Read Библия Церковнославянская Чи́сла 32 Bible Online

Чи́сла 32 - Библия Церковнославянская bible

Чи́сла 32

¹И҆ скота̀ мно́жество бѧ́ше сынѡ́мъ рѹви҄млимъ и҆ сынѡ́мъ га́дѡвымъ, мно́го ѕѣлѡ̀. И҆ ви́дѣша странѹ̀ ї҆ази́ровѹ и҆ странѹ̀ галаа́довѹ, и҆ бѧ́ше мѣ́сто, мѣ́сто ско́тно.

²И҆ прише́дше сы́нове рѹви҄мли и҆ сы́нове га́дѡвы реко́ша къ мѡѷсе́ю и҆ ко є҆леаза́рѹ жерцѹ̀ и҆ ко кнѧзє́мъ со́нма, глаго́люще:

³а҆тарѡ́ѳъ и҆ девѡ́нъ, и҆ ї҆ази́ръ и҆ намра̀, и҆ є҆севѡ́нъ и҆ є҆леа́ли, и҆ севама̀ и҆ нава́ѵъ и҆ веа́нъ,

⁴землѧ̀, ю҆́же предадѐ гд҇ь пред̾ сы҄ны ї҆и҃левыми, землѧ̀ скотопита́телна є҆́сть, рабѡ́мъ же твои҄мъ ско́тъ є҆́сть.

⁵И҆ рѣ́ша: а҆́ще ѡ҆брѣто́хомъ благода́ть пред̾ тобо́ю, да да́стсѧ на́мъ землѧ̀ сїѧ̀ рабѡ́мъ твои҄мъ во ѡ҆держа́нїе, и҆ не преводѝ на́съ чрез̾ ї҆ѻрда́нъ.

⁶И҆ речѐ мѡѷсе́й сынѡ́мъ га́дѡвымъ и҆ сынѡ́мъ рѹви҄млимъ: бра́тїѧ ва́шѧ по́йдѹтъ на бра́нь, и҆ вы́ ли сѧ́дете тѹ̀;

⁷и҆ вскѹ́ю развраща́ете се́рдце сынѡ́въ ї҆и҃левыхъ, не прейтѝ на зе́млю, ю҆́же дае́тъ гд҇ь и҆̀мъ;

⁸не та́кѡ ли сотвори́ша ѻ҆тцы̀ ва́ши, є҆гда̀ посла́хъ ѧ҆̀ ѿ ка́дисъ-варнѝ соглѧ́дати зе́млю;

⁹и҆ взыдо́ша до [де́бри грезно́вныѧ], и҆ соглѧ́даша зе́млю, и҆ ѿврати́ша се́рдце сынѡ́въ ї҆и҃левыхъ, ѩ҆́кѡ да не вни́дѹтъ въ зе́млю, ю҆́же дадѐ и҆̀мъ гд҇ь;

¹⁰И҆ разгнѣ́васѧ ѩ҆́ростїю гд҇ь въ де́нь ѡ҆́нъ и҆ клѧ́тсѧ, гл҃ѧ:

¹¹а҆́ще ѹ҆́зрѧтъ человѣ́цы сі́и и҆зше́дшїи и҆з̾ є҆гѵ́пта, ѿ два́десѧти лѣ́тъ и҆ вы́шше, вѣ́дѹщїи добро̀ и҆ ѕло̀, зе́млю, є҆́юже клѧ́хсѧ а҆враа́мѹ и҆ ї҆саа́кѹ и҆ ї҆а́кѡвѹ: не послѣ́доваша бо в̾слѣ́дъ менє̀,

¹²то́чїю хале́въ сы́нъ ї҆ефонні́инъ ѿлѹче́нный и҆ ї҆исѹ́съ сы́нъ наѵи́нъ, ѩ҆́кѡ послѣ́доваша в̾слѣ́дъ гд҇а.

¹³И҆ разгнѣ́васѧ ѩ҆́ростїю гд҇ь на ї҆и҃лѧ, и҆ томѝ ѧ҆̀ въ пѹсты́ни четы́редесѧть лѣ́тъ, до́ндеже потреби́сѧ ве́сь ро́дъ творѧ́щїй ѕла҄ѧ пред̾ гд҇емъ.

