Read Библия Церковнославянская Чи́сла 18 Bible Online

Чи́сла 18 - Библия Церковнославянская bible

Чи́сла 18

¹И҆ речѐ гд҇ь ко а҆арѡ́нѹ, гл҃ѧ: ты̀ и҆ сы́нове твоѝ, и҆ до́мъ ѻ҆тца̀ твоегѡ̀ съ тобо́ю, возми́те грѣхѝ ст҃ы́хъ, ты́ же и҆ сы́нове твоѝ возми́те грѣхѝ жре́чества ва́шегѡ:

²и҆ бра́тїю твою̀, пле́мѧ леѵі́ино, со́нмъ ѻ҆тца̀ твоегѡ̀ приведѝ къ себѣ̀, и҆ да приложа́тсѧ къ тебѣ̀, и҆ да слѹ́жатъ тебѣ̀, и҆ ты̀ и҆ сы́нове твоѝ съ тобо́ю пред̾ ски́нїею свидѣ́нїѧ,

³и҆ да блюдѹ́тъ стражбы҄ твоѧ҄ и҆ стражбы҄ ски́нїи: то́кмѡ къ сосѹ́дѡмъ ст҃ы҄мъ и҆ ко ѻ҆лтарю̀ да не пристѹпа́ютъ, да не и҆́змрѹтъ и҆ сі́и, и҆ вы̀:

⁴и҆ приложа́тсѧ къ тебѣ̀ и҆ да блюдѹ́тъ стражбы҄ ски́нїи свидѣ́нїѧ по всѣ҄мъ слѹ́жбамъ ски́нїи, и҆ и҆ноплеме́нникъ да не пристѹ́питъ къ тебѣ̀:

⁵и҆ соблюде́те стражбы҄ ст҃ы́хъ и҆ стражбы҄ ѻ҆лтарѧ̀, и҆ не бѹ́детъ ктомѹ̀ гнѣ́ва на сынѣ́хъ ї҆и҃левыхъ:

⁶и҆ а҆́зъ взѧ́хъ бра́тїю ва́шѹ леѵі́ты ѿ среды̀ сынѡ́въ ї҆и҃левыхъ въ да́ръ да́нный гд҇ѹ слѹжи́ти слѹ҄жбы ски́нїи свидѣ́нїѧ.

⁷И҆ ты̀ и҆ сы́нове твоѝ съ тобо́ю сохрани́те жре́чество ва́ше по всемѹ̀ ѡ҆́бразѹ ѻ҆лтарѧ̀, и҆ є҆́же внѹ́трь завѣ́сы, и҆ да слѹ́жите слѹ҄жбы въ да́ръ жре́чества ва́шегѡ: и҆ и҆ноплеме́нникъ пристѹпа́ѧй ѹ҆́мретъ.

⁸И҆ речѐ гд҇ь ко а҆арѡ́нѹ: и҆ сѐ, а҆́зъ да́хъ ва́мъ снабдѣ́нїе нача́ткѡвъ мои́хъ ѿ всѣ́хъ ѡ҆свѧще́нныхъ мнѣ̀ ѿ сынѡ́въ ї҆и҃левыхъ: тебѣ̀ да́хъ ѧ҆̀ въ че́сть, и҆ сынѡ́мъ твои҄мъ по тебѣ̀ зако́ннѡ вѣ́чнѡ:

⁹и҆ сїѐ да бѹ́детъ ва́мъ ѿ ѡ҆свѧще́нныхъ ст҃ы́хъ приноше́нїй, ѿ всѣ́хъ дарѡ́въ и҆́хъ и҆ ѿ всѣ́хъ же́ртвъ и҆́хъ, и҆ ѿ всѧ́кагѡ престѹпле́нїѧ и҆́хъ и҆ ѿ всѣ́хъ грѣ҄хъ и҆́хъ, є҆ли҄ка ѿдаю́тъ мнѣ̀, ѿ всѣ́хъ ст҃ы́нь, тебѣ̀ да бѹ́дѹтъ и҆ сынѡ́мъ твои҄мъ.

¹⁰Во ст҃ѣ́мъ ст҃ы́хъ ѩ҆ди́те ѧ҆̀: всѧ́къ мѹ́жескїй по́лъ да ѩ҆́стъ ѧ҆̀, ты̀ и҆ сы́нове твоѝ: ст҃а бѹ́дѹтъ тебѣ̀.

