Read Библия Церковнославянская А҆мѡ́с 8 Bible Online

А҆мѡ́с 8 - Библия Церковнославянская bible

А҆мѡ́с 8

¹Си́це показа́ ми гд҇ь бг҃ъ: и҆ сѐ, сосѹ́дъ птицело́вца.

²И҆ речѐ (гд҇ь): что̀ ты̀ ви́диши, а҆мѡ́се; И҆ рѣ́хъ: сосѹ́дъ птицело́вца. И҆ речѐ гд҇ь ко мнѣ̀: приспѣ̀ коне́цъ на лю́ди моѧ҄ ї҆и҃лѧ, не приложѹ̀ ксемѹ̀ є҆́же мимоитѝ є҆го̀.

³И҆ воспла́чѹтсѧ стро́пове хра́ма въ то́й де́нь, гл҃етъ гд҇ь бг҃ъ: мно́зи па́дшїи во все́мъ мѣ́стѣ, наве́ргѹ молча́нїе.

⁴Слы́шите ѹ҆̀бо сїѧ҄, сокрѹша́ющїи и҆з̾ ѹ҆́тра ѹ҆бо́гаго и҆ наси́льствѹющїи ни́щихъ ѿ землѝ,

⁵глаго́лющїи: когда̀ пре́йдетъ мц҇ъ, и҆ прода́мы, и҆ (когда̀ пре́йдѹтъ) сѹббѡ҄ты, и҆ ѿве́рземъ сокрѡ́вища на҄ша, є҆́же сотвори́ти мѣ́рѹ ма́лѹ, и҆ ѹ҆вели́чити мѣ́рило, и҆ сотвори́ти вѣ́съ непра́веденъ,

⁶ѩ҆́кѡ да притѧ́жемъ ѹ҆бѡ́гїѧ сребро́мъ и҆ ни́щаго за сапогѝ, и҆ ѿ всѧ́кагѡ жи́та кѹ́плю сотвори́мъ;

⁷Клене́тсѧ гд҇ь на презо́рство ї҆а́кѡвле, а҆́ще забѹ́детъ въ коне́цъ всѧ҄ дѣла̀ ва҄ша:

⁸и҆ ѡ҆ си́хъ не возмѧте́тсѧ ли землѧ̀, и҆ воспла́четсѧ всѧ́къ живѧ́й на не́й; и҆ взы́детъ ѩ҆́кѡ рѣка̀ сконча́нїе (є҆ѧ̀), и҆ сни́детъ ѩ҆́коже рѣка̀ є҆гѵ́петскаѧ.

⁹И҆ бѹ́детъ въ то́й де́нь, гл҃етъ гд҇ь бг҃ъ, за́йдетъ со́лнце въ полѹ́дне, и҆ поме́ркнетъ на землѝ въ де́нь свѣ́тъ:

¹⁰и҆ превращѹ̀ пра́здники ва́шѧ въ жа́лость и҆ всѧ҄ пѣ҄сни ва́шѧ въ пла́чь, и҆ возложѹ̀ на всѧ́къ хребе́тъ вре́тище и҆ на всѧ́кѹ главѹ̀ плѣ́шь, и҆ положѹ̀ є҆го̀ ѩ҆́кѡ жа́лость люби́магѡ и҆ сѹ́щыѧ съ ни́мъ ѩ҆́кѡ де́нь болѣ́зни.

¹¹Сѐ, дні́е грѧдѹ́тъ, гл҃етъ гд҇ь, и҆ послю̀ гла́дъ на зе́млю, не гла́дъ хлѣ́ба, ни жа́ждѹ воды̀, но гла́дъ слы́шанїѧ сло́ва гд҇нѧ:

¹²и҆ поколе́блютсѧ во́ды ѿ мо́рѧ до мо́рѧ и҆ ѿ сѣ́вера до востѡ́къ, и҆ ѡ҆бтекѹ́тъ и҆́щѹще словесѐ гд҇нѧ, и҆ не ѡ҆брѧ́щѹтъ.

¹³Въ то́й де́нь ѡ҆скѹдѣ́ютъ дѣ҄вы дѡ́брыѧ и҆ ю҆́нѡши въ жа́жди,

¹⁴кленѹ́щїисѧ ѡ҆чище́нїемъ самарі́йскимъ и҆ глаго́лющїи: жи́въ бо́гъ тво́й, да́не, и҆ жи́въ бо́гъ тво́й, вирсаве́е. И҆ падѹ́тъ и҆ не воста́нѹтъ ктомѹ̀.