¹⁴Сѐ, воста́сте вмѣ́стѡ ѻ҆тє́цъ ва́шихъ, сокрѹше́нїе человѣ҄къ грѣ́шникѡвъ, приложи́ти є҆щѐ къ ѩ҆́рости гнѣ́ва гд҇нѧ на ї҆и҃лѧ:

¹⁵ѩ҆́кѡ ѿвратите́сѧ ѿ негѡ̀, приложи́ти є҆щѐ ѡ҆ста́вити є҆го̀ въ пѹсты́ни, и҆ возбеззако́ннѹете на ве́сь со́нмъ се́й.

¹⁶И҆ прїидо́ша къ немѹ̀ и҆ глаго́лаша: ѡ҆гра҄ды ѻ҆вца́мъ да согради́мъ здѣ̀ скотѡ́мъ свои҄мъ, и҆ гра́ды и҆мѣ́нїємъ на́шымъ:

¹⁷и҆ мы̀ воѡрѹже́ни по́йдемъ на стражбѹ̀ пе́рвїи сынѡ́мъ ї҆и҃лєвымъ, до́ндеже введе́мъ ѧ҆̀ въ мѣ́сто и҆́хъ: и҆ да вселѧ́тсѧ и҆мѣ҄нїѧ на҄ша во градѣ́хъ ѹ҆твержде́ныхъ ра́ди живѹ́щихъ на землѝ:

¹⁸не возврати́мсѧ въ до́мы на́шѧ, до́ндеже раздѣлѧ́тсѧ сы́нове ї҆и҃лтестїи, кі́йждо въ наслѣ́дїе своѐ:

¹⁹и҆ ктомѹ̀ не наслѣ́димъ въ ни́хъ ѡ҆б̾ ѻ҆нѹ̀ странѹ̀ ї҆ѻрда́на и҆ да́лѣе, ѩ҆́кѡ прїѧ́хомъ жрє́бїѧ на́шѧ сїю̀ странѹ̀ ї҆ѻрда́на на восто́ки.

²⁰И҆ речѐ къ ни҄мъ мѡѷсе́й: а҆́ще сотворитѐ по словесѝ семѹ̀, а҆́ще воѡрѹжите́сѧ пред̾ гд҇емъ на бра́нь,

²¹и҆ пре́йдетъ всѧ́къ ѻ҆рѹ́жникъ ва́шъ ї҆ѻрда́нъ пред̾ гд҇емъ на бра́нь, до́ндеже потреби́тсѧ вра́гъ є҆гѡ̀ ѿ лица̀ є҆гѡ̀,

²²и҆ ѡ҆блада́на бѹ́детъ землѧ̀ пред̾ гд҇емъ, и҆ посе́мъ возврати́тесѧ, и҆ бѹ́дете безви́нни пред̾ гд҇емъ и҆ ѿ ї҆и҃лѧ: и҆ бѹ́детъ землѧ̀ сїѧ̀ ва́мъ во ѡ҆держа́нїе пред̾ гд҇емъ:

²³а҆́ще же не сотворитѐ та́кѡ, согрѣшитѐ пред̾ гд҇емъ, и҆ ѹ҆вѣ́сте грѣ́хъ ва́шъ, є҆гда̀ ва́съ пости́гнѹтъ ѕла҄ѧ:

²⁴и҆ соградитѐ вы̀ себѣ̀ гра́ды и҆мѣ́нїю ва́шемѹ и҆ ѡ҆гра҄ды скотѡ́мъ ва́шымъ: и҆ и҆сходѧ́щее и҆з̾ ѹ҆́стъ ва́шихъ сотворитѐ.

²⁵И҆ реко́ша сы́нове рѹви҄мли и҆ сы́нове га́дѡвы къ мѡѷсе́ю, глаго́люще: рабѝ твоѝ сотворѧ́тъ, ѩ҆́коже гд҇ь на́шъ повелѣ́лъ є҆́сть:

²⁶и҆мѣ́нїе на́ше, и҆ жєны̀ на́ши, и҆ ве́сь ско́тъ на́шъ да бѹ́дѹтъ во градѣ́хъ галаа́довыхъ:

²⁷раби́ же твоѝ пре́йдѹтъ всѝ воѡрѹже́ни и҆ ѹ҆гото́вани пред̾ гд҇емъ на бра́нь, ѩ҆́коже гл҃етъ гд҇ь.

