Read Библия Церковнославянская Чи́сла 33 Bible Online

Чи́сла 33 - Библия Церковнославянская bible

Чи́сла 33

¹И҆ сі́и ста́нове сынѡ́въ ї҆и҃левыхъ, є҆гда̀ и҆зыдо́ша и҆з̾ землѝ є҆гѵ́петскїѧ съ си́лою свое́ю рѹко́ю мѡѷсе́овою и҆ а҆арѡ́нею.

²И҆ написа̀ мѡѷсе́й воздвижє́нїѧ и҆́хъ и҆ ста́ны и҆́хъ, по словесѝ гд҇ню. И҆ сі́и ста́нове ше́ствїѧ и҆́хъ:

³воздвиго́шасѧ ѿ рамессы̀ въ мц҇ъ пе́рвый, въ пѧтыйна́десѧть де́нь пе́рвагѡ мц҇а: наѹ́трїе па́схи и҆зыдо́ша сы́нове ї҆и҃лтестїи рѹко́ю высо́кою пред̾ всѣ́ми є҆гѵ҄птѧны:

⁴и҆ є҆гѵ́птѧне погреба́хѹ ѹ҆ме́ршыѧ ѿ ни́хъ всѧ҄, ѩ҆̀же и҆збѝ гд҇ь всѧ́каго пе́рвенца въ землѝ є҆гѵ́петстѣй: и҆ въ бозѣ́хъ и҆́хъ сотворѝ ѿмще́нїе гд҇ь.

⁵И҆ воздви́гшесѧ сы́нове ї҆и҃лєвы ѿ рамессы̀, ѡ҆полчи́шасѧ въ сокхѡ́ѳѣ:

⁶и҆ воздви́гшесѧ ѿ сокхѡ́ѳа, ѡ҆полчи́шасѧ въ вѹѳа́нѣ, и҆́же є҆́сть ча́сть нѣ́каѧ пѹсты́ни:

⁷и҆ воздвиго́шасѧ ѿ вѹѳа́на, и҆ ѡ҆полчи́шасѧ во ѹ҆́стїи ї҆рѡ́ѳа, и҆́же є҆́сть прѧ́мѡ веельсепфѡ́нѹ, и҆ ѡ҆полчи́шасѧ прѧ́мѡ магдѡ́лѹ:

⁸и҆ воздвиго́шасѧ прѧ́мѡ ї҆рѡ́ѳѹ, и҆ проидо́ша средѝ мо́рѧ въ пѹсты́ню: и҆ и҆до́ша пѹте́мъ трѝ дни҄ въ пѹсты́ни ті́и, и҆ ѡ҆полчи́шасѧ въ [го́рькостехъ].

⁹И҆ воздвиго́шасѧ ѿ [го́рькостей] и҆ прїидо́ша въ є҆лі́мъ: и҆ въ є҆лі́мѣ (бы́ша) двана́десѧть и҆сто́чники во́дъ, и҆ се́дмьдесѧтъ сте́блїй фі́нїкѡвъ, и҆ ѡ҆полчи́шасѧ ѹ҆ воды̀ та́мѡ.

¹⁰И҆ воздвиго́шасѧ ѿ є҆лі́ма и҆ ѡ҆полчи́шасѧ ѹ҆ мо́рѧ чермна́гѡ:

¹¹и҆ воздвиго́шасѧ ѿ мо́рѧ чермна́гѡ и҆ ѡ҆полчи́шасѧ въ пѹсты́ни сі́нъ:

¹²и҆ воздвиго́шасѧ ѿ пѹсты́ни сі́нъ и҆ ѡ҆полчи́шасѧ въ рафа́кѣ:

¹³и҆ воздвиго́шасѧ ѿ рафа́ка и҆ ѡ҆полчи́шасѧ въ є҆лѹ́сѣ:

¹⁴и҆ воздвиго́шасѧ ѿ є҆лѹ́са и҆ ѡ҆полчи́шасѧ въ рафїді́нѣ: и҆ не бы́сть та́мѡ воды̀ лю́демъ пи́ти.

