Read Библия Церковнославянская Чи́сла 22 Bible Online

Чи́сла 22 - Библия Церковнославянская bible

Чи́сла 22

¹И҆ воздви́гшесѧ сы́нове ї҆и҃лтестїи, ѡ҆полчи́шасѧ на за́пады мѡа́ва ѹ҆ ї҆ѻрда́на ко ї҆ерїхѡ́нѹ.

²И҆ ви́дѣвъ вала́къ сы́нъ сепфѡ́ровъ всѧ҄, є҆ли҄ка сотворѝ ї҆и҃ль а҆морре́ю,

³и҆ ѹ҆боѧ́сѧ мѡа́въ люді́й ѕѣлѡ̀, ѩ҆́кѡ мно́зи бѧ́хѹ, и҆ ѡ҆скорбѣ̀ мѡа́въ ѿ лица̀ сынѡ́въ ї҆и҃левыхъ,

⁴и҆ речѐ мѡа́въ старѣ́йшинамъ мадїа҄млимъ: нн҃ѣ потреби́тъ со́нмъ се́й всѣ́хъ, и҆̀же ѡ҆́крестъ на́съ, ѩ҆́коже потреблѧ́етъ теле́цъ ѕла́къ на по́ли. И҆ вала́къ, сы́нъ сепфѡ́ровъ, бѧ́ше ца́рь мѡа́вль въ то̀ вре́мѧ,

⁵и҆ посла̀ послы̀ къ валаа́мѹ, сы́нѹ веѡ́ровѹ, во фаѳѹ́рѹ ѩ҆́же є҆́сть ѹ҆ рѣкѝ землѝ сынѡ́въ люді́й є҆гѡ̀, призва́ти є҆го̀, глаго́лѧ: сѐ, лю́дїе и҆зыдо́ша и҆з̾ є҆гѵ́пта, и҆ сѐ, покры́ша лицѐ землѝ, и҆ сі́и сѣдѧ́тъ при ѡ҆держа́нїи мое́мъ:

⁶и҆ нн҃ѣ прїидѝ, прокленѝ мнѣ̀ лю́ди сїѧ҄, поне́же крѣ́пльшїи сѹ́ть па́че на́съ, а҆́ще возмо́жемъ си́хъ и҆зби́ти, и҆ и҆зженѹ̀ и҆̀хъ и҆з̾ землѝ: ѩ҆́кѡ вѣ́мъ, и҆̀хже а҆́ще благослови́ши ты̀, благослове́ни сѹ́ть, и҆ и҆̀хже а҆́ще проклене́ши ты̀, про́клѧти.

⁷И҆ и҆до́ша старѣ҄йшины мѡа҄вли и҆ старѣ҄йшины мадїа҄мли, и҆ волхвова҄нїѧ въ рѹка́хъ и҆́хъ: и҆ прїидо́ша къ валаа́мѹ и҆ глаго́лаша є҆мѹ̀ словеса̀ вала́кѡва.

⁸И҆ речѐ къ ни҄мъ: препочі́йте здѣ̀ но́щь (сїю̀), и҆ ѿвѣща́ю ва́мъ дѣѧ҄нїѧ, ѩ҆̀же а҆́ще возгл҃етъ гд҇ь ко мнѣ̀. И҆ пребы́ша кнѧ҄зи мѡа҄вли ѹ҆ валаа́ма.

⁹И҆ прїи́де бг҃ъ къ валаа́мѹ и҆ речѐ є҆мѹ̀: что̀ человѣ́цы сі́и ѹ҆ тебє̀;

¹⁰И҆ речѐ валаа́мъ къ бг҃ѹ: вала́къ сы́нъ сепфѡ́ровъ, ца́рь мѡа́вль, посла̀ и҆̀хъ ко мнѣ̀, глаго́лѧ:

¹¹сѐ, лю́дїе и҆зыдо́ша и҆з̾ є҆гѵ́пта и҆ покры́ша лицѐ землѝ, и҆ сі́и сѣдѧ́тъ при ѡ҆держа́нїи мое́мъ: и҆ нн҃ѣ прїидѝ, проклени́ ми и҆̀хъ, не́гли возмогѹ̀ и҆зби́ти и҆̀хъ и҆ и҆згна́ти ѧ҆̀ ѿ землѝ.

¹²И҆ речѐ бг҃ъ къ валаа́мѹ: да не и҆́деши съ ни́ми, нижѐ да клене́ши люді́й: сѹ́ть бо бл҃гослове́ни.

¹³И҆ воста́въ валаа́мъ заѹ́тра, речѐ кнѧзє́мъ вала́кѡвымъ: возврати́тесѧ къ господи́нѹ своемѹ̀: не попѹща́етъ мѝ бг҃ъ и҆тѝ съ ва́ми.

