Read Библия Церковнославянская Чи́сла 26 Bible Online

Чи́сла 26 - Библия Церковнославянская bible

Чи́сла 26

¹И҆ бы́сть по ѩ҆́звѣ, и҆ речѐ гд҇ь къ мѡѷсе́ю и҆ є҆леаза́рѹ жерцѹ̀, гл҃ѧ:

²возмѝ нача́ло всегѡ̀ со́нма сынѡ́въ ї҆и҃левыхъ ѿ два́десѧти лѣ́тъ и҆ вы́шше, по домѡ́мъ ѻ҆те́чествъ и҆́хъ, всѧ́къ и҆сходѧ́й воѡрѹжи́тисѧ во ї҆и҃ли.

³И҆ глаго́ла мѡѷсе́й и҆ є҆леаза́ръ жре́цъ къ ни҄мъ во а҆равѡ́ѳѣ мѡа́вли при ї҆ѻрда́нѣ ѹ҆ ї҆ерїхѡ́на, глаго́лѧ:

⁴ѿ два́десѧти лѣ́тъ и҆ вы́шше, ѩ҆́коже заповѣ́да гд҇ь мѡѷсе́ю: и҆ сы́нове ї҆и҃лтестїи и҆зше́дшїи и҆з̾ є҆гѵ́пта:

⁵рѹви́мъ пе́рвенецъ ї҆и҃левъ. Сы́нове же рѹви҄мли: є҆нѡ́хъ и҆ со́нмъ є҆нѡ́ховъ, фа́ллѹ со́нмъ фа́лловъ,

⁶а҆срѡ́нѹ со́нмъ а҆срѡ́новъ, ха́рмѹ со́нмъ хармі́инъ.

⁷Сі́и со́нми рѹви҄мли: и҆ бы́сть соглѧ́данїе и҆́хъ четы́редесѧть трѝ ты́сѧщы и҆ ше́сть сѡ́тъ и҆ три́десѧть.

⁸И҆ сы́нове фа́ллѡвы є҆лїа́въ.

⁹И҆ сы́нове є҆лїа҄вли намѹи́лъ и҆ даѳа́нъ и҆ а҆вїрѡ́нъ: сі́и наро́читїи со́нмѹ: сі́и сѹ́ть воста́вше на мѡѷсе́а и҆ а҆арѡ́на въ со́нмѣ коре́овѣ въ крамолѣ̀ на гд҇а:

¹⁰и҆ ѿве́рзши землѧ̀ ѹ҆ста̀ своѧ҄ пожрѐ и҆̀хъ и҆ коре́а въ сме́рти со́нма є҆гѡ̀, є҆гда̀ поѧдѐ ѻ҆́гнь двѣ́сти и҆ пѧтьдесѧ́тъ, и҆ бы́ша въ зна́менїе.

¹¹Сы́нове же коре́ѡвы не и҆змро́ша.

¹²И҆ сы́нове сѷмеѡ҄ни, со́нмъ сынѡ́въ сѷмеѡ́нихъ: намѹи́лѹ со́нмъ намѹи́ловъ, ї҆амі́нѹ со́нмъ ї҆амі́новъ, ї҆ахі́нѹ со́нмъ ї҆ахі́новъ,

¹³за́рѣ со́нмъ за́ринъ, саѹ́лѹ со́нмъ саѹ́ловъ.

¹⁴Сі́и со́нми сѷмеѡ҄ни ѿ соглѧ́данїѧ и҆́хъ два́десѧть двѣ̀ ты́сѧщы и҆ двѣ́сти.

¹⁵Сы́нове же ї҆ѹ҄дины и҆́ръ и҆ а҆ѵна́нъ и҆ силѡ́мъ, и҆ фаре́съ и҆ за́ра: и҆ ѹ҆́мре и҆́ръ и҆ а҆ѵна́нъ въ землѝ ханаа́ни.

