Read Библия Церковнославянская Чи́сла 23 Bible Online

Чи́сла 23 - Библия Церковнославянская bible

Чи́сла 23

¹И҆ речѐ валаа́мъ къ вала́кѹ: сози́жди мнѣ̀ здѣ̀ се́дмь тре́бищъ, и҆ ѹ҆гото́вай мнѣ̀ здѣ̀ се́дмь телцє́въ и҆ се́дмь ѻ҆внѡ́въ.

²И҆ сотворѝ вала́къ, ѩ҆́коже речѐ є҆мѹ̀ валаа́мъ: и҆ вознесѐ телца̀ и҆ ѻ҆вна̀ на тре́бище.

³И҆ речѐ валаа́мъ къ вала́кѹ: ста́ни ѹ҆ тре́бы своеѧ̀, и҆ пойдѹ̀, а҆́ще ѩ҆ви́тсѧ мнѣ̀ бг҃ъ въ срѣ́тенїе, и҆ сло́во, є҆́же мнѣ̀ ѹ҆ка́жетъ, повѣ́мъ тебѣ̀. И҆ ста̀ вала́къ ѹ҆ тре́бы своеѧ̀.

⁴И҆ валаа́мъ и҆́де вопроси́ти бг҃а, и҆ и҆́де прѧ́мѡ: и҆ ѩ҆ви́сѧ бг҃ъ валаа́мѹ. И҆ речѐ къ немѹ̀ валаа́мъ: се́дмь тре́бищъ и҆згото́вихъ и҆ возложи́хъ телца̀ и҆ ѻ҆вна̀ на тре́бище.

⁵И҆ вложѝ бг҃ъ сло́во во ѹ҆ста̀ валаа́мѹ и҆ речѐ: возврати́всѧ къ вала́кѹ та́кѡ глаго́ли.

⁶И҆ возврати́сѧ къ немѹ̀: ѻ҆́нъ же стоѧ́ше ѹ҆ всесожже́нїй свои́хъ, и҆ всѝ кнѧ҄зи мѡа҄вли съ ни́мъ: и҆ бы́сть дх҃ъ бж҃їй на не́мъ.

⁷И҆ воспрїи́мъ при́тчѹ свою̀ речѐ: ѿ месопота́мїи приведе́ мѧ вала́къ ца́рь мѡа́вль, ѿ го́ръ восто́чныхъ, глаго́лѧ: грѧдѝ, проклени́ ми ї҆а́кѡва, и҆ грѧдѝ, проклени́ ми ї҆и҃лѧ:

⁸что̀ прокленѹ̀, є҆гѡ́же не клене́тъ гд҇ь; и҆лѝ что̀ ѕло̀ рекѹ̀, є҆гѡ́же не ѕлосло́витъ бг҃ъ;

⁹ѩ҆́кѡ ѿ верха̀ го́ръ ѹ҆зрю̀ є҆го̀ и҆ ѿ хѡ́лмъ проѹразѹмѣ́ю є҆го̀: сѐ, лю́дїе є҆ди́ни населѧ́тсѧ и҆ со ѩ҆зы҄ки не вмѣнѧ́тсѧ:

¹⁰кто̀ и҆зслѣ́дитъ сѣ́мѧ ї҆а́кѡвле; и҆ кто̀ и҆зочте́тъ со́нмы ї҆и҃лѧ; да ѹ҆́мретъ дѹша̀ моѧ̀ въ дѹша́хъ првдныхъ, и҆ бѹ́ди сѣ́мѧ моѐ, ѩ҆́коже сѣ́мѧ и҆́хъ.

¹¹И҆ речѐ вала́къ къ валаа́мѹ: что̀ сотвори́лъ є҆сѝ мѝ; на проклѧ́тїе вра҄гъ мои́хъ призва́хъ тѧ̀, и҆ сѐ, благослови́лъ є҆сѝ (ѧ҆̀) благослове́нїемъ.

¹²И҆ речѐ валаа́мъ къ вала́кѹ: не є҆ли҄ка ли вло́житъ бг҃ъ во ѹ҆ста̀ моѧ҄, сїѐ сохраню̀ глаго́лати;

¹³И҆ речѐ къ немѹ̀ вала́къ: пойдѝ є҆щѐ со мно́ю на мѣ́сто и҆́но, съ негѡ́же не ѹ҆́зриши и҆́хъ ѿтѹ́дѹ, но ра́звѣ ча́сть нѣ́кѹю и҆́хъ ѹ҆́зриши, всѣ́хъ же не ѹ҆́зриши, и҆ проклени́ ми и҆̀хъ ѿтѹ́дѹ.