¹⁴И҆ воста́вше кнѧ҄зи мѡа҄вли прїидо́ша къ вала́кѹ и҆ реко́ша є҆мѹ̀: не хо́щетъ валаа́мъ прїитѝ съ на́ми.

¹⁵И҆ приложѝ вала́къ є҆щѐ посла́ти кнѧ҄зи мно́жайшїи и҆ честнѣ́йшїи си́хъ.

¹⁶И҆ прїидо́ша къ валаа́мѹ и҆ глаго́лаша є҆мѹ̀: сїѧ҄ глаго́летъ вала́къ, сы́нъ сепфѡ́ровъ: молю́ тѧ, не ѡ҆блѣни́сѧ прїитѝ ко мнѣ̀:

¹⁷че́стнѣ бо тѧ̀ почтѹ̀, и҆ всѧ҄, є҆ли҄ка а҆́ще рече́ши мѝ, сотворю̀ тебѣ̀: и҆ прїидѝ, и҆ проклени́ ми лю́ди сїѧ҄.

¹⁸И҆ ѿвѣща̀ валаа́мъ и҆ речѐ кнѧзє́мъ вала́кѡвымъ: а҆́ще мѝ да́стъ вала́къ по́лнѹ хра́минѹ свою̀ зла́та и҆ сребра̀, не могѹ̀ престѹпи́ти сло́ва гд҇а бг҃а, є҆́же сотвори́ти то̀ ма́ло и҆лѝ вели́ко въ ра́зѹмѣ мое́мъ:

¹⁹и҆ нн҃ѣ потерпи́те здѣ̀ и҆ вы̀ но́щь сїю̀, и҆ ѹ҆вѣ́мъ, что̀ приложи́тъ гд҇ь гл҃ати ко мнѣ̀.

²⁰И҆ прїи́де бг҃ъ къ валаа́мѹ но́щїю и҆ речѐ є҆мѹ̀: а҆́ще зва́ти тѧ̀ прїидо́ша человѣ́цы сі́и, воста́въ и҆дѝ в̾слѣ́дъ и҆́хъ, но сло́во, є҆́же а҆́ще рекѹ̀ тебѣ̀, то̀ да сотвори́ши.

²¹И҆ воста́въ валаа́мъ заѹ́тра, ѡ҆сѣдла̀ ѻ҆слѧ̀ своѐ и҆ и҆́де со кнѧ҄зи мѡа҄вли.

²²И҆ разгнѣ́васѧ ѩ҆́ростїю бг҃ъ, ѩ҆́кѡ и҆́де се́й: и҆ воста̀ а҆́гг҃лъ бж҃їй препѧ́ти є҆мѹ̀ на пѹтѝ. Се́й же сѣдѧ́ше на ѻ҆слѧ́ти свое́мъ и҆ два̀ раба҄ є҆гѡ̀ съ ни́мъ.

²³И҆ ѹ҆зрѣ́въ ѻ҆се́лъ а҆́гг҃ла бж҃їѧ сѹпроти́въ стоѧ́ща на пѹтѝ, и҆ ме́чь и҆звлече́нъ въ рѹцѣ̀ є҆гѡ̀, и҆ соврати́сѧ ѻ҆се́лъ съ пѹтѝ и҆ и҆дѧ́ше на по́ле: и҆ бїѧ́ше (валаа́мъ) ѻ҆слѧ̀ жезло́мъ свои́мъ, є҆́же напра́вити є҆̀ на пѹ́ть:

²⁴и҆ ста̀ а҆́гг҃лъ бж҃їй на брозда́хъ вїногра́дныхъ: ѡ҆гражде́нїе ѿсю́дѹ, и҆ ѡ҆гражде́нїе ѿѻнѹ́дѹ:

²⁵и҆ ѹ҆зрѣ́въ ѻ҆се́лъ а҆́гг҃ла бж҃їѧ, приложи́сѧ ко ѡ҆гра́дѣ и҆ прижмѐ но́гѹ валаа́мѹ ко ѡ҆гра́дѣ, и҆ приложѝ є҆щѐ би́ти є҆го̀:

²⁶и҆ приложѝ а҆́гг҃лъ бж҃їй, и҆ ше́дъ ст҃а̀ въ мѣ́стѣ ѹ҆́зкомъ, въ не́мже не бѧ́ше ѹ҆клони́тисѧ ни на де́сно, ни на лѣ́во:

²⁷и҆ ви́дѧ ѻ҆слѧ̀ а҆́гг҃ла бж҃їѧ, падѐ под̾ валаа́момъ: и҆ разгнѣ́васѧ валаа́мъ, и҆ бїѧ́ше ѻ҆слѧ̀ жезло́мъ.

