Read Библия Церковнославянская Чи́сла 31 Bible Online

Чи́сла 31 - Библия Церковнославянская bible

Чи́сла 31

²ѿмстѝ ме́сть сынѡ́въ ї҆и҃левыхъ ѿ мадїані́тѡвъ, и҆ послѣдѝ приложи́шисѧ къ лю́демъ свои҄мъ.

³И҆ речѐ мѡѷсе́й къ лю́демъ, глаго́лѧ: воѡрѹжи́те ѿ ва́съ мѹ́жы и҆ ѡ҆полчи́тесѧ пред̾ гд҇емъ на мадїа́ма, ѿда́ти ѿмще́нїе ѿ гд҇а мадїа́мѹ:

⁴ты́сѧщѹ ѿ пле́мене и҆ ты́сѧщѹ ѿ пле́мене, ѿ всѣ́хъ племе́нъ сынѡ́въ ї҆и҃левыхъ, посли́те ѡ҆полчи́тисѧ.

⁵И҆ сочто́ша ѿ ты́сѧщъ ї҆и҃левыхъ, по ты́сѧщи ѿ пле́мене, двана́десѧть ты́сѧщъ воѡрѹже́ныхъ на бра́нь.

⁶И҆ посла̀ ѧ҆̀ мѡѷсе́й ты́сѧщѹ ѿ пле́мене и҆ ты́сѧщѹ ѿ пле́мене съ си́лою и҆́хъ, и҆ фїнее́са сы́на є҆леаза́рова сы́на а҆арѡ́на жерца̀: и҆ сосѹ́ды ст҃ы҄ѧ, и҆ трѹбы҄ зна́мєнныѧ въ рѹка́хъ и҆́хъ.

⁷И҆ ѡ҆полчи́шасѧ на мадїа́ма, ѩ҆́коже повелѣ̀ гд҇ь мѡѷсе́ю, и҆ и҆зби́ша ве́сь мѹ́жескъ по́лъ:

⁸и҆ царе́й мадїа́мскихъ ѹ҆би́ша вкѹ́пѣ съ ѩ҆́звеными и҆́хъ, и҆ є҆ѵі́на и҆ роко́ма, и҆ сѹ́ра и҆ ѹ҆́ра и҆ рово́ка, пѧ́ть царе́й мадїа́млихъ: и҆ валаа́ма сы́на веѡ́рова ѹ҆би́ша мече́мъ съ ѩ҆́звеными и҆́хъ:

⁹и҆ плѣни́ша же́нъ мадїа́млихъ и҆ и҆мѣ҄нїѧ и҆́хъ, и҆ скоты̀ и҆́хъ и҆ всѧ҄ притѧжа҄нїѧ и҆́хъ, и҆ си́лѹ и҆́хъ плѣни́ша:

¹⁰и҆ всѧ҄ гра́ды и҆́хъ, ѩ҆̀же во ѡ҆бита́нїихъ и҆́хъ, и҆ вє́си и҆́хъ пожго́ша ѻ҆гне́мъ,

¹¹и҆ взѧ́ша ве́сь плѣ́нъ и҆́хъ и҆ всѧ҄ кѡры́сти и҆́хъ, ѿ человѣ́ка до скота̀:

¹²и҆ приведо́ша къ мѡѷсе́ю и҆ ко є҆леаза́рѹ жерцѹ̀ и҆ ко всѣ҄мъ сынѡ́мъ ї҆и҃лєвымъ плѣ́нъ и҆ кѡры́сти и҆ и҆мѣ́нїе въ по́лкъ, во а҆равѡ́ѳъ мѡа́вль, и҆́же є҆́сть ѹ҆ ї҆ѻрда́на при ї҆ерїхѡ́нѣ.

¹³И҆ и҆зы́де мѡѷсе́й и҆ є҆леаза́ръ жре́цъ и҆ всѝ кнѧ҄зи со́нма въ срѣ́тенїе и҆̀мъ внѣ̀ полка̀.

¹⁴И҆ разгнѣ́васѧ мѡѷсе́й на надзира́телей си́лы, тысѧщенача́лникѡвъ и҆ стонача́лникѡвъ и҆дѹ́щихъ ѿ ѡ҆полче́нїѧ бра́ни.