¹⁶И҆ бы́ша сы́нове ї҆ѹ҄дины по со́нмѡмъ свои҄мъ: силѡ́мѹ со́нмъ силѡ́мль, фаре́сѹ со́нмъ фаре́совъ, за́рѣ со́нмъ за́ринъ.

¹⁷И҆ бы́ша сы́нове фаре́сѡвы: а҆срѡ́нѹ со́нмъ а҆срѡ́новъ, ї҆амѹи́лѹ со́нмъ ї҆амѹи́ловъ.

¹⁸Сі́и со́нми ї҆ѹ҄дины по соглѧ́данїю и҆́хъ се́дмьдесѧтъ ше́сть ты́сѧщъ и҆ пѧ́ть сѡ́тъ.

¹⁹И҆ сы́нове ї҆ссаха́рѡвы по со́нмѡмъ свои҄мъ: ѳѡ́лѣ со́нмъ ѳѡ́линъ, фѹ́еви со́нмъ фѹ́инъ,

²⁰ї҆асѹ́вѹ со́нмъ ї҆асѹ́винъ, а҆мвра́мѹ со́нмъ а҆мвра́мль.

²¹Сі́и со́нми ї҆ссаха́рѡвы по соглѧ́данїю и҆́хъ шестьдесѧ́тъ и҆ четы́ри ты́сѧщы и҆ четы́реста.

²²Сы́нове завѹлѡ҄ни по со́нмѡмъ свои҄мъ: саре́дѹ со́нмъ саре́динъ, а҆ллѡ́нѹ со́нмъ а҆ллѡ́нинъ, а҆лли́лѹ со́нмъ а҆лли́линъ.

²³Сі́и со́нми завѹлѡ҄ни по соглѧ́данїю и҆́хъ шестьдесѧ́тъ ты́сѧщъ и҆ пѧ́ть сѡ́тъ.

²⁴Сы́нове га́дѡвы по со́нмѡмъ и҆́хъ: сафѡ́нѹ со́нмъ сафѡ́нинъ, а҆ггі́нѹ со́нмъ а҆ггі́новъ, сѹні́нѹ со́нмъ сѹні́новъ,

²⁵а҆зе́нѹ со́нмъ а҆зе́нинъ, а҆́ддѹ со́нмъ а҆́ддинъ,

²⁶а҆роа́дѹ со́нмъ а҆роа́динъ, а҆рїи́лѹ со́нмъ а҆рїи́ль.

²⁷Сі́и со́нми сынѡ́въ га́довыхъ по соглѧ́данїю и҆́хъ четы́редесѧть и҆ четы́ри ты́сѧщы и҆ пѧ́ть сѡ́тъ.

²⁸Сы́нове а҆си́рѡвы по со́нмѡмъ и҆́хъ: ї҆амі́нѹ со́нмъ ї҆амі́новъ, ї҆есѹ́ю со́нмъ ї҆есѹ́инь,

²⁹варїа́ю со́нмъ варїа́инь, хове́рѹ со́нмъ хове́ринъ, мелхїи́лѹ со́нмъ мелхїи́линъ,

³⁰И҆́мѧ же дще́ри а҆си́ровѣ са́ра.

³¹Сі́и со́нми а҆си́рѡвы по соглѧ́данїю и҆́хъ четы́редесѧть трѝ ты́сѧщи и҆ четы́реста.

³²Сы́нове ї҆ѡ҄сифли по со́нмѡмъ и҆́хъ: манассі́а и҆ є҆фре́мъ.

³³Сы́нове манассї҄ины: махі́рѹ со́нмъ махі́ринъ: и҆ махі́ръ родѝ галаа́да, галаа́дѹ со́нмъ галаа́динъ.

