Read Библия Церковнославянская Чи́сла 29 Bible Online

Чи́сла 29 - Библия Церковнославянская bible

Чи́сла 29

¹И҆ въ мц҇ъ седмы́й, пе́рвый (де́нь) мц҇а наро́читъ ст҃ъ да бѹ́детъ ва́мъ: всѧ́кагѡ дѣ́ла слѹже́бна да не сотворитѐ: де́нь зна́менїѧ бѹ́детъ ва́мъ.

²И҆ сотвори́те всесожжє́нїѧ въ воню̀ благово́нїѧ гд҇ѹ, телца̀ ѿ волѡ́въ є҆ди́наго, ѻ҆вна̀ є҆ди́наго, а҆́гнцєвъ є҆динолѣ́тныхъ се́дмь непоро́чныхъ:

³же́ртва и҆́хъ мѹка̀ пшени́чна вмѣ́шана въ є҆ле́и: трѝ десѧти҄ны телцѹ̀ є҆ди́номѹ и҆ двѣ̀ десѧти҄ны ѻ҆внѹ̀ є҆ди́номѹ:

⁴по десѧти́нѣ а҆́гнцѹ є҆ди́номѹ, седмѝ а҆́гнцємъ:

⁵и҆ козла̀ ѿ ко́зъ є҆ди́наго грѣха̀ ра́ди, во є҆́же ѹ҆моли́ти ѡ҆ ва́съ:

⁶кромѣ̀ всесожже́нїй новом҇чїѧ и҆ жє́ртвы и҆́хъ, и҆ возлїѧ҄нїѧ и҆́хъ, и҆ всесожже́нїе всегда́шнее: и҆ жє́ртвы и҆́хъ и҆ возлїѧ҄нїѧ и҆́хъ, по ѹ҆ста́вѹ и҆́хъ, въ воню̀ благово́нїѧ гд҇ѹ.

⁷И҆ десѧ́тый де́нь мц҇а сегѡ̀ наро́читъ ст҃ъ да бѹ́детъ ва́мъ: и҆ ѡ҆ѕло́бите дѹ́шы ва́шѧ, и҆ всѧ́кагѡ дѣ́ла слѹже́бна да не сотворитѐ,

⁸и҆ принесе́те всесожже́нїе въ воню̀ благово́нїѧ гд҇ѹ, прино́сы гд҇ѹ: телца̀ є҆ди́наго ѿ говѧ́дъ, ѻ҆вна̀ є҆ди́наго, а҆́гнцєвъ є҆динолѣ́тныхъ се́дмь: непорѡ́чны да бѹ́дѹтъ ва́мъ:

⁹же́ртва и҆́хъ мѹка̀ пшени́чна вмѣ́шана въ є҆ле́и: трѝ десѧти҄ны телцѹ̀ є҆ди́номѹ и҆ двѣ̀ десѧти҄ны ѻ҆внѹ̀ є҆ди́номѹ:

¹⁰по десѧти́нѣ а҆́гнцѹ є҆ди́номѹ, на се́дмь а҆́гнцєвъ:

¹¹и҆ козла̀ є҆ди́наго ѿ ко́зъ грѣха̀ ра́ди, во є҆́же ѹ҆моли́ти ѡ҆ ва́съ: кромѣ̀ є҆́же грѣха̀ ра́ди ѡ҆чище́нїѧ, и҆ всесожже́нїе всегда́шнее: же́ртва є҆гѡ̀ и҆ возлїѧ́нїе є҆гѡ̀, по ѹ҆ста́вѹ є҆гѡ̀ въ воню̀ благово́нїѧ прино́съ гд҇ѹ.

¹²И҆ пѧтыйна́десѧть де́нь седма́гѡ мц҇а сегѡ̀ наро́читъ ст҃ъ да бѹ́детъ ва́мъ: всѧ́кагѡ дѣ́ла слѹже́бна да не сотворитѐ, и҆ пра́зднѹйте то́й пра́здникъ гд҇еви се́дмь дні́й,

¹³и҆ принеси́те всесожжє́нїѧ прино́съ въ воню̀ благово́нїѧ гд҇ѹ: въ пе́рвый де́нь телцє́въ ѿ говѧ́дъ трина́десѧть, ѻ҆вна҄ два̀, а҆́гнцєвъ є҆динолѣ́тныхъ четырена́десѧть: непорѡ́чны да бѹ́дѹтъ ва́мъ:

¹⁴жє́ртвы и҆́хъ мѹка̀ пшени́чна вмѣ́шана въ є҆ле́и: трѝ десѧти҄ны телцѹ̀ є҆ди́номѹ, тремна́десѧти телцє́мъ, и҆ двѣ̀ десѧти҄ны ѻ҆внѹ̀ є҆ди́номѹ, на два̀ ѻ҆вна҄:

¹⁵по десѧти́нѣ а҆́гнцѹ є҆ди́номѹ, на четырена́десѧть а҆́гнцєвъ:

¹⁶и҆ козла̀ є҆ди́наго ѿ ко́зъ грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.

