ мои́хъ, и҆ сѹ́дъ мо́й ѩ҆́кѡ свѣ́тъ и҆зы́детъ.

⁶Занѐ ми́лости хощѹ̀ а҆ не же́ртвы, и҆ ѹ҆вѣ́дѣнїѧ бж҃їѧ, не́жели всесожже́нїѧ.

⁷Сі́и же сѹ́ть ѩ҆́кѡ человѣ́къ престѹпа́ѧй завѣ́тъ: та́мѡ презрѣ́ша мѧ̀.

⁸Галаа́дъ гра́дъ дѣ́лаѧй сѹ́єтнаѧ, мѹтѧ́й во́дѹ,

⁹а҆ крѣ́пость твоѧ̀ ѩ҆́кѡ мѹ́жа морска́гѡ разбо́йника: скры́ша жерцы̀ пѹ́ть гд҇ень, ѹ҆би́ша сїкі́мѹ, ѩ҆́кѡ беззако́нїе сотвори́ша.

¹⁰Въ домѹ̀ ї҆и҃левѣ ви́дѣхъ грѡ́знаѧ: та́мѡ блѹже́нїе є҆фре́мово: ѡ҆скверни́сѧ ї҆и҃ль и҆ ї҆ѹ́да.

¹¹Начнѝ ѡ҆б̾има́ти вїногра́дъ себѣ̀, є҆гда̀ возвращѹ̀ плѣне́нїе люді́й мои́хъ.