Read Библия Церковнославянская Чи́сла 20 Bible Online

Чи́сла 20 - Библия Церковнославянская bible

Чи́сла 20

¹И҆ прїидо́ша сы́нове ї҆и҃лтестїи, ве́сь со́нмъ, въ пѹсты́ню сі́нъ, въ мц҇ъ пе́рвый, и҆ пребыва́хѹ лю́дїе въ ка́дисѣ: и҆ сконча́сѧ тѹ̀ марїа́мъ, и҆ погребе́сѧ та́мѡ.

²И҆ не бѧ́ше воды̀ со́нмѹ: и҆ собра́шасѧ на мѡѷсе́а и҆ а҆арѡ́на,

³и҆ ропта́ша лю́дїе на мѡѷсе́а, глаго́люще: ѽ, дабы̀ ѹ҆́мерли бы́хомъ въ поги́бели бра́тїи на́шеѧ пред̾ гд҇емъ:

⁴и҆ вскѹ́ю введо́сте со́нмъ гд҇нь въ пѹсты́ню сїю̀, погѹби́ти ны̀ и҆ скоты̀ на́шы;

⁵и҆ вскѹ́ю сїѐ; и҆зведо́сте ны̀ и҆з̾ є҆гѵ́пта, є҆́же прїитѝ (*на́мъ) на мѣ́сто ѕло́е сїѐ, мѣ́сто, въ не́мже не сѣ́етсѧ, ни смѡ́кви, ни вїногра́ды, нижѐ ѩ҆́блоки, нижѐ вода̀ є҆́сть пи́ти.

⁶И҆ прїи́де мѡѷсе́й и҆ а҆арѡ́нъ ѿ лица̀ со́нма пред̾ двє́ри ски́нїи свидѣ́нїѧ, и҆ падо́ста ни́цъ: и҆ ѩ҆ви́сѧ сла́ва гд҇нѧ над̾ ни́ми.

⁷И҆ речѐ гд҇ь къ мѡѷсе́ю, гл҃ѧ:

⁸возмѝ же́злъ тво́й и҆ созовѝ со́нмъ ты̀ и҆ а҆арѡ́нъ, бра́тъ тво́й, и҆ рцы́те ко ка́меню пред̾ ни́ми, и҆ да́стъ во́ды своѧ҄: и҆ и҆зведе́те и҆̀мъ во́ды и҆з̾ ка́мене, и҆ напо́йте со́нмъ и҆ скоты̀ и҆́хъ.

⁹И҆ взѧ̀ мѡѷсе́й же́злъ и҆́же пред̾ гд҇емъ, ѩ҆́коже повелѣ̀ гд҇ь.

¹⁰И҆ созва̀ мѡѷсе́й и҆ а҆арѡ́нъ со́нмъ пред̾ ка́мень, и҆ речѐ къ ни҄мъ: послѹ́шайте менѐ, непокори́вїи: є҆да̀ и҆з̾ ка́мене сегѡ̀ и҆зведе́мъ ва́мъ во́дѹ;

¹¹И҆ воздви́гъ мѡѷсе́й рѹ́кѹ свою̀, ѹ҆да́ри въ ка́мень жезло́мъ два́жды: и҆ и҆зы́де вода̀ мно́га, и҆ напи́сѧ со́нмъ (*ве́сь) и҆ скоты̀ и҆́хъ.

¹²И҆ речѐ гд҇ь къ мѡѷсе́ю и҆ а҆арѡ́нѹ: поне́же не вѣ́ровасте ѡ҆ст҃и́ти мѧ̀ пред̾ сынмѝ ї҆и҃лтескими, сегѡ̀ ра́ди не введе́те вы̀ со́нма сегѡ̀ въ зе́млю, ю҆́же да́хъ и҆̀мъ:

¹³сїѧ̀ вода̀ [пререка́нїѧ], ѩ҆́кѡ возропта́ша сы́нове ї҆и҃лтестїи пред̾ гд҇емъ, и҆ ѡ҆ст҃и́сѧ въ ни́хъ.

