Read Библия Церковнославянская Ѡ҆сі́а 7 Bible Online

Ѡ҆сі́а 7 - Библия Церковнославянская bible

Ѡ҆сі́а 7

¹Е҆гда̀ и҆зцѣлю̀ ї҆и҃лѧ, и҆ ѿкры́етсѧ непра́вда є҆фре́мова и҆ ѕло́ба самарі́йска, ѩ҆́кѡ содѣ́лаша лжѹ̀: и҆ та́ть къ немѹ̀ вни́детъ, совлача́ѧй разбо́йникъ на пѹтѝ є҆гѡ̀:

²ѩ҆́кѡ да воспою́тъ вкѹ́пѣ, а҆́ки пою́щїи се́рдцемъ свои́мъ. Всѧ҄ ѕлѡ́бы и҆́хъ помѧнѹ́хъ: нн҃ѣ ѡ҆быдо́ша и҆̀хъ совѣ́ти и҆́хъ, проти́вѹ лицѹ̀ мѝ бы́ша.

³Ѕло́бами свои́ми возвесели́ша царѧ̀ и҆ лжа́ми свои́ми кнѧзе́й.

⁴Всѝ любодѣ́ющїи, ѩ҆́кѡ пе́щь жего́ма на пече́нїе сожже́нїѧ ѿ пла́мене, ѿ примѣше́нїѧ тѹ́ка, до́ндеже вски́снетъ то̀ всѐ.

⁵Во дни҄ царе́й ва́шихъ нача́ша кнѧ҄зи ѩ҆ри́тисѧ ѿ вїна̀, простро́ша рѹ́ки своѧ҄ съ гѹби́тельми:

⁶занѐ разгорѣ́шасѧ ѩ҆́кѡ пе́щь сердца̀ и҆́хъ, внегда̀ ѹ҆стремлѧ́тисѧ и҆̀мъ: всю̀ но́щь сна̀ є҆фре́мъ насы́тисѧ, заѹ́тра бы́сть, и҆ разгорѣ́сѧ ѩ҆́кѡ пла́мень ѻ҆́гненный.

⁷Всѝ согрѣ́ѧшасѧ, ѩ҆́кѡ пе́щь жего́ма, и҆ ѻ҆́гнь поѧдѐ сѹді́й и҆́хъ: всѝ ца́рїе и҆́хъ падо́ша, не бѣ̀ въ ни́хъ молѧ́йсѧ ко мнѣ̀.

⁸Е҆фре́мъ въ лю́дехъ свои́хъ са́мъ смѣсѧ́шесѧ, є҆фре́мъ бы́сть ѡ҆прѣсно́къ неѡбраща́емь.

⁹И҆ снѣдо́ша чѹжді́и крѣ́пость є҆гѡ̀, се́й же не разѹмѣ̀: и҆ сѣди҄ны ѩ҆ви́шасѧ на не́мъ, ѻ҆́нъ же не позна̀.

¹⁰И҆ смири́тсѧ ѹ҆кори́зна ї҆и҃лева въ лицѐ є҆мѹ̀: и҆ не возврати́шасѧ ко гд҇ѹ бг҃ѹ своемѹ̀ и҆ не взыска́ша є҆гѡ̀ во всѣ́хъ си́хъ.

¹¹И҆ бѧ́ше є҆фре́мъ ѩ҆́кѡ го́лѹбь безѹ́мный, не и҆мы́й се́рдца: є҆гѵ́пта молѧ́ше, и҆ во а҆ссѷрі́аны ѿидо́ша.

¹²ѩ҆́коже и҆́дѹтъ, возложѹ̀ на нѧ̀ мре́жѹ мою̀, ѩ҆́коже пти҄цы небє́сныѧ све́ргѹ ѧ҆̀, накажѹ̀ ѧ҆̀ въ слѹ́хъ скорбѣ́нїѧ и҆́хъ.

¹³Го́ре и҆̀мъ, ѩ҆́кѡ ѿскочи́ша ѿ менє̀: боѧзли́ви сѹ́ть, ѩ҆́кѡ нече́ствоваша ко мнѣ̀: а҆́зъ же и҆зба́вихъ ѧ҆̀, сі́и же возглаго́лаша на мѧ̀ лжѹ̀.

¹⁴И҆ не возопи́ша ко мнѣ̀ сердца̀ и҆́хъ, но пла́кахѹсѧ на ло́жахъ свои́хъ: ѡ҆ пшени́цѣ и҆ вїнѣ̀ сѣча́хѹсѧ.

¹⁵Нака́жѹтсѧ мно́ю, а҆́зъ же ѹ҆крѣпи́хъ мы́шцѹ и҆́хъ, и҆ на мѧ̀ помы́слиша ѕла҄ѧ.

¹⁶Соврати́шасѧ ни во что́же, бы́ша ѩ҆́кѡ лѹ́къ напрѧже́нъ: падѹ́тсѧ кнѧ҄зи и҆́хъ мече́мъ ра́ди ненаказа́нїѧ ѩ҆зы́ка своегѡ̀. Сїѐ рѹга́нїе и҆́хъ въ землѝ є҆гѵ́петстѣй.