¹⁵И҆ воздвиго́шасѧ ѿ рафїді́на и҆ ѡ҆полчи́шасѧ въ пѹсты́ни сїна̀:

¹⁶и҆ воздвиго́шасѧ ѿ пѹсты́ни сїна̀ и҆ ѡ҆полчи́шасѧ во [гробѣ́хъ похотѣ́нїѧ]:

¹⁷и҆ воздвиго́шасѧ ѿ [гробѡ́въ похотѣ́нїѧ] и҆ ѡ҆полчи́шасѧ во а҆сирѡ́ѳѣ:

¹⁸и҆ воздвиго́шасѧ ѿ а҆сирѡ́ѳа и҆ ѡ҆полчи́шасѧ въ раѳа́мѣ:

¹⁹и҆ воздвиго́шасѧ ѿ раѳа́ма и҆ ѡ҆полчи́шасѧ въ ремнѡ́нъ-фаре́сѣ:

²⁰и҆ воздвиго́шасѧ ѿ ремнѡ́нъ-фаре́са и҆ ѡ҆полчи́шасѧ въ лемвѡ́нѣ:

²¹и҆ воздвиго́шасѧ ѿ лемвѡ́на и҆ ѡ҆полчи́шасѧ въ ресса́нѣ:

²²и҆ воздвиго́шасѧ ѿ ресса́на и҆ ѡ҆полчи́шасѧ въ макелла́ѳѣ:

²³и҆ воздвиго́шасѧ ѿ макелла́ѳа и҆ ѡ҆полчи́шасѧ во а҆рсафа́ѳѣ:

²⁴и҆ воздвиго́шасѧ ѿ а҆рсафа́ѳа горы̀ и҆ ѡ҆полчи́шасѧ въ харада́ѳѣ:

²⁵и҆ воздвиго́шасѧ ѿ харада́ѳа и҆ ѡ҆полчи́шасѧ въ макидѡ́ѳѣ:

²⁶и҆ воздвиго́шасѧ ѿ макидѡ́ѳа и҆ ѡ҆полчи́шасѧ въ катаа́ѳѣ:

²⁷и҆ воздвиго́шасѧ ѿ катаа́ѳа и҆ ѡ҆полчи́шасѧ во ѳара́ѳѣ:

²⁸и҆ воздвиго́шасѧ ѿ ѳара́ѳа и҆ ѡ҆полчи́шасѧ въ маѳе́ккѣ:

²⁹и҆ воздвиго́шасѧ ѿ маѳе́кка и҆ ѡ҆полчи́шасѧ во а҆селмѡ́нѣ:

³⁰и҆ воздвиго́шасѧ ѿ а҆селмѡ́на и҆ ѡ҆полчи́шасѧ въ масѹрѹ́ѳѣ:

³¹и҆ воздвиго́шасѧ ѿ масѹрѹ́ѳа и҆ ѡ҆полчи́шасѧ въ ванакка́нѣ:

³²и҆ воздвиго́шасѧ ѿ ванакка́на и҆ ѡ҆полчи́шасѧ въ горѣ̀ гадда́дъ:

³³и҆ воздвиго́шасѧ ѿ горы̀ гадда́дъ и҆ ѡ҆полчи́шасѧ во є҆тева́ѳѣ:

³⁴и҆ воздвиго́шасѧ ѿ є҆тева́ѳа и҆ ѡ҆полчи́шасѧ во є҆врѡ́нѣ:

³⁵и҆ воздвиго́шасѧ ѿ є҆врѡ́на и҆ ѡ҆полчи́шасѧ въ гесїѡ́нъ-га́верѣ:

³⁶и҆ воздвиго́шасѧ ѿ гесїѡ́нъ-га́вера и҆ ѡ҆полчи́шасѧ въ пѹсты́ни сі́нъ: и҆ воздвиго́шасѧ ѿ пѹсты́ни сі́нъ и҆ ѡ҆полчи́шасѧ въ пѹсты́ни фара́ни, ѩ҆́же є҆́сть ка́дисъ:

³⁷и҆ воздвиго́шасѧ ѿ ка́диса и҆ ѡ҆полчи́шасѧ въ горѣ̀ ѡ҆́ръ бли́з̾ землѝ є҆дѡ́мли.

³⁸И҆ взы́де а҆арѡ́нъ жре́цъ на го́рѹ ѡ҆́ръ повелѣ́нїемъ гд҇нимъ, и҆ ѹ҆́мре та́мѡ въ четыредесѧ́тое лѣ́то и҆зше́ствїѧ сынѡ́въ ї҆и҃левыхъ и҆з̾ землѝ є҆гѵ́петскїѧ, мц҇а пѧ́тагѡ въ пе́рвый де́нь мц҇а.

³⁹И҆ а҆арѡ́нъ бѧ́ше ста̀ два́десѧти тре́хъ лѣ́тъ, є҆гда̀ ѹ҆́мре въ горѣ̀ ѡ҆́ръ.

⁴⁰И҆ ѹ҆слы́ша ханане́й ца́рь а҆ра́дскїй, и҆ се́й живѧ́ше въ землѝ ханаа́ни, є҆гда̀ вхожда́хѹ сы́нове ї҆и҃лєвы.