³⁴И҆ сі́и сы́нове галаа҄дины: а҆хїе́зерѹ со́нмъ а҆хїе́зеровъ, хеле́кѹ со́нмъ хеле́ковъ,

³⁵є҆срїи́лѹ со́нмъ є҆срїи́ловъ, сѷхе́мѹ со́нмъ сѷхе́мль,

³⁶сѷмае́рѹ со́нмъ сѷмае́ринъ, и҆ ѻ҆фе́рѹ со́нмъ ѻ҆фе́ровъ.

³⁷И҆ салпаа́дѹ сы́нѹ ѻ҆фе́ровѹ не бы́ша є҆мѹ̀ сы́нове, но то́кмѡ дщє́ри. И҆ сїѧ҄ и҆мена̀ дще́ремъ салпаа́дѡвымъ: маала̀ и҆ нѹа̀, и҆ є҆гла̀ и҆ мелха̀ и҆ ѳерса̀.

³⁸Сі́и со́нми манассї҄ины по соглѧ́данїю и҆́хъ пѧтьдесѧ́тъ и҆ двѣ̀ ты́сѧщы и҆ се́дмь сѡ́тъ.

³⁹И҆ сі́и сы́нове є҆фрє́мли: сѹѳа́лѹ со́нмъ сѹѳа́линъ, тана́хѹ со́нмъ тана́хинъ.

⁴⁰Сі́и сы́нове сѹѳа́лѡвы: є҆де́нѹ со́нмъ є҆де́нинъ.

⁴¹Сі́и со́нми є҆фрє́мли по соглѧ́данїю и҆́хъ три́десѧть двѣ̀ ты́сѧщы и҆ пѧ́ть сѡ́тъ. Сі́и со́нми сынѡ́въ ї҆ѡ́сифовыхъ по со́нмѡмъ и҆́хъ.

⁴²Сы́нове венїамї҄ни по со́нмѡмъ и҆́хъ: ва́лѹ со́нмъ ва́линъ, а҆сѷви́рѹ со́нмъ а҆сѷви́ровъ, ї҆ахїра́нѹ со́нмъ ї҆ахїра́нинъ, сѡфа́нѹ со́нмъ сѡфа́нинъ.

⁴³И҆ бы́ша сы́нове ва́лѹ а҆де́ръ и҆ ноема́нъ:

⁴⁴а҆де́рѹ со́нмъ а҆де́ринъ, и҆ ноема́нѹ со́нмъ ноема́нинъ.

⁴⁵Сі́и сы́нове венїамї҄ни по со́нмѡмъ и҆́хъ по соглѧ́данїю и҆́хъ четы́редесѧть и҆ пѧ́ть ты́сѧщъ и҆ ше́сть сѡ́тъ.

⁴⁶И҆ сы́нове да́нѡвы по со́нмѡмъ и҆́хъ: саме́ю со́нмъ саме́инъ: сі́и со́нми да́нѡвы но со́нмѡмъ и҆́хъ.

⁴⁷Всѝ со́нми саме́ини по соглѧ́данїю и҆́хъ шестьдесѧ́тъ четы́ри ты́сѧщы и҆ четы́реста.

⁴⁸Сы́нове нефѳалї҄мли по со́нмѡмъ и҆́хъ: а҆сїи́лѹ со́нмъ а҆сїи́левъ, гѡѵ́нѹ со́нмъ гѡѵ́нинъ,

⁴⁹ї҆есрі́ю со́нмъ ї҆есрі́евъ, селли́мѹ со́нмъ селли́мовъ.

⁵⁰Сі́и со́нми нефѳалї҄мли по соглѧ́данїю и҆́хъ четы́редесѧть пѧ́ть ты́сѧщъ и҆ четы́реста.

⁵¹Сїѐ соглѧ́данїе сынѡ́въ ї҆и҃левыхъ ше́сть сѡ́тъ є҆ди́на ты́сѧща и҆ се́дмь сѡ́тъ три́десѧть.

