Read Библия Церковнославянская Чи́сла 17 Bible Online

Чи́сла 17 - Библия Церковнославянская bible

Чи́сла 17

¹И҆ речѐ гд҇ь къ мѡѷсе́ю, гл҃ѧ:

²глаго́ли сынѡ́мъ ї҆и҃лєвымъ, и҆ возмѝ ѿ ни́хъ по є҆ди́номѹ жезлѹ̀, же́злъ ѿ всѣ́хъ кнѧзе́й и҆́хъ, по домѡ́мъ ѻ҆те́чества и҆́хъ, двана́десѧть жезлѡ́въ, и҆́мѧ же коегѡ́ждо напишѝ на жезлѣ̀ є҆гѡ̀,

³и҆ и҆́мѧ а҆арѡ́не напишѝ на жезлѣ̀ леѵі́инѣ: є҆́сть бо же́злъ є҆ди́нъ: по пле́мени до́мѹ ѻ҆те́чествъ свои́хъ да дадѧ́тъ:

⁴и҆ да положи́ши и҆̀хъ въ ски́нїи свидѣ́нїѧ, прѧ́мѡ свидѣ́нїю, въ ни́хже ѩ҆влю́сѧ тебѣ̀ тѹ̀:

⁵и҆ бѹ́детъ человѣ́къ, є҆го́же а҆́ще и҆зберѹ̀, же́злъ є҆гѡ̀ прозѧ́бнетъ: и҆ ѿимѹ̀ ѿ менє̀ ропта́нїе сынѡ́въ ї҆и҃левыхъ, є҆ли҄ка сі́и ро́пщѹтъ на вы̀.

⁶И҆ глаго́ла мѡѷсе́й сынѡ́мъ ї҆и҃лєвымъ: и҆ да́ша є҆мѹ̀ всѝ кнѧ҄зи и҆́хъ по жезлѹ̀, кнѧ́зѧ є҆ди́нагѡ же́злъ, по кнѧже́нїю, по домѡ́мъ ѻ҆те́чествъ и҆́хъ, двана́десѧть жезлѡ́въ: и҆ же́злъ а҆арѡ́нь посредѣ̀ жезлѡ́въ и҆́хъ.

⁷И҆ положѝ мѡѷсе́й жезлы̀ пред̾ гд҇емъ въ ски́нїи свидѣ́нїѧ.

⁸И҆ бы́сть на ѹ҆́трїе, и҆ вни́де мѡѷсе́й и҆ а҆арѡ́нъ въ ски́нїю свидѣ́нїѧ: и҆ сѐ, прозѧбѐ же́злъ а҆арѡ́нь въ домѹ̀ леѵі́инѣ, и҆ и҆зрастѝ вѣ́твь, и҆ процвѣто́ша цвѣ́ти, и҆ и҆зрастѝ ѻ҆рѣ́хи:

⁹и҆ и҆знесѐ мѡѷсе́й всѧ҄ жезлы̀ ѿ лица̀ гд҇нѧ ко всѣ҄мъ сынѡ́мъ ї҆и҃лєвымъ: и҆ ви́дѣша, и҆ взѧ̀ кі́йждо же́злъ сво́й.

¹⁰И҆ речѐ гд҇ь къ мѡѷсе́ю: ѿложѝ же́злъ а҆арѡ́нь пред̾ свидѣ́нїемъ въ сохране́нїе, въ зна́менїе сынѡ́въ ѡ҆слѹшли́выхъ: и҆ да преста́нетъ ропта́нїе и҆́хъ ѿ менє̀, и҆ не и҆́змрѹтъ.

¹¹И҆ сотворѝ мѡѷсе́й и҆ а҆арѡ́нъ, ѩ҆́коже повелѣ̀ гд҇ь мѡѷсе́ю, та́кѡ сотвори́ша.

¹²И҆ реко́ша сы́нове ї҆и҃лєвы къ мѡѷсе́ю, глаго́люще: сѐ, потреби́хомсѧ, погибо́хомъ, и҆счезо́хомъ:

¹³всѧ́къ прикаса́ѧйсѧ ко ски́нїи свидѣ́нїѧ гд҇нѧ ѹ҆мира́етъ: да́же до конца́ ли ѹ҆мира́юще поги́бнемъ;