²⁸И҆ приста́ви и҆̀мъ мѡѷсе́й є҆леаза́ра жерца̀ и҆ ї҆исѹ́са сы́на наѵи́на, и҆ кнѧ҄зи ѻ҆те́чествъ племе́нъ сынѡ́въ ї҆и҃левыхъ.

²⁹И҆ речѐ къ ни҄мъ мѡѷсе́й: а҆́ще пре́йдѹтъ сы́нове рѹви҄мли и҆ сы́нове га́дѡвы съ ва́ми чрез̾ ї҆ѻрда́нъ, всѧ́къ воѡрѹже́нъ на бра́нь пред̾ гд҇емъ, и҆ ѡ҆блада́ете земле́ю пред̾ собо́ю, и҆ дади́те и҆̀мъ зе́млю галаа́довѹ во ѡ҆держа́нїе.

³⁰А҆́ще ли не пре́йдѹтъ воѡрѹже́ни съ ва́ми на бра́нь пред̾ гд҇емъ, то̀ предпосли́те и҆мѣ́нїе и҆́хъ и҆ жєны̀ и҆́хъ и҆ скоты̀ и҆́хъ пре́жде ва́съ на зе́млю ханаа́ню, и҆ да наслѣ́дѧтъ кѹ́пнѡ съ ва́ми въ землѝ ханаа́ни.

³¹И҆ ѿвѣща́ша сы́нове рѹви҄мли и҆ сы́нове га́дѡвы, глаго́люще: є҆ли҄ка гл҃етъ гд҇ь рабѡ́мъ свои҄мъ, та́кѡ сотвори́мъ мы̀:

³²пре́йдемъ воѡрѹже́ни пред̾ гд҇емъ въ зе́млю ханаа́ню, и҆ дади́те на́мъ во ѡ҆держа́нїе странѹ̀ сїю̀ ї҆ѻрда́на.

³³И҆ дадѐ и҆̀мъ мѡѷсе́й сынѡ́мъ га́дѡвымъ и҆ сынѡ́мъ рѹви҄млимъ и҆ полѹпле́мени манассі́инѹ сынѡ́въ ї҆ѡ́сифовыхъ ца́рство сиѡ́на царѧ̀ а҆морре́йска и҆ ца́рство ѡ҆́га царѧ̀ васа́нска, зе́млю и҆ гра́ды съ предѣ҄лы є҆ѧ̀, гра́ды ѡ҆крє́стныѧ землѝ.

³⁴И҆ согради́ша сы́нове га́дѡвы девѡ́нъ и҆ а҆тарѡ́ѳъ и҆ а҆рои́ръ,

³⁵и҆ сѡфа́нъ и҆ ї҆ази́ръ, и҆ вознесо́ша и҆̀хъ,

³⁶и҆ намра́мъ и҆ веѳара́нъ гра́ды твє́рды, и҆ ѡ҆гра҄ды ѻ҆вца́мъ.

³⁷И҆ сы́нове рѹви҄мли согради́ша є҆севѡ́нъ и҆ є҆леа́ли и҆ карїаѳаі́мъ,

³⁸и҆ навѡ́нъ и҆ веельмеѡ́нъ ѡ҆граждє́ны, и҆ севама̀: и҆ прозва́ша по и҆менѡ́мъ свои҄мъ и҆мена̀ градѡ́мъ, ѩ҆̀же согради́ша.

³⁹И҆ и҆́де ѹ҆́ръ сы́нъ махі́ровъ, внѹ́къ манассі́евъ, въ галаа́дъ, и҆ взѧ̀ є҆го̀, и҆ погѹбѝ а҆морре́а живѹ́щаго въ не́мъ:

⁴⁰и҆ дадѐ мѡѷсе́й галаа́дъ махі́рѹ сы́нѹ манассі́инѹ, и҆ всели́сѧ тѹ̀.

⁴¹И҆ ї҆аі́ръ сы́нъ манассі́евъ и҆́де и҆ взѧ̀ се́ла и҆́хъ, и҆ прозва́ша ѧ҆̀ [се́ла ї҆аі́рѡва].

⁴²И҆ нава́ѵъ и҆́де и҆ взѧ̀ каа́ѳа и҆ се́ла є҆гѡ̀, и҆ и҆менова̀ ѧ҆̀ [навѡ́ѳъ] ѿ и҆́мене своегѡ̀.