¹⁵И҆ речѐ и҆̀мъ мѡѷсе́й: вскѹ́ю жи́въ ѡ҆ста́висте ве́сь же́нскъ по́лъ;

¹⁶ты҄ѧ бо бы́ша сынѡ́мъ ї҆и҃лєвымъ, по словесѝ валаа́млю, є҆́же ѿстѹпи́ти и҆ презрѣ́ти сло́во гд҇не фогѡ́ра ра́ди, и҆ бы́сть ѩ҆́зва въ со́нмѣ гд҇ни:

¹⁷и҆ нн҃ѣ и҆збі́йте всѧ́къ мѹ́жескъ по́лъ во всѧ́комъ во́зрастѣ, и҆ всѧ́кѹ женѹ̀, ѩ҆́же позна̀ ло́же мѹ́жеско, и҆збі́йте:

¹⁸и҆ всѧ́къ во́зрастъ же́нскъ, ѩ҆̀же не позна́ша ло́жа мѹ́жеска, живы́хъ ѡ҆ста́вите ѧ҆̀:

¹⁹и҆ вы̀ ста́ните внѣ̀ полка̀ се́дмь дні́й: всѧ́къ ѹ҆би́вый дѹ́шѹ и҆ прикоснѹ́выйсѧ ѹ҆бїе́номѹ да ѡ҆чи́ститсѧ въ тре́тїй де́нь и҆ въ де́нь седмы́й, вы̀ и҆ плѣ́нъ ва́шъ:

²⁰и҆ всѧ́кѹ ѻ҆де́ждѹ, и҆ всѧ́къ сосѹ́дъ ко́жанъ, и҆ всѧ́ко содѣ́ланое ѿ козли́чины, и҆ всѧ́къ сосѹ́дъ древѧ́нъ ѡ҆чи́стите.

²¹И҆ речѐ є҆леаза́ръ жре́цъ къ мѹжє́мъ си́лы приходѧ́щымъ ѿ ѡ҆полче́нїѧ ра́тнагѡ: сїѐ ѡ҆правда́нїе зако́на, є҆́же заповѣ́да гд҇ь мѡѷсе́ю:

²²кромѣ̀ сребра̀ и҆ зла́та, и҆ мѣ́ди и҆ желѣ́за, и҆ кассїте́ра и҆ ѻ҆́лова,

²³всѧ́ка ве́щь, ѩ҆́же про́йдетъ сквозѣ̀ ѻ҆́гнь, и҆ (ѻ҆гне́мъ) ѡ҆чи́ститсѧ, но и҆ водо́ю ѡ҆чище́нїѧ ѡ҆чи́ститсѧ: и҆ всѧ҄, є҆ли҄ка а҆́ще не про́йдѹтъ сквозѣ̀ ѻ҆́гнь, да про́йдѹтъ сквозѣ̀ во́дѹ:

²⁴и҆ и҆спери́те ри҄зы ва́шѧ въ де́нь седмы́й, и҆ ѡ҆чи́ститесѧ: и҆ по си́хъ вни́дете въ по́лкъ.

²⁵И҆ речѐ гд҇ь къ мѡѷсе́ю, гл҃ѧ:

²⁶возми́те сочисле́нїе коры́стей плѣ́на ѿ человѣ́ка до скота̀, ты̀ и҆ є҆леаза́ръ жре́цъ и҆ кнѧ҄зи ѻ҆те́чествъ со́нма,

²⁷и҆ раздѣли́те кѡры́сти междѹ̀ вѡ́ины ходи́вшими на бра́нь и҆ междѹ̀ всѣ́мъ со́нмомъ,

²⁸и҆ ѿлѹчи́те да́нь гд҇ѹ ѿ люді́й вое́нныхъ ходи́вшихъ на бра́нь, є҆ди́нѹ дѹ́шѹ ѿ пѧтѝ сѡ́тъ, ѿ человѣ҄къ и҆ ѿ скотѡ́въ, и҆ ѿ волѡ́въ и҆ ѿ ѻ҆ве́цъ и҆ ѿ ѻ҆слѧ́тъ,

²⁹и҆ ѿ полови́ны и҆́хъ да во́змете, и҆ да́си є҆леаза́рѹ жерцѹ̀ нача́тки гд҇ни:

³⁰и҆ ѿ полови́ны сынѡ́въ ї҆и҃левыхъ да во́змеши є҆ди́но ѿ пѧти́десѧти человѣ҄къ, и҆ ѿ волѡ́въ и҆ ѿ ѻ҆ве́цъ, и҆ ѿ ѻ҆слѧ́тъ и҆ ѿ всѣ́хъ скотѡ́въ, и҆ да́си ѧ҆̀ леѵі́тѡмъ, и҆̀же стрегѹ́тъ стражбы҄ въ ски́нїи гд҇ни.

³¹И҆ сотворѝ мѡѷсе́й и҆ є҆леаза́ръ жре́цъ, ѩ҆́коже повелѣ̀ гд҇ь мѡѷсе́ю.

