Read Библия Церковнославянская Чи́сла 36 Bible Online

Чи́сла 36 - Библия Церковнославянская bible

Чи́сла 36

¹И҆ прїидо́ша кнѧ҄зи пле́мене сынѡ́въ галаа́довыхъ, сы́на махі́рова сы́на манассі́ина ѿ пле́мене сынѡ́въ ї҆ѡ́сифовыхъ, и҆ глаго́лаша пред̾ мѡѷсе́омъ и҆ пред̾ є҆леаза́ромъ жерце́мъ и҆ пред̾ кнѧ҄зи домѡ́въ ѻ҆те́чествъ сынѡ́въ ї҆и҃левыхъ,

²и҆ реко́ша: господи́нѹ на́шемѹ повелѣ̀ гд҇ь ѿда́ти зе́млю наслѣ́дїѧ по жре́бїю сынѡ́мъ ї҆и҃лєвымъ: и҆ господи́нѹ на́шемѹ заповѣ́да гд҇ь да́ти наслѣ́дїе салпаа́да бра́та на́шегѡ дще́ремъ є҆гѡ̀:

³и҆ бѹ́дѹтъ є҆ди́номѹ ѿ племе́нъ сынѡ́въ ї҆и҃левыхъ въ жєны̀, и҆ ѿлѹчи́тсѧ жре́бїй и҆́хъ ѿ ѡ҆держа́нїѧ ѻ҆тє́цъ на́шихъ, и҆ приложи́тсѧ къ наслѣ́дїю пле́мене, и҆̀мже бѹ́дѹтъ въ жєны̀, и҆ ѿ жре́бїѧ наслѣ́дїѧ на́шегѡ ѿлѹчи́тсѧ:

⁴а҆́ще же бѹ́детъ ѡ҆ставле́нїе сынѡ́въ ї҆и҃левыхъ, и҆ приложи́тсѧ наслѣ́дїе и҆́хъ къ наслѣ́дїю пле́мене, и҆̀мже а҆́ще бѹ́дѹтъ въ жєны̀, и҆ ѿ наслѣ́дїѧ пле́мене ѻ҆те́чества на́шегѡ ѿи́метсѧ наслѣ́дїе и҆́хъ.

⁵И҆ заповѣ́да мѡѷсе́й сынѡ́мъ ї҆и҃лєвымъ по повелѣ́нїю гд҇ню, глаго́лѧ: си́це пле́мѧ сынѡ́въ ї҆ѡ́сифовыхъ глаго́лютъ:

⁶сїѐ сло́во, є҆́же заповѣ́да гд҇ь дще́ремъ салпаа́дѡвымъ, гл҃ѧ: и҆дѣ́же ѹ҆го́дно и҆̀мъ, да бѹ́дѹтъ въ жєны̀, то́кмѡ ѿ со́нма ѻ҆те́чества своегѡ̀ да бѹ́дѹтъ въ жєны̀,

⁷и҆ не преврати́тсѧ наслѣ́дїе сынѡ́въ ї҆и҃левыхъ ѿ пле́мене въ пле́мѧ и҆́но: ѩ҆́кѡ кі́йждо въ наслѣ́дїи пле́мене ѻ҆те́чества своегѡ̀ жени́тисѧ и҆́мѹтъ сы́нове ї҆и҃лєвы:

⁸и҆ всѧ́ка дщѝ, ѹ҆́жичествѹющаѧ наслѣ́дїе ѿ племе́нъ сынѡ́въ ї҆и҃левыхъ, є҆ди́номѹ сѹ́щихъ ѿ со́нма ѻ҆тца̀ є҆ѧ̀ да бѹ́детъ жена̀: да ѹ҆́жичествѹютъ сы́нове ї҆и҃лєвы кі́йждо наслѣ́дїе ѻ҆тца̀ своегѡ̀:

⁹и҆ не преврати́тсѧ жре́бїй ѿ пле́мене въ пле́мѧ и҆́но, но кі́йждо въ наслѣ́дїи свое́мъ да же́нѧтсѧ сы́нове ї҆и҃лєвы.

¹⁰ѩ҆́коже повелѣ̀ гд҇ь мѡѷсе́ю, та́кѡ сотвори́ша дщє́ри салпаа́дѡвы.

¹¹И҆ бы́ша маала̀ и҆ ѳерса̀, и҆ є҆гла̀ и҆ мелха̀ и҆ нѹа̀, дщє́ри салпаа́дѡвы, сынѡ́мъ бра́тїи своеѧ̀, ѿ со́нма манассі́ина сынѡ́въ ї҆ѡ́сифовыхъ, бы́ша въ жєны̀:

¹²и҆ бы́сть наслѣ́дїе и҆́хъ въ пле́мени со́нма ѻ҆тца̀ и҆́хъ.

¹³Сїѧ҄ за́пѡвѣди и҆ ѡ҆правда҄нїѧ и҆ сѹды̀, ѩ҆̀же заповѣ́да гд҇ь рѹко́ю мѡѷсе́овою на за́падѣ мѡа́вли при ї҆ѻрда́нѣ прѧ́мѡ ї҆ерїхѡ́нѹ. <P><BR>Коне́цъ кни́зѣ четве́ртѣй мѡѷсе́овѣ: и҆́мать въ себѣ̀ гла́въ 36.