Read Библия Церковнославянская А҆мѡ́с 6 Bible Online

А҆мѡ́с 6 - Библия Церковнославянская bible

А҆мѡ́с 6

¹Лю́тѣ ѹ҆ничижа́ющымъ сїѡ́на и҆ ѹ҆пова́ющымъ на го́рѹ самарі́йскѹю: ѡ҆б̾има́ша нача́тки ѩ҆зы́кѡвъ, и҆ внидо́ша къ ни҄мъ до́мъ ї҆и҃левъ.

²Мимоиди́те хала́нѹ всѝ и҆ ви́дите, и҆ прейди́те ѿтѹ́дѹ во є҆ма́ѳъ вели́кїй и҆ сни́дите ѿтѹ́дѹ въ ге́ѳъ и҆ноплеме́нникѡвъ, крѣпча́йшыѧ ѿ всѣ́хъ ца́рствъ си́хъ, а҆́ще бо́лши сѹ́ть предѣ́лы и҆́хъ предѣ҄лъ ва́шихъ;

³Приходѧ́щїи въ де́нь ѕо́лъ, приближа́ющїисѧ и҆ прикаса́ющїисѧ сѹббѡ́тамъ лжи҄вымъ,

⁴спѧ́щїи на ѻ҆дрѣ́хъ ѿ косте́й слоно́выхъ и҆ ласкосе́рдствѹющїи на посте́лехъ свои́хъ, ѩ҆дѹ́щїи кѡ́злища ѿ па́ствъ и҆ телцы̀ млеко́мъ пита́ємы ѿ среды̀ ста́дъ:

⁵пле́щѹщїи ко гла́сѹ пища́лей, а҆́ки стоѧ́ща мнѣ́ша, а҆ не ѩ҆́кѡ бѣжа́ща:

⁶пїю́щїи процѣже́ное вїно̀ и҆ пе́рвыми вонѧ́ми ма́жѹщїисѧ, и҆ не страда́хѹ ничесо́же въ сокрѹше́нїи ї҆ѡ́сифовѣ.

⁷Сегѡ̀ ра́ди нн҃ѣ плѣ҄нницы бѹ́дѹтъ ѿ нача́ла си́льныхъ, и҆ ѿи́метсѧ ржа́нїе ко́нско ѿ є҆фре́ма.

⁸ѩ҆́кѡ клѧ́тсѧ гд҇ь собо́ю, гл҃етъ гд҇ь бг҃ъ си́лъ: поне́же гнѹша́юсѧ а҆́зъ все́ю ѹ҆кори́зною ї҆а́кѡва и҆ се́ла є҆гѡ̀ возненави́дѣхъ, и҆ ѿве́ргѹ гра́дъ со всѣ́ми живѹ́щими въ не́мъ.

⁹И҆ бѹ́детъ, а҆́ще ѡ҆ста́нѹтсѧ де́сѧть мѹже́й во є҆ди́нѣмъ домѹ̀, ѹ҆́мрѹтъ, и҆ ѡ҆ста́нѹтсѧ ѡ҆ста́точнїи:

¹⁰и҆ во́змѹтъ своѝ и҆́хъ, и҆ понѹ́дѧтсѧ и҆знестѝ кѡ́сти и҆́хъ и҆з̾ до́мѹ. И҆ рече́тъ настоѧ́телємъ до́мѹ: є҆ще́ ли є҆́сть ѹ҆ тебѐ; И҆ рече́тъ: нѣ́сть є҆щѐ. И҆ рече́тъ: молчѝ, не и҆менова́нїѧ ра́ди и҆́мене гд҇нѧ.

¹¹Поне́же, сѐ, гд҇ь заповѣ́даетъ и҆ побїе́тъ до́мъ вели́кїй толче́нїемъ и҆ до́мъ ма́лый разсѣде́нїемъ.

¹²А҆́ще поженѹ́тъ въ ка́менїѧхъ ко́ни; и҆ а҆́ще ѹ҆мо́лкнѹтъ въ же́нстѣмъ по́лѹ; ѩ҆́кѡ ѡ҆брати́сте на гнѣ́въ сѹ́дъ, и҆ пло́дъ пра́вды на го́ресть,

¹³веселѧ́щїисѧ ни ѡ҆ є҆ди́нѣмъ сло́вѣ бла́зѣ, глаго́лющїи: не крѣ́постїю ли на́шею и҆́мамы ро́ги;

¹⁴Тѣ́мже, сѐ, а҆́зъ воздви́гнѹ на вы̀, до́ме ї҆и҃левъ, ѩ҆зы́къ, гл҃етъ гд҇ь бг҃ъ си́лъ, и҆ сокрѹша́тъ ва́съ є҆́же не вни́ти во є҆ма́ѳъ и҆ до водоте́чи за́падѡвъ.