Read Библия Церковнославянская Чи́сла 34 Bible Online

Чи́сла 34 - Библия Церковнославянская bible

Чи́сла 34

¹И҆ речѐ гд҇ь къ мѡѷсе́ю, гл҃ѧ:

²заповѣ́ждь сынѡ́мъ ї҆и҃лєвымъ, и҆ рече́ши къ ни҄мъ: вы̀ вхо́дите въ зе́млю ханаа́ню, сїѧ̀ бѹ́детъ ва́мъ въ наслѣ́дїе, землѧ̀ ханаа́нѧ съ предѣ҄лы є҆ѧ̀:

³и҆ бѹ́детъ ва́мъ страна̀, ѩ҆́же къ лі́вѣ ѿ пѹсты́ни сі́нъ да́же до є҆дѡ́ма: и҆ бѹ́дѹтъ ва́мъ предѣ́лѣ къ лі́вѣ, ѿ кра́ѧ мо́рѧ сла́нагѡ ѿ восто́кѡвъ,

⁴и҆ ѡ҆б̾и́дѹтъ ва́съ предѣ́лы ѿ лі́вы до возше́ствїѧ а҆краві́нѧ, и҆ про́йдѹтъ є҆нна́къ, и҆ бѹ́детъ и҆схо́дъ є҆гѡ̀ къ лі́вѣ ка́дисъ-варнѝ, и҆ и҆зы́детъ на село̀ а҆ра́дъ, и҆ про́йдетъ а҆селмѡ́на:

⁵и҆ ѡ҆б̾и́дѹтъ предѣ́лы ѿ а҆селмѡ́на водоте́чѹ є҆гѵ́петскѹю, и҆ бѹ́детъ и҆схо́дъ мо́ре (вели́кое):

⁶и҆ предѣ́лы морсті́и бѹ́дѹтъ ва́мъ, мо́ре вели́кое ѡ҆предѣли́тъ, сїѐ бѹ́детъ ва́мъ предѣ́лы морсті́и:

⁷и҆ сїѐ бѹ́детъ ва́мъ предѣ́лъ къ сѣ́верѹ: ѿ мо́рѧ вели́кагѡ и҆змѣ́рите са́ми себѣ̀ при горѣ̀ [го́рѹ]:

⁸и҆ ѿ горы̀ [го́рѹ] и҆змѣ́рите са́ми себѣ̀, входѧ́ще во є҆ма́ѳъ, и҆ бѹ́дѹтъ прехо́дъ є҆гѡ̀ предѣ́лы садада̀:

⁹и҆ и҆зы́дѹтъ предѣ́лы зефрѡ́на, и҆ бѹ́детъ и҆схо́дъ є҆гѡ̀ а҆рсенаі́нъ: сїѐ бѹ́детъ ва́мъ предѣ́лы ѿ сѣ́вера:

¹⁰и҆ и҆змѣ́рите са́ми себѣ̀ предѣ́лы востѡ́чныѧ ѿ а҆рсенаі́на до сепфама́ра:

¹¹и҆ сни́дѹтъ предѣ́лы ѿ сепфама́ръ-вила̀ ѿ востѡ́къ на и҆сто́чники, и҆ сни́дѹтъ предѣ́лы вилы̀, и҆ про́йдѹтъ на хребе́тъ мо́рѧ хенере́ѳъ, ѿ востѡ́къ:

¹²и҆ сни́дѹтъ предѣ́лы на ї҆ѻрда́нъ, и҆ бѹ́детъ прехо́дъ є҆гѡ̀ мо́ре сла́ное: сїѧ̀ бѹ́детъ землѧ̀ ва́мъ, и҆ предѣ́лы є҆ѧ̀ ѡ҆́крестъ.

¹³И҆ заповѣ́да мѡѷсе́й сынѡ́мъ ї҆и҃лєвымъ, глаго́лѧ: сїѧ̀ землѧ̀, ю҆́же прїи́мете въ наслѣ́дїе по жре́бїю, ѩ҆́коже повелѣ̀ гд҇ь, да́ти ю҆̀ девѧтѝ племенѡ́мъ и҆ полѹпле́мени манассі́инѹ:

¹⁴ѩ҆́кѡ взѧ̀ пле́мѧ сынѡ́въ рѹви́млихъ и҆ пле́мѧ сынѡ́въ га́довыхъ, по домѡ́мъ ѻ҆те́чествъ и҆́хъ, и҆ по́лъ пле́мене манассі́ина воспрїѧ́ша жрє́бїѧ своѧ҄:

¹⁵два̀ племена̀ и҆ по́лъ пле́мене прїѧ́ша жрє́бїѧ своѧ҄ за ї҆ѻрда́номъ при ї҆ерїхѡ́нѣ ѿ полѹ́днѧ на восто́ки.

¹⁶И҆ речѐ гд҇ь къ мѡѷсе́ю, гл҃ѧ:

¹⁷сїѧ҄ и҆мена̀ мѹже́й, и҆̀же раздѣлѧ́тъ ва́мъ зе́млю: є҆леаза́ръ жре́цъ и҆ ї҆исѹ́съ наѵи́нъ:

¹⁸и҆ по кнѧ́зю є҆ди́номѹ ѿ пле́мене во́змете раздѣли́ти ва́мъ зе́млю.

¹⁹И҆ сїѧ҄ и҆мена̀ мѹжє́мъ: пле́мене ї҆ѹ́дина хале́въ сы́нъ ї҆ефонні́инъ,

²⁰пле́мене сѷмеѡ́нѧ саламїи́лъ сы́нъ семїѹ́довъ,

²¹пле́мене венїамі́нѧ є҆лда́дъ сы́нъ хаслѡ́нь,

²²пле́мене да́нова кнѧ́зь воккѡ́ръ сы́нъ ї҆еклі́нинъ,

²³сынѡ́въ ї҆ѡ́сифовыхъ пле́мене сынѡ́въ манассі́иныхъ кнѧ́зь а҆нїи́лъ сы́нъ сѹфі́довъ,

²⁴пле́мене сынѡ́въ є҆фре́млихъ кнѧ́зь камѹи́лъ сы́нъ сафта́новъ,

²⁵пле́мене завѹлѡ́нѧ кнѧ́зь є҆лїсафа́нъ сы́нъ харна́ховъ,

²⁶пле́мене сынѡ́въ ї҆ссаха́ровыхъ кнѧ́зь фалтїи́лъ сы́нъ ѻ҆за́инъ,

²⁷пле́мене сынѡ́въ а҆си́ровыхъ кнѧ́зь а҆хїѡ́ръ сы́нъ селемі́инъ,

²⁸пле́мене нефѳалі́млѧ кнѧ́зь фадаи́лъ сы́нъ а҆мїѹ́довъ.

²⁹Си҄мъ заповѣ́да гд҇ь раздѣли́ти сынѡ́мъ ї҆и҃лєвымъ въ землѝ ханаа́ни.