Read Библия Церковнославянская Чи́сла 2 Bible Online

Чи́сла 2 - Библия Церковнославянская bible

Чи́сла 2

¹И҆ речѐ гд҇ь къ мѡѷсе́ю и҆ а҆арѡ́нѹ, гл҃ѧ:

²человѣ́къ держа́йсѧ по чи́нѹ своемѹ̀, по зна́менїѧмъ, по домѡ́мъ ѻ҆те́чествъ свои́хъ, да ѡ҆полча́ютсѧ сы́нове ї҆и҃лєвы пред̾ гд҇емъ, ѡ҆́крестъ ски́нїи свидѣ́нїѧ да ѡ҆полча́ютсѧ сы́нове ї҆и҃лєвы.

³И҆ ѡ҆полча́ющїисѧ пе́рвїи на восто́къ чи́нъ полка̀ ї҆ѹ́дина съ си́лою и҆́хъ, и҆ кнѧ́зь ѿ сынѡ́въ ї҆ѹ́диныхъ наассѡ́нъ сы́нъ а҆мїнада́вль:

⁴си́ла є҆гѡ̀ соглѧ́данаѧ се́дмьдесѧтъ и҆ четы́ри ты́сѧщы и҆ ше́сть сѡ́тъ.

⁵И҆ ѡ҆полча́ющїисѧ бли́з̾ ѿ пле́мене ї҆ссаха́рова, и҆ кнѧ́зь сынѡ́въ ї҆ссаха́ровыхъ наѳанаи́лъ сы́нъ сѡга́ровъ:

⁶си́ла є҆гѡ̀ соглѧ́данаѧ пѧтьдесѧ́тъ и҆ четы́ри ты́сѧщы и҆ четы́ре ста҄.

⁷И҆ ѡ҆полча́ющїисѧ бли́з̾ ѿ пле́мене завѹлѡ́нѧ, и҆ кнѧ́зь сынѡ́въ завѹлѡ́нихъ є҆лїа́въ сы́нъ хелѡ́нь:

⁸си́ла є҆гѡ̀ соглѧ́данаѧ пѧтьдесѧ́тъ се́дмь ты́сѧщъ и҆ четы́ре ста҄.

⁹Всѣ́хъ сочте́ныхъ ѿ полка̀ ї҆ѹ́дина сто̀ ѻ҆́смьдесѧтъ ше́сть ты́сѧщъ и҆ четы́ре ста҄, съ си́лою и҆́хъ пе́рвїи да воздвиза́ютсѧ.

¹⁰Чи́ны полка̀ рѹви́млѧ къ ю҆́гѹ съ си́лою є҆гѡ̀, и҆ кнѧ́зь сынѡ́въ рѹви́млихъ є҆лїсѹ́ръ сы́нъ седїѹ́ровъ:

¹¹си́ла є҆гѡ̀ соглѧ́данаѧ четы́редесѧть и҆ ше́сть ты́сѧщъ и҆ пѧ́ть сѡ́тъ.

¹²И҆ ѡ҆полча́ющїисѧ бли́з̾ є҆гѡ̀ ѿ пле́мене сѷмеѡ́нѧ, и҆ кнѧ́зь сынѡ́въ сѷмеѡ́нихъ саламїи́ль сы́нъ сѹрїсада́инъ:

¹³си́ла є҆гѡ̀ сочте́наѧ пѧтьдесѧ́тъ и҆ де́вѧть ты́сѧщъ и҆ трѝ ста҄.

¹⁴И҆ ѡ҆полча́ющїисѧ бли́з̾ є҆гѡ̀ ѿ пле́мене га́дова, и҆ кнѧ́зь сынѡ́въ га́довыхъ є҆лїса́фъ сы́нъ рагѹи́ль:

¹⁵си́ла є҆гѡ̀ соглѧ́данаѧ четы́редесѧть и҆ пѧ́ть ты́сѧщъ и҆ ше́сть сѡ́тъ и҆ пѧтьдесѧ́тъ.

¹⁶Всѣ́хъ же сочте́ныхъ полка̀ рѹви́млѧ сто̀ пѧтьдесѧ́тъ є҆ди́на ты́сѧща и҆ четы́ре ста҄ и҆ пѧтьдесѧ́тъ, съ си́лою и҆́хъ вторі́и да воздвиза́ютсѧ.