³²И҆ бы́сть мно́жество плѣ́на, є҆го́же плѣни́ша мѹ҄жи во́инстїи, ѿ ѻ҆ве́цъ ше́сть сѡ́тъ се́дмьдесѧтъ пѧ́ть ты́сѧщъ,

³³и҆ волѡ́въ се́дмьдесѧтъ двѣ̀ ты́сѧщы,

³⁴и҆ ѻ҆слѡ́въ шестьдесѧ́тъ є҆ди́на ты́сѧща,

³⁵и҆ дѹ́шъ человѣ́ческихъ ѿ же́нска по́лѹ, ѩ҆̀же не позна́ша ло́жа мѹ́жеска, всѣ́хъ дѹ́шъ три́десѧть двѣ̀ ты́сѧщы:

³⁶и҆ бы́сть полови́на ча́сть ходи́вшихъ на бра́нь, ѿ числа̀ ѻ҆ве́цъ три́ста три́десѧть се́дмь ты́сѧщъ и҆ пѧ́ть сѡ́тъ:

³⁷и҆ бы́сть да́нь гд҇ѹ ѿ ѻ҆ве́цъ ше́сть сѡ́тъ се́дмьдесѧтъ пѧ́ть:

³⁸и҆ волѡ́въ три́десѧть ше́сть ты́сѧщъ, и҆ да́нь гд҇ѹ се́дмьдесѧтъ и҆ два̀:

³⁹и҆ ѻ҆слѡ́въ три́десѧть ты́сѧщъ пѧ́ть сѡ́тъ, и҆ да́нь гд҇ѹ шестьдесѧ́тъ є҆ди́нъ:

⁴⁰и҆ дѹ́шъ человѣ́ческихъ шестьна́десѧть ты́сѧщъ, и҆ да́нь ѿ си́хъ гд҇ѹ три́десѧть двѣ̀ дѹши҄.

⁴¹И҆ дадѐ мѡѷсе́й да́нь гд҇ѹ, ѹ҆ча́стїе бж҃їе є҆леаза́рѹ жерцѹ̀, ѩ҆́коже повелѣ̀ гд҇ь мѡѷсе́ю.

⁴²Ѿ полови́ны сынѡ́въ ї҆и҃левыхъ, и҆̀хже раздѣлѝ мѡѷсе́й ѿ мѹже́й вое́нныхъ:

⁴³и҆ бы́сть полови́на ѿ со́нма, ѿ ѻ҆ве́цъ три́ста и҆ три́десѧть се́дмь ты́сѧщъ и҆ пѧ́ть сѡ́тъ:

⁴⁴и҆ волѡ́въ три́десѧть ше́сть ты́сѧщъ:

⁴⁵ѻ҆слѡ́въ три́десѧть ты́сѧщъ и҆ пѧ́ть сѡ́тъ:

⁴⁶и҆ человѣ́чихъ дѹ́шъ шестьна́десѧть ты́сѧщъ:

⁴⁷и҆ взѧ̀ мѡѷсе́й ѿ полови́ны сынѡ́въ ї҆и҃левыхъ, є҆ди́но ѿ пѧти́десѧти, ѿ человѣ҄къ и҆ ѿ скотѡ́въ, и҆ дадѐ ѧ҆̀ леѵі́тѡмъ стрегѹ́щымъ стражбы҄ ски́нїи гд҇ни, ѩ҆́коже повелѣ̀ гд҇ь мѡѷсе́ю.

⁴⁸И҆ прїидо́ша къ мѡѷсе́ю всѝ поста́вленнїи над̾ ты́сѧщами си́лы, тысѧщенача́лники и҆ стонача́лники,

⁴⁹и҆ реко́ша къ мѡѷсе́ю: ѻ҆́троцы твоѝ взѧ́ша сочте́нїе ѿ мѹже́й вои́нскихъ, и҆̀же сѹ́ть ѹ҆ на́съ, и҆ никто́же поги́бе ѿ ни́хъ:

⁵⁰и҆ принесо́хомъ да́ръ гд҇ѹ, мѹ́жъ є҆́же ѡ҆брѣ́те, сосѹ́дъ зла́тъ и҆ ѡ҆брѹ́чїе, и҆ гри́внѹ и҆ пе́рстень, и҆ ѹ҆серѧ҄зи и҆ че́пь златѹ́ю, ѹ҆моли́ти ѡ҆ на́съ пред̾ гд҇емъ.

⁵¹И҆ взѧ̀ мѡѷсе́й и҆ є҆леаза́ръ жре́цъ зла́то ѿ ни́хъ, всѧ́къ сосѹ́дъ содѣ́ланъ.

⁵²И҆ бы́сть всегѡ̀ зла́та ѹ҆ча́стїе, є҆́же ѿлѹчи́сѧ гд҇ѹ, шестьна́десѧть ты́сѧщъ и҆ се́дмь сѡ́тъ и҆ пѧтьдесѧ́тъ сї҄кль ѿ тысѧщенача́лникѡвъ и҆ ѿ стонача́лникѡвъ.

⁵³И҆ мѹ҄жи во́инстїи плѣни́ша кі́йждо себѣ̀.

⁵⁴И҆ взѧ́ша мѡѷсе́й и҆ є҆леаза́ръ жре́цъ зла́то ѿ тысѧщенача́лникѡвъ и҆ ѿ стонача́лникѡвъ и҆ внесо́ша є҆̀ въ ски́нїю свидѣ́нїѧ, въ па́мѧть сынѡ́въ ї҆и҃левыхъ пред̾ гд҇емъ.