Read Библия Церковнославянская Чи́сла 3 Bible Online

Чи́сла 3 - Библия Церковнославянская bible

Чи́сла 3

¹И҆ сїѧ҄ рождє́нїѧ а҆арѡ́на и҆ мѡѷсе́а, въ де́нь въ ѻ҆́ньже гл҃а гд҇ь мѡѷсе́ю на горѣ̀ сїна́йстѣй:

²и҆ сїѧ҄ и҆мена̀ сынѡ́въ а҆арѡ́нихъ: пе́рвенецъ нада́въ и҆ а҆вїѹ́дъ, и҆ є҆леаза́ръ и҆ ї҆ѳама́ръ:

³сїѧ҄ и҆мена̀ сынѡ́въ а҆арѡ́нихъ, жерцы̀ пома҄заныѧ, и҆̀мже соверши́шасѧ рѹ́цѣ и҆́хъ жре́ти:

⁴и҆ сконча́шасѧ нада́въ и҆ а҆вїѹ́дъ пред̾ гд҇емъ, приносѧ́щымъ и҆̀мъ ѻ҆́гнь чѹ́ждь пред̾ гд҇емъ въ пѹсты́ни сїна́йстѣй, и҆ ча҄дъ не бѣ̀ и҆̀мъ: и҆ жре́чествовахѹ є҆леаза́ръ и҆ ї҆ѳама́ръ со а҆арѡ́номъ, ѻ҆тце́мъ свои́мъ.

⁵И҆ речѐ гд҇ь къ мѡѷсе́ю, гл҃ѧ:

⁶поимѝ пле́мѧ леѵі́ино, и҆ поста́виши ѧ҆̀ пред̾ а҆арѡ́номъ жерце́мъ, и҆ да слѹ́жатъ є҆мѹ̀:

⁷и҆ да стрегѹ́тъ стражбы҄ є҆гѡ̀ и҆ стражбы҄ сынѡ́въ ї҆и҃левыхъ пред̾ ски́нїею свидѣ́нїѧ, дѣ́лати дѣла̀ ски́нїи:

⁸и҆ да хранѧ́тъ всѧ҄ сосѹ́ды ски́нїи свидѣ́нїѧ и҆ стражбы҄ сынѡ́въ ї҆и҃левыхъ по всѣ҄мъ дѣлѡ́мъ ски́нїи:

⁹и҆ да да́си леѵі́ты а҆арѡ́нѹ бра́тѹ твоемѹ̀ и҆ сынѡ́мъ є҆гѡ̀ жерцє́мъ: въ да́ръ даны̀ сі́и мнѣ̀ сѹ́ть ѿ сынѡ́въ ї҆и҃левыхъ:

¹⁰и҆ а҆арѡ́на и҆ сы́ны є҆гѡ̀ поста́виши над̾ ски́нїею свидѣ́нїѧ, и҆ да хранѧ́тъ жре́чество своѐ, и҆ всѧ҄ ѩ҆̀же ѹ҆ ѻ҆лтарѧ̀ и҆ внѹ́трь завѣ́сы: и҆ноплеме́нникъ же прикаса́ѧйсѧ ѹ҆́мретъ.

¹¹И҆ речѐ гд҇ь къ мѡѷсе́ю, гл҃ѧ:

¹²и҆ сѐ, а҆́зъ взѧ́хъ леѵі́ты ѿ среды̀ сынѡ́въ ї҆и҃левыхъ, вмѣ́стѡ всѧ́кагѡ пе́рвенца, ѿверза́ющагѡ ложесна̀ ѿ сынѡ́въ ї҆и҃левыхъ: и҆скѹплє́нїѧ и҆́хъ бѹ́дѹтъ, и҆ да бѹ́дѹтъ мнѣ̀ леѵі́ти:

¹³мнѣ́ бо всѧ́къ пе́рвенецъ: въ ѻ҆́ньже де́нь поби́хъ всѧ́каго пе́рвенца въ землѝ є҆гѵ́петстѣй, ѡ҆ст҃и́хъ себѣ̀ всѧ́каго пе́рвенца во ї҆и҃ли, ѿ человѣ́ка до скота̀ мнѣ̀ да бѹ́дѹтъ: а҆́зъ гд҇ь.

¹⁴И҆ речѐ гд҇ь къ мѡѷсе́ю въ пѹсты́ни сїна́йстѣй, гл҃ѧ:

¹⁵соглѧ́дай сынѡ́въ леѵі́иныхъ по домѡ́мъ ѻ҆те́чествъ и҆́хъ по со́нмѡмъ и҆́хъ, по рожде́нїю и҆́хъ: всѧ́къ мѹ́жескъ по́лъ ѿ мц҇а є҆ди́нагѡ и҆ вы́шше да соглѧ́даете и҆̀хъ.

¹⁶И҆ сочтѐ и҆̀хъ мѡѷсе́й и҆ а҆арѡ́нъ повелѣ́нїемъ гд҇нимъ, ѩ҆́коже повелѣ̀ и҆̀мъ гд҇ь.