¹¹И҆ сїѐ да бѹ́детъ ва́мъ ѿ нача́ткѡвъ даѧ́нїй и҆́хъ, ѿ всѣ́хъ возложе́нїй сынѡ́въ ї҆и҃левыхъ: тебѣ̀ да́хъ ѧ҆̀, и҆ сынѡ́мъ твои҄мъ и҆ дще́ремъ твои҄мъ съ тобо́ю, зако́ннѡ вѣ́чнѡ: всѧ́къ чи́стый въ домѹ̀ твое́мъ да ѩ҆́стъ ѧ҆̀.

¹²Всѧ́къ нача́токъ є҆ле́а, и҆ всѧ́къ нача́токъ вїна̀ и҆ пшени́цы, нача́токъ и҆́хъ, є҆ли҄ка а҆́ще ѿдадѧ́тъ гд҇ѹ, тебѣ̀ да́хъ ѧ҆̀: перворѡ́днаѧ всѧ҄ є҆ли҄ка въ землѝ и҆́хъ, є҆ли҄ка а҆́ще принесѹ́тъ гд҇ѹ, тебѣ̀ да бѹ́дѹтъ:

¹³всѧ́къ чи́стый въ домѹ̀ твое́мъ да ѩ҆́стъ ѧ҆̀.

¹⁴Всѧ́ко ѡ҆свѧще́нное въ сынѣ́хъ ї҆и҃левыхъ тебѣ̀ да бѹ́детъ,

¹⁵и҆ всѧ́кое разверза́ющее всѧ҄ка ложесна̀ ѿ всѧ́кїѧ пло́ти, є҆ли҄ка прино́сѧтъ гд҇ѹ, ѿ человѣ́ка до скота̀, тебѣ̀ да бѹ́дѹтъ: но то́кмѡ и҆скѹпле́нїемъ и҆скѹ́пѧтсѧ пе́рвенцы человѣ́честїи, и҆ пе́рвенцы скотѡ́въ нечи́стыхъ да и҆скѹ́пѧтсѧ:

¹⁶и҆ и҆скѹ́пъ є҆гѡ̀ ѿ є҆ди́нагѡ мц҇а, сцѣне́нїе пѧ́ть сї҄кль, по сі́клю свѧто́мѹ: два́десѧть мѣ́дницъ є҆́сть:

¹⁷ѻ҆ба́че перворѡ́днаѧ телцє́въ и҆ перворѡ́днаѧ ѻ҆ве́цъ и҆ перворѡ́днаѧ ко́зъ да не и҆скѹ́пѧтсѧ: ст҃а сѹ́ть: и҆ кро́вь и҆́хъ пролїе́ши ѹ҆ ѻ҆лтарѧ̀, и҆ тѹ́къ принесе́ши прино́съ въ воню̀ благово́нїѧ гд҇ѹ.

¹⁸И҆ мѧса̀ тебѣ̀ да бѹ́дѹтъ, ѩ҆́коже и҆ грѹ҄ди возложе́нїѧ: и҆ по ра́мѹ десно́мѹ тебѣ̀ да бѹ́дѹтъ.

¹⁹Всѧ́ко ѹ҆ча́стїе ст҃ы́хъ, є҆ли҄ка а҆́ще ѿлѹча́тъ сы́нове ї҆и҃лтестїи гд҇ѹ, тебѣ̀ да́хъ и҆ сынѡ́мъ твои҄мъ и҆ дще́ремъ твои҄мъ съ тобо́ю, зако́ннѡ вѣ́чнѡ: завѣ́тъ со́ли вѣ́чныѧ є҆́сть пред̾ гд҇емъ, тебѣ̀ и҆ сѣ́мени твоемѹ̀ по тебѣ̀.

²⁰И҆ речѐ гд҇ь ко а҆арѡ́нѹ: въ землѝ и҆́хъ да не наслѣ́диши наслѣ́дїѧ, и҆ ча́сти да не бѹ́детъ тебѣ̀ въ ни́хъ: ѩ҆́кѡ а҆́зъ ча́сть твоѧ̀ и҆ наслѣ́дїе твоѐ посредѣ̀ сынѡ́въ ї҆и҃левыхъ.