¹⁴И҆ поѧ̀ є҆го̀ на стра́жѹ села̀, на ве́рхъ и҆сте́санагѡ, и҆ созда̀ та́мѡ се́дмь тре́бищъ, и҆ возложѝ телца̀ и҆ ѻ҆вна̀ на тре́бище.

¹⁵И҆ речѐ валаа́мъ къ вала́кѹ: ста́ни ѹ҆ тре́бы своеѧ̀, а҆́зъ же пойдѹ̀ вопроси́ти бг҃а.

¹⁶И҆ срѣ́те бг҃ъ валаа́ма, и҆ вложѝ сло́во во ѹ҆ста̀ є҆мѹ̀ и҆ речѐ: возврати́сѧ къ вала́кѹ, и҆ рече́ши сїѧ҄.

¹⁷И҆ возврати́сѧ къ немѹ̀: ѻ҆́нъ же стоѧ́ше ѹ҆ всесожже́нїй свои́хъ, и҆ всѝ кнѧ҄зи мѡа҄вли съ ни́мъ. И҆ речѐ є҆мѹ̀ вала́къ: что̀ гл҃а гд҇ь;

¹⁸И҆ воспрїи́мъ при́тчѹ свою̀, речѐ: воста́ни, вала́къ, и҆ послѹ́шай, внѹшѝ свидѣ́тель, сы́не сепфѡ́ровъ:

¹⁹не ѩ҆́кѡ человѣ́къ бг҃ъ коле́блетсѧ, нижѐ ѩ҆́кѡ сы́нъ человѣ́ческїй и҆змѣнѧ́етсѧ: то́й гл҃аше, не сотвори́тъ ли; рече́тъ, и҆ не пребѹ́детъ ли;

²⁰сѐ, благословлѧ́ти приведе́нъ є҆́смь: благословлю̀, и҆ не ѿвращѹ̀:

²¹не бѹ́детъ трѹда̀ во ї҆а́кѡвѣ, нижѐ ѹ҆́зритсѧ болѣ́знь во ї҆и҃ли: гд҇ь бг҃ъ є҆гѡ̀ съ ни́мъ, сла́ва ца́рскаѧ на не́мъ:

²²бг҃ъ и҆зведы́й є҆го̀ и҆з̾ є҆гѵ́пта, ѩ҆́коже сла́ва є҆диноро́га въ не́мъ:

²³нѣ́сть бо вражбы̀ во ї҆а́кѡвѣ, нижѐ волхвова́нїѧ во ї҆и҃ли: во вре́мѧ нарече́тсѧ ї҆а́кѡвѹ и҆ ї҆и҃лю, что̀ соверши́тъ бг҃ъ:

²⁴сѐ, лю́дїе ѩ҆́кѡ льви҄чища воста́нѹтъ, и҆ ѩ҆́кѡ ле́въ вознесе́тсѧ: не ѹ҆́снетъ, до́ндеже снѣ́стъ ло́въ и҆ кро́вь посѣ́ченыхъ и҆спїе́тъ.

²⁵И҆ речѐ вала́къ къ валаа́мѹ: ни клѧ́твами мнѣ̀ кленѝ и҆̀хъ, нижѐ благослове́нїемъ благословѝ и҆̀хъ.

²⁶И҆ ѿвѣща́въ валаа́мъ, речѐ къ вала́кѹ: не рѣ́хъ ли тѝ, глаго́лѧ: сло́во, є҆́же а҆́ще возгл҃етъ бг҃ъ, сїѐ сотворю̀;

²⁷И҆ речѐ вала́къ къ валаа́мѹ: грѧдѝ, поймѹ́ тѧ на мѣ́сто и҆́но, а҆́ще ѹ҆го́дно бѹ́детъ бг҃ѹ, и҆ проклени́ ми и҆̀хъ ѿтѹ́дѹ.

²⁸И҆ поѧ̀ вала́къ валаа́ма на ве́рхъ фогѡ́ра, простира́ющасѧ въ пѹсты́ню.

²⁹И҆ речѐ валаа́мъ къ вала́кѹ: сози́жди мнѣ̀ здѣ̀ се́дмь тре́бищъ, и҆ ѹ҆гото́вай мнѣ̀ здѣ̀ се́дмь телцє́въ и҆ се́дмь ѻ҆внѡ́въ.

³⁰И҆ сотворѝ вала́къ, ѩ҆́коже речѐ є҆мѹ̀ валаа́мъ: и҆ вознесѐ телца̀ и҆ ѻ҆вна̀ на тре́бище.