¹⁷И҆ бѧ́хѹ сі́и сы́нове леѵї҄ины ѿ и҆ме́нъ и҆́хъ: гирсѡ́нъ, каа́ѳъ и҆ мера́рї.

¹⁸И҆ сїѧ҄ и҆мена̀ сынѡ́въ гирсѡ́нихъ по со́нмѡмъ и҆́хъ: ловенї̀ и҆ семе́й.

¹⁹И҆ сы́нове каа́ѳѡвы по со́нмѡмъ и҆́хъ: а҆мра́мъ и҆ ї҆ссаа́ръ, хеврѡ́нъ и҆ ѻ҆зїи́лъ.

²⁰И҆ сы́нове мера҄рїны по со́нмѡмъ и҆́хъ: моолї̀ и҆ мѹсї̀: сі́и сѹ́ть со́нми леѵі́тстїи по домѡ́мъ ѻ҆те́чествъ и҆́хъ.

²¹Ѿ гирсѡ́на со́нмъ ловені́инъ и҆ со́нмъ семеи́нь: сі́и сѹ́ть со́нми гирсѡ́нѡвы.

²²Соглѧ́данїе и҆́хъ по числѹ̀ всегѡ̀ мѹ́жеска по́лѹ, ѿ мц҇а є҆ди́нагѡ и҆ вы́шше, соглѧ́данїе и҆́хъ се́дмь ты́сѧщъ и҆ пѧ́ть сѡ́тъ.

²³И҆ сы́нове гирсѡ́нѡвы за ски́нїею да ѡ҆полча́ютсѧ къ мо́рю.

²⁴И҆ кнѧ́зь до́мѹ ѻ҆те́чества со́нма гирсѡ́нѧ є҆лїса́фъ сы́нъ даи́ль.

²⁵И҆ стражба̀ сынѡ́въ гирсѡ́новыхъ въ ски́нїи свидѣ́нїѧ, ски́нїѧ и҆ покро́въ є҆ѧ̀, и҆ покро́въ две́рїй ски́нїи свидѣ́нїѧ,

²⁶и҆ ѻ҆пѡ́ны двора̀, и҆ завѣ́са две́рїй двора̀, и҆́же є҆́сть ѹ҆ ски́нїи, и҆ прѡ́чаѧ всѣ́хъ дѣ́лъ є҆гѡ̀.

²⁷Ѿ каа́ѳа со́нмъ а҆мра́мль є҆ди́нъ и҆ со́нмъ ї҆ссаа́ровъ є҆ди́нъ, и҆ со́нмъ хеврѡ́нь є҆ди́нъ и҆ со́нмъ ѻ҆зїи́ль є҆ди́нъ: сі́и сѹ́ть со́нми каа́ѳѡвы:

²⁸по числѹ̀ всѧ́къ мѹ́жескъ по́лъ ѿ мц҇а є҆ди́нагѡ и҆ вы́шше ѻ҆́смь ты́сѧщъ и҆ ше́сть сѡ́тъ, стрегѹ́щїи стражбы҄ ст҃ы́хъ.

²⁹Со́нми сынѡ́въ каа́ѳовыхъ да ѡ҆полча́ютсѧ ѿ страны̀ ски́нїи къ ю҆́гѹ,

³⁰и҆ кнѧ́зь до́мѹ ѻ҆те́чествъ со́нмѡвъ каа́ѳовыхъ є҆лїсафа́нъ сы́нъ ѻ҆зїи́ль:

³¹и҆ стражба̀ и҆́хъ кївѡ́тъ и҆ трапе́за, и҆ свѣти́лникъ и҆ ѻ҆лтари҄, и҆ сосѹ́ды ст҃а́гѡ, въ ни́хже слѹ́жатъ, и҆ покро́въ, и҆ всѧ҄ дѣла̀ и҆́хъ.

³²И҆ кнѧ́зь над̾ кнѧ҄зи леѵі́тскими є҆леаза́ръ сы́нъ а҆арѡ́на жерца̀, поста́вленъ стрещѝ стражбы҄ ст҃ы́хъ.

³³Ѿ мера́ра же со́нмъ моолї̀ и҆ со́нмъ мѹсї̀: сі́и сѹ́ть со́нми мера҄рїны,

³⁴соглѧ́данїе и҆́хъ по числѹ̀, всѧ́къ мѹ́жескъ по́лъ ѿ мц҇а є҆ди́нагѡ и҆ вы́шше, ше́сть ты́сѧщъ и҆ двѣ́сти.