²¹И҆ сынѡ́мъ леѵї҄инымъ, сѐ, да́хъ всю̀ десѧти́нѹ во ї҆и҃ли въ жре́бїй за слѹ҄жбы и҆́хъ, є҆ли́кѡ слѹ́жатъ ті́и слѹже́нїе въ ски́нїи свидѣ́нїѧ:

²²и҆ да не пристѹпа́ютъ по се́мъ сы́нове ї҆и҃лтестїи къ ски́нїи свидѣ́нїѧ прїѧ́ти грѣ́хъ смертоно́сный:

²³и҆ да слѹ́жатъ леѵі́ти са́ми слѹ́жбѹ ски́нїи свидѣ́нїѧ, и҆ ті́и во́змѹтъ грѣхѝ и҆́хъ: зако́ннѡ вѣ́чнѡ въ ро́ды и҆́хъ: и҆ посредѣ̀ сынѡ́въ ї҆и҃левыхъ да не наслѣ́дѧтъ наслѣ́дїѧ:

²⁴ѩ҆́кѡ десѧти҄ны сынѡ́въ ї҆и҃левыхъ, є҆ли҄ки а҆́ще ѿлѹча́тъ гд҇ѹ, ѹ҆ча́стїе да́хъ леѵі́тѡмъ въ жре́бїй: сегѡ̀ ра́ди реко́хъ и҆̀мъ: средѝ сынѡ́въ ї҆и҃левыхъ да не наслѣ́дѧтъ жре́бїѧ.

²⁵И҆ речѐ гд҇ь къ мѡѷсе́ю, гл҃ѧ:

²⁶и҆ леѵі́тѡмъ да глаго́леши и҆ рече́ши къ ни҄мъ: а҆́ще во́змете десѧти́нѹ ѿ сынѡ́въ ї҆и҃левыхъ, ю҆́же да́хъ ва́мъ ѿ ни́хъ во жре́бїй, и҆ ѿдѣли́те вы̀ ѿ неѧ̀ ѹ҆ча́стїе гд҇ѹ, десѧти́нѹ ѿ десѧти́ны є҆ѧ̀,

²⁷и҆ вмѣнѧ́тсѧ ва́мъ ѹ҆ча҄стїѧ ва҄ша ѩ҆́кѡ пшени́ца ѿ гѹмна̀ и҆ ѩ҆́кѡ ѹ҆ча́стїе ѿ точи́ла:

²⁸та́кѡ ѿдѣли́те и҆̀хъ и҆ вы̀ ѿ всѣ́хъ ѹ҆ча́стїй гд҇нихъ, ѿ всѣ́хъ десѧти́нъ ва́шихъ, є҆ли҄ки а҆́ще во́змете ѿ сынѡ́въ ї҆и҃левыхъ, и҆ дади́те ѿ ни́хъ ѹ҆ча́стїе гд҇ѹ, а҆арѡ́нѹ жерцѹ̀:

²⁹ѿ всѣ́хъ даѧ́нїй ва́шихъ ѿдѣли́те ѹ҆ча́стїе гд҇ѹ, и҆лѝ ѿ всѣ́хъ нача́ткѡвъ ѡ҆свѧще́нное ѿ негѡ̀.

³⁰И҆ рече́ши къ ни҄мъ: є҆гда̀ ѿдѣли́те нача́токъ ѿ негѡ̀, и҆ вмѣни́тсѧ леѵі́тѡмъ а҆́ки жи́то ѿ гѹмна̀ и҆ ѩ҆́кѡ ѹ҆ча́стїе ѿ точи́ла:

³¹и҆ ѩ҆ди́те то̀ во всѧ́комъ мѣ́стѣ вы̀ и҆ сы́нове ва́ши и҆ до́мове ва́ши, ѩ҆́кѡ мзда̀ сїѧ̀ ва́мъ є҆́сть за слѹ҄жбы ва́шѧ, ѩ҆̀же въ ски́нїи свидѣ́нїѧ:

³²и҆ не прїи́мете за сїѐ грѣха̀, ѩ҆́кѡ а҆́ще ѿлѹчитѐ нача́токъ ѿ негѡ̀: и҆ ст҃ы́нь сынѡ́въ ї҆и҃левыхъ не ѡ҆скверни́те, да не ѹ҆́мрете.