⁴¹И҆ воздвиго́шасѧ ѿ горы̀ ѡ҆́ръ и҆ ѡ҆полчи́шасѧ въ селмѡ́нѣ:

⁴²и҆ воздвиго́шасѧ ѿ селмѡ́на и҆ ѡ҆полчи́шасѧ въ фїнѡ́нѣ:

⁴³и҆ воздвиго́шасѧ ѿ фїнѡ́на и҆ ѡ҆полчи́шасѧ во ѡ҆вѡ́ѳѣ:

⁴⁴и҆ воздвиго́шасѧ ѿ ѡ҆вѡ́ѳа и҆ ѡ҆полчи́шасѧ въ гаї̀, ѡ҆б̾ ѻ҆нѹ̀ странѹ̀ предѣ҄лъ мѡа́влихъ:

⁴⁵и҆ воздвиго́шасѧ ѿ гаї̀ и҆ ѡ҆полчи́шасѧ въ девѡ́нъ-га́дѣ:

⁴⁶и҆ воздвиго́шасѧ ѿ девѡ́нъ-га́да и҆ ѡ҆полчи́шасѧ въ гелмѡ́нъ-девлаѳаі́мѣ:

⁴⁷и҆ воздвиго́шасѧ ѿ гелмѡ́нъ-девлаѳаі́ма и҆ ѡ҆полчи́шасѧ въ гора́хъ а҆варі́млихъ прѧ́мѡ нава́ѵѹ:

⁴⁸и҆ воздвиго́шасѧ ѿ го́ръ а҆варі́млихъ и҆ ѡ҆полчи́шасѧ на за́падѣ мѡа́вли, ѹ҆ ї҆ѻрда́на при ї҆ерїхѡ́нѣ:

⁴⁹и҆ воздвиго́шасѧ ѿ за́пада мѡа́влѧ и҆ ѡ҆полчи́шасѧ ѹ҆ ї҆ѻрда́на, междѹ̀ є҆сїмѡ́ѳомъ, до велсатті́ма на за́пады мѡа́ва.

⁵⁰И҆ речѐ гд҇ь къ мѡѷсе́ю въ за́падѣ мѡа́ва ѹ҆ ї҆ѻрда́на при ї҆ерїхѡ́нѣ, гл҃ѧ:

⁵¹глаго́ли сынѡ́мъ ї҆и҃лєвымъ и҆ рече́ши къ ни҄мъ: вы̀ прехо́дите ї҆ѻрда́нъ въ зе́млю ханаа́ню,

⁵²и҆ погѹби́те всѧ҄ живѹ́щыѧ на землѝ ѿ лица̀ ва́шегѡ, и҆ разрѹши́те стражбы҄ и҆́хъ, и҆ всѧ҄ їдѡлы и҆злїѧ҄нныѧ и҆́хъ сокрѹши́те ѧ҆̀, и҆ всѧ҄ ка҄пища и҆́хъ разрѹши́те,

⁵³и҆ погѹби́те всѧ҄ живѹ́щыѧ на землѝ, и҆ всели́тесѧ въ ню̀: ва́мъ бо да́хъ зе́млю и҆́хъ по жре́бїю:

⁵⁴и҆ наслѣ́дите зе́млю и҆́хъ жре́бїемъ по племена́мъ ва́шымъ: мнѡ́гимъ ѹ҆мно́жите ѡ҆держа́нїе и҆́хъ, и҆ ма҄лымъ ѹ҆ма́лите ѡ҆держа́нїе и҆́хъ: въ не́же и҆зы́детъ и҆́мѧ є҆гѡ̀, та́мѡ да бѹ́детъ жре́бїй є҆гѡ̀: по племена́мъ ѻ҆те́чествїй ва́шихъ наслѣ́дите:

⁵⁵а҆́ще же не погѹбитѐ живѹ́щихъ на землѝ ѿ лица̀ ва́шегѡ, бѹ́дѹтъ, и҆̀хже ѡ҆ста́вите ѿ ни́хъ, ѻ҆стны̀ во ѻ҆чесѣ́хъ ва́шихъ и҆ стрѣ́лы въ ре́брахъ ва́шихъ, и҆ совраждѹ́ютъ ва́мъ на землѝ, на не́йже вы̀ вселите́сѧ:

⁵⁶и҆ бѹ́детъ ѩ҆́коже ѹ҆мы́слихъ сотвори́ти ѡ҆́нѣмъ, то̀ сотворю̀ ва́мъ.