Read Библия Церковнославянская Ѡ҆сі́а 8 Bible Online

Ѡ҆сі́а 8 - Библия Церковнославянская bible

Ѡ҆сі́а 8

¹Въ нѣ́дрѣ и҆́хъ, ѩ҆́кѡ землѧ̀ непроходи́ма, ѩ҆́кѡ ѻ҆ре́лъ въ домѹ̀ гд҇ни: поне́же престѹпи́ша завѣ́тъ мо́й и҆ на зако́нъ мо́й нече́ствоваша.

²Ко мнѣ̀ воззовѹ́тъ: бж҃е, позна́хомъ тѧ̀,

³ѩ҆́кѡ ї҆и҃ль ѿврати́сѧ благи́хъ, врага̀ прогна́ша.

⁴Са́ми себѣ̀ царѧ̀ поста́виша, а҆ не мно́ю, нача́лствоваша, и҆ не ѩ҆ви́ша мѝ: ѿ сребра̀ своегѡ̀ и҆ ѿ зла́та своегѡ̀ сотвори́ша себѣ̀ кѹмі́ры, ѩ҆́кѡ да потребѧ́тсѧ.

⁵Сокрѹшѝ телца̀ твоего̀, самарі́е, разгнѣ́васѧ ѩ҆́рость моѧ̀ на нѧ̀: доко́лѣ не мо́гѹтъ ѡ҆чи́ститисѧ, и҆̀же во ї҆и҃ли;

⁶И҆ то̀ древодѣ́ль сотворѝ, и҆ нѣ́сть бг҃ъ: занѐ льстѧ́й бѧ́ше теле́цъ тво́й, самарі́е.

⁷ѩ҆́кѡ вѣ́тромъ и҆стлѣ́но всѣ́ѧша, и҆ разрѹше́нїе и҆́хъ прїи́метъ ѧ҆̀: рѹкоѧ́ть не и҆мѹ́щаѧ си́лы є҆́же сотвори́ти мѹкѹ̀, а҆́ще же и҆ сотвори́тъ, то̀ чѹжді́и поѧдѧ́тъ ю҆̀.

⁸Поглоще́нъ бы́сть ї҆и҃ль, нн҃ѣ бы́сть во ѩ҆зы́цѣхъ ѩ҆́кѡ сосѹ́дъ непотре́бенъ,

⁹поне́же ті́и взыдо́ша ко а҆ссѷрі́анѡмъ: процвѣтѐ ѡ҆ себѣ̀ є҆фре́мъ, да́ры возлюбѝ.

¹⁰Сегѡ̀ ра́ди предадѹ́тсѧ во ѩ҆зы́ки: нн҃ѣ воспрїимѹ̀ и҆̀хъ, и҆ почі́ютъ ма́лѡ є҆́же пома́зати царѧ̀ и҆ кнѧ҄зи.

¹¹ѩ҆́кѡ ѹ҆мно́жи є҆фре́мъ трє́бища, во грѣхѝ бы́ша є҆мѹ̀ трє́бища возлю́блєннаѧ.

¹²Впишѹ̀ є҆мѹ̀ мно́жество, и҆ закѡ́ннаѧ є҆гѡ̀ въ чѹжда҄ѧ вмѣни́шасѧ трє́бища возлю́блєннаѧ.

¹³Тѣ́мже а҆́ще и҆ пожрѹ́тъ же́ртвѹ и҆ снѣдѧ́тъ мѧса̀, гд҇ь не прїи́метъ и҆́хъ: нн҃ѣ помѧне́тъ непра҄вды и҆́хъ и҆ ѿмсти́тъ грѣхѝ и҆́хъ: ті́и во є҆гѵ́петъ возврати́шасѧ и҆ во а҆ссѷрі́и нечи҄стаѧ снѣдѧ́тъ.

¹⁴И҆ забы̀ ї҆и҃ль сотво́ршаго и҆̀ и҆ возградѝ трє́бища, и҆ ї҆ѹ́да ѹ҆мно́жи гра́ды ѹ҆тверждє́ны: но послю̀ ѻ҆́гнь на гра́ды є҆гѡ̀, и҆ потреби́тъ ѡ҆снова҄нїѧ є҆гѡ̀.