⁵²И҆ речѐ гд҇ь къ мѡѷсе́ю, гл҃ѧ:

⁵³си҄мъ раздѣли́тсѧ землѧ̀ въ наслѣ́дїе по числѹ̀ и҆ме́нъ:

⁵⁴мно́жайшымъ да ѹ҆мно́жиши наслѣ́дїе, и҆ малѣ́йшымъ да ѹ҆ма́лиши наслѣ́дїе и҆́хъ: коемѹ́ждо, ѩ҆́коже сѹ́ть соглѧ́дани, да да́стсѧ наслѣ́дїе и҆́хъ:

⁵⁵по жре́бїємъ да раздѣли́тсѧ землѧ̀ и҆мена́мъ, по племенє́мъ ѻ҆те́чествъ свои́хъ да наслѣ́дѧтъ:

⁵⁶ѿ жре́бїѧ да раздѣли́ши наслѣ́дїе и҆́хъ междѹ̀ мно́гими и҆ ма́лыми.

⁵⁷И҆ сы́нове леѵі́ини но со́нмѡмъ и҆́хъ: гирсѡ́нѹ со́нмъ гирсѡ́новъ, каа́ѳѹ со́нмъ каа́ѳовъ, мера́рѣ со́нмъ мера́ринъ.

⁵⁸Сі́и со́нми сынѡ́въ леѵі́иныхъ: со́нмъ лове́нинъ, со́нмъ хеврѡ́нинъ, и҆ со́нмъ мѹсі́нъ, и҆ со́нмъ коре́овъ. И҆ каа́ѳъ родѝ а҆мра́ма.

⁵⁹И҆́мѧ же женѣ̀ а҆мра́мли ї҆ѡхаве́ѳъ, дщѝ леѵі́ина, ѩ҆́же родѝ си́хъ леѵі́и во є҆гѵ́птѣ, и҆ родѝ а҆мра́мѹ а҆арѡ́на и҆ мѡѷсе́а и҆ марїа́мъ сестрѹ̀ и҆́хъ.

⁶⁰И҆ роди́шасѧ а҆арѡ́нѹ нада́въ и҆ а҆вїѹ́дъ, и҆ є҆леаза́ръ и҆ ї҆ѳа́маръ.

⁶¹И҆ ѹ҆́мре нада́въ и҆ а҆вїѹ́дъ, є҆гда̀ принесо́ста ѻ҆́гнь чѹжді́й пред̾ гд҇емъ въ пѹсты́ни сїна́йстѣй.

⁶²И҆ бы́ша ѿ соглѧ́данїѧ и҆́хъ два́десѧть трѝ ты́сѧщы, всѧ́къ мѹ́жескъ по́лъ ѿ є҆ди́нагѡ мц҇а и҆ вы́шше: не бы́ша бо соглѧ́дани посредѣ̀ сынѡ́въ ї҆и҃левыхъ, ѩ҆́кѡ не даде́сѧ и҆̀мъ жре́бїй посредѣ̀ сынѡ́въ ї҆и҃левыхъ.

⁶³И҆ сїѐ соглѧ́данїе мѡѷсе́а и҆ є҆леаза́ра жерца̀, и҆̀же соглѧ́даша сынѡ́въ ї҆и҃левыхъ во а҆равѡ́ѳѣ мѡа́вли, ѹ҆ ї҆ѻрда́на при ї҆ерїхѡ́нѣ.

⁶⁴И҆ въ си́хъ не бѧ́ше человѣ́къ ѿ соглѧ́даныхъ мѡѷсе́омъ и҆ а҆арѡ́номъ, и҆̀хже соглѧ́даша сынѡ́въ ї҆и҃левыхъ въ пѹсты́ни сїна́йстѣй.

⁶⁵Поне́же речѐ гд҇ь и҆̀мъ: сме́ртїю и҆́змрѹтъ въ пѹсты́ни. И҆ не ѡ҆ста́сѧ ѿ ни́хъ ни є҆ди́нъ, кромѣ̀ хале́ва сы́на ї҆ефонні́ина и҆ ї҆исѹ́са сы́на наѵи́на.