³⁵И҆ кнѧ́зь до́мѹ ѻ҆те́чествъ со́нма мера́рїна сѹрїи́лъ сы́нъ а҆вїхе́овъ: ѿ страны̀ ски́нїи да ѡ҆полча́ютсѧ къ сѣ́верѹ,

³⁶соглѧ́данїе стражбы̀ сынѡ́въ мера́рїныхъ глави҄цы ски́нїи и҆ верєѝ є҆ѧ̀, и҆ столпы̀ є҆ѧ̀ и҆ стоѧ҄ла є҆ѧ̀, и҆ всѧ҄ сосѹ́ды и҆́хъ и҆ всѧ҄ дѣла̀ и҆́хъ,

³⁷и҆ столпы̀ двора̀ ѡ҆́крестъ и҆ стоѧ҄ла и҆́хъ, и҆ колкѝ и҆́хъ и҆ вє́рви и҆́хъ.

³⁸Ѡ҆полча́ющїисѧ сопредѝ ски́нїи свидѣ́нїѧ на восто́ки мѡѷсе́й и҆ а҆арѡ́нъ и҆ сы́нове є҆гѡ̀, стрегѹ́ще стражбы҄ ст҃а́гѡ, въ стражба́хъ сынѡ́въ ї҆и҃левыхъ: и҆ и҆ноплеме́нникъ прикаса́ѧйсѧ да ѹ҆́мретъ.

³⁹Всѐ соглѧ́данїе леѵі́тѡвъ, и҆̀хже соглѧ́да мѡѷсе́й и҆ а҆арѡ́нъ повелѣ́нїемъ гд҇нимъ по со́нмѡмъ и҆́хъ, всѧ́къ мѹ́жескъ по́лъ ѿ мц҇а є҆ди́нагѡ и҆ вы́шше, два́десѧть и҆ двѣ̀ ты́сѧщы.

⁴⁰И҆ речѐ гд҇ь къ мѡѷсе́ю, гл҃ѧ: соглѧ́дай всѧ́каго пе́рвенца мѹ́жеска по́лѹ сынѡ́въ ї҆и҃левыхъ ѿ мц҇а є҆ди́нагѡ и҆ вы́шше, и҆ возмѝ число̀ и҆́хъ по и҆́мени,

⁴¹и҆ да по́ймеши мнѣ̀ леѵі́ты за всѧ҄ пе́рвенцы сынѡ́въ ї҆и҃левыхъ: а҆́зъ гд҇ь: и҆ скоты̀ леѵї҄тски вмѣ́стѡ всѣ́хъ пе́рвенцєвъ въ скотѣ́хъ сынѡ́въ ї҆и҃левыхъ.

⁴²И҆ соглѧ́да мѡѷсе́й, ѩ҆́коже заповѣ́да є҆мѹ̀ гд҇ь, всѧ́каго пе́рвенца въ сынѣ́хъ ї҆и҃левыхъ.

⁴³И҆ бы́ша всѝ пе́рвенцы мѹ́жескагѡ по́лѹ, по числѹ̀ и҆ме́нъ ѿ мц҇а є҆ди́нагѡ и҆ вы́шше, ѿ соглѧ́данїѧ и҆́хъ два́десѧть двѣ̀ ты́сѧщы двѣ́сти и҆ се́дмьдесѧтъ трѝ.

⁴⁴И҆ речѐ гд҇ь къ мѡѷсе́ю, гл҃ѧ:

⁴⁵поимѝ леѵі́ты вмѣ́стѡ всѣ́хъ пе́рвенцєвъ сынѡ́въ ї҆и҃левыхъ, и҆ скоты̀ леѵї҄тски вмѣ́стѡ скотѡ́въ и҆́хъ, и҆ бѹ́дѹтъ мнѣ̀ леѵі́ты: а҆́зъ гд҇ь:

⁴⁶и҆ и҆скѹ́пъ двѹ̀ сѡ́тъ седми́десѧти тре́хъ, и҆̀же преизбыва́ютъ све́рхъ леѵі́тѡвъ ѿ пе́рвенцѡвъ сынѡ́въ ї҆и҃левыхъ:

⁴⁷и҆ да во́змеши по пѧтѝ сї҄кль на главѹ̀, по сі́клю ст҃о́мѹ во́змеши два́десѧть пѣ́нѧзей сі́кль,

⁴⁸и҆ да́си сребро̀ а҆арѡ́нѹ и҆ сынѡ́мъ є҆гѡ̀ и҆скѹ́пъ ѿ преизбыва́ющихъ въ ни́хъ.

⁴⁹И҆ взѧ̀ мѡѷсе́й сребро̀ и҆скѹ́пное ѿ преизбыва́ющихъ въ ни́хъ на и҆скѹ́пъ леѵі́тѡмъ:

⁵⁰ѿ пе́рвенєцъ сынѡ́въ ї҆и҃левыхъ взѧ̀ сребра̀ ты́сѧщѹ трѝ ста҄ шестьдесѧ́тъ пѧ́ть сі́клєвъ, по сі́клю ст҃о́мѹ.

⁵¹И҆ дадѐ мѡѷсе́й ѡ҆́кѹпъ ѿ преизбы́вшихъ а҆арѡ́нѹ и҆ сынѡ́мъ є҆гѡ̀, повелѣ́нїемъ гд҇нимъ, ѩ҆́коже заповѣ́да гд҇ь мѡѷсе́ю.