Read Библия Церковнославянская Чи́сла 30 Bible Online

Чи́сла 30 - Библия Церковнославянская bible

Чи́сла 30

¹И҆ глаго́ла мѡѷсе́й сынѡ́мъ ї҆и҃лєвымъ по всѣ҄мъ, є҆ли҄ка заповѣ́да гд҇ь мѡѷсе́ю:

²и҆ глаго́ла мѡѷсе́й кнѧзє́мъ племе́нъ сынѡ́въ ї҆и҃левыхъ, глаго́лѧ: сїѐ сло́во, є҆́же повелѣ̀ гд҇ь.

³Человѣ́къ человѣ́къ, и҆́же а҆́ще ѡ҆бѣща́етъ ѡ҆бѣ́тъ гд҇ѹ, и҆лѝ заклене́тсѧ клѧ́твою, и҆лѝ ѡ҆предѣли́тъ предѣ́ломъ ѡ҆ дѹшѝ свое́й, не ѡ҆скверна́витъ словесѐ своегѡ̀: всѧ҄, є҆ли҄ка и҆зы́дѹтъ и҆з̾ ѹ҆́стъ є҆гѡ̀, да сотвори́тъ.

⁴А҆́ще же ѡ҆бѣща́етъ жена̀ ѡ҆бѣ́тъ гд҇ѹ, и҆лѝ ѡ҆предѣли́тъ ѡ҆предѣле́нїе въ домѹ̀ ѻ҆тца̀ своегѡ̀ въ ю҆́ности свое́й,

⁵и҆ ѹ҆слы́шитъ ѻ҆те́цъ є҆ѧ̀ ѡ҆бѣ́ты є҆ѧ̀ и҆ ѡ҆предѣлє́нїѧ є҆ѧ̀, ѩ҆̀же ѡ҆предѣлѝ на дѹ́шѹ свою̀, и҆ премолчи́тъ ѻ҆те́цъ є҆ѧ̀, и҆ да состоѧ́тсѧ всѧ҄ ѡ҆бѣ́ты є҆ѧ̀, и҆ всѧ҄ ѡ҆предѣлє́нїѧ, ѩ҆̀же ѡ҆предѣлѝ на дѹ́шѹ свою̀, да пребѹ́дѹтъ є҆́й.

⁶А҆́ще же возбране́нїемъ возбрани́тъ ѻ҆те́цъ є҆ѧ̀, въ ѻ҆́ньже де́нь ѹ҆слы́шитъ всѧ҄ ѡ҆бѣ́ты є҆ѧ̀ и҆ ѡ҆предѣлє́нїѧ, ѩ҆̀же ѡ҆предѣлѝ на дѹ́шѹ свою̀, не состоѧ́тсѧ: и҆ гд҇ь ѡ҆чи́ститъ ю҆̀, ѩ҆́кѡ возбранѝ ѻ҆те́цъ є҆ѧ̀.

⁷А҆́ще же посѧ́гла за мѹ́жа, и҆ ѡ҆бѣ́ты є҆ѧ̀ на не́й, по ѡ҆предѣле́нїи ѹ҆́стъ є҆ѧ̀, є҆ли҄ка ѡ҆предѣлѝ на дѹ́шѹ свою̀,

⁸и҆ ѹ҆слы́шитъ мѹ́жъ є҆ѧ̀, и҆ премолчи́тъ є҆́й, въ ѻ҆́ньже де́нь ѹ҆слы́шитъ, и҆ та́кѡ состоѧ́тсѧ всѧ҄ ѡ҆бѣ́ты є҆ѧ̀, и҆ ѡ҆предѣлє́нїѧ є҆ѧ̀, ѩ҆̀же ѡ҆предѣлѝ на дѹ́шѹ свою̀, да состоѧ́тсѧ.

