Read Библия Церковнославянская Чи́сла 27 Bible Online

Чи́сла 27 - Библия Церковнославянская bible

Чи́сла 27

¹И҆ прише́дшѧ дщє́ри салпаа́да сы́на ѻ҆фе́рова, сы́на галаа́дова, сы́на махі́рова, со́нма манассі́ина, сынѡ́въ ї҆ѡ́сифовыхъ, и҆ сїѧ҄ и҆мена̀ и҆́хъ: маала̀ и҆ нѹа̀, и҆ є҆гла̀ и҆ ме́лха и҆ ѳерса̀,

²и҆ ста́вшѧ пред̾ мѡѷсе́омъ и҆ пред̾ є҆леаза́ромъ жерце́мъ, и҆ пред̾ кнѧ҄зи и҆ пред̾ всѣ́мъ со́нмомъ ѹ҆ две́рїй ски́нїи свидѣ́нїѧ, глаго́лаша:

³ѻ҆те́цъ на́шъ ѹ҆́мре въ пѹсты́ни, и҆ се́й не бѣ̀ средѣ̀ со́нма воста́вшагѡ на гд҇а въ со́нмѣ коре́овѣ, ѩ҆́кѡ грѣха̀ ра́ди своегѡ̀ ѹ҆́мре, и҆ сы́нове не бы́ша є҆мѹ̀:

⁴да не поги́бнетъ и҆́мѧ ѻ҆тца̀ на́шего ѿ среды̀ со́нма своегѡ̀, ѩ҆́кѡ нѣ́сть сы́на є҆мѹ̀: дади́те на́мъ наслѣ́дїе посредѣ̀ бра́тїи ѻ҆тца̀ на́шегѡ.

⁵И҆ принесѐ мѡѷсе́й сѹ́дъ и҆́хъ пред̾ гд҇а.

⁶И҆ речѐ гд҇ь къ мѡѷсе́ю, гл҃ѧ:

⁷пра́вѡ глаго́лаша дщє́ри салпаа́дѡвы: даѧ́нїе да да́си и҆̀мъ ѡ҆держа́нїе наслѣ́дїѧ посредѣ̀ бра́тїй ѻ҆тца̀ и҆́хъ, и҆ да приложи́ши и҆̀мъ жре́бїй ѻ҆тца̀ и҆́хъ:

⁸и҆ сынѡ́мъ ї҆и҃лєвымъ да рече́ши, глаго́лѧ: человѣ́къ а҆́ще ѹ҆́мретъ, и҆ не бѹ́детъ сы́на є҆мѹ̀, дади́те наслѣ́дїе є҆гѡ̀ дще́ри є҆гѡ̀:

⁹а҆́ще же дще́ри не бѹ́детъ є҆мѹ̀, дади́те наслѣ́дїе є҆гѡ̀ бра́тѹ є҆гѡ̀:

¹⁰а҆́ще же не бѹ́дѹтъ є҆мѹ̀ бра́тїѧ, дади́те наслѣ́дїе бра́тѹ ѻ҆тца̀ є҆гѡ̀:

¹¹а҆́ще же не бѹ́дѹтъ бра́тїѧ ѻ҆тца̀ є҆гѡ̀, дади́те наслѣ́дїе ѹ҆́жикѹ бли́жнемѹ є҆гѡ̀ ѿ пле́мене є҆гѡ̀ наслѣ́дити ѩ҆̀же є҆гѡ̀: и҆ да бѹ́детъ сїѐ сынѡ́мъ ї҆и҃лєвымъ ѡ҆правда́нїе сѹда̀, ѩ҆́коже заповѣ́да гд҇ь мѡѷсе́ю.

¹²И҆ речѐ гд҇ь къ мѡѷсе́ю: взы́ди на го́рѹ, ѩ҆́же ѡ҆б̾ ѻ҆нѹ̀ странѹ̀ ї҆ѻрда́на, сїѧ̀ гора̀ нава́ѵъ, и҆ ви́ждь зе́млю ханаа́ню, ю҆́же а҆́зъ даю̀ сынѡ́мъ ї҆и҃лєвымъ во ѡ҆держа́нїе:

¹³и҆ ѹ҆́зриши ю҆̀, и҆ приложи́шисѧ къ лю́демъ свои҄мъ и҆ ты̀, ѩ҆́коже приложи́сѧ а҆арѡ́нъ бра́тъ тво́й на горѣ̀ ѡ҆́ръ:

¹⁴поне́же престѹпи́сте сло́во моѐ въ пѹсты́ни сі́нъ, внегда̀ сѹпроти́витисѧ со́нмѹ ѡ҆свѧти́ти мѧ̀, не ѡ҆свѧти́сте менѐ ѹ҆ воды̀ пред̾ ни́ми: сїѧ̀ є҆́сть вода̀ [пререка́нїѧ] въ ка́дисѣ въ пѹсты́ни сі́нъ.

¹⁵И҆ речѐ мѡѷсе́й ко гд҇ѹ:

¹⁶да и҆збере́тъ гд҇ь бг҃ъ дѹхѡ́въ и҆ всѧ́кїѧ пло́ти человѣ́ка над̾ со́нмомъ си́мъ,

¹⁷и҆́же и҆зы́детъ пред̾ лице́мъ и҆́хъ, и҆́же вни́детъ пред̾ лице́мъ и҆́хъ, и҆ и҆́же и҆зведе́тъ и҆̀хъ и҆ и҆́же введе́тъ и҆̀хъ, и҆ да не бѹ́детъ со́нмъ гд҇ень, ѩ҆́кѡ ѻ҆́вцы не и҆мѹ́щѧ па́стырѧ.

¹⁸И҆ речѐ гд҇ь къ мѡѷсе́ю, гл҃ѧ: поимѝ къ себѣ̀ ї҆исѹ́са сы́на наѵи́на, человѣ́ка, и҆́же и҆́мать дх҃а въ себѣ̀: и҆ да возложи́ши рѹ́цѣ твоѝ на него̀:

¹⁹и҆ поста́виши є҆го̀ пред̾ є҆леаза́ромъ жерце́мъ, и҆ заповѣ́ждь є҆мѹ̀ пред̾ всѣ́мъ со́нмомъ, и҆ заповѣ́ждь ѡ҆ не́мъ пред̾ ни́ми:

²⁰и҆ да́си на него̀ ѿ сла́вы твоеѧ̀, ѩ҆́кѡ да послѹ́шаютъ є҆го̀ всѝ сы́нове ї҆и҃лєвы:

²¹и҆ пред̾ є҆леаза́ромъ жерце́мъ да ста́нетъ, и҆ да вопро́сѧтъ ѿ негѡ̀ сѹда̀ ѩ҆вле́нныхъ пред̾ гд҇емъ: по словесѝ є҆гѡ̀ да и҆схо́дѧтъ, и҆ по словесѝ є҆гѡ̀ да вхо́дѧтъ са́мъ и҆ сы́нове ї҆и҃лєвы вкѹ́пѣ, и҆ ве́сь со́нмъ.

²²И҆ сотворѝ мѡѷсе́й, ѩ҆́коже повелѣ̀ є҆мѹ̀ гд҇ь бг҃ъ: и҆ взе́мъ ї҆исѹ́са поста́ви є҆го̀ пред̾ є҆леаза́ромъ жерце́мъ и҆ пред̾ всѣ́мъ со́нмомъ:

²³и҆ возложѝ рѹ́цѣ своѝ на него̀, и҆ ѹ҆стро́и є҆го̀, ѩ҆́коже повелѣ̀ гд҇ь мѡѷсе́ю.