¹⁷И҆ въ де́нь вторы́й телцє́въ двана́десѧть, ѻ҆вна҄ два̀, а҆́гнцєвъ є҆динолѣ́тныхъ четырена́десѧть непоро́чныхъ:

¹⁸же́ртва и҆́хъ и҆ возлїѧ҄нїѧ и҆́хъ телцє́мъ и҆ ѻ҆внѡ́мъ и҆ а҆́гнцємъ по числѹ̀ и҆́хъ, по ѹ҆ста́вѹ и҆́хъ:

¹⁹и҆ козла̀ є҆ди́наго ѿ ко́зъ грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.

²⁰Въ де́нь тре́тїй телцє́въ є҆динна́десѧть, ѻ҆вна҄ два̀, а҆́гнцєвъ є҆динолѣ́тныхъ четырена́десѧть непоро́чныхъ:

²¹же́ртва и҆́хъ и҆ возлїѧ҄нїѧ и҆́хъ телцє́мъ и҆ ѻ҆внѡ́мъ и҆ а҆́гнцємъ по числѹ̀ и҆́хъ, по ѹ҆ста́вѹ и҆́хъ:

²²и҆ козла̀ ѿ ко́зъ є҆ди́наго грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.

²³Въ де́нь четве́ртый телцє́въ де́сѧть, ѻ҆вна҄ два̀, а҆́гнцєвъ є҆динолѣ́тныхъ четырена́десѧть непоро́чныхъ:

²⁴жє́ртвы и҆́хъ и҆ возлїѧ҄нїѧ и҆́хъ телцє́мъ и҆ ѻ҆внѡ́мъ и҆ а҆́гнцємъ по числѹ̀ и҆́хъ, по ѹ҆ста́вѹ и҆́хъ:

²⁵и҆ козла̀ ѿ ко́зъ є҆ди́наго грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.

²⁶Въ де́нь пѧ́тый телцє́въ де́вѧть, ѻ҆вна҄ два̀, а҆́гнцєвъ є҆динолѣ́тныхъ четырена́десѧть непоро́чныхъ:

²⁷жє́ртвы и҆́хъ и҆ возлїѧ҄нїѧ и҆́хъ телцє́мъ и҆ ѻ҆внѡ́мъ и҆ а҆́гнцємъ но числѹ̀ и҆́хъ, по ѹ҆ста́вѹ и҆́хъ:

²⁸и҆ козла̀ ѿ ко́зъ є҆ди́наго грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.

²⁹Въ де́нь шесты́й телцє́въ ѻ҆́смь, ѻ҆вна҄ два̀, а҆́гнцєвъ є҆динолѣ́тныхъ четырена́десѧть непоро́чныхъ:

³⁰жє́ртвы и҆́хъ и҆ возлїѧ҄нїѧ и҆́хъ телцє́мъ и҆ ѻ҆внѡ́мъ и҆ а҆́гнцємъ по числѹ̀ и҆́хъ, по ѹ҆ста́вѹ и҆́хъ:

³¹и҆ козла̀ ѿ ко́зъ є҆ди́наго грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.

³²Въ де́нь седмы́й телцє́въ се́дмь, ѻ҆вна҄ два̀, а҆́гнцєвъ є҆динолѣ́тныхъ четырена́десѧть непоро́чныхъ:

³³жє́ртвы и҆́хъ и҆ возлїѧ҄нїѧ и҆́хъ телцє́мъ и҆ ѻ҆внѡ́мъ и҆ а҆́гнцємъ по числѹ̀ и҆́хъ, по ѹ҆ста́вѹ и҆́хъ:

³⁴и҆ козла̀ ѿ ко́зъ є҆ди́наго грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.

³⁵И҆ въ де́нь ѻ҆смы́й и҆схо́дъ бѹ́детъ ва́мъ: всѧ́кагѡ дѣ́ла слѹже́бна да не сотворитѐ въ ѻ҆́нь,

³⁶и҆ да принесе́те всесожжє́нїѧ въ воню̀ благово́нїѧ гд҇ѹ, телца̀ є҆ди́наго, ѻ҆вна̀ є҆ди́наго, а҆́гнцєвъ є҆динолѣ́тныхъ се́дмь непоро́чныхъ:

³⁷жє́ртвы и҆́хъ и҆ возлїѧ҄нїѧ и҆́хъ телцѹ̀ и҆ ѻ҆внѹ̀ и҆ а҆́гнцємъ по числѹ̀ и҆́хъ, по ѹ҆ста́вѹ и҆́хъ:

³⁸и҆ козла̀ ѿ ко́зъ є҆ди́наго грѣха̀ ра́ди: кромѣ̀ всесожже́нїѧ всегда́шнѧгѡ, жє́ртвы и҆́хъ и҆ возлїѧ҄нїѧ и҆́хъ.

³⁹Сїѧ҄ сотвори́те гд҇ѹ въ пра́здники ва́шѧ, кромѣ̀ ѡ҆бѣ́тѡвъ ва́шихъ, и҆ вѡ́льнаѧ ва҄ша, и҆ всесожжє́нїѧ ва҄ша, и҆ жє́ртвы ва́шѧ, и҆ возлїѧ҄нїѧ ва҄ша, и҆ спаси́тєлнаѧ ва҄ша.