¹⁷И҆ да воздви́гнетсѧ ски́нїѧ свидѣ́нїѧ и҆ по́лкъ леѵі́тскїй посредѣ̀ полкѡ́въ: ѩ҆́коже ѡ҆полча́тсѧ, та́кѡ и҆ да воздви́гнѹтсѧ, кі́йждо держа́сѧ по чи́нѹ своемѹ̀.

¹⁸Чи́нъ полка̀ є҆фре́млѧ къ мо́рю съ си́лою и҆́хъ, и҆ кнѧ́зь сынѡ́въ є҆фре́млихъ є҆лїсама̀ сы́нъ є҆мїѹ́довъ:

¹⁹си́ла є҆гѡ̀ сочте́наѧ четы́редесѧть ты́сѧщъ и҆ пѧ́ть сѡ́тъ.

²⁰И҆ ѡ҆полча́ющїисѧ бли́з̾ пле́мѧ манассі́ино, и҆ кнѧ́зь сынѡ́въ манассі́иныхъ гамалїи́лъ сы́нъ фадассѹ́ровъ:

²¹си́ла є҆гѡ̀ соглѧ́данаѧ три́десѧть двѣ̀ ты́сѧщы и҆ двѣ́сти.

²²И҆ ѡ҆полча́ющїисѧ бли́з̾ ѿ пле́мене венїамі́нѧ, и҆ кнѧ́зь сынѡ́въ венїамі́нихъ а҆вїда́нъ сы́нъ гадеѡні́евъ:

²³си́ла є҆гѡ̀ сочте́наѧ три́десѧть пѧ́ть ты́сѧщъ и҆ четы́ре ста҄.

²⁴Всѣ́хъ сочте́ныхъ полка̀ є҆фре́млѧ сто̀ ѻ҆́смь ты́сѧщъ и҆ сто̀, съ си́лою и҆́хъ гре́тїи да воздвиза́ютсѧ.

²⁵Чи́нъ полка̀ да́нова къ сѣ́верѹ съ си́лою и҆́хъ, и҆ кнѧ́зь сынѡ́въ да́новыхъ а҆хїе́зеръ сы́нъ а҆мїсада́инъ:

²⁶си́ла є҆гѡ̀ соглѧ́данаѧ шестьдесѧ́тъ двѣ̀ ты́сѧщы и҆ се́дмь сѡ́тъ.

²⁷И҆ ѡ҆полча́ющїисѧ бли́з̾ є҆гѡ̀ пле́мѧ а҆си́рово, и҆ кнѧ́зь сынѡ́въ а҆си́ровыхъ фагаїи́лъ сы́нъ є҆хра́новъ:

²⁸си́ла є҆гѡ̀ соглѧ́данаѧ четы́редесѧть є҆ди́на ты́сѧща и҆ пѧ́ть сѡ́тъ.

²⁹И҆ ѡ҆полча́ющїисѧ бли́з̾ пле́мѧ нефѳалі́мле, и҆ кнѧ́зь сынѡ́въ нефѳалі́млихъ а҆хїре́й сы́нъ є҆на́нь:

³⁰си́ла є҆гѡ̀ соглѧ́данаѧ пѧтьдесѧ́тъ трѝ ты́сѧщы и҆ четы́ре ста҄.

³¹Всѣ́хъ сочте́ныхъ полка̀ да́нова сто̀ пѧтьдесѧ́тъ се́дмь ты́сѧщъ и҆ ше́сть сѡ́тъ, съ си́лою и҆́хъ послѣ́днїи да воздвиза́ютсѧ по чи́нѹ своемѹ̀.

³²Сїѐ сочте́нїе сынѡ́въ ї҆и҃левыхъ по домѡ́мъ ѻ҆те́чествъ и҆́хъ: всѧ҄ соглѧ҄данїѧ полкѡ́въ съ си́лами и҆́хъ ше́сть сѡ́тъ трѝ ты́сѧщы и҆ пѧ́ть сѡ́тъ пѧтьдесѧ́тъ.

³³Леѵі́ти же не соглѧ́дашасѧ средѝ сынѡ́въ ї҆и҃левыхъ, ѩ҆́коже заповѣ́да гд҇ь мѡѷсе́ю.

³⁴И҆ сотвори́ша сы́нове ї҆и҃лєвы всѧ҄, є҆ли҄ка заповѣ́да гд҇ь мѡѷсе́ю: та́кѡ ѡ҆полча́хѹсѧ по чинѡ́мъ свои҄мъ, и҆ та́кѡ воздвиза́хѹсѧ кі́йждо бли́з̾ по со́нмѡмъ свои҄мъ, по домѡ́мъ ѻ҆те́чествъ свои́хъ.