⁹А҆́ще же возбране́нїемъ возбрани́тъ мѹ́жъ є҆ѧ̀, въ ѻ҆́ньже де́нь ѹ҆слы́шитъ всѧ҄ ѡ҆бѣ́ты є҆ѧ̀ и҆ ѡ҆предѣлє́нїѧ є҆ѧ̀, ѩ҆̀же ѡ҆предѣлѝ на дѹ́шѹ свою̀, да не пребѹ́дѹтъ, ѩ҆́кѡ мѹ́жъ возбранѝ є҆́й: и҆ гд҇ь ѡ҆чи́ститъ ю҆̀.

¹⁰И҆ ѡ҆бѣ́тъ вдови́цы и҆ пѹщени́цы, є҆ли҄ка а҆́ще ѡ҆бѣща́ютъ на дѹ́шѹ свою̀, да пребѹ́дѹтъ и҆̀мъ.

¹¹А҆́ще же въ домѹ̀ мѹ́жа є҆ѧ̀ ѡ҆бѣ́тъ є҆ѧ̀ и҆лѝ ѡ҆предѣле́нїе, є҆́же на дѹ́шѹ є҆ѧ̀ съ клѧ́твою,

¹²и҆ ѹ҆слы́шитъ мѹ́жъ є҆ѧ̀, и҆ премолчи́тъ є҆́й, и҆ не возбрани́тъ є҆́й, и҆ состоѧ́тсѧ всѧ҄ ѡ҆бѣ́ты є҆ѧ̀, и҆ всѧ҄ ѡ҆предѣлє́нїѧ є҆ѧ̀, ѩ҆̀же ѡ҆предѣлѝ на дѹ́шѹ свою̀ да состоѧ́тсѧ на ню̀.

¹³А҆́ще же ѿлѹча́ѧ ѿлѹчи́тъ мѹ́жъ є҆ѧ̀, въ ѻ҆́ньже де́нь ѹ҆слы́шитъ, всѧ҄ є҆ли҄ка и҆зыдо́ша и҆з̾ ѹ҆́стъ є҆ѧ̀ по ѡ҆бѣ́тѡмъ є҆ѧ̀ и҆ по ѡ҆предѣле́нїємъ є҆ѧ̀ ѩ҆̀же на дѹ́шѹ є҆ѧ̀, не пребѹ́дѹтъ є҆́й: мѹ́жъ бо є҆ѧ̀ ѿлѹчи́лъ є҆́сть, и҆ гд҇ь ѡ҆чи́ститъ ю҆̀.

¹⁴Всѧ́къ ѡ҆бѣ́тъ и҆ всѧ́ка клѧ́тва соѹ́за во є҆́же ѡ҆ѕло́бити дѹ́шѹ, мѹ́жъ є҆ѧ̀ поста́витъ є҆́й, и҆ мѹ́жъ є҆ѧ̀ ѿи́метъ.

¹⁵А҆́ще же молча̀ премолчи́тъ є҆́й де́нь ѿ днѐ, и҆ поста́витъ є҆́й всѧ҄ ѡ҆бѣ́ты є҆ѧ̀, и҆ ѡ҆предѣлє́нїѧ ѩ҆̀же на не́й, поста́витъ є҆́й, ѩ҆́кѡ ѹ҆молча̀ є҆́й въ де́нь, въ ѻ҆́ньже ѹ҆слы́ша.

¹⁶А҆́ще же ѿлѹча́ѧ ѿлѹчи́тъ мѹ́жъ є҆ѧ̀ по днѝ, въ ѻ҆́ньже ѹ҆слы́ша, и҆ прїи́метъ грѣ́хъ сво́й.

¹⁷Сїѧ҄ ѡ҆правда҄нїѧ, є҆ли҄ка заповѣ́да гд҇ь мѡѷсе́ю, междѹ̀ мѹ́жемъ и҆ междѹ̀ жено́ю є҆гѡ̀, и҆ междѹ̀ ѻ҆тце́мъ и҆ дще́рїю въ ю҆́ности є҆ѧ̀, въ домѹ̀ ѻ҆́тчи.