¹⁴И҆ посла̀ мѡѷсе́й послы̀ ѿ ка́диса къ царю̀ є҆дѡ́мскомѹ, глаго́лѧ: та́кѡ глаго́летъ бра́тъ тво́й ї҆и҃ль: ты̀ вѣ́си ве́сь трѹ́дъ ѡ҆брѣ́тшїй на́съ:

¹⁵и҆ снидо́ша ѻ҆тцы̀ на́ши въ є҆гѵ́петъ, и҆ жи́хомъ во є҆гѵ́птѣ дни҄ мнѡ́ги, и҆ ѡ҆ѕло́биша на́съ є҆гѵ́птѧне и҆ ѻ҆тцє́въ на́шихъ:

¹⁶и҆ возопи́хомъ ко гд҇ѹ, и҆ ѹ҆слы́ша гд҇ь гла́съ на́шъ, и҆ посла́въ а҆́гг҃ла, и҆зведѐ ны̀ и҆з̾ є҆гѵ́пта: и҆ нн҃ѣ є҆смы̀ въ ка́дисѣ гра́дѣ, на концѣ̀ предѣ҄лъ твои́хъ:

¹⁷да пре́йдемъ сквозѣ̀ зе́млю твою̀: не про́йдемъ сквозѣ̀ се́ла, ни сквозѣ̀ вїногра́ды, ни пїе́мъ воды̀ въ пото́цѣхъ твои́хъ: пѹте́мъ ца́рскимъ по́йдемъ, не соврати́мсѧ ни на де́сно, ни на лѣ́во, до́ндеже пре́йдемъ предѣ́лы твоѧ҄.

¹⁸И҆ речѐ къ ни҄мъ є҆дѡ́мъ: не про́йдеши сквозѣ̀ менѐ: а҆́ще же нѝ, ра́тїю и҆зы́дѹ проти́вѹ тебє̀.

¹⁹И҆ реко́ша къ немѹ̀ сы́нове ї҆и҃лєвы: под̾ горо́ю про́йдемъ: а҆́ще же ѿ воды̀ твоеѧ̀ и҆спїе́мъ а҆́зъ и҆ скоты̀ моѧ҄, да́мъ цѣ́нѹ тебѣ̀: но ве́щь сїѧ̀ ничто́же є҆́сть, под̾ горо́ю да про́йдемъ.

²⁰Ѻ҆́нъ же речѐ: не про́йдеши сквозѣ̀ менѐ. И҆ и҆зы́де проти́вѹ и҆̀мъ є҆дѡ́мъ съ наро́домъ тѧ́жкимъ и҆ рѹко́ю крѣ́пкою.

²¹И҆ не восхотѣ̀ є҆дѡ́мъ да́ти ї҆и҃лю проитѝ сквозѣ̀ предѣ́лы своѧ҄, и҆ ѹ҆клони́сѧ ї҆и҃ль ѿ негѡ̀.

²²И҆ воздвиго́шасѧ ѿ ка́диса, и҆ прїидо́ша сы́нове ї҆и҃лтестїи, ве́сь со́нмъ, въ го́рѹ ѡ҆́ръ.

²³И҆ речѐ гд҇ь къ мѡѷсе́ю и҆ а҆арѡ́нѹ въ горѣ̀ ѡ҆́ръ ѹ҆ предѣ҄лъ землѝ є҆дѡ́мли, гл҃ѧ:

²⁴да приложи́тсѧ а҆арѡ́нъ къ лю́демъ свои҄мъ, ѩ҆́кѡ не вни́дете въ зе́млю, ю҆́же да́хъ сынѡ́мъ ї҆и҃лєвымъ въ наслѣ́дїе, поне́же преѡгорчи́сте мѧ̀ ѹ҆ воды̀ [пререка́нїѧ]:

²⁵возмѝ а҆арѡ́на бра́та твоего̀ и҆ є҆леаза́ра сы́на є҆гѡ̀, и҆ возведѝ ѧ҆̀ на ѡ҆́ръ го́рѹ пред̾ всѣ́мъ со́нмомъ:

²⁶и҆ совлецы̀ а҆арѡ́нѹ ри҄зы є҆гѡ̀ и҆ ѡ҆блецы̀ є҆леаза́ра сы́на є҆гѡ̀, и҆ а҆арѡ́нъ приложи́всѧ да ѹ҆́мретъ та́мѡ.

²⁷И҆ сотворѝ мѡѷсе́й, ѩ҆́коже повелѣ̀ є҆мѹ̀ гд҇ь: и҆ возведѐ ѧ҆̀ на ѡ҆́ръ го́рѹ пред̾ всѣ́мъ со́нмомъ,

²⁸и҆ совлечѐ а҆арѡ́на съ ри́зъ є҆гѡ̀, и҆ ѡ҆блечѐ въ нѧ̀ є҆леаза́ра сы́на є҆гѡ̀:

²⁹и҆ ѹ҆́мре а҆арѡ́нъ та́мѡ на версѣ̀ горы̀: и҆ сни́де мѡѷсе́й и҆ є҆леаза́ръ съ горы̀.

³⁰И҆ ви́дѣ ве́сь со́нмъ, ѩ҆́кѡ ѹ҆́мре а҆арѡ́нъ: и҆ пла́кашасѧ по а҆арѡ́нѣ три́десѧть дні́й ве́сь до́мъ ї҆и҃левъ.