Read Библия Церковнославянская А҆мѡ́с 3 Bible Online

А҆мѡ́с 3 - Библия Церковнославянская bible

А҆мѡ́с 3

¹Слы́шите сло́во сїѐ, є҆́же гл҃а гд҇ь на вы̀, до́ме ї҆и҃левъ, и҆ на всѐ пле́мѧ, є҆́же и҆зведо́хъ и҆з̾ землѝ є҆гѵ́петскїѧ, рекі́й:

²ва́съ то́чїю позна́хъ ѿ всѣ́хъ племе́нъ на землѝ, сегѡ̀ ра́ди ѿмщѹ̀ на ва́съ всѧ҄ грѣхѝ ва́шѧ.

³Е҆да̀ по́йдѹтъ два̀ вкѹ́пѣ всѧ́кѡ, а҆́ще не позна́ютъ себѐ;

⁴и҆лѝ возреве́тъ ле́въ и҆з̾ дѹбра́вы своеѧ̀, лови́твы не и҆мы́й; и҆лѝ и҆спѹ́ститъ гла́съ сво́й льви́чищь и҆з̾ ло́жа своегѡ̀ всѧ́кѡ, а҆́ще не похи́титъ чесогѡ̀;

⁵и҆лѝ паде́тъ пти́ца на зе́млю без̾ ловца̀; и҆лѝ спаде́тъ прѹгло̀ на зе́млю, а҆́ще не и҆́метъ ничесѡ́же;

⁶и҆лѝ возгласи́тъ трѹба̀ во гра́дѣ, и҆ не ѹ҆боѧ́тсѧ лю́дїе; и҆лѝ бѹ́детъ ѕло̀ во гра́дѣ, є҆́же гд҇ь не сотворѝ;

⁷Поне́же не сотвори́тъ гд҇ь бг҃ъ дѣ́ла, а҆́ще не ѿкры́етъ наказа́нїѧ своегѡ̀ къ рабѡ́мъ свои҄мъ про҇ро́кѡмъ.

⁸Ле́въ возреве́тъ, и҆ кто̀ не ѹ҆бои́тсѧ; гд҇ь бг҃ъ гл҃а, и҆ кто̀ не прорече́тъ;

⁹Повѣ́дите страна́мъ во а҆ссѷрі́анѣхъ и҆ во страна́хъ є҆гѵ́петскихъ и҆ рцы́те: собери́тесѧ на го́рѹ самарі́йскѹю и҆ ви́дите чѹдє́снаѧ мнѡ́га средѣ̀ є҆ѧ̀ и҆ наси́льство є҆́же въ не́й.

¹⁰И҆ не ѹ҆разѹмѣ̀, ѩ҆̀же бѹ́дѹтъ проти́вѹ є҆́й, гл҃етъ гд҇ь, сокро́вищствѹющїи непра́вдѹ и҆ стра́сть въ се́лѣхъ свои́хъ.

¹¹Сегѡ̀ ра́ди сїѧ҄ гл҃етъ гд҇ь бг҃ъ: тѵ́ре, ѡ҆́крестъ землѧ̀ твоѧ̀ ѡ҆пѹстѣ́етъ, и҆ ѿи́метъ ѿ тебє̀ крѣ́пость твою̀, и҆ разгра́бѧтсѧ страны҄ твоѧ҄.

¹²Сїѧ҄ гл҃етъ гд҇ь: ѩ҆́коже пастѹ́хъ, є҆гда̀ и҆сто́ргнетъ ѿ ѹ҆́стъ льво́выхъ двѣ̀ го́лєни, и҆лѝ ѡ҆бѹ́шїе ѹ҆́ха, та́кѡ и҆сто́ргнѹтсѧ сы́нове ї҆и҃лєвы живѹ́щїи въ самарі́и прѧ́мѡ пле́мене и҆ въ дама́сцѣ.

¹³Жерцы̀, послѹ́шайте и҆ засвидѣ́телствѹйте до́мѹ ї҆а́кѡвлю, гл҃етъ гд҇ь бг҃ъ вседержи́тель:

¹⁴поне́же въ де́нь, є҆гда̀ ѿмщѹ̀ нечє́стїѧ ї҆и҃лєва на не́мъ, и҆ ѿмщѹ̀ на тре́бищихъ веѳи́лихъ, и҆ раскопа́ю ро́ги тре́бища, и҆ падѹ́тсѧ на зе́млю:

¹⁵сокрѹшѹ̀ и҆ поражѹ̀ до́мъ съ преклѣ҄ты съ до́момъ лѣ́тнимъ, и҆ поги́бнѹтъ до́мове ко́сти слоно́выѧ, и҆ потребѧ́тсѧ и҆ дрѹзі́и до́мове мно́зи, гл҃етъ гд҇ь.