²⁸И҆ ѿве́рзе бг҃ъ ѹ҆ста̀ ѻ҆слѧ́ти, и҆ речѐ валаа́мѹ: что̀ сотвори́хъ тебѣ̀, ѩ҆́кѡ сѐ, въ тре́тїе бїе́ши мѧ̀;

²⁹И҆ речѐ валаа́мъ ѻ҆слѧ́ти: ѩ҆́кѡ порѹга́лосѧ мѝ є҆сѝ: и҆ а҆́ще бы́хъ ме́чь и҆мѣ́лъ въ рѹкѹ̀ моє́ю, пробо́лъ бы́хъ тѧ̀.

³⁰И҆ речѐ ѻ҆слѧ̀ валаа́мѹ: не а҆́зъ ли ѻ҆сли́ца твоѧ̀, на не́йже ты̀ ѣ҆́здиши ѿ ю҆́ности своеѧ̀ до дне́шнѧгѡ днѐ; є҆да̀ презо́рствомъ презрѣ́вши сотвори́хъ тебѣ̀ сїѐ; Ѻ҆́нъ же речѐ: нѝ.

³¹Ѿве́рзе же бг҃ъ ѻ҆́чи валаа́мѹ, и҆ ѹ҆зрѣ̀ а҆́гг҃ла бж҃їѧ противостоѧ́ща на пѹтѝ, и҆ ме́чь и҆звлече́нъ въ рѹцѣ̀ є҆гѡ̀: и҆ приклони́всѧ поклони́сѧ є҆мѹ̀ лице́мъ свои́мъ.

³²И҆ речѐ є҆мѹ̀ а҆́гг҃лъ бж҃їй: почто̀ бїе́ши ѻ҆слѧ̀ твоѐ сїѐ въ тре́тїе; и҆ сѐ, а҆́зъ прїидо́хъ на препѧ́тїе твоѐ, ѩ҆́кѡ непрїѧ́тенъ пѹ́ть тво́й предо мно́ю: и҆ ви́дѧ мѧ̀ ѻ҆сли́ца, соврати́сѧ ѿ менє̀ сѐ тре́тїе:

³³и҆ а҆́ще бы не ѹ҆клони́ласѧ ѿ менє̀, нн҃ѣ тѧ̀ ѹ҆̀бо ѹ҆би́лъ бы́хъ, сїю́ же сохрани́лъ бы́хъ.

³⁴И҆ речѐ валаа́мъ ко а҆́гг҃лѹ гд҇ню: согрѣши́хъ, не вѣ́дѣхъ бо, ѩ҆́кѡ ты̀ мнѣ̀ противостоѧ́лъ є҆сѝ на пѹтѝ: и҆ нн҃ѣ а҆́ще тебѣ̀ не ѹ҆го́дно, возвращѹ́сѧ.

³⁵И҆ речѐ а҆́гг҃лъ бж҃їй къ валаа́мѹ: и҆дѝ ты̀ съ челѡвѣ́ки: ѻ҆ба́че сло́во, є҆́же а҆́ще рекѹ̀ тебѣ̀, сїѐ сохранѝ глаго́лати. И҆ и҆́де валаа́мъ со кнѧ҄зи вала́кѡвы.

³⁶И҆ ѹ҆слы́шавъ вала́къ, ѩ҆́кѡ прихо́дитъ валаа́мъ, и҆зы́де во срѣ́тенїе є҆мѹ̀ во гра́дъ мѡа́вль, и҆́же є҆́сть въ предѣ́лѣхъ а҆рнѡ́нихъ, и҆́же є҆́сть на краѝ предѣ́лѡвъ.

³⁷И҆ речѐ вала́къ къ валаа́мѹ: не посла́хъ ли къ тебѣ̀ зва́ти тѧ̀; почто̀ не прише́лъ є҆сѝ ко мнѣ̀; и҆лѝ не возмогѹ̀ почти́ти тебѐ;

³⁸И҆ речѐ валаа́мъ къ вала́кѹ: сѐ, прихождѹ̀ къ тебѣ̀ нн҃ѣ: мо́щенъ ли бѹ́дѹ глаго́лати что̀; сло́во, є҆́же а҆́ще вложи́ть бг҃ъ во ѹ҆ста̀ моѧ҄, сїѐ рекѹ̀.

³⁹И҆ и҆́де валаа́мъ съ вала́комъ, и҆ внидо́ша во гра́ды сє́лныѧ.

⁴⁰И҆ закла̀ вала́къ телцы̀ и҆ ѻ҆́вцы, и҆ посла̀ валаа́мѹ и҆ кнѧзє́мъ и҆̀же съ ни́мъ.

⁴¹И҆ бы́сть заѹ́тра, и҆ взѧ́въ вала́къ валаа́ма, возведѐ є҆го̀ на сто́лпъ ваа́ловъ, и҆ показа̀ є҆мѹ̀ ѿтѹ́дѹ ча́сть нѣ́кѹю люді́й.